Isithi-ke ingelosi: “UShembe wathunywa nguye lo owayebonwa nguJohane esesihlalweni ekakwe amalunga angamashumi amabili nane. Wathunywa ukuba ezovuselela ubuNazaretha okwathi emva kwaYeshua kwaqedwa ngabezizwe.
Uma nina senithi uShembe nguNkulunkulu, nisuke senimnyundela kulona ohleli esihlalweni sobukhosi; ngoba nisuke senimlinganisa nalo owamthuma lapha emhlabeni!
1.Imini yeSabatha ayibenhle kwabangcwele. Isihloko salentshumayelo sithi,” uJehova nebandla lamaNazaretha.”
2.INCWADI KA-LEVI 20:26: “Yibani ngcwele kimi, ngokuba mina UJEHOVA ngingcwele, nginahlukanisile nabanye abantu ukuba nibe ngabami.Amien!”
3.Empilweni yami yonke ngingumuntu ohlale eshumayela kakhulu ngevangeli likaShembe nobuNazaretha.
4.Kusukela eminyakeni yama-80’s ngangihlale ngenza ucwaningo ngoShembe, ngabhala izincwadi eziningi ngaye, ngaya nasezikoleni eziningi zemfundo ephakeme ngichaza ngoShembe nobuNazaretha.
5.Ngangikholwa ukuthi uShembe uvela ezulwini; noma eyami imfundiso-nkolo ngalokho yayingachazi ukuthi uShembe unguMdali wezulu nomhlaba, njengoba namanje ngimi kulokho!
Kodwa ngokucwaninga isihlabelelo 139, ngathola ukuthi uShembe uthi unguMoya ongcwele uYeshua owakhuluma ngawo KuJohane16.
6.Mina ngangihlale ngifundisa ngoShembe, kodwa ingelosi yafika yathi UTHI USHEMBE UYABONGA NGOKUHLALE UFUNDISA NGAYE, KODWA MANJE SEKUMELE NGIFUNDISE NGOJEHOVA! Ukuhlale ngifundisa ngoJehova kusukela lapho-ke!
7.Ngelinye ilanga ingelosi yachaza kabanzi ngencwadi yeSambulo kusukela kusahluko 4 kuya ku-5.
8.Kulesi Sambulo uJohane uthi waba seMoyeni, wabona isihlalo sobukhosi, nohleli kuso ekhanya kakhulu; ehaqwe uthingo lwenkosazane.
9.Lesi sihlalo sobukhosi sasihaqwe zihlalo zobukhosi ezingamashumi amabili nane, zihleli amalunga afake imiqhele yegolide emakhanda; embethe izingubo ezimhlophe.
10.Kunezidalwa ezine ezazilokhu zihalalisa zithi, “Ingcwele, ingcwele iNkosi uNkulunkulu uMnini mandla onke; owayekhona, nokhona, nozayo!”
11.Lapho izidalwa zimdumisa osesihlalweni, namalunga angamashumi amabili nane awa phambi kwakhe, akhuleka kuye ophilayo kuze kube phakade naphakade!
12.Amalunga angamashumi amabili nane aphonsa imiqhele awo phambi kwesihlalo sobukhosi, ethi: “Ufanele wena Nkosi yethu noNkulunkulu wethu, ukwamukela inkazimulo nodumo namandla.
13.Ngokuba nguwena owadala izinto zonke; nangenxa yentando yakho zabakhona; zadalwa.Amen!”
14.Ithi-ke ingelosi, “Lo owayehleli esihlalweni ekakwe ngamalunga angamashumi amabili nane kwaku nguJehova; amalunga angamashumi amabili nane kwaku yizikhulu zaseZulwini ezimele izizwe zakwa Israel.”
15.Isiyaqhubeka ingelosi ithi, “Okufanele nikuqonde ukuthi lo owayesesihlalweni sobukhosi ekakwe zidalwa ezine ezazimdumisa imini nobusuku, namalunga angamashumi amabili nane nawo ayemdumisa, ethi:
16.“Ufanele wena Nkosi yethu noNkulunkulu wethu ukwamukela inkazimulo nodumo namandla, ngokuba nguwena owadala izinto zonke,”
17.lokhu kudumisa uJehova okwakwenzeka ezulwini, yikho okwakwenziwa nguMprofethi kusihlabelelo 66 lapho ethi:
18.”Thixo wami uyamangalisa; ubukhulu bakho buyakhazimula. Yeka ubuhle besihlalo somusa, ekujuleni kokukhanya okuvuthayo.
