Ngithi-ke bantwana baseKuphakameni ileyoke indaba esiphethe, siphethe leyo ndaba lapha kulelibandla leli ukuthi singamkhohlwa uJehova, futhi singakukhohlwa ukuthi nabantwana bethu sibafundise ukudumisa, singavumi ukuphucwa lokhu kukhanya bantwana bokukholwa.
Inkonzo yeSabatha ekuseni mhlaka 15 October 2022: NguMfundisikazi Nomcebo Nxumalo Mpanza.
Lwadum’ ulwandle,
Nang’ uFaro.
Ulwandle olubomvu,
Eshon’emfuleni.
Uzobuya nini weFaro,
Nempi yezinqola zomlilo!
(Lesi sigekle asibhaliwe ezihlabelelweni).
1.Ngibingelele abangcwele, bantwana baseKuphakameni sesingenile endabeni enkulu yokugcina iSabatha nokugcina imithetho yakhe ayibekile. Isihloko sithi SIYAZIDINGA EZOKUMBONGA. Bantwana baseKuphakameni njengoba ngihlabelela lesi sihlabelelo noma ngingeyena umuntu oyigagu, kodwa ngizwakalisa ukubonga kuNkulunkulu, ngikhombisa ukukhumbula, ngoba uma uwumuntu ubohlala uhlale ukhumbule, ungabi umuntu okhohlwa okwedlulile, ubese unamathela kulokhu okusuke kukhona.
2.Umlando wakhiwa izinto okusuke kudlulwe kuzo, uma ngabe ukhohlwa izinto odlule kuzona, awukho umlando ongakheka. Abanye bafike sekukuhle, kodwa abanye esinabo lapha endlini bayazi ukuthi ikuphi lapho esike sadlula khona. Uma ngithi LADUMA ULWANDLE OLUBOVU, ngikhumbula ngenye imini lapho okwake kwathiwa khona angeke sisasho. Kwathiwa emva kwezinyanga ezintathu udumo luka Jehova luzobe lungasekho, seluphelile! Isina muva liyabukwa!
3.Kulapho esabona khona ukuthi angeke kuphele udumo luka Jehova, ngoba lokho kosho ukuthi kuphela thina esiluphethe, thina esalalela, thina esamlalela kahle uma uShembe ethi, “UDUMO MALUBE KUYE uJehova!” Sabona ukuthi lungaphela kanjani sikhona, sabona ukuthi kusho ukuthi sekuwukuphela kwethu, ngoba sasenze isifungo ukuthi loludumo luka Jehova siyoliphakamisa kuze kube sezinsukwini zethu zokugcina!
4.Bantwana baseKuphakameni lokho kwenzeka, sakhombisa umhlaba wonke ukuthi into kaNkulunkulu ungaboyifungela, ngoba izofungela wena! Wakhombisa uNkulunkulu ukuthi into yakhe ayinawuqedwa umuntu! Ngithike bantwana baseKuphakameni njengoba ngithi SIYAZIDINGA EZOKUMBONGA, ngibonga ukuthi kunokuthi kulezinyanga ezintathu udumo luka Jehova lushabalale, kodwa lakhula kakhulu kwaba yilapho liqala khona ukukhula!
5.Ngibonge bantwana baseKuphakameni abantwana beNkosi enkulu yaseKuphakameni esasinabo abagcotshiwe nabangagcotshwanga esasiyibambe nabo kuleso sikhathi, abangazange baphephuke, abangazange bavume ukusala emajikeni, babambelela khona sekunjalo, sekuthiwa lento iyaphela, vele yayingekho! Babambelela bathi, “Cha uShembe wathi asesabe uJehova, akashongo ukuthi asisabe abantu abafungela into kaJehova!”
7.Abanye babezihluphekele bengena lutho, abanye bengahluphekile, abazange babone ukuthi kuyihlazo, abanye babona ukuthi kuyihlazo ukuba sebandleni elingakhuli. Lithi lapho lithi liyakhula, likhule ngababi, afike uJehova kuleso sikhathi sisajabule, ezohlunga, bese siyasala sibe yingcosana. Bantwana baseKuphakameni, asisoze sakhohlwa ukuthi laba bantwana beNkosi enkulu yaseKuphakameni balibamba leli vangeli njengoba sengishilo ukuthi abanye bagcotshiwe abanye abagcotshwanga!
8.Balibamba abanye behluphekile, kodwa bathemba khona kunjalo ukuthi loJehova esamnikwa uShembe ukhona, uyakufika alikhanyise ikusasa labo, abanye babo bahlukunyezwa nasemizini abahlala kuyo, behlukunyezwa imindeni yabo, ibahlukumezela leli bandla. Noma sebehlukunyezwa kunjalo, abazange banikele ngodumo luka Jehova emindenini yabo!
9.Bakhetha ukushiya imindeni, bayilahla imindeni eyayilwa nokukholwa, ilwa noJehova, bakhetha uJehova noma babengazi ukuthi bazothathani bahlanganise nani, abanye babengasebenzi, kodwa ukuthanda uJehova kwaba yinto yokuqala kubo, bangalinda ukuthi ngiyoqala ngithole umsebenzi bese ngiyabonake ukuthi ngenza njani, baphuma khona bengasebenzi bayohlala ezigangeni, baqalaza bantwana baseKuphakameni ukuthi ngizohlala lapha kuze kube nini, ngifanele nami ngibe naye umuntu ozoba seduze kwami njengoba uNkulunkulu washo njalo.
