Kodwa uShembe wafika nevangeli elihlanzekile elihle elingenakuzamula, elingena lutho. Wathi, “NANGALO USUKU LWENHLUPHEKO, NIMBIZE UJEHOVA UYAKUZA ANISINDISE.” Akashongo ukuthi mina Shembe ngizawukuza nginisindise, uthi, “NIM’BIZE UJEHOVA UYAKUZA ANISINDISE UMA NIYENDLALA INHLIZIYO YENU NGEZIKHATHI ZONKE EMKHONDWENI YEZIMEMEZELO ZEZWI LAKHE.”
Inkonzo yeSabatha ekuseni mhlaka 08 October 2022: NguMfundisikazi Nomcebo Mpanza.
229. ISIHLABELELO. 10
J.G SHEMBE
Mathewu 25:1-13
1 Zafika izintombi
Zize emthimbeni,
Ziphethe izibani
Nawo amafutha.
Chorus: Kunjalo namhla eKuphakameni
Ufikile umyeni,
Wozani wezintombi
Ngenani ngamandla.
2 Umyeni walibala
Zozela izintombi
Aphela amafutha
Zacima izibani.
Chorus:
3 Umyeni usondele
Phumani nimhlangabeze
Bangena abalindile
Endlini yomshado.
Chorus:
4 Zakhala iziwula
Sipheni amafutha,
Zicimile izibani
Besozela silele.
Chorus:
5 Alingene thina sodwa
Nani zithengeleni
Lelilifa alabiwa
Liyadliwa ngamandla.
Chorus:
6 Nkosi sivulele
Kusho iziwula,
Umyeni waphedula
Anginazi niphumaphi.
Chorus:
7 Lindani niqinise
Alwaziswa usuku,
Asaziwa nesikhathi
Sokufika komyeni.
Chorus:
1.Ngibabingelele abangcwele, bantwana baseKuphakameni ngiyabonga nami, ngibonga ukuvunyelwa ukuthi ngingene endlini eyingcwele ngiphinde nginikwe lomusebenzi kaNkulunkulu, wokufundisa nokuthi nami ngifunde. Isihloko sithi MASIZIQONDE IZINDLELA ZIKA JEHOVA INKOSI YETHU.
2.Uma siqonda izindlela zika Jehova, asiyukudinga asiyukweswela. Uma uNkulunkulu engakithi akukho okungasithinta, ngiyacela ukuthi sedlule emazwini ngizobe ngilokhu ngingasuki lapha kuMahubo ngoba ngithanda indaba ebhalwe khona ngiyizwa ikhuluma nami iluleka mina.
3.Sikhuluma lapha kuMahubo 37, siqala evesini lika 35 bese siyogcina ku 40. Amahubo 37: 35-40, “Ngambona omubi, oyisidlova, eza nabasile njengomuthi oluhlaza ojulileyo. Kwathi lapho umuntu edlula, bheka wayengasekho; ngamfuna, kepha akade asafunyanwa.
4.Mbhekisise ongasolekiyo, umbone oqotho, ngokuba umuntu wokuthula, ukugcina kwakhe kuhle. Kepha abaphambukayo bayakubhujiswa bonke; isikhathi sababi siyakunqunywa. Ukusindiswa kwabalungileyo kuvela kuJehova; kuyinqaba yabo esikhathini sokuhlupheka. UJehova uyabasiza abakhulule; ubakhulula kwababi abasindise ngokuba bayamethemba.”
5.Lamazwi bantwana baseKuphakameni akhuluma nabantu abazibophezele, ekufanele ngawo siziqonde izindlela zikaJehova oyiNkosi yethu, siqonde ukuthi uJehova akagcini-nje ngokudunyiswa kuphela kodwa futhi uJehova nangosuku lwenhlupheko uba seduze kwakho. Uthi-ke uyosisiza ngoba siyamethemba. Ukuthemba-ke kuyinto enkulu ngoba uma wethemba awusuki entweni othembele kuyo. Uyasichazela bantwana baseKuphakameni ukuthi uma sethemba kuye uthi uyakusisiza ngoba simethemba.
6.Simubonile-ke ezenza izinto ezinkulu, simbonile uJehova esivikela lapho sabhekisa izinhliziyo zethu kuye, sasikhumbula usizi esasibhekene nalo lapho okwakuwa khona abantu bewisa okwezimpukane ezifakwa udoom.Befa abantu, kodwa amathemba ethu asuka kukho konke okwakukhona emhlabeni, sabuyela kuye uJehova, ngoba sanikezwa umqondisi, sanikwa sisekhona lapha emhlabeni, sanikezwa uMqondisi ozoqondisa inkolo kaJehova ngathi.
7.UNkosazana wasiqondisa kuzo lezo zinsuku wathi, “Musanini ukushawa uvalo,” wathi, “UShembe wanitshela, wathi, “Uma usukulenhlupheko nibize uJehova uNkulunkulu wenu,” Wathi “Nami ngisho njalo, ngithi buyelani kuye nimmemeze nizendlale lezi zinhliziyo zenu njengoba uShembe umuntu wasezulwini asho njalo, nami ngithi buyelani kuye uJehova, buyelani ethembeni enalinikwa uShembe.” Akagcinanga ngokusho njalo, wabe eseyasitshela ukuthi asikhiphe umnikelo sikhale kuJehova, kodwa siqale ngako ukuvuma izono. Washo wathi ngoba sonile phambi kuka Jehova njengoba sishaywa kanjena.