19.Hawu ukumangalisa; hawu ubuhle bakho, bokuzibonakalisa kwakho; ukuhlakanipha kwakho okungenamkhawulo; amandla akho anganakubola; nobungcwele bakho obungapheli.
20.Hawu ukukwesaba kwami Thixo ophilayo; ngokwesaba okumnene. Ngikukhonza ngethemba eliqhaqhazelayo, nezinyembezi ezinganqamukiyo.
21.Ngiyakuthanda Mkhululi, ngokuba usungithandile; ngokuba uthobele ukukuncenga ngothando lwenhliziyo yami empofu.
22.Akakho uBaba emhlabeni onothando olunjengolwakho; akekho nomame onjengawe. Mthwali wazo zonke izono zethu. Nezami mina moni olusizi.
23.Yise kaJesu, Mvuzi wothando. Hawu intokozo eyakubakhona; uma sesiguqa phambi kwesihlalo sakho; sigqolozela njalo kuwe, Amen.”
24.Isithi-ke ingelosi: “UShembe wathunywa nguye lo owayebonwa nguJohane esesihlalweni ekakwe amalunga angamashumi amabili nane. Wathunywa ukuba ezovuselela ubuNazaretha okwathi emva kwaYeshua kwaqedwa ngabezizwe.
25.Uma nina senithi uShembe nguNkulunkulu, nisuke senimnyundela kulona ohleli esihlalweni sobukhosi; ngoba nisuke senimlinganisa nalo owamthuma lapha emhlabeni!
26.Lamalunga angamashumi amabili nane ayaye aphenduke ahlasele uShembe, ethi, “kanti wena wathi uma ufika emhlabeni wathi nguwe uNkulunkulu; kanti awubafundisanga yini abantu ukuthi uyisithunywa sikaNkulunkulu?”
27.Ithi-ke ingelosi: “UShembe uyaye ekuphike lokho, bese eveza lesi sihlabelelo samaNazaretha esimfakazelayo ukuthi wafundisa amaNazaretha ukuthi ayodumisa uJehova yedwa.
28.Avule yonke imithandazo nezihlabelelo ezingubufakazi bokuthi amaNazaretha wawafundisa ukuthi ayokhonza uJehova ngokugcina imithetho yakhe owayiletha emhlabeni ngeNceku yakhe uMose.
29.Ithi ke ingelosi: “Kodwa lezi zikhulu zaseZulwini zimphikise, zithi, “Kodwa abalandeli bakho bathi nguwe uNkulunkulu.”
30.Bese uMprofethi uyajabha, ngoba okusuke sekwenziwa amaNazaretha kusuke kungasamfakazeli ukuthi wawafundisa ukuba adumise uJehova njengoba kubhalwe kuyo yonke imithandazo nezihlabelelo zakhe!
31.Ithi-ke ingelosi kimi, “Wena unguMfundi kaShembe; umele ukuqhuba ivangeli elifakazela uMprofethi ukuthi wathi uma efika phakathi kwamaNazaretha wawafundisa ukukhonza nokudumisa uJehova yedwa!
32.Uma ngingase ngikubonise la kuhleli khona uMprofethi, ungamangala ukubona indlela odumele ngayo ngokucekelwa phansi ngamaNazaretha kuwo wonke umsebenzi awenze lapha emhlabeni; yikho iNkosi iLanga igcizelela ukuthi ufundise abantu ukudumisa uJehova njengoba kwakwenza umprofethi. Amein!”
33. Lelivangeli ngelokuthi angifundise abantu ukudumisa uJehova, ngithathele ezimfundisweni zikaBabamkhulu efundisa amaNazaretha, ngalo ngifakazela uBabamkhulu ezulwini ukuthi wasifundisani ngokudumisa uJehova!
34.UBabamkhulu wathunywa eZulwini ukuzovuselela lobu buNazaretha okwakushabalaliswe ngabezizwe.
35.Kodwa emva kwakhe amaNazaretha amhlubukile uJehova; amphika noMprofethi wawo!
