Ithi-ke iNkosi iLanga: “Bayothi gayani utshwala, lumbani amalumbo, BANIBUYISELE KOKUCHITHIWE, BETHI YIYO INDLELA YOKHOKHO BENU, BETHI NINGAYILAHLI!
MINA MUNYE UMTHETHO ENGIZONISHIYA NAWO, NENGINI NIKA WONA, YILOWO UBABA (Mprofethi Isaiah Shembe) OWANIFUNDISA WONA!”
Isihlabelelo 233.
1.Thixo wami dwala lami
Wena ungikhohlwe ngani
Ngiyalila imihla yonke
Ngokuhlushwa yisitha sami.
2.Abahluphi bami bona
Bayangizingela njalo
Bayasho imihla yonke
Bathi uphi uThixo wakho.
3.Yini mphefumulo wami
Wena udumaleleni
Methembe uThixo wakho
Ayikho enye inqaba.
4.Namhla Nkosi ngiyabonga
Ungivumele ngize kuwe
Ngiyazendlala phambi kwakho
Kuleyindawo eyingcwele.
5.Makube liphunga elimnandi
Kuwe wedwa onguMdali
Ukukudumisa kwami
Phezu kwalentaba yakho.
6.Yebo Nkosi mangihlume
Ngibe ngoxhakathileyo
Mangithele izithelo
Zona ezithandwa nguwe.
INKOSI ILANGA YATHI SIBULWELE UBUNAZARETHA.
1.Inyanga kaDecember yinyanga yokukhumbula iNkosi iLanga, ngoba yahamba emhlabeni mhla ka 19 December 1976.
2.INkosi iLanga yahola lelibandla lamaNazaretha iminyaka engamashumi amane; waqala ukulihola kusukela eneminyaka engu 30 waze wahamba emhlabeni eseneminyaka engu 70.
3.Lesi sihlabelelo esisihlabelelayo saqanjwa nguye uBaba iLanga ngo 1945.
4.Angimbonanga uBabamkhulu, kodwa ngokwami akakho umuntu engake ngambona owayefana neNkosi iLanga ngayo yonke into ongase uyicabange!
5.Kuyadinga-ke ukuthi sonke esiphokophele izwi lezulu, kesibuke emuva, sibheke ukuthi iNkosi iLanga yasifundisani ngalobu buNazaretha osebudicilelwa phansi!
6.Kodwa ngaphambi kokuba ngigxile ezimfundisweni zeNkosi iLanga, kumele ngiqondise lamahlubuka athi angamaNazaretha, acabanga ukuthi yiwona asezolawula mina ngenzeni, kanjani, kulomsebenzi kaNkulunkulu!
7.Mina ngiyinzalo yalobu buNazaretha, umama wakhuliswa nguMprofethi, emva kwakhe wahlala eNkosini iLanga waze wayogana kwaMpanza ephila impilo yobuNazaretha ngokugcwele! Ukukholwa ngakuncela kuye!
8.Kusukela ekukhuleni kwami, akekho umuntu osebenzele lelibandla lamaNazaretha njengami.
9.Akakho umuntu engingakaze ngibhekane naye uma esedicilela phansi lelibandla likaMenzi wezulu nomhlaba!
10.Yimina engabhala izincwadi eziningi, zesiZulu nezesingisi ngichaza ngoShembe nobuNazaretha.
11.Yimina engaqala ukuqopha izintshumayelo nama culo amaNazaretha, ngichaza ngoShembe nobuNazaretha. Umhlaba waqala ngami ukwazi ngoShembe nobuNazaretha!
12.Yimina engakhipha ibandla lamaNazaretha ngaphansi kobuKrestu, laba yinkolo ezimele, emva kwalokho ngafuna i-slot, lapho engizoshumayela khona ngichazele umhlaba emsakazweni ngobuNazaretha!
13.Yimina engaphumela eshashalazini, ngaphonsela inselelo labo abakha ilumbo lokuthi uBabamkhulu wafa ezama ukundiza.
14.Ngawaqeda lawo manga akhelwa ukuqeda ngoBabamkhulu nobuNazaretha!
15.Kusukela ngaleso sikhathi akekho umuntu njengamanje ongake aphumele eshashalazini afakaze ngaleli lumbo elakhiwa zimishini zabamhlophe ukuthi uBabakhulu wake wazama ukundiza!
16.Yimina engaya ku TRC ngiyochaza ngokuhlukumezeka koMprofethi nebandla lamaNazaretha.