10.Uma ngabe uNkulunkulu ebona ukukholwa kwakho uye uzibone wena ungelutho, uthi anginalutho, anginamali angisenazo nezinto zokwembatha, kodwa uma ngabe ngingathola-nje noma ngingathola lapha kuma jamble sale, ngithole-nje lokho engiyokuthola, kodwa uNkulunkulu obona ukuzidela kwakho yena akasho njalo bantwana baseKuphakameni. Ukufunela okusha ukunikeza izembatho ezintsha athi wena ufanelwe ngokusha ngoba unokukholwa okungena sici, akwembese izingubo wena obekade ungazilindele ngoba uphuma empini lapho bowulwa khona ulwela indaba kaJehova.
11.Abanye bantwana basekUphakameni babelwiswa ngabazali, kodwa baphuma babona ukuthi abashiye balandele uNkulunkulu waseKuphameni onguJehova. Abanye bantwana baseKuphakameni babengenayo ngisho imizi, kodwa babengenandaba nalokho, babenendaba nokuthi udumo luka Jehova alube kuye!
12.Kuleli bandla bantwana baseKuphakameni kukhona into enhle, kwakuye kuthi uma ngabe bembona omunye wabo, bambone ukuthi lona uze waphuma kwakhe ngoba ephumela lokhu kukholwa, noma engasebenzi kodwa bakhona abagcotshwa ababesondela belule isandla bathi woza mfwethu sidle, angabonakali ukuthi akasebenzi, angabonakali ukuthi udele konke, akasenalutho, usele noJehova kuphela! Abanye bathi sebekhona la, izitha zabo zabathumelela ngoSathane, uSathane wabephuca imisebenzi kanti babengabantu ababeme kahle, wabaphuca uSathane umsebenzi, babuyela emuva bahlupheka, kodwa noma kunjalo abazange bamthuke uJehova, abazange futhi bazisole ngokuba kuleli bandla, abazange futhi basho ukuthi ukube abangenanga lapha ngabe izinto azange zibe nje. Bahlupheka basala naye uJehova kuphela, kodwa uNkulunkulu waseKuphakameni wala ukuthi badlewe umuzi, wathi cha hlalani nje endlini ngoba ngifuna ukwakha intshumayelo ngani eyophendula abantu abezayo esizukulwaneni esizayo!
13.Ngokuthi banamathela kulo Nkulunkulu, wahamba uJehova wabuya kubo, ngoba wayefuna ukukhombisa uSathane ukuthi noma angabahluphekisa, kodwa ngeke basuke kuJehova! UJehova wababuyisela emsebenzini, kwasetshenzwa kwaba kuhle kwakhanya ekhaya, wajabha uSathane. Ngithi-ke bantwana baseKuphakameni asikwazi ukukulibala lokho, ngoba kufanele kwakheke umlando wokuthi sisuka kuphi nabangcwele esinabo lapha.
14.Babamba bantwana baseKuphakameni, babamba bengasenalutho, babamba uSathane esebashaye ngazo zombili, babamba uSathane elwa nabo noma kuphi, babamba sebehlekwa kuthiwa, “Ninamathele kulento engekho, ezophela kusasa, into eyakhiwa nguMpanza eyakha ngokuhlakanipha kwemfundo yakhe?” Bahlala abantu, abantu bayifunda imibhalo eyabhalwa umuntu kaNkulunkulu, eyabhalwa nguMprofethi u-Isaiah Shembe, bayibona ukuthi lemibhalo ayiphikisani nalento ekhulunywayo, bahlala abantwana baseKuphakameni.
15.Ngithi-ke SIYAZIDINGA EZOKUMBONGA, ngithi-ke bantwana baseKuphakameni kuyimini eyingcwele iSabatha lika Jehova, kubuye kube umhlangano kaNkulunkulu esimemile ukuthi abe nomhlangano nathi, ngibuyela bantwana baseKuphakameni ukuthi lokhu kukhanya uNkulunkulu asinika kona singavumi ukwephucwa khona, singavumi ukuthi lokhu kukhanya esakulwela sephucwe kalula kona. Ngithi-ke bantwana baseKuphakameni ngikhumbula emuva, imuva laleli bandla alizange libe lihle, ngoba lalisempini, kodwa ngifisa nje ukukhuluma ngokuthi noma iNgilozi yayethukwa ibizwa ngedimoni ibizwa ngamandla kaSathane, kodwa ngiyafisa ukuthi ngedlule ezintweni iNgilozi eyafika yathi asizenze ezaphumelela.
16.Kuleli bandla bantwana baseKuphakameni kwathi uma ngabe sekufanele ukuthi sibe ibandla lika Nkulunkulu yedwa, yayisithi-ke iNgilozi, “Cha abantu abadumise uJehova bonke, akungabi khona umuntu ozokwenqatshelwa ukudumisa uJehova, anqatshelelwe ukuthi akaqhoyisile, anqatshelelwe ukuthi akanawo amandla okuqhoyisa.”
17.INgilozi yafike yakuchaza ukuthi ukuqhoyisa kuyinto ewumthetho wesiZulu, akusiwona umthetho kaNkulunkulu, umthetho kaNkulunkulu ukuhlanganisa abantu bashade egameni lakhe uNkulunkulu kuphela. Yafika iNgilozi sibophe amabhande siwabopha ngezimbuzi uma singakabi nazo izinkomo, yafika abantu bengasini kodwa bengaguli ndawo bengonanga lutho. Kuthiwa, “Akakwazi ukusina lomnumzane ngoba umkakhe akamqhoyisile.” Le Ngilozi yafika bantwana baseKuphakameni, yafika phezu kosizi lapho okwakuthi khona noma umuntu ekholwa, egcina umthetho kaNkulunkulu, kodwa eshumayela azisa abantu indaba kaNkulunkulu, uma abantu bebuthene lapho beqoqwa yilowo muntu okhuthele njengomuntu okholwayo, kodwa ongabanga nawo amandla okuthi aqhoyise umkakhe, zazithi uma sezifika izikhulu zebandla sezizobheka ukuthi ikuphi lapho kudingeka khona umshumayeli, ikuphi lapho kudingeka khona umkhokheli, bese ziyafika kuthiwe, “Cha akakwazi lomnumzane ukuba umshumayeli ngoba akamqhoyisile umkakhe.”