8.Sakwenza siyisizwana nje esibukeleka phansi, sanikela lowo mnikelo owawubiziwe. Amathemba ethu aba Kuye, abheka lapho esigcine khona umnikelo wethu, simemeze uJehova njengoba washo uShembe. INgilozi izogcizelela wona amazwi oMprofethi ayekade efike nawo esuka nawo ezulwini ezositshela ukuthi asibuyele kuJehova.
9.Sabuyela bantwana baseKuphakameni, sabuyela nje sibancinyane siyingcosana sinjena, sanikela singenako nokuthi uNkulunkulu singenalo ulwazi lokuthi uNkulunkulu angase awemukele yini umnikelo wethu. Kodwa amathemba ethu enza ukuthi uJehova uwemukele umnikelo wethu.
10.Wawumukela ngoba sanikela sethemba ukuthi loNkulunkulu esamunikezwa nguShembe uzakusisindisa kulempi elwayo, kulokhu kufa okubhidliza yonke into ephambi kwako. Ngithi bantwana baseKuphakameni noma indaba yethu ingeke yakhulunywa ngabantu ngoba abantu abayifuni into engenzakalanga kubo. Uma ngabe into uNkulunkulu eyenzile wayenzela abanye abantu, abantu bayayihlikiza basho nokuthi kwakuvele kuzowenzeka, babale zonke izinto kodwa thina esila endlini siyazi ukuthi kwenzekalani, siyazi ukuthi kwathiwa asinikele.
11.Sanikela bantwana baseKuphakameni, sanikela sabanethemba lokuthi njengoba sesinikele kuJehova, lokhu kufa akusilutho. Nangempela bantwana baseKuphakameni, loJehova esihlangene ngaye lapha welula isandla sakhe wasisindisa ngezindlela eziyimfihlakalo yakhe yedwa ngoba asazi ukuthi uJehova wasisindisa kanjani, kwazi yena yedwa. Bawa abantu ngapha nangapha, aphela amasonto amakhulu bahamba nalapha kithi eNazaretha, emabandleni amanye.
12.Bahamba abafundisi esasibazi, bahamba emhlabeni, bawa, kwawa abashumayeli, kwawa abakhokheli, kwawa yonke into, kodwa sahlala kuleli themba njengoba esho uJehova ethi uma simethemba, wathi uyosisiza ngoba siyamethemba. Sathemba yena yedwa, savuma ukubuyela emazwini afika nomuntu kaNkulunkulu, afika noMprofethi u-Isaiah Shembe (ukuthula kube kuye). Wayefike ezosikhulula emakhamandela okuhlupheka nokufa, wasikhulula emathembeni ayize, wathi asibuyele sethembe uJehova yedwa.!
13.Wasifica sikhuluma sodwa njengezinhlanya ngezikhathi afika nazo obaba bethu babengazi obabamkhulu bengazi lutho ukuthi uJehova yini, uNkulunkulu yini babephuma bevungame bavungazele bodwa bevungazela bekhuluma nabazali abaphambibi, bekhuluma nabantu abahamba nabo futhi bengabazi ukuthi labantu abakhuluma nabo bakuphi, bakhuluma nabo nje bakhala isililo esingakanani lapho bagcinwe khona. Bagcinwephi lapho bagcinwe khona, kodwa babengazi lutho babevungazela nje basizwa uNkulunkulu. Bese bathi basizwa obabamkhulu bona, basizwa ngoyisemkhulu ngoba babephuma-nje bakhulume.
14.Kodwa uShembe wafika nevangeli elihlanzekile elihle elingenakuzamula, elingena lutho. Wathi, “NANGALO USUKU LWENHLUPHEKO, NIMBIZE UJEHOVA UYAKUZA ANISINDISE.” Akashongo ukuthi mina Shembe ngizawukuza nginisindise, uthi, “NIM’BIZE UJEHOVA UYAKUZA ANISINDISE UMA NIYENDLALA INHLIZIYO YENU NGEZIKHATHI ZONKE EMKHONDWENI YEZIMEMEZELO ZEZWI LAKHE.”
15.Kush uShembe umuntu wasezulwini, kusho uMprofethi kaThixo, kusho owayezosikhulula emaketangweni lapho uSathane ayesibophe khona esinikeza amathemba ayize. Abantu bafile babhujiswa ngamathemba ayize. Sabona namasonto amakhulu adume umhlaba wonke, sababona abantu begibela begibela amabhanoyi behamba bathi sebamtholile uNkulunkulu onguye, kuthiwa-nje kwenzeka izimangaliso, kodwa bantwana bokukholwa kwathi emva kwesikhathi nje esithile lapho umhlaba uxokozela ngebandla abantu begibela amabhanoyi beya khona. Sathi sizwa ngelinye ilanga sezwa kuthiwa abantu izinkulungwane nezigidi zifile, kwathiwa abantu abafile abaningi kakhulu ngabalapha eNingizimu-Afrika ebebehambile bethi bayomukha uNkulunkulu ngeqoma, bahamba baya khona le.