36.Ukuhlubuka uMprofethi ngokusobala ilokhu; ukuhlanganisa ubuNazaretha nokukhonza imimoya yabafile. Ubufakazi bokuthi into enjalo iphambene noJehova, siyithola kuyo incwadi ka-Levi 20:27.”
37.Lomuntu waseZulwini wabe esefunda incwadi ka-Dutoronomi 32:17-20, lapho kuthi, “Bahlabela amadimoni, onkulunkulu ababengabazi; onkulunkulu abasha, abasanda kuqhamuka; ababengesatshwa ngoyihlo.
38.IDwala elakuzalayo awusalinakekeli; ukhohliwe nguNkulunkulu owakudalayo.
39.Uma uJehova ekubona lokhu, wanengwa yibo,..wayesethi,” ngiyakubafihlela ubuso bami, ngibone ukugcina kwabo ukuthi kuyoba yini.”Amein!
40.Ithi-ke ingelosi kimi, “Umsebenzi owunikwe uShembe akulona ivangeli lokuthi uShembe nguNkulunkulu; kodwa ukufakaza ukuthi uMprofethi wawenza umsebenzi owayewuthunywe nguNkulunkulu, okungukuvuselela imithetho kaJehova uMprofethi owayifundisa amaNazaretha.
41.Ilokho okuzokwenza igama likaShembe libatshazwe emhlabeni naseZulwini; ahlale esihlalweni sobukhosi kanye nezikhulu zeZulu; ahaqe umbuso kaNkulunkulu ethwele umqhele wegolide.
42.Iyaqhubeka ingelosi ithi: “Umuntu eZulwini udunyiswa ngobuqhawe okubonakalise ngemiphumela emihle yemisebenzi yakhe esale emhlabeni..”
43.Uyaqhubeka lomuntu waseZulwini uthi, “Maningi amakholwa akhonza uNkulunkulu ngezindebe zomlomo, kodwa angazi lutho ngokuthi uNkulunkulu ufuna ukukhonzwa kanjani.
44.Emhlabeni uJehova akasakhonzwa, ngoba ngisho abantu abathi bakholiwe; esikhundleni sokukhonza uJehova, baqophisana ngokukhonza izithunywa zakhe!
45.Umphumela walokho ukuthi esikhundleni sokuthi amakholwa azihluphe ngokufuna indlela eqondile ayifundiswe ilezi zithunywa, wona avula umqhudelwana wokuthi isiphi isithunywa saseZulwini esingunkulunkulu omkhulu kunezinye! Amein!”
46.Lelivangeli elifike nengelosi lehluke lapho-ke kulamavangeli atholakala emhlabeni; ngoba lona alizile ukuzovula umqhudelwano ngezikhundla zezithunywa zasezulwini, kodwa libheka ukuthi uJehova usakhonzwa yini ngemithetho yakhe owasilobela yona ngenceku yakhe uMose!
47.Ingelosi yabe isikhuluma ngezinhlamba ezitholakala phakathi kwamaKrestu namaNazaretha, bethukana ngazo lezi zithunywa zeZulu.
48.Uthi lomuntu waseZulwini: “UYeshua wathi othuka iNdodana unokuthethelelwa, kodwa othuka uMoya ongcwele akanantethelelo; kodwa okuseqinisweni nothuka iNdodana akanantethelelo!
49.Uma amaKrestu ethuka uMprofethi angayithola intethelelo, ngoba ayothi ayengazi lutho ngoShembe; wona adukiswa ngamaNazaretha.
50.Kodwa amaNazaretha athuka uYeshua wona ngeke ayithole intethelelo, ngoba angeke akwazi ukuthi abengazi lutho ngoYeshua, ngoba uShembe uwafundisile ngaye! Amein!”
51.Onke-ke amaNazaretha kaNkulunkulu ayelulekwa ukuthi noma ungezwa umuntu ethuka uShembe, wena ungaphindiseli ngokuthuka uYeshua, ngoba lowo muntu ngosuku lokugcina angase akushiye esihogweni!
52.Encwadini engiyifundile uthi uJehova, “Yibani ngcwele kimi, ngokuba mina Jehova ngingcwele; nginahlukanisile nabanye abantu ukuba nibe ngabami.”
53.Amakholwa amaningi akafundiswe lutho ngobungcwele; akazi nokuthi kusho ukuthini lokho.
