Uma sifuna ukukholwa kweqiniso, asifunde ukukhuluma iqiniso. Alikho igama esilinikwe nguYah ukuba silidumise, silingcwelise, ngaphezu kwegama lakhe, okunguYahuwah!
1.Imini yeSabatha ayibenhle kwabangwele. Isihloko sanamuhla sithi, “kuyini ukukholwa.”
2.Incwadi kaMathewu 6:9-10: “Ngakho-ke anokhuleka kanje; nithi: “Baba wethu oseZulwini, malingcweliswe igama lakho; mawufike umbuso wakho; mayenziwe intando yakho emhlabeni njengaseZulwini.” Amein!
3.Lombuzo osihloko sithi “Kuyini ukukholwa” ungezwakala unga phenduleka kalula, kodwa akunjalo.
4.Kuyinto ejwayelekile ukuthi uma into ivela nezinye izizwe thina sizwe esimnyama singayi hlaziyi, singalibheki iqiniso layo, kodwa sivele siyamukele njengoba injalo!
5.Okuse qinisweni inkolo ngoNkulunkulu oyedwa onguMdali, yafikela e-Afrika; ayivelanga Europe.
6.O-Abraham no Jakobe noMoshe ngabase Afrika; kanjalo noMprofethi uMahomed noMprofethi u-Isaya Shembe bangabase-Afrika!
7.INkolo yase Afrika yaqala ukuba ngeyase Ntshonalanga emva kwaYeshua nabaPhostoli. Kwathi uma lezi zizwe seziwanqobile amaHebheru ngo 70 A.D, zase ziyiqenda ngamaCreeds inkolo kaJehova.
8.Sebeyi qedile, lenkolo yamaHebheru bayi hlanganisa neyabo ukuze bayichithe kalula!
7.Izizwe zase-Afrika zephucwa lenkolo kaYahuwah eyayifike noMoshe nabaprofethi, sezifunzwa inkolo esungulwe ngabezizwe; kwase kuthiwa inkolo ile evele nabezizwe!
8.Kuliqiniso-ke ukuthi inkolo esiyilandelayo kulesi sikhathi samanje akusiyo eyase Afrika, kodwa ngeyezizwe zase Ntshonalanga.
9.Lento esithi inkolo, ngamasiko asemhlabeni aphikisana nenkolo yaseZulwini. Sisuswa kokukhona, siyiswa kokungekho! Lento engekho siyayifundisa, siqinise ngokuthi ikhona, iyona yona; kodwa yona ayemukelekile eZulwini!
10.Sinemfundiso ethi inkolo kaJehova yakhelwe phezu kwezimfundiso zeBhayibheli, kodwa asikwenzi esikukhuluma ngomlomo; sithi sikholwa ngokulandela izimfundiso zikaNkulunkulu ngoJesu, kodwa ngokwenza siyawuchitha umthetho kaJehova.
11.Siphikisa yena uJesu esithi siyamlandela! Simkhonza ngezindebe zomlomo, kodwa sibe silandela izimfundiso zabantu!
12. UYeshua wasifundisa ukuthi asothi uma sithandaza sithi; “Baba wethu oseZulwini, malingcweliswe igama lakho, mawufike umbuso wakho, mayenziwe intando yakho emhlabeni njengaseZulwini.”
13.Kodwa lomthandazo usewaba isilandelo, ngoba futhi kunezimfundiso eziwuchithayo ngezindlela eziningi. Kuyethusa ukucabanga ukuthi sinenkolo enoNkulunkulu oyedwa, uJehova, kodwa futhi siyayichitha imithetho yakhe!
14.Akakho umuntu ongaphika ukuthi ngenkathi uYeshua ekhuluma ngoBaba wethu oseZulwini, wayesho uJehova, nokuthi eBhayibhelini nguye ozichaze ngokuthi UNGU NKULUNKULU.
15.Kodwa kuyiqiniso lomlando ukuthi ngenkathi inkolo isiqhwagwa izizwe zase Ntshonalanga, leligama likaYahuwah lachithwa, kwathiwa uYahuwah uNkulunkulu wamaJuda; yachithwa nemithetho yakhe; babulawa nabakhonzi bakhe!