16.Akuve kubuhlungu ukusuka ugibele ibhanoyi uyobulawa ngamanga akwelinye izwe kunokuba ubulawe ngamanga alapha ezweni lakini abekade eqanjwa ngabantu obaziyo, kodwa uhambe uyofela emahlane. Bafa abantu bebulawa ngamathemba ayize, kodwa thina esanikwa nguMprofethi owasungula leli bandla, walisungula ngoJehova, walisungula waba ngumntwana naye kaNkulunkulu. Uthi, “NIMBIZE,” akasho ukuthi, “NIBONGIBIZA,” uthi, “MBIZE UJEHOVA, UYAKUZA AKUSINDISE.” Akasho ukuthi, “NGIYAWUFIKA MINA NGIKUSINDISE.”
17.Kwake kwafika isimangaliso bantwana baseKuphakameni kulomhlaba, angikaze ngimuzwe nangendaba uMprofethi ofana noShembe, owathi uNkulunkulu esemenzile njengoba eshilo laphana kuDavide ethi, “NGIYAKUKWENZA UBE UMUNTU OHLUKILE EMAKHOSINI OMHLABA.” Wahluka kubo bonke abaholi bezenkolo ngisho nabamhlophe, ngisho nababefunde bezibona ukuthi bangathinta ngisho isibhakabhaka, kodwa wehluka khona kunjalo ngoba wayewumuntu kaNkulunkulu, wayedalwe ngezwi likaNkulunkulu, wayekade kukhulunyiwe ngaye engakafiki kulomhlaba waphathiswa indaba kaNkulunkulu, akaphathiswanga bugwili, akaphathiswanga bukhulu kodwa waphathiswa insindiso.
18.Lensindiso akayifihlanga ukuthi izawuvela kuJehova, ngithi-ke bantwana baseKuphakameni sibuthene lapha namuhla ngezwi lakhe konke kungaye, konke esiyiko kungaye asinakwazi ukumushiya emuva ngoba wuye osinikeze amasango amahle, osinikeze inkululeko wasikhulula ngoJehova, wathi asibize yena. Simbizile saphila sonke nabantwana bethu, bekufa ikati kufa inja kufa yonke into kodwa ngokuvuma ukwethemba uJehova yedwa saphepha bantwana baseKuphakameni.
19.Ngithi-ke nanamuhla sizodumisa loyo Jehova, sizobabaza phambi kwakhe ukuthi Nkosi noma besonile phambi kobuso bakho noma besingelutho kodwa sithe uma sithatha amathemba siwabhekisa kuwe awaze wasibalela ukuthi izolo kodwa wabuka ukwethemba kwethu ukuthi sesivumile. Yithi sodwa esivulile izinhliziyo zethu sathi ngena Nkosi yethu uhlale kuzo, sethembe wena ngezikhathi zonke.
20.Bonke abantu abanamathemba ayize, abanikezwe amathemba kanti banikezwa uSathane ebaholela ophathe. Kwawa amabhilidi amakhulu awaphansi kanti awa njena ayamemezela ukuthi, “Mene mene khelekethe phasi.” Kwabanjalo namhlanje akusazwakali, lwaphela udumo lokuzakhela, lwaphela udumo lomuntu kodwa olukaJehova lusekhona nanamuhla. Sisasho ukuthi mubongeni uJehova, kuleli viki eliphelile sasisho ukuthi, “MBONGENI UJEHOVA NGOKUBA ELUNGILE.”
21.iyolanda uMoya wakhe oyingcwele, siyocela abangcwele ukuthi bangene nathi. Sangena sisho ukuthi, “AKABONGWE NGOBA ULUNGILE.” Kodwa yawa imithangala, abanye abantu abangamalunga alowo mthangala owawa, bakhwele bazehlele kuShembe, bamubone uShembe engelutho kuthiwe nanguya umuntu onezimangaliso. Kuthiwa nguNkulunkulu, kuthiwa nguMprofethi, kodwa waze wahamba emhlabeni engazange asitshele ukuthi yini eyenza ukuthi abantu bafe bafise okwezintwala phambi kwakhe behliphizwa yindlu kodwa wabe engumprofethi kaNkulunkulu.
22.Asizange sisezwa ukuthi kwenzekalani, ngikhuluma ngamathemba ayize, ngikhuluma ngamathemba angasizi ngalutho, akusiza esikhathini lapho akukhohlisa khona ukhohliseke. UShembe akafikanga ukomemezela ngemali, akakho mcebo amemezela ngawo. Wakhuluma nje ngoJehova, yebo kukhona lapho owayefica khona abalambile ngoba wayekunikwe konke akukho ayengakunikwanga.
23.Wayefika kulanjiwe afike abacelele abantu kuNkulunkulu, kusale ukuphila lapho ayehamba khona kusale ukudla. Ahambe emasimini lapho abantu babetshala bengavuni lutho kodwa uma eke wahamba wadlula ngalapho bayosala abantu bedla, belima kuqhamuke ukudla ngoba kudlule umuntu wasezulwini ophathiswe ukuphila ongaphathiswanga ukufa bantwana baseKuphakameni.