17.Ngangihamba ngedwa, ngoba zonke izinhloko zebandla zahlehlela emuva! Noma seziincengwa ukuthi azingiphelekezele, zenqaba!
18.Kodwa phambili sengiku TRC, ngafica ibandla nebandla limelwe ngabantu abangu 12, kuyileli bandla kuphela eliza nami ngedwa!
19.Yize ngingedwa, ngachaza, ngabuye ngabhekana nayo yonke imibuzo evela kuTRC ngoShembe! Ngangena kuTRC ngingalutho, kodwa ngathi ngiphuma ngabe sengihlonishwa ngisho ngosihlalo beTRC!
20.Imina engihambe cishe iSouth Afrika yonke ngishumayela ngedwa ngoShembe nobuNazaretha!
21.Ayikho i-University namakholiji lapha eKZN engingakaze ngiwahambele; ngaye ngafika ngisho eWits University eGauteng, ngihamba ngichaza ngoShembe nobuNazaretha!
22.Mina anginazo izifundo zezenkolo, kodwa eWits bengiba nodokotela kanye noProfesa bezenkolo abaqhamuka ema-University ahlukahlukene, ngisho avela e- USA nako Canada, ngibachazela ngoShembe nebandla lamaNazaretha, ngiqondisa okungamanga nokuliqiniso ngaleli bandla!
23.Ngangiba nama Symposia njalo ngonyaka eWits University lapho ebengiba noProfesa Oostheizeyn, kanye noProfesa Kishorf abangama Dean emnyangweni wezenkolo, ngibaqondise ngobuNazaretha uma sebephaphalaza.
24.Sengiwenze wonke lomsebenzi, ngo 2010 kwafika ingelosi kimi emini, into eyagcina ukwenzeka kwa-Israel ukuba ingelosi ifike kumuntu ihamba ngezinyawo, imnike negama layo!
25.Lengelosi yathi ithunywe nguShembe iNkosi iLanga kimi yathi uthi uBaba iLanga ANGIPHUME EBUHLENI, BESE NGAKHELA YONA INKOSI ILANGA IBANDLA ELIZOFUNDISA INDLELA EYIYO YOKUKHONZA UJEHOVA!
26.Mhla ka 26 March 2011, ingelosi yafika futhi isiphethe lelijazi engiligqokile, yathi lelijazi ngilembathiswa yiNkosi iLanga, ngalo ingethwesa iziqu ukubonga ukuthi empilweni yami yonke ngilwele uShembe nobuNazaretha! Yathi ngakho lelijazi alihlangene nokugcotshwa kwami njengomholi webandla, kodwa ngelokungihlonipha ngegalelo engibe nalo ukulwela ubuNazaretha!
27.Kwasho yona iNkosi iLanga ukuthi manje UMSEBBENZI OKUMELE NGIWENZE UKUFUNDISA UMHLABA WONKE INDLELA EYIYO YOKUKHONZA UJEHOVA!
28.UShembe akagcinanga ngokwenza lokho, kodwa lengelosi ifike yahlala nathi isiqeqesha ngobuNazaretha njengenkolo kaJehova eyayikhona kusukela kwa-Israel!
29.Ngakho-ke nginegunya engilinikwe yiNkosi iLanga ukuthi ngiqondise inkolo kaJehova; ngaphezu kwalokho, ngasengivele ngaziswe yiNkosi iNyangayezulu ukuthi uNkulunkulu ukubeke kimi ukuthi ngivikele noma ikuphi ukuwa kwaleli bandla okungase kwenzeke!
30.INyangayezulu neNkosi iLanga bakhuluma NGEBANDLA LAMANAZARETHA njengoba lasungulwa nguBabamkhulu!
31.Angikwazike ukuthi sengizovukelwa ngamavukana angamahlubuka ebese ezotshela mina ukuthi angiwenze kanjani umsebenzi engiwuthunywe ezulwini!
32.Ku-Hezekeli 3:17-19 uJehova wakhuluma lamazwi kuHezekeli: “Ndodana yomuntu, ngikuqoke ukuba ngumlindi kuyo indlu yakwa-Israel. Ngakho-ke uyokuzwa izwi eliphuma emlonyeni wami, ungixwayisele bona.
33.Uma ngithi komubi uyokufa nokufa, bese ungamxwayisi omubi endleleni yakhe embi, ukumsindisa, uyokufa ngenxa yezono zakhe, kodwa igazi lakhe ngolibiza esandleni sakho!