18.Bantwana baseKuphakameni bese kuthathwa umuntu ongakholwa umuntu oziqhamukele ofuna nje udumo lokuthi kuke kukhulunywe ngaye. Ongakholwa nje umuntu, uma ngithi ongakholwa angisho umuntu ophendukile, ngisho umuntu nje oliNazaretha ozalwe la, kodwa ongenandaba nokukholwa, kuphela waganwa inkosikazi yayo yangena kahle, waganwa kahle wacela intombi yezambatho, kwangena isambatho esikuhlaza emzini kayise, kodwa akakholwa, akanandaba noNkulunkulu. Bese kuthiwa-ke nangu umuntu okufanele abe umshumayeli ngoba uganwe kahle uganwe intombi yesambatho esiluhlaza! Kungabukwa ukuthi lesi sembatho siluhlazela uNkulunkulu yini, noma sihlazela yena! Akanandaba noNkulunkulu, agcosthelwe lokho kuphela angagcotshelwa ukuthi ukholiwe. Lowana alahlwe kuthiwe akakwazi ukuphatha abantu ngoba akabanga nawo amandla okuqhoyisa umkakhe!
19.Kodwa ibandla asebezogcoba kulo liqoqeke ngalomuntu, lona okuthiwa manje akakwazi ukuba umshumayeli. Yafikela iNgilozi-ke osizini olunjalo, nakuba kuyigugu kuleli bandla, sijabula sitshakadula sibona abantwana bethu begana bezuza umqhele wezintombi zala eKuphakameni, kodwa akubukwa lokho uma kukhulunywa indaba kaNkulunkulu. Yafike yathi iNgilozi akubukwe ukukholwa, ngoba uNkulunkulu ufuna umuntu omesabayo.
20.Ngithi-ke bantwana baseKuphakameni yafika iNgilozi yakuqeda lokho, yathi, “Cha abantu abangahlali bangangeni emgidini bavinjelwe ngokuthi abanalutho, abavinjelwe ukungakholwa kwabo.” Yahlukanisa iNgilozi, yachaza ukuthi uShembe wafika nomshado wasezulwini, yathi, “Lomshado ofunwa kubantu umshado wabantu owenziwa ngosiko lwesizwe samaZulu akusiwona umshado kaNkulunkulu owabekwa nguNkulunkulu kubantu abakholwayo!”
21.Saqala manje savuleka amehlo, besikade singaboni sonke, bakhululeka kanjalo abantu, kwathiwa abantu abalahlwe ukungakholwa, abangalahlwa ukuthi bavinjiwe bavinjelwe izinto ezingamasiko abantu, hhayi amasiko kaNkulunkulu. Babefika begqoke izembatho kuphela bengawufaki u-14, iNgilozi yasicacisela ukuthi u-14 uyibhande elafika ngokukholwa, elafika noShembe umuntu wasezulwini, wathi wonke umuntu osehlanganisiwe oseshadile uyofaka leli bhande. Kodwa lelibhande lagcina seliboshwe ezimbuzini, kuthiwa kufuneke liqale liboshwe yimbuzi ingakahlatshwa, kuthiwa-ke ukuze-ke lelibhande likwazi ukuthatha abangasekho, ukwazi ukwaziwa emndenini lapho ugane khona kwakushwelezwa kushiwo ukuthi, “Cha ubopha lelibhande ngale mbuzi, kodwa kuseza okukhulu,” lokho ekufanele kwenzeke, anembeswa, uyacelelwa nje ukuthi aboshwe lelibhande, kodwa laliqala liboshwe khona embuzini iphila, bese no-14 lona wasekhanda uboshwe ezimpondweni zembuzi, bese uyathatha-ke usuyaboshwa, laphayanake kuthiwa-ke usuphelele, kodwa kuza umuntu wasemndenini azokhuluma nabalele, kwakungakhulunywa lutho noNkulunkulu, kwakukhulunywa nabantu balapho okugane khona lomakoti.
23.Ngithi-ke wafika bantwana baseKuphakameni wayibhidliza leyo mithangala eyayibophe abantu ukuthi bakhonze uNkulunkulu ngokukhululeka. Wathi abantu bonke abebevele sebehlanganisiwe wathi ababoshwe amabhande ngoba bahlanganiswa, bawenza umshado okwakungowasezulwini, loyo uShembe afika nawo. Beza abantu begijima bafike baboshwa kwathiwa izinsizwa azingene emgidini, azingene emgidini umuntu akaboshwe isono angaboshwa ukuthi akanalutho. Yilokhoke okwenziwa iNgilozi, yabona ukuthi ikwenzile lokho sesikhululekile bantwana baseKuphakameni yaphinde yabheka, yabheka abantwana bethu laba bamantombazane abahambe bahamba bayengwa nguSathane abakhiphe ebuhleni babo, yababuka labantwana yathi labantwana bayophelelaphi ngoba bangaphakathi esontweni?
24.Ngoba bese kukhona khona ukuthi bagezwe bahlanjululwe bangene esontweni. Yathi, “Laba bantwana ngoba bakhona baphakathi esontweni, bayibandla nabo likaNkulunkulu ngoba bageziwe bathethelelwa bangeniswa phakathi ebandleni. Ngalokho nabo bayibandla elifanele ukungena emgidini kaJehova, kufanele benze isifungo sokuthi abaseyobuye baphinde bayengeke kodwa sebeyozigcina balinde isibusiso abayosiphiwa uNkulunkulu ukuthi bashade.”