24.Wabonakala uMprofethi kaNkulunkulu, zambona izizwe zonke nomazingeke zasho ukuthi uShembe wayethunywe uNkulunkulu. Kwazwakala nasemabandleni amakhulu, kwamenyezwa kwathiwa kubonakale izilwane ezithile ezisanyoni ezisabantu, ziphikelele khona. Zafika nakhona lapho baphela abantu, babaleka bagcwala izinkalo, bafa abafundisi abakhulu, bafa abathwala izigqoko ezingumphongolo uze ubone ukuthi uma umbona uthi, “Pho uthi akusiyena uNkulunkulu lona?” ubona ukuhloba kwakhe, kodwa bacekeleka phansi!
25.Amathemba ayize ayababulala abawamukelayo. Ngithi bantwana baseKuphakameni nathi akashongo uShembe ukuthi siyowomela uthini, usitshelile ukuthi zikhona izinsuku lapho siyongababikho khona, yikho silapha sizosebenzela lezo zinsuku ezifihliweyo. Akekho umuntu ozinikwayo ukuthi azibheke njengekhalenda kodwa ubona seyifika leyo date nalolo suku luyimfihlo kaNkulunkulu. Sizeke lapha ukuzokhonza uNkulunkulu onjalo, siwabonile amathemba ayize, sahamba ngawo kuleli bandla lakithi, sibonile bantwana baseKuphakameni sihlaba izinkomo, sihlaba izimbuzi sithi sihlabela obabamkhulu kanti sihlabela amadimoni.
27.Sibonile simenyezwa sisabela sithi sibizwa ngobabamkhulu kanti simenyezwa nguSathane, usehambe wayovundla lapha ezenza abobabamkhulu. Sapheka sipheka ukudla kodwa azange sisithole isibusiso, isibusiso esasithola kwaba usizi nezinyembezi, sakhala emva kokuba senze lowo msebenzi kwehla isililo esisabekayo ngoba kwangena ukufa kwangena ukuhlupheka.
28.Baphelelwa umsebenzi abantu, kwahlushekwa ekhaya, kwafiwa ekhaya kwangcwatshwa kwanganqanyukwa. Isona sibusisoke uSathane anikana sona, noma ungamuhlabela izinkunzi ezinonileyo, noma ungamfunela izinqama ezingamakhulu amangakhi kodwa isibusiso ozosithola ilesi esasithola. Wasihawukela uShembe, wehla ezulwini wathi cha ngithe ngiyafika ngiyabheka ngathola abantu bekhala kanti kwakukhala thina ngoba sase sifile ukuhlaba singazi ukuthi yini. Kube engathi uhlaba labantu bakini ngoba uma uhlaba inkomo kufuneka ukuthi kube khona umuntu ozohamba nalenkomo. Uma uhlaba imbuzi kufanele kuhambe umuntu ozohamba nalembuzi, asizange sizuze lutho. Noma bangasiyenga bakhulume into engelona iqiniso, bathi bathole ukuthi nokuthi, asiyikhohliwe inganekwane eyinganekwane uma uyizwa kodwa uma uyibheka uyabona ukuthi akuyona inganekwane isexwayiso.
29.Asikhohliwe ukuthi ikhona inganekwane ekhuluma ngezinyosi, lapho izinyosi zafika zakha khona umuntu waphenduka ukhuni, wawuthi uthi uyagijima ufaka laphana ingalo isale khona lapho, ababekade bezifihla bezifihlela ukuthi izingalo abasenazo, babememeza abanye ukuthi abaye beyokha laphana ukuze bonke abantu bangabi nazo izingalo.
30.Ngeke size sikhohliseke ngoba sibonile amathemba ayize esifakela ukuhlupheka nokufa. Kwawa imizi eyayakhiwe, kwafa abantu bantwana baseKuphakameni. Ngithi-ke namhlanjena ngikhuluma ngamathemba ayize esizakhela wona noma esakhelwa ngabantu wona ukuthi sisuke kuJehova sithathe amathemba kubo anomvuzo owusizi. Ngenye imini wathi ehlezi umzala wami omunye, ingane yakhe yayisize ukuzokholwa kuleli bandla kolunye uhlangothi kodwa kulo leli bandla lamaNazaretha.
31.Wathi usajabula ukuthi ingane yakhe iyakholwa lapha, ingane ngelinye ilanga yamubuyela nezindaba yathi sebeyibonele kukhona ababonayo, sebefike bayibonela bathi cha ayikhushulwa nje emsebenzini ayikhushulelwa nje imali seyitholile ukuthi kuthiwa ayisiyona eyaphayana kwaSimelane, kwathiwa ayisiyo owakhona. Awu wakhala waba uhlanya umzala wami wathi,
32.“Hawu owakuphi lona ongethukayo ngoba mina selokhu ngafika kwaSimelane ngafika mina kwaSimelane ngiyintombi, ngakuthola la angifikanga ngiku gonile?” wathi usalalele lokho, umuntu owayemutshela wathi, “Wena ungowakaSthole.” Yahlanya ingane bathukuthela bakwa Simelane ngoba lomntwana uyise noma engekho noma ungamazi wawumubuka kulomntwana, uyizibulo lakhe wazizala nje uSimelane. Kodwa bafika labafwethu abalapha esisuka khona bafika ngoba abantu abababoni ukuthi bakha ikhampani abazokwazi ukuthi bahwebe ngayo kubantu, bahweba ngamadlozi kodwa ucabange wena ukuthi kukhulunywa ngamadlozi kanti kukhulunywa ngezilwane.
