INCEKU KAJEHOVA

Inkonzo yeSabatha ekuseni mhlaka 01 October 2022: NguMfundisikazi Nomcebo Nxumalo Mpanza.

 

uLuka 22:45-46

 

1. Mangingozeli Nkosi yami

Phakathi komsebenzi wakho,

Ngivuse ebuthongweni

Ngingangeni ekulingweni.

 

2 Washonjalo uJesu

Kubafundi bakhe,

Beninge linde kanye nami

Isikhathi esisodwa na.

 

3 Isikhathi sami sifikile

Sengiyanishiya lusapho,

Salani kanjalo

Sengiya kuBaba.

 

4 Uma ningalindi

Nihlala ngokwezela

Nizongena nonke ekulingweni

Lindani niqinise

 

1.Ngibabingelele abangcwele, ngicela ukumukela inkonzo ngesihlabelelo samashumi ayisithupha nanye. Siyabonga bantwana baseKuphakameni ukuthi uJehova asimemele kulendawo esithi uma sikuyo bese sikhumbula yena, sikhumbule izifungo esazenza thina nazo ezenziwa nguye uJehova ukuthi uma senze kahle uya kusifaka emzini oyingcwele, wakusho ngezinceku zakhe abezithumile. Isihloko sithi INCEKU KAJEHOVA. Nasevikini eliphelile bengiguqile la, bengikhuluma ngeNkosi iNyangayezulu, ngizoqala ngiqedele indaba yami ekhuluma ngeNkosi iNyangayezulu njengoba kukade kuyinyanga lena lapho abekhunjulwa khona yilabo abamaziyo, manje-ke ngibese ngedlulela phambili.

 

2.Bantwana baseKuphakameni ngigcine lapho ngithi uBaba wayiqeda indlala komunye umuzi kwakuyi kwaMahlaba kulomuzi. Inkosikazi yakhona kunguMaMshengu, ngithanda ukuqedela lapho engisho khona ukuthi emva kokuba eselibonile ikati leli ayethe umuntu, uma ezobika usizi lwakhe kuBaba iNyangayezulu owayewumgcotshwa kaNkulunkulu, okwasekusele yena yedwa kubantu ababe gcotshwe uJehova.

 

3.Wafika wathi engakayikhulumi indaba yakhe, yabe iNkosi iNyangayezulu yambiza yambuza ukuthi, “Yini ukhalelani kangaka?” ngoba phela wayehlale eba nesililo ngoba nomendo wawusumphelela ngoba uMahlaba wayethi untshontsha ukudla akuyise kubo, nemali uyisa kubo. Wafikake wabikake, ngizakudlula kulokhu, uBaba wayethanda ukuthi noma uzobika into ekhalisayo kodwa akwenze ukuthi ugcine uhleka, wayengafuni ukuthi usukume kuye usenaleziya zinyembezi.

 

4.Wathi uma eyibika indaba yakhe ukuthi kuyaphela ukudla, noma ngabe ethenge isaka lempuphu uma eke wayikha nje kanye kuyaphela ngisho ukudla angakupheka kube ngakanani, kuyaphela kodwa akanabo ngisho abantwana abaningi (wayenomntwana oyedwa, kuyizingane ezimbili ekungezakubo, abaningi base beshonile abantwana bakhe). Walubika-ke usizi lakhe ukuthi manje-ke Baba uthi-ke umyeni wami imali ngiyayintshontsha nokudla ngikuthumela kithi, ngikuthatha ngikuthuthe ngikuyise kithi kwazise kwakuseduzane kwaShabalala, kwaMahlaba kwakukude kwasekungesinye isigodi.

 

5.Ngithi-ke bantwana baseKuphakameni, iNyangayezulu yabuza ukuthi, “Uye umbone yini lomuntu ofike ababuke abantwana bakho uma ngabe sebedla baze baqede abese uyahamba?” wase ethi lonkosikazi, “Akekho umuntu ofikayo.” Yayisithi-ke iNyangayezulu akake aphume aye kohlala lapha phandle, kwakuvele kukuphandle kodwa aphume-nje eThempelini ahlale ngale ngaphandle acabange kahle ukuthi kuyaye kwenzakaleni uma izingane zidla.