16.Igama likaJehova lize labuyiswa nguMprofethi uMahomed, ongesiye umJuda; lapha eMzansi ne Afrika labuyiswa nguMprofethi u-Isaya Shembe (ukuthula kube kuye).
17.Ukubuyiswa kwegama likaJehova yilaba baProfethi ababili kwaku fakazisa ukuthi njengaba profethi bakwa-Israel nabo bathunywe yiloNkulunkulu owathuma uMoshe.
18.Uma sifuna ukukholwa kweqiniso, asifunde ukukhuluma iqiniso. Alikho igama esilinikwe nguYah ukuba silidumise, silingcwelise, ngaphezu kwegama lakhe, okunguYahuwah!
19.Uthi uYeshua UMBUSO KA NKULUNKULU AWUZE EMHLABENI, NENTANDO YAKHE YENZIWE EMHLABENI NJENGOBA YENZIWA EZULWINI!
20.Uma umuntu ethi kukhona imfundiso ethi awusaphili ngaphansi komthetho, usho umthetho kabani ongasaphili ngaphansi kwawo? Wena olalele uyaye uthi lomuntu ukhuluma ngomthetho kabani okungasaphilwa ngaphansi kwawo?
21.Ayikho into ewukungaphili ngaphansi komthetho. Lokhu ukukhuluma okunobuqili phakathi; okusho into okungayisho.
22.Kungukukhuluma okwenza umuntu ongahlakaniphile acabange ukuthi ukhuluma into ejulile, kanti okuseqinisweni ukhuluma into engekho!
23.Ukuba lokhu kukhuluma kunobuqiniso, ngabe lemfundiso ikubeka ngokusobala ukuthi THINA SIYAWUCHITHA UMTHETHO KAJEHOVA WOKUBA SIMKHONZE NGOKUWUGCINA!
24.Kodwa ngobuqili lenkulumo icashisiwe, kuthiwa nje “Asisaphili ngaphansi komthetho.”
25.Amakholwa akabuzi ukuthi yimuphi lomthetho okuthiwa asisaphili ngaphansi kwawo, ngoba kumele kucaciswe ngalo mthetho!
26.Ukugcina umthetho kusho ukwenza lokho okuthiwe kwenze; ungakwenzi okuthiwa ungakwenzi. Uma ethi umuntu gcina iSabatha, bese nempela uligcina, usuke uphila ngaphansi komthetho othi gcina iSabatha.
27.Ngesikhathi kushawa umthetho othi abantu abangaligcini iSabatha, ababeligcina babebulawa, ngoba babeqa umthetho othi abangaligcini isabatha!
28.Sihlale sifundiswa ukuthi umbuso kaNkulunkulu awuze emhlabeni; bese kungaqondakali ukuthi umbuso wamuphi uNkulunkulu esithi awuze emhlabeni, intando yamuphi uNkulunkulu esithi ayenziwe emhlabeni njengaseZulwini?
29.Uma kungumbuso walo Nkulunkulu owafika nomthetho ngoMoshe, thina esingasaphili ngaphansi komthetho sithi akuze muphi umbuso, kugcinwe muphi umthetho?
30.Sisuke sithandaza sithini uma sithi intando kaNkulunkulu ayenziwe emhlabeni njengasezulwini, ngoba intando kaNkulunkulu ngumthetho kaNkulunkulu? Siyabona ukuthi asizizwa ukuthi sithini?
31. KuMathewu 22:37-40 uYeshua uthi umyalo omkhulu kuneminye nowokuqala uthi: “Wothanda uJehova uNkulunkulu wakho ngenhliziyo yakho yonke nangomphefumulo wakho wonke.
32.Owesibili ofana nawo ngothi ubothada omunye umuntu ngothando ozithanda ngalo! UYeshua uthi lemiyalo iyizinsika eziphase wonke umthetho kaMoshe nemfundiso yabaProfethi.”
33. Lemiyalo uYeshua osifundisa ngayo ihlanganisa yonke imiyalo elishumi ehlukaniswe izigaba ezimbili.
34.Imiyalo emine esesigabeni sokuqala ngemiselwe ukuthi ngayo sikhonze uJehova, bese kuthi imiyalo esesigabeni sesibili elandelayo imiselwe ukuthi ngayo singahlukumezani, kodwa sihloniphane.