34.Kepha wena uma umxwayisile omubi, kodwa akaze wakuyeka ububi bakhe, nendlela yakhe embi, uyakufa ngenxa yesono sakhe, kodwa wena uwusindisile umphefumulo wakho!” Amen!
35.Uma uthunywa yizwi, kumele ungesabi, ungesatshiswa, futhi ungenzeleli muntu; unganciphisi, futhi ungandisi kokuthunyiwe, wenze njengoba uthunyiwe!
36.Mina ngithunywe ezulwini ukuthi ngizokulwa nalempi kaSathane uBabamkhulu okhuluma ngayo kusihlabelelo 55, ephume ukuzochitha amaNazaretha eNkosini yezulu!
37.KuyiZenzo 12:21-23 ingelosi yashaya uHerode, wafa, waphethuza izimpethu ngaso leso sikhathi, ngoba evumele abalandeli bakhe bethi unguNkulunkulu, kodwa yena engazange wathi unguNkulunkulu!
38.Kepha lapha kubi kakhulu, ngoba sikhuluma ngomuntu osukume ebandleni okubhalwe phansi nguBabamkhulu ukuthi ngelikaJehova, wazikhomba yena wathi: “YIMINA UNKULUNKULU!”
39.Leso isono esibi kakhulu ezulwini, okungenke kuthi ngoba okhulume lokho ungowakwa Shembe, uNkulunkulu bese emxolela!
40.Noma imuphi umuntu okholiwe, kungakhathalekile ukuthi ukuliphi ibandla, uyazi ukuthi akekho umuntu, ngaphandle kobuswa ngumoya kaSathane, ongavele ezikhombe yena athi unguNkulunkulu!
41.Lendlela yokuhlambalaza uJehova ebandleni lakhe, intsha, futhi kumele inqandwe singakabhujiswa!
42.Njengoba ngilapha ngithunywe ukuba ngiyivikele inkolo kaJehova kulaba bahlunbuki, angizosaba lutho ukukwenza lokho!
43.Ukuthi uyakukholwa noma awukukholwa ukuthi ngithunyiwe, akusikho okwami lokho!
44.Manje uma ungakwemukeli lokho, ufuna mina ngenzeni ukukwenza wamukele ukuthi uShembe onguMoya ungithumile ukuba ngivikele lobu buNazaretha?
45.Sekuzothi ngoba ubuNazaretha sebubhidlizwa ngumzukulu weNyangayezulu, bese ngiqhaqhazela, ngesabe ukuvikela inkolo kaJehova, ngitshelwe amahlubuka ukuthi ngenzeni? Angenke ngikwenze lokho!
46.Sengichazile ukuthi kulenyanga sisesikhumbuzweni seNkosi iLanga, ngakho-ke ngifisa ukuthi labo abasenaye unembeza wokukholwa, bezwe ukuthi iNkosi iLanga yasixwayisa kanjani ngalokhu kuhlubuka esekudlange kwezinye zezinhlangothi zamaNazaretha!
47.Eziningi zalezi zintshumayelo ngizikhiphe encwadini ka-Advocate Mnyandu ethi IZINTSHUMAYELO ZENKOSI ILANGA.
48.INkosi iLanga yasixwayisa ngabaholi abangase bavele kulelibandla abayizidakwa, yathi ngokuvumela lowo mholi ahole ibandla, utshwala kogcina sekuphuzwa yiwo wonke amaNazaretha, njengoba sekwenzeka nje manje!
49.Ithi-ke iNkosi iLanga:“Kulula kabi maNazaretha, ikakhulukazi kumuntu onjengami, njengomuntu othandwa ngabantu bonke, ukuba nginifake etshwaleni.
50.Ubani ongangivimba uma ngithanda ukuba niphuze utshwala? Uma ngithanda ukuba nidle ingulube ubani ongangivimbela?
51.Anize ningayicabanga leyonto? Mina ngiye ngikucabange ukuthi emuva kwami koba njani?
52.Anosala nifuye izinja, noma nosala nidle amatshwala, noma nosala nidle izingulube? Nithi kungenzeke lokho? Kungenzeka!
53.Ake ngibuze kini, uma namuhla ngiqala ngiphuze utshwala noma ugologo noma obesizulu, ningabanjani nina? Bangaki abangasala kini bengaphuzi?
54.Ngingaqale ngibuthukuse utshwala ilanga elilodwa, kodwa ngelinye ilanga ngithi uma ngifika phakathi kwenu nibe senibona ukuthi uBaba namuhla unomusa kakhulu, nokuhamba kwakhe uyakubona nje ukuthi kunjani!