33.Ngithi lomfana walwa nonina walwa waphuma ngezwi laloyo muntu wathi akaphume ayokwakha ixhokovane. Waphuma wayokwakha ixhokovana, uthe uma eselakhile wafika lomuntu wathi uzomfakela abakwaSithole, emukhipha emagcekeni akubo kuyise omzalayo ethi akulandwe abantu abafunda bazolanda ithambo likayise lisiwe laphayana kuyohlolwa i-DNA ngoba uyethukwa kuleli bandla lakithi. Wathi usazokwenza lokho wangenelwa indaba enkulu, kwathiwa umntanakhe ushe waba ngumlotha.
34.Wangcwaba umlotha, eshela kulelo tshotshombe ayekhishwe kubo wayofakwa kulo wanikwa isibongo ekungesisona esakhe ngoba zinjalo lezi zilwane ezembethe labantu, azisifuni isibongo ozalwa kuso. Bese ziyakwabela zikunikeza isibongo esinye sazo. Wafa lomntwana akekho, wafa fififi umzala walanda umlotha eyongcwaba wona ngamathemba ayize.
35.Ngithi-ke bantwana baseKuphakameni engathi iNkosi ingasisiza abantu bomhlaba bayazi indaba yalabantu abathi bayabona ukuthi bamsuse uShembe, bamqhelukise noma sebethuka bamshiye uShembe ngoba into ebuhlungu bafike baqambe amanga bathi bathunywe nguye bese abantu laba abangakholwa uma sekuvela izinto bese behlasela uMprofethi kanti uMprofethi akenze lutho.
36.Labantu laba bazakhela umsebenzi ngokuhlupheka kwabantu, bazakhela izimali, bafike nezilwane ezingaziwa ngoba kusuke kuyizilwane kusuke kungesiye uyihlomkhulu ngoba akekho uyihlomkhulu ongathi umenzele into yena akuphe into enje. Lapho ekungafiwanga khona kuphela umsebenzi, uphele umsebenzi kube nendlala baboshwe abantwana, babulale abantwana abangazange babulale muntu genxa yamathemba ayize.
37.Manje asikwazi ukungambongi uShembe ngokusikhipha kulamathemba ayize, babathe bayasigabisela basigabisela ngezingalo zokukhandwa bengasenazo lezi abadalwa nazo zasala laphana ekufakwa khona uphume ungasenayo ingalo. Asisayi ngoba sesivele sinqumile ukuthi emuva asisayi ngoba sesibonile ukuthi uShembe wayesiletha ekukhanyeni asisuse ebumnyameni.
38.Namhlanjena safika sibabi, safika sinezinguzunga zeziduli ebusweni, sishaywe njalo yiwo lamathemba amathemba ayize sonakalelwa ubuso sihamba siququda amathambo siwaququda nezilwane sithi sidle nobabamkhulu. Kwathi nongaphuzi kwathiwa akaphuze ngoba uyisemkhulu angeke akuthande lokho kanti akushiwo uyisemkhulu kushiwo izilwane.
39.Ngithi-ke bantwana baseKuphakameni, lapha kuleli bandla uma engaba khona umuntu othembela kwezinye izinto, kusho ukuthi loyo muntu uNkulunkulu akamufuni uyokhishwa kabuhlungu kuleli bandla. Umnikazi waleli bandla uyomukhipha kabuhlungu, sekuzofika isikhathi lapho abantu abazokhuluma khona, uzokwenza uNkulunkulu. Abantu kukhona isikhathi lapho uJehova azobashaya khona abese ebatshela ukuthi kufanele ukuthi beze ebezokhuluma ukuthi benzeni.
40.Njengoba kuthiwa kufanele bakhulume, uyothi uma efika umuntu ekhuluma into esingayizwa kahle ekhombe enhla ekhombe enzansi singamuzwa ukuthi uthini. Siyothi uma sesishaya “ufire!” uma ngabe ethi uyathi sithi, “Confess!” ngoba uku confess(a) kuyinto enkulu kuNkulunkulu. Ungakwesabi ukuhlulwa yimpi uthi uma usuhlulekile ungesabi ukutshela abantu ukuthi ngiya confess(a) ngihlulekile, ngiya confess(a) bengingamthembi loNkulunkulu.