 

6.Wacabanga wabuya wabuya esezotshela uBaba wathi, “Hhayi Baba sengikhumbulile, yikati elivame ukuthi libe khona, nengike ngilibone uma ngabe abantwana bami bedla, ngike ngibone ikati.” Yayisithi-ke iNyangayezulu, “Akusilona ikati umuntu,” wathi-ke uMaMshengu, “Baba ikati ngihlala ngilibona,” wathi uBaba, “akusilo,” wayesethi uBaba, “Hamba-ke uyofuna amanzi uze nawo ngizokubusisela wona, ubuye ungitshele ukuthi yikati yini leli.” Nangempela-ke wahamba-ke lonkosikazi wayowafuna amanzi, uBaba wayesewabusisa wamtshela ukuthi afike achele phakathi endlini ageze ngawo nabantwana bakhe abageze ngawo.

Wayesethike uBaba iNyangayezulu, “Ubothi-ke leli kati othi yikati uma selifikile ubese uyalinda badle abantwana bakho baqede, uma selisukuma lihamba uhambe nalo lapho liyongena khona ungene nakuleyondlu eliyongena kuyo ungene nalo noma ngabe kusemzini wenkosi ufike ungene lapho eliyongena khona.”

 

7.angempela-ke wenza njalo lonkosikazi, wabaphakela abantwana bakhe esebagezile ngamanzi abusisiwe naye egezile ngawo lamanzi, lase liyafika ikati ngalesi khathi lifika ngaso lalisazi isikhathi ekuphakelwa ngaso abantwana. Lafika nalo lalinda laqeda wahamba nalo lomakoti, walilandela walilandela laze layongena kulomuzi elangena kuwo, lithe-ke uma sengena endlini wangena naye khona lapho. Uma engena ufica isalukwazi, uthi-ke yena uma esho wake wathi ukuquleka wabuye waphaphama, equlekiswa ukuthi akaliboni ikati usebona logogo.

 

8.Uthi-ke wayesethi logogo, “Kwenzenjani?” ebuza kulomama, uthi-ke umakoti lona, “Angabe ngisamtshela ngoba vele wayengazi ukuthi ngangihlale ngikhala njalo ngesimo esasingehlele emzini wami.” Uthi, “Ngase ngiyamtshela ukuthi bengilandlela ikati, ikati lingene lapha ekhaya ngilandela lona sifike nalo, ngingene kanye nalo kulendlu, ngingena-nje ngingangqongqozile ngoba ngingena nekati.” Uthi-ke logogo, “Alikho ikati, yimi engiqeda kungena manje,” waphinde wathi ukuquleka kancane esekhumbula amazwi okuthi ishilo iNyangayezulu ukuthi akusilo ikati umuntu, waqeda lapho wabuyela kwakhe.

 

9.Engifuna-ke ukukuqedela bangcwele ukuthi uma sekutholakele leli kati, uthi-ke lomakoti kwakunezijumbane zezimpuphu zayo yonke into eyayimphelela ayithola lapha kulomuzi, nezi jumbane zemali uthi-ke kwakungathi kukhona abantu abanikela kulomuzi nangemali kulendlu angena kuyo. Wayesemtshela umyeni wakhe uMahlaba, wamtshela ngoba kwakumnyama yonke into laphayana nabantwana befa, naye esebenza umsebenzi kungaqondakali. Umyeni wakhe wamtshela ukuthi ubalekile waya le namakhosikazi lawa asonta eKuphakameni eyobika ngalolu sizi abanalo.