35. Kodwa lemfundiso ethi asiphili ngaphansi komthetho, abayi fundisayo abachazi ukuthi kulezi zigaba ezimbili imuphi umthetho esingasaphili ngaphansi kwawo?
36.Okuseqinisweni ngumthetho osesigabeni sokuqala, lo othi asithande uJehova ngenhliziyo yethu yonke, simdumise ngokugcina imithetho yakhe!
37.Abezizwe bakuchitha ngobuqili ukuba sidumise uJehova, onguNkulunkulu wamaJuda, okuyithi!
38.Uma ungathi abantu abasaphili ngaphansi komthetho othi ‘thanda umakhelwana wakho njengoba uzithanda wena’, lowo mthetho ongayibhekeli inhlalonhle yabantu, ungachithwa!
39.Kodwa imfundiso ethi thanda uJehova ngenhliziyo yakho yonke’, leyo mfundiso yelekelela amaCreeds athi akuchithwe inkolo yamaHebheru ethi asesabe uJehova uNkulunkulu wethu!
40.Uma amakholwa ethi asingazemukeli izimiso zikaJehova, kanti yini umehluko phakathi kwekholwa nomelene nokukholwa kwethu?
41. Umthetho wesihlanu uthi: “YAZISA UYIHLO NONYOKO UKUZE IZINSUKU ZAKHO ZIBE ZINDE EZWENI.” Sonke siyaphila ngaphansi kwalomthetho!
42.Umthetho wesithupha uthi, “UNGABULALI.” Sonke siyaphila ngaphansi kwalomthetho!
43.Umthetho wesikhombisa uthi, UNGAPHINGI. Sonke siyaphila ngaphansi kwalomthetho!
44.Umtheto wesishiyagalombili uthi, UNGEBI. Sonke siyaphila ngaphansi kwalomthetho!
45.Owesi shiyagalolunye uthi, UNGAFAKAZI AMANGA NGOMAKHELWANE WAKHO. Sonke siyaphila ngaphansi kwalomthetho.
46.Oweshumi uthi, UNGAFISI INDLU YOMAKHELWANO WAKHO. Sonke siyaphila ngaphansi kwalomthetho!
47.Kungani sonke siphile ngaphansi kwalemithetho eyisithupha, kodwa singaphili kwemine yokuqala? Kungenxa yokuthi lemithetho eyisithupha ivikela inhlala kahle yethu!
48.Kodwa emine yokuqala akufanele siphile ngaphansi kwawo ngoba ithi asidumise uNkulunkulu wamaJuda, kanti singaphansi kwenkolo yabezizwe!
49.Imfundiso ethi asingaphili ngaphansi komthetho kaJehova isekela ama Creeds amaRoma achitha inkolo yamaHebheru! Ngawo sigcwalisa ukuthi sibuswa yinkolo yabezizwe!
50.Kuyadinga-ke ukuthi abantu abafuna ukukholwa kweqiniso bawuqonde umehluko phakathi komthetho obekelwe ukukhonza uJehova nemfundiso egqugquzela ukuchithwa komthetho ngawo esikhonza uJehova!
51.Umehluko phakathi komthetho wobuntu nomthetho wokukholwa ukuthi owobuntu ugcinwa yibo bonke abantu; kanti owokukholwa ugcinwa ngabantu abayizi khonzi zikaNkulunkulu; benza lokho athi uNkulunkulu abakwenze; bakwenza ngoba uJehova bayamthanda ngenhliziyo yabo yonke!
52.Uwubona kanjani umthetho okumele ugcinwe umuntu wonke? Uma umthetho othi uma uweqa uthole icala, lowo mthetho umiselwe ukugcinwa ngumuntu wonke emhlabeni, kodwa uma umthetho noma uweqa ungathweswa cala, lowo mthetho ngowokukholwa, ubekelwe labo asebekhethe ukubuswa indlela yokuphila kwasezulwini!