25.Kwaba njalo bantwana baseKuphakameni wayiqopha imvunulo yabo, yathungwa imvunulo, amantombazane aqala aba ngabantu. Yile Ngilozi eyabuza ukuthi, “Uma umuntu enesono enecala uyangena yini eThempelini?” impendulo yathi uhlala ngaphandle, yabuza yathi, “Abahleli ngaphakathi basuke benecala yini?” kwathiwa, “Cha kusuke kungabantu abangasenalo icala.” Yathi-ke iNgilozi, “Lamantombazane athethelelwe, lawa angaphakathi,” ngalokho-ke enzelwa imvunulo amantombazane angena emgidini agida, aphucwa amagama amabi ayethiwe wona ethiwa yizinsizwa zakuleli bandla, laphoke ebesikade sikhona izolo. Babebizwa ngamagama kuthiwa ngama phulaphiko, kuthiwe… angeke ngiwaqede amagama ababebizwa ngawo, kuthiwe izintombi zentethelelo, kukhona amanye nje ahlambalazayo, kodwa bangaphakathi esontweni. INgilozi yabuza umbuzo yathi, “Kungani umnikelo wabo umukelwa ngoba uma kunikelwa akekho umuntu oma eceleni athi ‘laba abangama ntombazane asebephule umthetho banganikeli.’ Laba bantwana bayanikela, umnikelo wabo umukelwe, kodwa uma sekuyiwa emgidini kuthiwe abakwazi ukugida, bese bevuselwa amacala, lamacala lawa abathethelelwe ngawo ngaphambi kokungena esontweni.”
26.LeNgilozi yathola amantombazana ekhohliswa kuthiwa, “Angeke angene ezulwini uma ngabe engaganile.” Yafika leNgilozi yalibhidliza leli vangeli lamanga yathi, “Ezulwini kungena umuntu ogcina umthetho kaNkulunkulu. Noma ngabe ngubani, uma ngabe egcina umthetho kaJehova emesabile uNkulunkulu njengoba eshilo uShembe, lowo muntu uyongena ezulwini. Umuntu akangeni ngokugana ezulwini, baningi abantu abaganile abame ngaphandle kwezulu abalahlelwe ukona kwabo.
27.Wathi akusilo iqiniso lelo, naye uShembe akakubhalanga lokho, wathi asigcine umthetho sesabe uJehova, akukho lapho akhuluma le nganekwane esase sitshelwa yona. Kwathiwa amantombazane awagane noma ubani, angafanele ukuthi ale, kuthiwa awagane noma ubani, esenzela nje ukuthi uma efa engene ezulwini.
28.Yabuza ingelosi ukuthi inhlalisuthi yona, njengoba kuthiwa laba abagane noma ubani, inhlalisuthi yona, ngoba amantombazane amaningi, izingane eziningi zazingoniwanga ngabantu bokuhamba, zazoniwe khona ngaphakathi ebandleni, kodwa labo abone lama ntombazane athukwayo, laba abone lamantombazane aboshiwe, ekungafanele angene emgidini nasesidlweni bona babegida, bevunyelwa ukuvunula bengene emgidini, bengena esidlweni bona. Baphinde bavunyelwe futhi ukuthi bayothatha, bavunyelwe ukuthi bayocela, acele intombi? Kodwa kunomuntu oboshiwe, eboshelwe yena, kungashiwo lutho?
29.Yathi-ke ingelosi cha, kulelibandla ngoba ibandla likaNkulunkulu, umuntu akaboshelwe ukuphula umthetho kaJehova, akangaboshelwa izinto zasemhlabeni, izinto zabantu. Akhululeka-ke amantombazane, laphela igama elibi. Kwaqala la e-NCG ukuthi kube nombutho wamantombazane lawa anabantwana, angasesiwo amakhosazana, ukuthi abe nomgidi. Khona le ngelosi bayithuka kunjalo, sathi sibabone abanye sababona sebeyenza lento. Yenziwa lento, yenziwa lento manje, kodwa yenziwe ilengelosi okuthiwa idimoni. Baqala manje amantombazane aba ngabantu, sesiye sibone, asaqoqekile amantombazane, nabo sebezama ukuthi bewaqoqe, kodwa abakafiki kulelivesi leli lokuthi amantombazane awangene esidlweni, abakafiki lapho ngoba abakwazi ukufika lapho, uma bezakufika lapho kuzowa ikhampani yomsamu yalaba abaphethe umsamu ngoba indaba yabo ihamba iyovaya khona emsamu ukuthi kusafanele ukuthi bayocela intethelelo, bayohlaba koyisemkhulu, bayocela khona kubo oyisemkhulu!
30.Angisabi ukukusho ukuthi kuwo wonke amabandla aholwa abantwana noma abazukulu boMprofethi, uthi mawufika khona, uyaye uzwe kwesinye isikhathi kukhulunywa ngoJehova, kodwa uma usufika khona, unikezwa oyihlomkhulu, kuthiwa naba oyihlomkhulu. Uma usufike khona awunikezwa lo Jehova uShembe akhuluma ngawo nasezihlabelelweni, uma usufike khona unikezwa oyihlo mkhulu, kuthiwe nampa oyihlomkhulu, akusibo noyihlomkhulu bangampela. Unikezwa amabutho, amabutho omubi. Wephucwe nesibongo sakho ozalwa kuso, unikeze isibongo osinikwa ilamabutho, ukuze uzothi uma umemeza bese wehlelwa inkindlankindla yokuhlupheka!