 

10.Uthi-ke, iNkosi iNyangayezulu ayizange igcine kulokhu yena ayekubikile, kodwa yabe isiyamtshela ukuthi-ke nalabantwana bakho abafayo, athi lona okhona angeke manje Asafa, uzophila yena, engazange asho yena ukuthi ngiphelelwa ngabantwana. Emva kokuba esemtshelile umyeni wakhe akuzange kusaphela ukudla kodwa isalukazi sagcina sesihlala endlini, kwaphenduka ubusuku baba semini. Uthi sasihlala sizivalele uthi baze bagcina besilandile abakhona, sihlala sivala sithi sekumnyama kusebusuku, bese kuthi emini kube sebusuku, sesithithibala, kwalamba sona sangabe saba nako ukudla.

 

11.Wase-ke uMahlaba naye uyangena kuleli bandla uyazinikela kuleli bandla, kwaphela ukuhlupheka kwaMahlaba, kwanqamuka nokufa nendlala yanqamuka, noMahlaba wagcina esewumuntu onamatekisi, amatekisi akhe ayekade ehamba laphana esuka eGemiston eya eSpruit elokishini, konke lokho kwaqhamuka kuShembe owayengumgcotshwa kaNkulunkulu, uMphethi wembhenge owabona ukuthi akusilo ikati, kwanqamuka konke kwakheka umshado kwabuyela kwaba kuhle sanqamuka lesililo sokufelwa ngabantwana, kwadliwa kwaMahlaba kwasuthwa ngoba manje wayesefike phambi komgcotshwa kaNkulunkulu, owayephathiswe yonke into eyisikhali sokulwa nokuhlupheka. Wase-ke uyasinda.

 

12.Nngithi-ke bengithi angiqede khona lapho bangcwele okwasala evikini eliphelile ebengikusho ukuthi uMphethi wembenge wenzani. Ngicelake bantwana baseKuphakameni ukukhulekela eNkosini enkulu yaseKuphakameni, ngikhulekela lapha ngamazwi, ngisaqhubeka khona lapho engike ngathinta thinta khona evikini eliphelile, ngangithinte indaba yokugcotshwa. Ngicela-ke lapha ukufundelwa kuMahubo 89, ngiyacela ukuthi siyifunde lencwadi kuMahubo 89 bese ngicela sigcine laphayana ku 29 kuMahubo 89 siqala evesini lika 20 size sifike laphana ku 29:

 

13.“NGIFUMENE INCEKU YAMI, UDAVIDE; NGIMGCOBILE NGAMAFUTHA AMI ANGCWELE, ISANDLA SAMI SIYAKUBA NAYE SIQINILE; INGALO YAMI IYAKUMQINISA. ISITHA ASIYIKUMAHLULA NENDODANA YOBUBI AYIKUMHLUPHA. NGIYAKUCHOBOZA IZITHA ZAKHE EBUSWENI BAKHE NGIHLUPHE ABAMZONDAYO. UKUTHEMBEKA KWAMI NOMUSA WAMI KUYAKUBA NAYE EGAMENI LAMI LUYAKUPHAKAMA UPHONDO LWAKHE. NGUYAKUBEKA ISANDLA SAKHE PHEZU KOLWANDLE ESOKUNENE SAKHE PHEZU KWEMIFULA.

 

14.UYAKUNGIBIZA NGOKUTHI, ‘UNGUBABA UNGUNKULUNKULU WAMI NEDWALA LENSINDISO YAMI.’ NGIYAKUMENZA ABE YIZIBULO NOPHAKAMILE KUNAMAKHOSI OMHLABA. NESIVUMELWANO SAMI SOBA SIQINILE KUYE. NGIYAKWENZA INZALO YAKHE IME KUZE KUBE PHAKADE NESIHLALO SAKHE SOBUKHOSI SIBE NJENGEZINSUKU ZEZULU.”

 

15.Ngithi-ke bantwana baseKuphakameni lencwadi ngiyifunda ngoba ngibona iNkosi iNyangayezulu yayiwumgcotshwa kaNkulunkulu, siyezwa lapha ukuthi uNkulunkulu uthi loyo amgcobileyo uyobahlupha abamzondayo. Ukhuluma-ke bantwana baseKuphakameni ukuthi uyakumenza, uthi kodwa yena, “Uyakungibiza ngokuthi nginguBaba, ngiyomenza abe yizibulo nophakamileyo kunamakhosi omhlaba.”