54.Asazi-ke ukuthi umuntu angasho kanjani ukuthi ukholiwe kodwa engekho esimeni sobungcwele; ngoba ubungcwele busho isimo sokuphila ngaphansi kwenqubo yomthetho kaJehova.
55.Uma umuntu ekukholweni ethi ungaphili ngaphansi komthetho, usuke ethi ungawugcini umthetho kaJehova njengokufundiswa nguYeshua noShembe!
56.Awukwazi ukungaphili ngaphansi komthetho; kodwa okwenzekayo ukuthi ungaphili ngaphansi komthetho othize; kumakholwa okusho umthetho kaNkulunkulu!
57.Lemfundiso-ke ithi; mbize uJehova ngezindebe zomlomo wakho uma ucela utho kuye, kodwa ungawugcini umthetho wakhe!
58.Yonke indlela yokukhonza nokudumisa uJehova, uNkulunkulu wayedlulisa kumakholwa ngoMose.
59.Akukho lutho uMose ongaludlulisanga kithi ekutheni uJehova ulindele ukukhonzwa kanjani; nabaprofethi abalandela uMose bakuchaza konke ngokuthi uJehova kumele adunyiswe kanjani.
60.Kodwa lemfundiso yamakholwa ithi mbize uJehova ngezindebe zomlomo wakho uma uhluphekile; kodwa ungakwenzi okufunwa nguYe!
61.KuJohane wesibili vesi 9-11 sizwa uMphostoli uJohane ethi, “Lowo oweqisayo, engemi ekufundiseni kukaKrestu, akanaye uNkulunkulu; ohleli ekufundiseni, lowo unaye uyise neNdodana.
62.Uma kufika umuntu kini engalethi lokho kufundisa, ningamemukeli endlini yenu, ningambingeleli, ngoba ombingelelayo uhlanganyela naye emsebenzini yakhe emibi. Amein!”
63.Ku-Johane wokuqala isahluko 2:4 umpostoli uJohane uqhuba athi: “Lowo othi ngiyamazi (uJesu) engagcini imiyalo yakhe, ungumqambimanga, iqiniso alikho kuye; kepha ogcina izwi lakhe, uthando lukaNkulunkulu luphelelisiwe kuye..”
64.Kanti kusahluko 3:4 uthi uMpostoli uJohane, “Bonke abenza isono bayeqa nomthetho, ngokuba isono singukweqa umthetho. Amein!” Bheka uMathewu 5:17-19.
65. Manjeke bantwana basezulwini, kumele sibhekane neqiniso lokukholwa; uma ethi uJehova gcina iSabatha, wena ungaligcini, wenza isono, ngoba weqa umthetho kaNkulunkulu; uphikisana nemfundiso kaYeshua ethi umthetho kaJehova umi nguna phakade.
66.Uma ethi uJehova ungayidli ingulube, ukuyidla kuyisono; ngoba weqa umthetho kaNkulunkulu.
67.Uma ethi uJehova ungagundi, wena uthi ulikholwa uhlale unekhanda eliyimpuculu, wenza isono, ngoba weqa umthetho kaJehova.
68.Uma ethi uJehova ungawahlabeli amadlozi, wena utholakale ungumNazaretha kaNkulunkulu uhlabela abafile; utholakala uphila ngokubhula nokuhlola; wenza isono ngoba wenza okuyisinengiso kuJehova.
69.KuMathewu 6:10 uthi uYeshua asothi uma sithandaza sicele ukuthi umbuso nomthetho kaJehova ugcinwe emhlabeni njengaseZulwini.
70.Mhla uJehova eqala ukuletha inkolo, wayiletha nemithetho eyisisekelo salenkolo. Kodwa thina sawuchitha lomthethosisekelo waseZulwini; sazakhela eyethu indlela yokukhonza, engaziwa ezulwini lapha siya khona!
72.Njengoba sihlale sicela ukuthi umbuso nentando kaJehova yenziwe emhlabeni njengasezulwini, sizophila kanjani embusweni kaNkulunkulu, ngoba asifuni ukuphila ngaphansi komthetho wakhe?
73.Phela namanje sisahamba emkhondweni yezimemezelo zezwi likaJehova njengoba zalethwa kubantwana bakwa-Israel inceku yakhe, uMose!
iNkosi ibusise lokho enikuzwile.