31.Ngithi-ke bantwana baseKuphakameni, yasinikeza lelivangeli, yasibuyisela evangelini elidala. Kula e-NCG kuphela lapho insizwa nentombi iganwa ngomthetho kaJehova kuphela, kungalukwa macansi, akukho zibizo ngoba siyibandla likaNkulunkulu kuphela. izibizo, zivaya emsamu. izibizo, yinto ebizelwa bona abangasekho, nokuyomemeza, kwagcina kuvaliwe ngoba uma uyinsizwa yomNazaretha, usathumela abantu ukuthi bayomemeza, bayomemeza imimoya yakweminye imizi, bathi bayakhuleka, bayokhuleka emimoya eyahamba, kodwa eyakini awusayimemezi, kwavalwa ngoba siyibandla likaNkulunkulu, siyibandla likaMenzi wezulu nomhlaba!
32.Ngithi-ke bantwana baseKuphakameni ngikhumbula lapho uJehova esithanda, esifica siboshiwe, siyiziboshwa, siboshwe ngamasiko esizwe sakithi KwaZulu, kodwa kwase kuthiwa akathathwe kuchithwe ngawo amasiko okukholwa, kuchithwe ngawo umthetho kaNkulunkulu.
33.Ngiyadlula lapho bantwana baseKuphakameni, ngiya ezintweni eyazisho ingelosi, ingelosi bantwana baseKuphakameni, yakhuluma yasho yathi, lelibandla lamaNazaretha lisazoba inhlekisa phambi kwabantu. Izinhlamba ezazibheke kuBaba uMelusi zazihlasimulisa umzimba, kuthiwa manje ngeke bezwe ngedimoni, inamanga, kwasha kwacima, kodwa akekho umuntu namuhla ongabuza ukuthi lelibandla lamaNazaretha liyinhlekisa kanjani!
35.Ngithi-ke bantwana baseKuphakameni, sake sasuka ngenye imini, ithe ingelosi, cha, awukwazi ukuthi ungaba ngumholi lapha ebandleni lamaNazaretha kaNkulunkulu ungayi konyathela entabeni eyingcwele yaseNhlangakazi. Sase siyahamba siya khona. Ngaphambi kokuya khona, kwenziwa yonke imicibilisho eyenziwayo, yokufaka isicelo kuMasipala. Kwenziwa lokho, bahamba abagcotshwa bayokwenza.
Kwase kuyafikake umzukulu weNkosi iLanga, uSizwe, sambona esekhuluma emaphephandabeni ukuthi asisoze sakwazi thina ukuthi siye lapho ngoba asiholwa umuntu wakwaShembe. Wathi amaNazaretha akwaShembe awahlangene wonke sivinjwe singayi lapho. Kodwa ngoba uNkulunkulu esamba naye, sasingahambi noNkulunkulu waseMhlabeni, sahamba saze safika eNhlangakazi, saphepha futhi saze sabuya, sakwenza lokho okwakuthiwa asikwenze, sakhuphuka sahamba.
37.Futhi uBaba uMelusi akakaze aye lapho okwahlala khona uMprofethi namakhosi amlandelayo, akazange aye ngoba wayewumuntu ozohlonipha uJehova, owayengazile ukuzozilinganisa noBabamkhulu nabamlandelayo. Wayengeke akuboshelwe lokho ukufika ahlale lapho khona okuhlala abantu bakwaShembe, futhi akasabanga bona ukuthi ahlale khona. Wahamba wayofika phezulu entabeni yomhlangano, safike sasina sabuya.
38.Ngithi-ke bantwana baseKuphakameni, ngiyazidinga ezokumbonga, aqhamuka amazwi, aqhamuka ngapha nangapha, ayegxeka ukuya kwethu entabeni yomhlangano namaNazaretha ezinhlangothi zonke, ayekugxeka lokho.
39.Kodwa okungimangalisile bantwana baseKuphakameni, enginganayo incazelo yokuthi ngingachazelwa ubani kulokhu, simangele kulonyaka odlule noma loyana, sezwa emaphephandabeni kuthiwa abantu abahola amabandla ezingane zikaBaba iLanga, kwathiwa hhawu kuhle bayohlala bonke entabeni yomhlangano, kwaze kwahalaliswa kwabongwa, kwabongwa ngabantu, kwathiwa awube khona umoya wobumbano.
40.Nathi futhi sakujabulela lokho ukuthi kulungile, ngoba asikujabuleli ukuthi balwe nathi bodwa. Bahamba bantwana baseKuphakameni lwafika usuku sithi nathi sizobuka khona izithombe abaholi behleli bobabili entabeni yomhlangano noma kuyinto eyayingazange yenzeke ngaphambilini, kodwa sasihalalisa sithi kulungile akube kuhle.
41.Kodwa kulokhu isibonelo, sabona esithombeni yena lona owayethi singayi eNhlangakazi asisibo abakwaShembe, indodana yenkosana uNkanyezi ehola abantu ngapha eGinyezinye, sambona esehliswa, sezwa izikhulu zakhona sezisho ukuthi wehliswe ngesibhamu. Ngangabe ngisaqondake ukuthi kanti kwenzakalani ngalomholi, ngoba uthe yena thina asikufanele ukuya eNhlangakazi ngoba asibona abakwaShembe, wehliselwani yena ehliswa entabeni yakubo. Thina, sehla kahle, asizange sehliswe ngesibhamu, sakhuphuka nje kahle, saphinda sehla futhi kahle.
42.Siyazidinga ezokumbonga, sasifakazelwa uJehova ukuthi leya ntaba ayisiyona intaba yezingane zakwaShembe, kodwa intaba yokukhonza uJehova. Ngithi-ke bantwana baseKuphakameni kwangimangaza lokho ukuthi usehliselwani yena manje, usexoshwa kulentaba abethe akuxoshwe thina kuyo?