,

16.Uthi-ke, “Isivumelwano sami soba siqinile kuye, ngiyakuwenza inzalo yakhe ime kuze kube phakade, isihlalo sakhe sobukhosi sibe njengezinsuku zezulu.” Bantwana baseKuphakameni, sibonile bangcwele abantu ababeme phambi kweNkosi iNyangayezulu, ababekhuluma yonke into ababemshaya ngayo yonke into embi izangila zezinhlamba, kodwa amazwi kaJehova awakhulumayo ukuthi ngiyakubahlupha abakuzondayo.

 

17.Sibonile uJehova ebahlupha ngezindlela ezihlukene, angazi noma bona bayabona yini ukuthi sebehlushwa uJehova, ngoba ushilo ukuthi loyo amfumene oyinceku yakhe, lento ayigcinanga-nje ngokuthi kushiwo uDavide yedwa kodwa umuntu othunywe uNkulunkulu kuyingozi ukulwa naye, ngoba wena usuke uza ngamandla akho kodwa yena ulwelwa uNkulunkulu, uNkulunkulu onamandla angeke aphikiswe umuntu.

 

18.Uthi-ke akayukufana namakhosi omhlaba, nakuba ayakumbiza yena uJehova ukuthi unguBaba, kodwa akayukuba njengamakhosi omhlaba yikoke lokho okwenza ukuthi iNkosi iNyangayezulu ikwazi ukubona ukuthi kwakungalona ikati ngaphandle kokuzamula, ngaphandle kokuthini kodwa yakwazi ukuthi ibone ukuthi kwakuwumuntu lowana ngoba uma ubekwa awubekwa-nje kuphela, uNkulunkulu akamubeki umuntu wakhe amubeke nje kuphela athi uzohlala esihlalweni athi uzoba mkhulu phambi kwabantu.

 

19.Kodwa ubeka zonke izinhlobo zezikhali zezwi lakhe zokumvikela, uNkulunkulu ukubeka konke abeke ngisho izingilozi ezizakumubheka ngoba usuke ethunywe nguye njengoba esho ukuthi ngiyakubahlupha abamzondayo. Bonke abantu abazonda uBaba iNyangayezulu balengelwa inhlupheko. Nabangakahlupheki kodwa iseza ngoba kusho uJehova uthi uyakubahlupha abantu abamzondayo.

 

20.UBaba iNyangayezulu wabe engumgcotshwa kaNkulunkulu, ngiyaphindela kuleli gama lokuthi kwasekusele yena yedwa owayegcotshwe uJehova nowayengumphethi wembenge okwakufanele ukuthi simbone eyisibusiso kithi sonke singamaNazaretha, okwakufanele ukuthi sisondele sonke kuye sizocela isibusiso ngoba wayenogcobo lwasezulwini, wayengazange akuhlwithe ukuba ngumgcotshwa kodwa wagcotshwa engumntwana uNkulunkulu wabeka indaba yakhe kuye.

 

21.Namuhla abantu ababemzonda bamthuka, ngibona uJehova esebahlupha njengoba asho ukuthi uyobahlupha abazonda inceku yakhe. Ngithi-ke bangcwele abantu ngesinye isikhathi, siyaye sizwe bangcwele siyibandla likaNkulunkulu, kukhona igama eliye ligijinyiswe abantu phambili ukuthi noma kukhulumeka ngendaba kaNkulunkulu ekufanele sonke sethuke, okufanele sonke sithathe lawo mazwi ukuthi uNkulunkulu ufunani kumuntu ongumntwana wakhe kodwa abantu abangamaNazaretha bavele bathi, “Vusomunye endlini yami.” Ngithi-ke bangcwele-ke akesizwe ukuthi uJehova utheni ngovusa omunye endlini yami, sizwe ukuthi uNkulunkulu uthena uyawugcina ngisho inzalo yakhe uyawugcina ubukhosi kodwa sizwe ukuthi abangenzanga kahle, ngoba akube kusakhulunywa ngokwenza kahle ukuthi kukhona ukwenza… “kuvese kuthiwe vusa omunye endlini yami” bese kuntantiswa isibongo phambi kwabantu!