55.Utshwala-ke lobo! Uma wenza isono usifihla, siyathanda ukuba sivele obala. Kobe sekuyachitheka-ke uKuphakama, kungabe kusaba khona!
56.UShembe-ke wayelindile ebuza kuNkulunkulu ethi: ”Nkosi, njengoba uthi angize kuwe, uyangibiza, emuva kwami kuzosala kube njani eKuphakameni?”
57.Wahlala izinsuku eziyishumi elindile, engadli, nabamlethela amanzi bawabeke laphaya kude, azithathele ageze.
58.Nobeka amanzi okuphuza, awabeke kude aphume azithathele wona aphuze. Wayehluphekela thina!” Amen!
59.Iyaqhubeka iNkosi iLanga ithi: “Angizange ngihlale mina nezidakwa, angizazi. Ngiqale ukuzibona khona lapha eKuphakameni.
60.Kukhona amabhoxongwane aseke angene lapha ekhaya edakiwe. Ngiqala lapha eKuphakameni ukubona ukuthi ukudakwa yinto enje, ngoba ngazalwa kungaphuzwa kithi.
61.Ubaba nomama babengaphuzi. Ugogo umaHadebe kwase kuyisalukazi esidala esabuyeka utshwala.
62.Yathi uma ithi indodana yakhe ‘mama yeka lokhu’ sayeka. Ufe esemdala kakhulu.
63.Kulenkosi yaseBabele, kwaphuza bonke abantu ngalobo busuku bedili, badakwa, basina.
64.Kodwa kwathi inkosi ingakadakwa kakhulu kusahleziwe nje etafuleni, yathi akulandwe izitsha zephasika eziNgcwele.
65.Kwavela amadoda amadala athi: ‘Hhayi bo! Uyihlo wathi zingathintwa lezi zitsha, ngezikaNkulunkulu!
66.Wathi: ‘UNkulunkulu wani? Yimi uNkulunkulu, lethani nina’. Kusho uBelishasari.
67.Zalandwa izitsha zegolide nesiliva ezazikhishwe eThempelini lendlu kaNkulunkulu yaseJerusalema. Inkosi nezikhulu zayo baphuza ngazo!
68.Ningabuyeli emuva maNazaretha. Ningabuphuzi utshwala. Noma kuthiwa uNkulunkulu uyabuphuza utshwala ezulwini, nina ningabuphuzi.
69.Umuntu ophuzayo lapha eKuphakameni ningesabi ukumkhipha. Noma yimi nje, uma ningibona ngiphuzile, nisho nithi: ‘Baba, ngoba usuyaphuza lapha eKuphakameni, hamba uye kwenye indawo yakho.
70.Uyothi mhla uyekayo ukuphuza bese ubuyela eKuphakameni’.
71.Ngeke nginiphikise, ngeke nginiphendule, ngiyobopha amasakana ami ngaleso sikhathi bese ngihamba, ngenze lokho enikushoyo. Ngoba angisiyo into enkulu uma ngilapha eKuphakameni.
72.Into enkulu yalapha eKuphakameni uNkulunkulu, lo owehla ezulwini weza emhlabeni ngoba ethanda nina bantu baKwaZulu.
73.Lapha kukhona amakhosi angaphezulu kwamashumi amabili (20), nanka phambi kwami. Abezile kimi, beze kuNkulunkulu!
74.Uma sekufika isikhathi sami sokuba ngihambe emhlabeni ngiyohamba njengoBaba. Kodwa uNkulunkulu akahambi, yena uyahlala!
75.Engingakuthandi-ke ukuthi uma ngikhona eKuphakameni ngisebenzele ukuthi uNkulunkulu akahambe lapha! (Njengoba uNkulunkulu exoshwa eBuhleni!)
76.Ngisebenzele indlela yokuthi angiphuze, uNkulunkulu aphume lapha eKuphakameni.
77.Ngisale-ke mina ngibe iNkosi. Angazi-ke ukuthi ngizoba iNkosi enjani.
78.Noma ngizoba iNkosi eyingulube noma eyikati noma eyimfene noma enjani uma uNkulunkulu esehambile phakathi kwethu!
79.(Njengoba sekunjalo eBuhleni, emzini kaNkulunkulu sekusina izangoma, zibhabhadisa nokubhabhaduisa!)