43.Uthi-ke uShembe, wachitha icebo laba cebi babo, uJehova walichitha icebo yena ayelicebele thina ethi akube ithina esehla kanjalo, kwaba nguye. Ngithi-ke le ngelosi yasho yathi lelibandla lisazoba inhlekisa, ayikho inhlekisa edlula lokhu esekwenzakele!
44.Sithena sisahleli, sathola kuthiwa iNkosi iNyangayezulu yayiyilokhu nalokhu, ithukwa abazukulu bayo! UBaba uMelusi wasukuma wakuphikisa lokho okwakushiwo ngeNkosi iNyangayezulu okwakukade kungamanga! Kodwa okwalandela lapho kwaba ukuthi eboshwe, eseboshiwe, wabuye wahlehla, wathi cha asikuyeke konke okwayizolo, asibuyele kuShembe, asibuyele kuJehova, sivulele amasango, siyobeka imbali, siyibeke kuMprofethi wethu.
45.Akuzange kube njalo, waba mkhulu kakhulu lo mntwana, wabamkhulu kakhulu kunakuqala, abalandeli bakhe babelwa noBaba esashumayela naye, bathi ushumayela kanjani noNkulunkulu ewumuntu yena. Ngithi-ke bantwana baseKuphakameni asikwazi ukukushiya emuva okwakwenzeka izolo, ngoba ikhona okuzokwakha umlando walelibandla.
46.Wathula uJehova walalela, baqhubeka abantu baseKuphakameni bathi nguJehova uShilo, wathula uJehova walalela ukuthi ngubani lona okuthiwa nguJehova lona okuthiwa unguShilo, kanti mina ngingubani? Ngenye imini umuntu wakhona lapha eKuphakameni wabhala phansi wathi kufanele amaNazaretha akwaShembe ahlangane, abulawe uBaba uMelusi, kodwa akavumi ukuthi amaNazaretha ahlangene ayobeka imbali kuMprofethi wawo. Kodwa okufanele ukuthi amaNazaretha akuhlanganele, kufanele ukuthi ahlangane abulale uBaba uMelusi!
Akekho-ke namuhla umuntu obulawa ngenye into, sinye isikhali sezinsuku zanamuhla, akusesikho ukuthi uyobona umuntu ephethe izinduku ezolwa nawe, ayisekho indaba yezinduku, kwaphela konke kwaphakama isibhamu!
47.Ngithi-ke bantwana baseKuphakameni lo Jehova esimlandelayo, athi uShembe wachitha icebo laba cebi babo, wamlwela uBaba uMelusi, wathi lesi sikhali okwakuthiwa asigcinelwe ukuthi simbulale, sathi sizwa sezwa kuthiwa besiqhuma khona eKuphakameni. Asikwazi ukukugega lokho, futhi asikwazi ukuthi bese siyakuhlonipha lokho singakusho.
48.Kwaphuma emaphepheni ukuthi bekuqhuma isibhamu, siqhuma ngeSabatha, okwathi uma kubonakala ukuthi ngabe kwenzakalani, kwabonakala ukuthi kukhona izinto ezingasahambi kahle, imoto engathi iyawuchitha u-oyela, engathi iyavuza, kukhona lapho okuvuza khona u-oyela!
49.Bagijima abazana nayo, beyithatha beyibamba beyiyisa ema garaje, lesi sbhamu, ilesi okwakuthiwa kuzodutshulwa ngaso uBaba uMelusi. Uthi-ke uJehova ake sibe ngakuwe, sibheke ngakuwe. Laba abafakaza, bebona ukuthi umholi wabo unkulunkulu, bebona ukuthi uwunkulunkulu ngempela uma ethuka uBaba iNyangayezulu, uNkulunkulu waphendula ngenye indlela.
Waboma ukuthi uNkulunkulu lokho kuyafihleka, bayakugqiba, noma uthi uyabuza bakumbesa ngento enhle, bethi hhayi kwakukhona nje ukudideka, uwumuntu onolaka. Awu unkulunkulu ophatha isibhamu, unolaka, udubula abantu obaphethe, kanti unkulunkulu nje uphethe isibhamu? Sathula, wabuya uJehova ezolanda igama lakhe, ezolanda udumo lwakhe!
50.Sathi sizwa sezwa kuthiwa sekukhona umuntu ongasahlali lapha, kodwa osehlala lapho azoboshwa khona nangeSabatha, ngoba useyahlanya! Ayikho inhlekisa enjenga leyo ngoba lelibandla lokhu laba khona emlandweni ayikaze yenzeke into efana naleyo, ithi ingelosi lelibandla lisazakuba inhlekisa phambi kwabantu, athi amaNazaretha ayikho leyonto leyo.
Namanje bayahleka abantu, bahleka ngapha nangapha.
51.Sithe sisathi silalele lokho, sathi sithi sizihlalele nje, sithi sihleli, sezwa kuthiwa kade kungene oMaskandi kolunye uhlangothi, beyogida ethempelini ngezimbadada, sezwa kuthiwa yathi enye insizwa yakhona sengiyahamba, ngizwa kuthiwa sekuza uZodwa wabantu, uza khona lapho endaweni kaNkulunkulu, wathi ngifuna angifice ngingasekho!
52.Bangena oMaskandi emzini kaNkulunkulu, bagida khona, ayikho inhlekisa edlula lokho, bakugubazela, bakugandaya, bakugubezela lokho, wathula nje uNkulunkulu. Zaqhubeka izinhlamba ezithuka uBaba uMelusi kuthiwa ungumuntu ntu, akakwazi ngisho ukusukumisa isishosha, akakwazi ngisho ukwenzani, kwathiwa kunabantu abathathu, ibandla lakhe kalikhuli, kwathiwa abanye balandelwa izigidi nezinkulungwane, ngoba izigidi zibona ukuthi bangonkulunkulu, kwathiwa unkulunkulu ubonakala ngokulandelwa amakhosi.