 

22.Akukho ukuthi loyo muntu uyawufanele ukuthi akhethwe uNkulunkulu, enze kahle asabe uNkulunkulu, kodwa-ke ake sizwe ukuthi uNkulunkulu ubagcineleni abephuli bemthetho bezalwa ngabantu abazinceku zikaJehova, sifunde laphayana ku-30 siyawugcina lapha ku-34: Amahubo 89:30-34, “UMA ABANTWANA BAKHE BESHIYA UMTHETHO WAMI BENGAHAMBI NGEZAHLULELO ZAMI, UMA BEPHULA IZIMISO ZAMI BENGAGCINI IMIYALO YAMI, NGIYAKUHAMBELA IZONO ZABO NGENDUKU NAMACALA ABO NGEMIVIMBO, KEPHA UMUSA WAMI ANGIWUKUSUSA KUYE NGINGAPHIKISI UKUTHEMBEKA KWAMI. ANGIYIKWAPHULA ISIVUMELWANO SAMI NOKUPHUMILEYO EZINDEBENI ZAMI, ANGIYUKUGUQULA.” Uthi-ke uNkulunkulu, noma ngabe inzalo yaloyo amkhethile yena abemlungiselele izihlalo zobukhosi ukuthi kuyakuthi uma kudlula labo abakhethiweyo bese inzalo nayo iyangena ngoba uNkulunkulu uthena ubukhosi buyakugcinwa kuze kube phakade.

 

23.Uthi-ke uNkulunkulu uma ngabe abantwana bengagcinanga imiyalo, uthi-ke uyakuhambela izono zabo ngenduku nangamacala. Siyezwa lapha uJehova ukuthi uyayiphikisa inzalo yoMprofethi ukuthi ingangena ngaye nokuthi iyoni, uphikisa amaNazaretha. AmaNazaretha kunjenje kungenxa yawo, yiwona akhohlisa izingane zakwaShembe, amaNazaretha athi noma bangenzani izulu ngelabo, ababalelwa isono, kodwa uNkulunkulu uthi esesho konke okuhle ngoDavide, kodwa uthi uma ngabe leyonzalo ingenzanga kahle, uyakuhambela izono zabo ngenduku.

 

24.Bona uma ngabe uNkulunkulu ahambela izono zabo ngenduku enzalweni kaDavide, bona bebekade beyini ukuthi uJehova ngeke abahambele bona ngenduku nangamacala njengoba emzini kaNkulunkulu namhlanjena wathi uMprofethi akungeni utshwala, akungeni muthi khona wathi azidingeki izangoma, uma ngabe sezifikile wathi abangcwele amaNazaretha akhonza uJehova asukume athathe amagugu kaJehova aphume nawo, kodwa kuze kube namhlanjena azange kube khona noyedwa enzalweni yoMprofethi ophuma namagugu kaJehova ngoba awekho amagugu kaJehova kubo. Amagugu kaJehova kwathiwa yibo ngalokho-ke ngeke baphume, bazokwenza lokho abakufunayo.

 

25.Endlini kaNkulunkulu kungena abantu abaphuze utshwala, abantu abaphuza utshwala bethi babuphuzela oyisemkhulu, konke lokho inceku kaJehova yathi akudingeki ebandleni likaNkulunkulu. Abakaze baphume, abakaze-nje balikhiphe igama elithi azidingeki izangoma ebandleni lika Nkulunkulu. Abakaze beme phezu kwamabandla abo bathi utshwala abufuneki, ngeke baze bakusho lokho ngoba bayazi ukuthi bayobe nabo sebezithuka, bezikhipha kulelothempeli ngoba abakwazi ukukuhlaba utshwala ngoba nabo bayakwazi ukuphambukela kukho! Ngalokho-ke bangcwele ngithi-ke laba abadlala ngezingane zeNkosi, abathi izulu ngelazo, kodwa uShembe wasezulwini owafika kulomhlaba akashongo njalo, wathi kulowo muzi akungeni okungcolisayo, wathi akungeni nasono nasinye kodwa kuqhamuka abantu abahlulwa yimithetho emizini yabo babaleka beza la eKuphakameni bazokhohlisa izingane zakwaShembe bezibusisa zingabusisiwe uNkulunkulu!