41.Ngi confess(a) ukuthi bengihlezi nje endlini ngizobukela, bengingazile ukuzokhonza ngoba bakhona abantu abanjalo. Labantu abasuke bezile nje endlini abanye baphoqwa ukuthi, “Ngizohlala kanjani ngoba ubaba angeke avume, kumele ngihambe naye ngoba uma ngisala ekhaya ubaba uyogcina ethole intombi ekholwayo.” Vele, vele kufanele khona kanjalo ukuthi umnomzane owehlelwa inkinga yomuntu obamba izinyawo ngoba yena asemukela amathemba ayize bese ecabanga ukuthi kufanele ukuthi adonse nobaba amufake kulamathemba ayize.
42.Vele kufanele ukuthi athole inkosikazi azokhonza nayo engazukumphazamisa, ezawukwazi ukuhalalisa ihalalisele loJehova esihlangene ngaye. Ezokwazi ukuhalalisa ihalalisele uMprofethi kaThixo, ithi, “Nkosi ngiyabonga ngoba wasithumelela umuntu ongcwele, owathi noma engcwele wazenza umuntu ongangcwele ngoba enzela ukuthi thina bampofana sigcine sesingcwele.”
43.Sike sizwe bethi abadala yangena lensizwa yasezulwini, ihamba ingena emzini ifice kwezinye izindawo kuhlafunwa izinkobe bayicaphunele ihlafune izinkobe ingumuntu wasezulwini. Balinde bathi bazokuzwa indaba yasemhlabeni kodwa lensizwa yasezulwini ibe isikhuluma ngalo Jehova, ibe isikhuluma ngale mana efihliweyo. Kanti ihambe ihlafuna izinkobe nje iyatshala ithunyiwe, inikezwe imbewu ukuthi ayitshale.
44.Kwezinye izindawo kuyotholakala izikhwebu ezimbili, kwezinye izindawo zibe zintathu kwezinye izindawo zibe zinhlanu. Kugcine kodwa indlu kaNkulunkulu ikhona emhlabeni. Ngithi-ke bantwana baseKuphakameni lomusa ohlezi phakade ngeke singawubongi bantwana baseKuphakameni. Njengoba silapha kuye kube khona abantu, abantu abahlale bebambelele emndenini. Ukubambelela emndenii ongakholwa, uyawuhlehlelwa yizinto akushiwo kuleli bandla ukuthi abantu bakini ubalande kodwa ubosikhumbula isifungo sakho.
45.Uyazi ukuthi uma usukholwa, uNkulunkulu esekuthintithile wakucutha ucucuza akuthole unawo, wakwakhela indawo enhle, umuzi wakho omuhle noma ngabe itshotshombe lihle uma ngabe leli tshotshombe ulinikwe nguNkulunkulu, uzohlala khona udumisa uzophila. Bantwana baseKuphakameni, izinto zethu sizonelwa yiyo lemindeni. Njengoba uNkulunkulu esikhiphe etshwaleni asikhiphe egwayini asikhipha enyameni yengulube, ukuvakasha kwazo kuxosha uMoya kaNkulunkulu obese ukhona. Ngoba umubona esithela emva kwezindlu nje uthi ubuka umuzi uyahalalisa kanti uyoshisa ugwayi uyobhema ubhema khona layikhaya. Ulokhu esithela langaphandle nje ubeke utshwala uthi ahambe ayophuza khona, uphuzela kuwona lomuzi wakhe.
46.Icala liyoba kubani? Uwena owenze isifungo noNkulunkulu. Kuhle khona ngoba ngeke u(audio unclear) kodwa uzazi ukuthi angeke usahlambuluka kahle kukhona okuzokulahlekela. Sekuya nje manje ku December, hhawu bantwana baseKuphakameni, ake ngiyiyeke leyo ngikhulume ngoNkulunkulu esihlangene ngaye lapha. Ngiyabonga uJehova, ngenye imini bantwana baseKuphakameni sake sathi sihleli sikhonza, sibona ukuthi cha siyakhonza kodwa wafika uSathane wathi!
47.“Baqhamukaphi laba abazomelana nami? babuyaphi laba abasazomelana nami mina senganqoba kulomhlaba, baqhamukaphi laba?” Angazi noma lafika yini izwi elathi, “Cha siqhamuka kuNkulunkulu.” Kodwa uSathane waphatheka kabi wathi babuyaphi laba abakhuluma ngoNkulunkulu, abangakhulumi ngamabutho ami engigadla ngawo ngoba amabutho akhe ukugadla ngokuthi kufanele ungesuki koyihlomkhulu.
48.Ngake ngaba nayo intshumayelo eyayithi, “INHLIZIYO ENGATHUTHI EMANXIWENI,” uhlala njalo umuntu wakhona ehlupheka, akha ethutha, abathe ungena lapha ashe angacisheki ahlupheke. Uhlupheka nje ngabo labo abebekade bakhe lawo manxiwa. Umuntu alwele nje ukuthi angikwazi ukusuka ngoba kwakukhona umzwakithi wonke wawula.
49.Kodwa usizi olwababamba, bahlupheka baze bafa kodwa lona osewazi uNkulunkulu ufuna manje ukufela lapho ekwafela khona labo bantu ababulawa usizi nokuhlupheka kwamathemba ayize. Yena esegeziwe esenikezwe ukukhanya kodwa usafuna ukuhamba ayokwakha lapha kubantu abakhala baze bahamba emhlabeni bekhala, lutho uJehova engabaphenduli.