53.Bathi kwamanje, uMprofethi walelibandla uyobuya esiqwini sesihlanu, kwathiwa hhayi usewuBabamkhulu. Sithe sithi siyathula sithi mhlawumbe kunjalo, sabona sekuphuma emaphepheni kuthiwa unkulunkulu ukhalela u R30 million wakhe, ubekade ewunikeze Ilunga lebandla ukuthi liyomgwazela, ligwazele amajaji! Bantwana baseKuphakameni le nhlekisa eshiwo ingelosi beyiphika, ayikho inhlekisa edlule lokho bantwana baseKuphakameni.
54.Okunye esengikweqile, ngelinye ilanga kwakungu September, le nyanga ka September asenzi lutho ngayo, asiwenzi amadili okujabula ngoba inyanga esisuke sikhumbula ngayo iNkosi iNyangayezulu. Sathi siyabona, sabona kunomkhulu umdanso, kwathiwa kunedili, kuthiwa manje bekunosuku lokuzalwa kwenkosikazi yalapho, kudansa amakhosikazi kwakungathi kuyahlanywa lapha, adansa amakhosikazi, adansa no president wawo.
55.Ithi-ke ingelosi lelibandla lisazokuba inhlekisa, ayikho inhlekisa edlula lezizinto engizibalayo. Namhlanjena, bayasihleka abantu, usuthi mawuthi uyiNazaretha, bethi wena ungakuphi, ukuloyana obethi udizela amajaji. Uthi uthi uyangapha uyiNazaretha bethi wena uyangapha kulo okuthiwa kade ehlanya kulezi zinsuku. Awusakwazi ukuthi uyiNazaretha kubantu, usuyesaba, usaba le nhlekisa, eyamenyezelwa, yaphikiswa.
56.Uma ngithi ngiyazidinga ezokumbonga, ngibonga ukuthi yonke into eshiwo ile ngelosi, yenzekile. Kwakuthi uBaba uma ekhuluma ngezinto, ezisho ukuthi zazingenziwa eKuphakameni, ahlaselwe iwo wonke amabandla, ngisho naseThembezinhle, kodwa namhlanjena sibona uMvangeli wakhona esehamba ecosha, ehamba eyomonyula emgodleni kuBaba uMelusi, azakhela udumo, afuna kuthiwe uyincitha buchopho, kodwa akha ngamaqubu enye inyoni!
Ucabanga ukuthi izwe kaliboni, ngoba yonke into uBaba uMelusi ayikhulumayo ibhaliwe, bonke abantu bayambona ukuthi uhosha lapha. Sewavula-ke indawo yakhe lapho athatha khona izintshumayelo zikaBaba ayemthuka yena, emthukela lokho emphikisa, namuhla, simbona manje esakha udumo, elwakhe ngezinto uBaba uMelusi ebezikhuluma ethi zishiwo ingelosi, simbona namuhla yena esezakhela udumo.
57.UBaba uMelusi wayengakhi udumo, wayakha udumo luka Jehova, kodwa simthola akha udumo lwakhe efuna kuzothiwa uhlakaniphile, kodwa wayemethuka uBaba, emthukela lezi zintshumayelo, lezi yena asezakhela udumo ngazo. Uthathe izintshumayelo zikaBaba, ezenza umuntu ohlakaniphile ngazo. Bekungenankinga, kodwa wamthuka, emthukela ukuthi ukhuluma into engafanele ayikhulume, athuke, aze athuke ngisho nayo le ngelosi. Ngithi-ke bantwana baseKuphakameni, ngithi ake ngithi siyazidinga ezokumbonga, umlando wakhiwa ngokwayizolo, uma ngabe ungenakho okwayizolo, umlando awukho, ngeke lelibandla libe nomlando uma ngabe singakhulumi izinto ezenzeke izolo, abanye abantu abazidingayo ngoba bebengekho izolo ukuthi le ngelosi, zonke izinto ezenzekalayo ingelosi yayizishilo!
58.Ngingakusho bangcwele ukuthi noma bebuka uHlaleleni kodwa zikhona izingelosi abangaziboni, sanikwa uChitha abamchithayo, sanikwa bantwana baseKuphakameni, sedlule lapho okungadluli khona muntu, ngoba samba noChitha abamchithayo. Namhlanjena ababekade belungise izibhamu, ababe kade bethi akabulawe lona, waqhamuka uChitha abamchithayo, wachitha bona, babonakala begijima phakathi kwebandla behamba bedubula izimpukane!
59.Ngithi-ke akabongwe lo Jehova esihlangene ngaye, ngizwe ngikhumbula bantwana baseKuphakameni ukuthi bathi lizophela lelibandla, kanti bahlola ukuthi lizokhula!
Ngithi angisho ukuthi likhona lelibandla eGoli, selikhona emalokishini ahlukene, nalapha KwaZulu likhona lelibandla, likhona e-Mondlo, likhona e-Newcastle naseMnambithi, likhona eMpangeni manje. Umlilo kaJehova uvutha ngaphakathi kwezinhliziyo zethu, alikwazi ukungaba bikho!
60.Konke-ke okuthiwa asikwenze nangeminikelo, sakwenza sanikela, uNkulunkulu wasisindisa, uNkulunkulu wasipha, sibaningi, esesibonayo ukuthi ukukholwa kwethu kusisebenzele!
Isihlabelelo 246
Ukukholwa kwami kuyangisebenzela
Kuyangisebenzela!
Yikho lokhu ngiphumelela!