 

26.Ngithi-ke namuhla-ke sizwake uJehova ezikhulumela ethi uma ngabe lenzalo yakho ingazange ihambe ngezimiso zami, uthi ngiyakuyihambela ngenduku namacala. Ngishoke ukuthi-ke laba abakhohlisa izingane zoMprofethi abathi noma zingenzani zona ziyongena ezulwini. Ngithi-ke bantwana baseKuphakameni lencwadi ngiyifunda ngoba ingikhumbuza ukuhlupheka kweNyangayezulu, kodwa namuhla siyitholile impendulo yokuthi namhlanjena njengoba sebenokhwekhwe njengoba sebeziklwebha, akukho muntu obaloyile akekho muntu ohlolela isihlalo sabo, kodwa sebashawa uNkulunkulu, loNkulunkulu oshilo ukuthi ngiyakubahambela ngenduku, sekuyiyona leyonduku uNkulunkulu abeyisho emandulo ukuthi uyoshaya abantu abangahambanga ngezimiso, abafuna ukungena ngobukhosi boyise, abafuna ukungena ngesibongo abaphakamisa isibongo!

 

27.Ngishilo ngathi akekho noyedwa oke eme phezu kwebandla eme phambi kwabantu athi utshwala abudingeki la, akekho owake wathi ayidingeki insangu, akekho owake wathi ungawuphathi umuthi ngesandla sakho uyikholwa uyakufa, kodwa kugcinwa uma kufundwa, kodwa akukaze kube khona umholi owake waxwayisa abantu ukuthi njengoba nizwile kufundwa umthandazo weSabatha, leyanto ayiwona umlolozelo, kodwa yakhulunywa umuntu wasezulwini owayethunywe uJehova, uMprofethi u-Isaiah Shembe (ukuthula kube kuye), wakukhuluma lokhu, siwakhumbule lamazwi sime lapha nje sizokhumbula wona ukuthi wathini. Akekho umholi osasukumile phakathi kwabantu wathi ungakucabangi ukukhipha umphefumulo womunye umuntu.

 

28.Akekho ngoba namhlanjena kufuneka abantu ukuthi babe baningi, akudingeki ukuthi kugcinwe umthetho kaNkulunkulu. Kuyazeka ukuthi abantu abanezandla ezigcwele igazi baningi kakhulu, futhi ibona abahamba phambili, ibona futhi abaphethe zonke izinto, laba ababulala abantu. Ngeke bakwazi ukusho ukuthi, “Ungakucabangi ukukhipha umphefumulo womunye umuntu.” Kodwa kusashiwo lapha ekhaya kuphela, ngoba lapha sibuthene ngokuzosaba uJehova, size ukuzothatha umthetho, sizofunda ukuthi ezulwini kungenwa kanjani, sizofunda ukuthi ezulwini kuphunywa kanjani futhi.

 

29.Ngithi-ke bantwana basekuphakameni-nje manje kuyinyanga ephambi kwenyanga lapho kade kukhunjulwa khona uBaba iNyangayezulu, namhlanjena usuku lokuqala enyangeni yomhlangano ozovulwa ngokufaneleyo, mina bengiqedela indaba kaBaba iNyangayezulu ngiphikisa amaNazaretha ukuthi akusilo iqiniso lokhu akutshela abantwana baka Shembe ukuthi abenze izono ngoba izulu ngelabo!

30.UBaba iLanga wayendlala kahle lendaba, indaba yesono uyayikhuluma kakhulu siyamuzwa ukuthi uthini. Akukho lapho athi khona abakwaShembe abanakujeziswa bayawungena noma ngabe bekhaphathise odakeni bangene ukuthi ngabakwaShembe. Uma kwakunjalo sasingekho isidingo sokuthi sikhonze nabo, babezobe bezokhonzelani ngoba phela izulu ngelabo, thina sisuke sizocela kuNkulunkulu ukuthi asikhumbule nasezinsukwini zethu zokugcina, asithethelele nokona kwethu.