50.Kanti indawo uma usumusha kufuneka ukuthi uthole indawo entsha, noma unenkosikazi uma ngabe ikudonsa ikudonsela emanxiweni, yishiye kuwo amanxiwa ufune umuntu ozokugana phambili nakhe umuzi omusha onoNkulunkulu, onethemba eliqinisileyo.
51.Ngithi kufanele uzazi ukuthi uhamba uhambe ungabi nayo inhlambuluko phambi kukaJehova, wena ukholiwe uqedile ukukholwa kodwa ngenxa yokuthi uyahamba futhi uyongena lapha kulomuntu, lomuntu okhuluma nemimoya yabantu, lomuntu odla imithi. Nawe uyangcola, uma uliwasha ibhuluko lakho lingavumi ukuwasheka likhumule ulishiye uyothenga elisha, ugqoke ibhulukwe elisha utshele abantu ukuthi ngimusha.
52.Kukhona lapho esho khona incwadi ethi lona omemezayo uthi wabona izulu elisha konke nomhlaba omusha ngoba konke okudala kwase kwedlulile. Akadlule nokudala uma umuntu engakufuni okusha, engalifuni izulu elisha, akadlule naleli eledlulayo basale abantu abafuna izulu elinoJehova, basale abantu abafuna uNkulunkulu ophilayo hhayi umuntu ofuna indawo lapho ekwabhujiswa khona abantu.
53.Nobani akalahlelwe izono zakhe, nobani akalahlelwe amabala awaziyo ukuthi lamabala uma bemubuza ukuthi ngawani uzosho ukuthi wawenza njani. Umuntu akasokulahlelwa amabala omunye umuntu. Musa ukufuna ukuthi ulahlwe ulahlelwe amabala omunye umuntu ongeke ukwazi ukuwachaza. Uma umuntu engakufuni ukukhanya mushiye ebumnyameni, musa ukusuka ekukhanyeni uye ebumnyameni ngoba nawe uzobalwa naye.
54.Njengabantu abantwana bethu amadodana ethu awanqatshelwe ukuthi aganwe kodwa kuye kubukeke kabi ukuthi uma indodana isingenelwe ukuqonywa, abanye bathi izintombi zabo abebekade benazo kuqala kodwa kusho ukuthi lowo muntu akakahlutshwa, useyisiqwanga esingene namakhasi, asidlekike sinamakhasi siyahlutshwa. Ngeke uzongcolisa indlu kaJehova, ungcolise ibandla ulingcolise ngamathando akho ukuthi wawusemathandweni alomuntu ngalokho uzohle uya kuye.
55.UJehova uzokujezisa, noma uthi awubonwa muntu kodwa uNkulunkulu mhlazane ehla… uJehova bangcwele kufanele nimbone loJehova, uma ngabe nithi ngeke nimbone namhlanje… baningi abantu abahamba baye kubantu emathandweni abo, bathi babethandane nabo bengakangeni la. Bangenelani la uma kuwukuthi ngeke bakwazi ukuma kuJehova yedwa? Uphoqwe ngubani ukuthi uze lapha? Noma umuntu eseganiwe kodwa usemathandweni, uthi lokunje uyaganwa akamthathi lomuntu kodwa uthi-nje ngisemathandweni.
56.Umuntu osemathandweni-ke engekho emthethweni uthando olumukelekile, uthando olunomshado okuthiwa umuntu useshadile. UShembe wawaqeda amasoka omhlaba, wathi abantu abaganwe, izinsizwa zakuleli bandla ayikho insizwa eba nelawu. Lento okuthiwa ilawu thina bantu ebesihlala nabantu abagcina umthetho wesizulu, ilawu uma kuthiwa nje ilawu kusho ukuthi uyazilawula. Ungalanda lo intombazana uyikhiphe uhambe ulande enye ngoba lithi igama ilawu lakho.
57.Intombazana ayikwazi ukuba nalo kodwa insizwa iba nalo kodwa hhayi insizwa ekholwayo, angikaze ngiyizwe indaba yelawu kubantu abangamaNazaretha, kodwa ngezwa indaba yokushada. Kodwa kusekhona abantu abangena belengise lawo malawu. Bathi babebathandile kuqala. Umuntu uma umthandile uhlulwa yini, wameqelani? Sike saba nabo mpela izolo abantu abasho njalo athi mdala, kodwa usehanjelwe ngamakhosikazi amahlanu kodwa uthi mdala loya, awumazi ukuthi emdala wayengathathwa ngani.
58.Sebaze bahamba abahlali, kwahlukwana naye sekungokwesithupha kodwa uthi lona mdala kubo bonke nakulaba abahamba. Ulokhu-nje echithekelwa umuzi nje umuchithekela ngalomuntu okulokhu kuthiwa mdala. Mdala kubani kanti? Usezokuba mdala nakuJehova-ke manje, waba mdala emakhosikazini ayisithupha noma ayisonto namhla sezakuba mudala kuJehova-ke manje ngoba phela uzombiza ngoba mdala yena.