53.Umthetho wokugcina iSabatha uma ungawugcini awuthikamenzi ndawo ngokwenyama nokomoya, ngoba nguJehova owaqala ukugcina iSabatha, lingelakhe; lomthetho uJehova uwubekele ukuba kukhonzwe Yena ngawo!
54.Uma ungalingcwelisi iSabatha uchitha umthetho wokuqala uYeshua osifundisa ngawo othi, “Wothanda uJehova uNkulunkulu wakho ngenhliziyo yakho yonke nango mphefumulo wakho wonke.”
56.Inhloso yesenzo sokugcina iSabatha ukufakaza ukuthi uJehova uyamthanda ngenhliziyo yakho yonke nangomphefumulo wakho wonke; futhi uyalihlonipha iZwi lakhe. Yikho uligcina iSabatha noma lilukhuni!
57.Uma ungaphansi komthetho womzali wakho, wenza konke othi umzali wakho kwenze. Awenzi lokho okuvuna noma okusiza wena kuphela; kodwa okubalulekile ukulalela umzali wakho.
58.Konke okwenzayo ukwenziswa ukuthi uyamhlonipha umzali wakho, umhlonipha ngoba uyamthanda. Kungakho-ke uYeshua ethi ubothanda uNkulunkulu ngayo yonke inhliziyo yakho nangawo wonke umphefumulo wakho.
59.Ukukhonza uNkulunkulu kwakheke phezu kothando omthanda ngalo ngenhliziyo yakho yonke nangomoya wakho wonke.
60.Uma ethi uNkulunkulu yenza noma ungayenzi into ethize, wenza lokho otshelwa khona, ngoba uyamthanda, futhi uyamhlonipha!
61.Yilowo umehluko omkhulu phakathi komuntu okholiwe nomuntu ongakholiwe. Umuntu okholiwe ngolalela enze lokho athe uNkulunkulu akakwenze; ongabuzi ukuthi akwenzeleni, kuzomsiza ngani!
62.Ukwenza lokho ngoba uyamhlonipha uJehova; umhlonipha ngoba uyamthanda! Leso senzo-ke singukukhonza uJehova!
63.Njengoba sesishilo, lempi yokuchitha umthetho kaJehova ayiqondisiwe kuphela emthethweni wakhe, kodwa kwasekuqaleni yayichitha uqobo lwakhe uJehova.
64.Leli iqiniso lomlando wenkolo yethu ukuthi abezizwe abayamukelanga inkolo kaMoshe, okuyinkolo kaYahuwah neyaqhutshwa nguYeshua!
65.Kumele-ke kubacacele abantu abalambele iqiniso laseZulwini, ukuthi lemfundiso ethi ‘asisaphili ngaphansi komthetho kaNkulunkulu’ isuselwa kumaCreeds ka Constantine, ngawo owaye chitha inkolo yamaHebheru, okuyithi, sase siphoqwa ukwamukela inkolo yabezizwe!
66.NguYeshua owasifundisa ukuthi noma singahlale simbabaza, senza izimangaliso ngegama lakhe, kodwa solahlwa uma singayigcini imithetho kaNkulunkulu (Mathewu 7:21).
67.NguYeshua owathi uma simthanda sogcina imiyalo yakhe efundisa ngoYahuah, (Johane 14:15).
68.NguYeshua owathi umthetho kaMoshe nezimfundiso zabaProfethi kumi phakade; wathi umuntu ofundisa ukuthi akwephulwe umthetho kaNkulunkulu uyolahlwa, (Mathewu 5:17-19).
69.Lesi isikhathi sokuthi abantu abafuna iqiniso laseZulwini, bake bazihlole ukuthi basahamba ngayo yini indlela esayifundiswa nguYeshua ngokukhonza uYahuwah?
70.Uma sifuna iqiniso likaNkulunkulu, kumele kesizibuze ukuthi njengamakholwa, lelivangeli kuseyilo yini esalilethelwa nguYahuwah?
71.Uma uYahuah enguNkulunkulu ngempela, ethi asimkhonze ngokugcina imithekho yakhe, uma amakholwa ethi akasaphili ngaphansi komthetho oshawe nguYahuah, kanti ukukholwa kuyini?
INkosi ibusise iZwi layo!