80.Uthi ke uBaba iLanga: Manje-ke ngiyakhuluma, ngithi uma ningibona ngidakiwe anibongitshela kahle nithi: ‘Baba, hamba uye kwenye indawo.
81.Kothi ungayeka ukuphuza ubuye’. Ngani na? Ngoba nina nibhasobhile lapha eKuphakameni!
82.Ngithi-ke, maNazaretha, noma kufika uMphrofethi kini ombethe ingubo emnyama njengale engiyimbethe, noma eluhlaza noma ebomvu noma emhlophe, uma ethi buyaphuzwa utshwala ezulwini phuzani nani, ningavumi!
83.Uma seniphuza utshwala ngeke nikwazi ukuwulinda lo muzi waseKuphakameni.
84.Ngeke nikwazi ukuwubhasobha, ngoba iphoyisa lalo muzi yini nonke, amakhosikazi, amadoda, izintombi nezinsizwa zalapha eKuphakameni.
85.Uma nina ningawubhasobhi lo muzi, ngeke ubekhona. Uma nibuka izinto zonakala nikhona nithi: ‘Akundaba yami, indaba kaBaba’. Seningenwa usathane, ngoba indaba yenu leyo!
86.UShembe ushiye kini konke. Akashiyanga lutho kimi. Noma esegula akazange angibize. Nomfowethu lo, u-Amos akazange ambize. Nomnewethu omdala okhona lapha akazange ambize. Akazange asho ukuthi abantwana bami baphi?” Amen!
87.(Namhla-ke uma sesikhuza umhlola, amaNazaretha esephuza, nabanye abaholi bephuza kulelibandla, abanye sebethi banguNkulunkulu, sekuliwa nathi, sekumele sesabe ubukhulu bebandla kunokulahlekelwa uNkulunkulu?)
88.Kuzo zonke izono ebezingeziwa ngumNazaretha, kodwa iNazaretha belingadlaleli etshwaleni, belingadlaleli ekugundeni ikhanda!
89.Kodwa namuhla sekunama Nazaretha aphuzayo, agundayo, ahlabela amadlozi, asonta nezangoma, futhi nawo aba yizangoma. Uthi-ke uBaba: “Uma ngingaqala ngiphuze, bangaki abangasala kini bengaphuzi?
90.Njengoba sekunabaholi abathi yibona uNkulunkulu kulelibandla, iNkosi iLanga yaprofetha ukuthi lento iyokwenzeka uma esehambile emhlabeni, nokuthi kumele thina sibhekane kanjani nalesi simo. Ithi-ke iNkosi iLanga:
91.“Manje ngiyathanda ukunikhumbuza, njengoba isihlabelelo senu sisho ukuthi uNkulunkulu uyayenza into enhle njengale yenu, kodwa usuke engayenzeli abantu. UbuNazaretha lobu uNkulunkulu akabenzelanga abantu, wazenzela yena!
92.Sisho njalo isihlabelelo senu sithi: ‘Idwala elihle lamaNazaretha, owazikhethela lona uJehova ngokulithanda kwakhe.’ Into yakhe le, akusiyo into yabantu.
93.Akusiyo futhi into kaShembe, futhi akusiyo into yamadodana ami noma abafowethu. Nabefundisi baseKuphakameni akusiyo into yabo, ngekaNkulunkulu!
94.UKuphakama lokhu akusikho okwenu, akusikho futhi okukaShembe lo obonwayo, okuka Nkulunkulu, okuka Shembe osezulwini, okuka Shembe owakuqalayo lokhu kuhamba!
95.UbuNazaretha bohlale kukhona uma nikhumbula ukuthi indawo enalo muzi, kanye nalokhu kuhamba eniyikho, akunaNkosi ebonwayo, akusikho okomuntu!
96.Eyenu iNkosi ayibonwa, nguNkulunkulu kuphela, ayikho enye. Ngakho nilibambisise lelo lizwi noma nini, noma singasekho thina emhlabeni, nikhumbule ukuthi ubuNazaretha lobu, lo muzi waseKuphakameni akusiwo owomuntu!
97.Akukho muntu ongavela onjengami nje anikhiphe nina endleleni kaShembe.
98.Uma ngithi onjengami ngisho ngoba kuye kuthiwe nginguMholi wamaNazaretha, kepha angisiye, umholi wenu uShembe kuphela! (Kodwa uNyazi luthi lona lunguNkulunkulu wamaNazaretha!)