61.Siphumelela ngokusetshenzelwa ukukholwa kwethu, namhlanjena, babedilizwa, kuthiwe abantu bayadilizwa, kodwa kwabonakala ukuthi uma ngabe sekudilizwa, kuzodiliswa uMfundisi wakithi, uMfundisi uNtuli waseGoli. Bantwana baseKuphakameni kwabonakala ukuthi izingane zizolala zingadlile, zizophuma esikoleni, nendawo ahlala kuyo izophela, ngoba akasenakho okokukhokha. Kodwa wahamba ngoba ephethe lelivangeli, ephethe lelithemba, elingasilo ize, esalinikwa nguShembe, wase eliphatha uMfundisi, ehamba naye eyokuma, eyobheka ukuthi uyaxoshwa yini noma uyasala.
62.Kodwa yafika ingelosi kaThixo, yabheka, yambona, yamthola, yambuka emabhukwini, nasemnikelweni yonke, yamubuka ukuthi wenzeni, yase iyakhumbula ukuthi wahlanganaphi noNkulunkulu, yase iyakhumbula, yamkhumbula mhlazane ethemba, yamubona ukuthi loyana lathi uma limemeza izwi, lithi abantu ababuyele kuJehova, naye waphuma, waphuma esinyokothweni, weza, weza entweni abengayazi, kodwa edonswa, edonswa igama lokuthi akubuyelwe kuJehova!
63.Yaphinda ingelosi yamubuka ukuthi wenzanjani, mhlazane kuphuma imbhenge, kuthiwa abantu abafake izicelo, abafake ama CV abo khona, lase liyafika izwi khona ngeSabatha, lathi wena usuwutholile umsebenzi, lathi khuphuka ungaphethe ngubo, uzohlala. Wafika uMfundisi wakithi wangena wasebenza.
64.Lase liyabuka, yase iyabuka ingelosi ukuthi wathi uma eselapho, wayesenzani, yase iyamthola ukuthi walinda eyedwa eGoli, walinda kwaze kuba liyasunguleka ibandla, wahlala uMfundisi kulelibandla, wangaphephuka, wangabona kuyihlazo ukuthi uyedwa, laphenjwa ibandla bantwana baseKuphakameni. Lathi uma seliphendliwe ibandla, bagcotshwa abantu ngapha, uMfundisi akazange asho ukuthi mina, imina engimdala, mina lelibandla ngisuka nalo eThekwini, mina ngamukela lelibandla ngiseThekwini, angikwazi ukuthi ngingaphathwa abantu abaphenduka lapha! Wahlala waphathwa ilabo bantu ababekade bephendukile, yena esuka nalo lapha bantwana baseKuphakameni.
65.Yabuka le ngelosi ukuthi wenzanjani uMfundisi, yathola ukuthi wayekade ekhonza, yamthola ukuthi ubekholwa, yase iyamubuka ukuthi wenzenjani khona esengumfundisi, yase iyathola ukuthi wenzeni, kwathi uma sekufika lapho okufanele kudilizwe khona, uMfundisi, lathi izwi yena uyasala, badilizwa abantu, abadala kunaye, badilizwa ngisho ababemhlupha, badilizwa nabantu ababemphethe, wase eyabona uMfundisi, kwase kuyamusebenzela ukukholwa kwakhe, kwamusebenzela lapho, kuze kube namhlanje!
66.Ngithi-ke bantwana baseKuphakameni ileyoke indaba esiphethe, siphethe leyo ndaba lapha kulelibandla leli ukuthi singamkhohlwa uJehova, futhi singakukhohlwa ukuthi nabantwana bethu sibafundise ukudumisa, singavumi ukuphucwa lokhu kukhanya bantwana bokukholwa. Nami, ngithi nami ngenye imini, ngiyoke ngikhulume nami eyami indaba, kodwa ngikhuluma nje ukuthi sasizokhala sonke ukuthi nje uMfundisi nkosi yami uzophuma abhekephi nabantwana, kodwa uShembe wathi cha-ke ukukholwa kwakho, walihlola ibhuku ngoba kakubani liyohlolwa ibhuku lemisebenzi yakho ukuthi wena umi ubhekephi?
67.Kodwa-ke uyothi uma esethola ebese ethi akakufanele lona ukuthi angakhala, engehlelwa isililo, akakufanele lona ukuthi engalahlakelwa umsebenzi. Bantwana baseKuphakameni sibabonile bangcwele abantu bezishaya izifuba, sezwa, noma singabonanga ngamehlo, sezwa ngezindlebe, efika uMfundisi wakithi, esebenza, esebenza emsebenzini oyingozi bantwana baseKuphakameni wokulwa nezigebengu, wokulwa nabantu abangafuni ukubona abantu ababaphikisayo ekwebeni.
68.Kodwa wabakhona umuntu owafike watshelwa uMfundisi uMdlolo ukuthi hhayi, useyahloma ngapha uthi kufanele abulawe uMfundisi, kusho umuntu, uMfundisi weza kuJehova wathi Nkosi, ngiyacela ukuthi ungikhumbule ezinsukwini ezifihlakele, engingazazi ukuthi zizofika nini, nangu umuntu eqoqa abantu ethi kufanele ukuthi ngibulawe.
69.Kodwa-ke uChitha abamchithayo kwabuthana labo bantu ayethi bazobuthalena uMfundisi, babulala yena, kwafa yena, ebulawa amabutho, ebulawa izikhuni ekade ezikhwezelela abanye abantu, kodwa zashisa yena, sihamba noChitha abamchithayo!
70.Bantwana baseKuphakameni ilawa amazwi uJehova okade engithume ukuthi ngiwadlulise ebandleni nokukhumbuza ukuthi singakhohlwa ukuthi ngosuku lwenhlupheko, simubize uyakuza asisindise!
INkosi ibusise!