 

31.Bangena phakathi kwethu basuke bezothini ngoba kuthiwa phela bona izulu ngelabo, bayongena noma benjani. Yini, sikuphi isidingo sokuthi beze enkonzweni, sikuphi isidingo sokuthi bazohlupheka nathi noma sihamba siya entabeni yomuhlangano sihamba nabo. Thina sihamba ngoba sisuke sizincengela kuJehova, sisuke senzela ukuthi uJehova asikhumbule bona basuke befuna ukukhunjulwa ini ngoba izulu ngelabo ngokusho kwamaNazaretha?

 

32.Ngithi-ke bantwana baseKuphakameni, lencwadi ibeka amaqiniso obala ukuthi umuntu akangakhohliswa ngomunye umuntu athi, “Wena noma ungenzani .” Lento eshiwo ngamaNazaretha isafana naleyana eyayishiwo uSathane kuJesu elindile, lapho uSathane ahambela kuye wafika wathi, “Yini ungaziphonsi phansi ngoba wena uyindodana kaNkulunkulu, izingilozi zizakunqaka.” Eseshilo ukuthi, “Yini ungasho kulamatshe ukuthi awaphenduke abe yisinkwa ukuze udle ngoba wena unamandla uyindodana kaNkulunkulu.”

 

33.UJesu ngoba wayengumuntu wasezulwini (angisho lo wamaRoma) ngisho uJesu wasezulwini owaseNazaretha. Ngithi-ke bantwana baseKuphakameni, wamchitha wathi, “Hamba Sathane kulotshiwe emthethweni ukuthi ungamlingi uJehova uNkulunkulu wakho,” wathi, “Akusikho ukudla kuphela okungenisa umuntu embusweni kaNkulunkulu,” wathi, “Suka phambi kwami!” kodwa thina siyahluleka ukuthi, “Suka phambi kwami!”

 

34.Ngoba wabe elindile engaphuzi engadli, kodwa weza engathi uyamudabukela kanti uzomubhuqa, ngishoke ukuthi-ke izingane zeNkosi aziwavukele amaNazaretha adlala ngazo, athi ngeke zenziwe lutho izulu ngelabo. Ngithi-ke bangcwele ngithe-ke uma umuntu ebekwa uNkulunkulu, usuke emubekele ukuthi axwayise abantu ezonweni, ukuthi uma nenza lokhu uNkulunkulu uzonilahla.

 

35.Uma nenza loku uNkulunkulu uzonamukela, ngalawo mazwi bantwana baseKuphakameni ngikhumbuza amaNazaretha kaNkulunkulu ukuthi angakukhohlwa ukuthi seza lapha savuma, savuma phambi kwamazulu savuma phambi komhlaba ukuthi siyavuma ukushiya konke size kuNkulunkulu. Savuma ukuthi izinhliziyo zethu ziyokwethembela kuye noma sikhala noma sihleka noma siphila noma sifa ziyakwethembela kuye, akukho ukuhlupheka kwethu okothi uma sesihlupheka bese sithi bekungcono emuva kodwa sithi siyaphambili ngoba phambili kunoNkulunkulu kodwa emuva kunoSathane.

 

36.Sithi-ke bantwana baseKuphakameni engathi nezingane zethu singahlala sizifundisa zikwazi lokhu kukhuluma, ziwazi lawa mazwi, zazi ukuthi uma zilapha zize esikolweni sokufundela ukungena ezulwini. Leli bandla alimiselwe ukuthi kube yibandla elizothokozisa abantu ngezinto ezibajabulisayo kodwa libandla elizokhipha amava esihlatshwe ngoMubi kuwo, yibandla lapho umuntu wonke ezoxolisa kuJehova ngoba silapha njena sifike kuNkulunkulu sesonile ngoba sase siwalahlile amazwi afika noShembe sathatha lawo ayefike noSathane muva. Samulandela uSathane elingisa obabamkhulu, ephakama, ephakama ngobabamkhulu. Samlahla uJehova emini, sawalahla amazwi esayalwa ngawo njengoba ngichaza ukuthi akekho umholi oseke wathi izangoma azidingeki la ngoba uma besho njalo ibandla liza bese liyaphunguka ngoba into efunekayo yibandla hhayi umthetho kaNkulunkulu.