59.Ngithi-ke bangcwele umhlangano uJehova awubizile, enomhlangano nathi uNkulunkulu akasisize abantwana bethu ababhidlize amalawu ezinhlizweni zabo, amadodana ethu awabe qotho phambi kukaNkulunkulu, awabe isibonelo esihle phambi kwabantwana abancane abasazoganwa. Ngoba singaka noShembe wathi uma efika akashongo ukuthi uzofuna ibandla elikhulu, wathi ufuna abantu abazoya kuNkulunkulu.
60.Akazange asho ukuthi ufuna izigidi nezinkulungwane ngoba wayazi ukuthi izigidi akwenzeki ukuthi ziye kuNkulunkulu ngoba kugcina sekukhuphuke wona lama lawu. Ngithi-ke bantwana baseKuphakameni bayajabula abantu abaye bawabambe lamazwi akhulunywa iNkosi uDavid izendlala phambi kukaJehova, uJehova agcine ethi uyobasindisa abakholwa kuye ngoba bemethemba. Bangakhi abantu abathembela kuJehova yedwa?
61.Kukhona abanye abantu abangawuphathi vele umuthi kodwa abathembela koyisemkhulu, bese kuba khona labo abathembela emthini. Ngithi-ke bantwana baseKuphakameni, kulamazwi engiwakhulumile bengihlose ukuthi abantu abamukhumbule uShembe okunguyena owasikhipha emakhamandela. Namuhla siyababuka abantu bayehla bayenyuka, bafuna insindiso bafuna okuzobasiza, bafuna umcebo bafuna ukuphila.
62.Bomile, umzimba wabo uyambona umuntu elapha ukuthi ngathi akasenaso isikhumba, nezinwele sekwaba uqadolo-nje lokhula lolu olungahlakuleki. Kodwa baphethe amathemba ayize, bonke abantwana bakaNkulunkulu uNkulunkulu wabageza wasigeza ngoShembe ngoba nguye owasitshela ukuthi uma sifuna ukuba bahle ubokwenzenjani. Ubomsaba umuntu ongena la endlini emubi, ubone ukuthi hhayi wamubi umuntu wesabeka ma engahle abonwe ingane nje ingakhala ibe uhlanya, kodwa abuye ngeviki elizayo enjalo aphinde aqhubeke njalo, kusoke kukhona isono angazange asivume.
63.UShembe unensipho engekho kwabanye abantu, umugeza umuntu abe muhle baze basho ngisho emazweni akubo ukuthi, “Hawu lomuntu wayeseba muhle wedlula abantu esasithi bahle,” kanti muhle ngoba ugezwe ngumuntu wasezulwini. UShembe unensipho engekho kubantu, engatholakali kulomhlaba. Uma ngabe ungagezekanga la, kusho ukuthi usuke ethi edlulela phambili, kusho ukuthi uwulomuntu onesono esingenakuthethelelwa.
64.Awukwazi ukungagezeki, ngisho umama ngisho intombazane ekuthiwa, cha lena nje impela noma ngabe inezitho izagile kodwa uyibona seyimi kahle noma ngabe beyinamadolo angongawagandaganda amasondo agandaganda, uyibona seyikahle-nje seyibukeka, uzwe nabantu sebeyibuza ukuthi, “Hawu mkhokheli owakabani lowa mntwana?” sebeyambona ukuthi uwumuntu, kodwa wafika-nje enamadolo engathi amasondo egandaganda nempumulo ongathi ishevekile ingazange ishevwe yilutho ishevwe ilezi lwane akade ezihlaba ethi uhlabela oyisemkhulu.
65.Bonke laba abahlabelayo, ngisho izinsizwa ezihlabayo kulezi ezikholwayo sezaba nezinwele amaqobolondo nje baphela bonke ubuhle uShembe ayekade ebanikeze bona. Kodwa manje abantu abathembela kuJehova, abanamathemba amahle abangeke baboshelwe wona, batholakala bebabahle. Ngisho intombazane yalapha yinhle, akudingi nokuthi uze ube mhlophe, lapha asinaye umuntu oziphaqulayo ahambe efuna imithi yokuziphaqula kodwa ngoba phela sikuNkulunkulu ogezanayo, vele ophaqulayo yena ngokwakhe, akekho-nje umuntu lapha ongathi uhamba ayofuna iziphaqulo.
66.Ezani bakithi uShembe egezana kahle kangaka, uma ukuhlaza uba muhle ukuhlaza ube muhle nje uyintombi yakwabo, ube muhle-nje ubemuhle uluhlaza. Uma ukhanya, ube muhle futhi ube nebala-nje ekihle ukhanye kuthandeke ukukhanya kwakho bantwana baseKuphakameni ngoba awuzikhanyisanga wena kodwa ukhanyiswa nguShembe.
67.Akuve kumnandi, nabobaba bethu amakhehla alapha ngabobaba-nje abahle sebebadala ngisho behamba uyambona ukuthi ngisho angayokhuluma-nje nenkosazana ingavele ithi ngehlulwa ngamazwakho baba. Ngoba iyambona ukuthi ungubaba omuhle, uyathandeka noma ngabe enjani kodwa muhle ugezekile ngoba insizwa kaJehova uphethe ithemba elingabulali.
INkosi ibusise enikuzwile.