 

37.Ibandla uma selilikhulu kuzoba khona umnotho, lowo mnotho awusiwo umnotho ogcinelwe ukuthi kukhona okuyowenzelwa uNkulunkulu kodwa umnotho oyifa lezizukulwana zabo. Ifa lobukhosi babo, manje ngeke baze bakusho lokho ukuthi izangoma aziphume, ngeke futhi baze basho ukuthi ongqingili abaphume bahambe, ngeke bakusho lokho ngoba basebhizinisini ekufanele ukuthi likhule bakwazi nabo ukuba ngamakhosi ahamba ngezimoto ahamba ngezinqola zamagolide, abahlala emzini othi uma ungena khona uthi ungena ezulwini, kanti awungeni khona ezulwini ungena ekulahlweni, ngoba konke okuhle la emhlabeni okubi ezulwini, kuwukulahlwa komuntu othembela nokwemukelayo. Ngithi-ke bantwana baseKuphakameni, singakukhohlwa lokho.

 

38.Ngelinye ilanga uthi-ke uNkosazana, “Nibafundise abantwana benu noma besezikoleni,” uthi, “inhliziyo iyakwazi ukucula noma umlomo ungaculi,” uthi, “iyakwazi inhliziyo ukuthi imkhumbule uNkulunkulu noma ngabe kukuphi.” Uthi, “Nina nenziwa yini? Nehlulwa yizo nezangoma ekwathiwa azidingeki, ngoba izangoma ziye zivukwe umoya woyise mkhulu uma ngabe zikhona esigodlweni. Sihlabelele isangoma sivukwe umoya sikhumbula oyise mkhulu, sekukhuphuka uyisemkhulu othile. Sibe nevumo laso ukuzwakala ukuthi sikhumbule lona owavela kuso.”

 

39.Uthi, “Nina nizovukwa nini uMoya kaNkulunkulu?” uthi, “Kufanele uvukwe uMoya kaNkulunkulu, kuke kuthi emzini wakho noma uvuka ube noMoya kaNkulunkulu, bakuzwe uqongoloza ukhumbula uNkulunkulu. Uhlabelela umemeza uthi, “Ngiyomsinela oBongekayo, ngiyomsinela ngingasenanhloni!” Ubonakale ukuthi… bake babuza abantu ukuthi kwenzenjani?” uthi, “Kwehle uMoya kaThixo, ngikhumbule uNkulunkulu wami, ngikhumbule uBaba wami, ngikhumbule uMenzi wami!”

 

40.Uma uyikholwa kufanele kube njalo, uhambe uhambe uvukwe ngumoya ucule, ukhumbule uNkulunkulu wakho ngoba izangoma ziyahlabelela nezayoni kunezikhathi lapho ezivukwa umoya wazo khona, ziqongoloze, zisho zibhidilishe zisho ‘obhidani forishi’ sezifikele yiwo lowo moya wazo. Kodwa thina esingamakholwa siyoshonini ukuthi ‘siyomsinela oBongekayo singasenanhloni?’ Ngisho izingane zakho zazi ukuthi ubaba akakhulunyiswa, umama akakhulunyiswa uma esehlabelela. Ubatshele abantwana bakho ukuthi ningalokhu ningiphazamisa ngoba uma sengihlabelela bantwabami ngisuke ngikhumbula uJehova, ngisuke ngikhumbule uMenzi weZulu nomhlaba, ngoba uShembe wathini? Wathi, “MASIZAZI IZINDLELA ZOMKHULULI WETHU.” 

INkosi ibusise enikuzwile.