99.Ithi-ke inkosi iLanga: Kodwa akukho muntu ongavela athi phambukani endleleni kaShembe, noma ikomidi lamadoda, ibandla labafundisi noma yinina nonke njengoba nihlangene lapha.
100.Aninakuveza umthetho ophambene nokaShembe, ngoba leli bandla akusilo elabantu, akusilo elomuntu, elasezulwini!” Amen!
101.Njengoba sihlale sikuveza lokhu, iNkosi iLanga ziningi iziprofetho eyakhuluma ngazo, eziningi esezenzekile.
102.Ngelinye iLanga inkosi ishumayela, ithi: “Uma thina boShembe sisithela ngale kwaleliya gquma kuyovela oShembe abaningi, nalowo uyothi nami nginguShembe, abantu bamlandele, nomunye athi nami nginguShembe, abantu bamlandele, nenkawu iyothi nami nginguShembe, abantu bayilandele!
103.Kodwa ngiyaniyala, ngithi uShembe mdleni, ningamgcobi, ngoba uma nimgcoba uyosuka masinyane.
104.Ngithi funani uShembe woMoya, ngoba uShembe wenyama uyaphela, uyadlula, kodwa uShembe kaMoya akadluli.
105.Kuzokuhlwa, kuzoba mnyama, baningi abazohamba ebumnyameni, uNkulunkulu uzokwenza inkokhelo lapha eKuphakameni, kuzoba khona inkokhelo yendoda!
106.Yayingcono ekaMaMthembu ngoba uNkulunkulu wenza inkokhelo yomfazi, namuhla uzokwenza inkokhelo yendoda egqoke ibhulukwe njengami, iyophuma emkhonweni wejazi lami” Amen!
107.Nempela emva kweNkosi iLanga babakhona oShembe abaningi, njengoba namanje bekhona.
108.Kukhona nabangazi noma liyaphuma noma liyashona, abangena enkonzweni bedakiwe, behamba beshisa impepho kuyo yonke imigwaqo! Nenkokhelo yendoda eyavela emkhonweni wayo iNkosi iLanga, uNkosana uLonda, waba khona!
109.Ngelinye ilanga iNkosi iLanga ithi: “Ngesinye isikhathi wake wafika uNkulunkulu, ngangiseLinda kwaNongoma, sineNhlangano khona.
110.Ngabona abantu besodakeni bonke ababekhona eNhlanganweni, nabefundisi naba shumayeli naba phathi, neNhlalisuthi, naba khokheli, nama khosikazi nama ntombazane bonke nje becwile odakeni.
111.Babengakwazi ukuphuma kulolu daka, lulukhuni kunamanzi. Lendawo yayino mhlanga nodaka olubi inamanzi amaningi, ibanda futhi. Kwakuyindawo embi kakhulu.
112.Uma ngisacabanga ukuthi laba bantu ngizobakhipha kanjani lapha, ngabona uShembe eqhamuka, akaze akhuluma lutho.
113.Welula isandla edonsa, osekuqaleni wabaleka, wahlehla wabuyela lapho kunodaka oluningi khona. Wathi udonsa omunye naye kwaba yiso leso.
114.Bonke bahlehla baya lapha kunodaka khona oluningi. Akuphumanga noyedwa umuntu, bonke bahlehla babuyela emuva.
115.Angisazi ukuthi ngathini eNkosini, ngabona iphelelwa amandla ihlala phansi. Kwakuwudaka lokungcoliswa isono!
116.Ngabona ukuthi uNkulunkulu ubezongikhombisa ukuthi laba bantu engihamba nabo bangcolile, abahlambulukile, banamacala nezono. Kukhona okubi abakugodlile ezinhliziyweni zabo!
117.Laba bantu abacabangi ngoNkulunkulu, bayeza nje eNhlanganweni bangazihluphi ngoNkulunkulu, bangazisoli!
118.Bangasho ukuthi: ‘Mkhokheli oyingcwele ngikhokhele nami emadlelweni aluhlaza usinde umoya wami’.
119.Akukho noma munye kulabo bantu owake wasondela wabamba isandla seNkosi. Bonke bahlehla babuyela emuva, bangaphuma.
120.Indaba enkulu lena uma abantu abaningi kangaka bengathandi ukusondela eNkosini noma bengathandi nokuphuma odakeni lwezono zabo.
121.Njengoba sibuthene lapha, kukhona yonke inhlobo yomuntu. Abanye amasela bayeba, abanye bayaphinga, abanye banamanga, abanye bayabulala.
122.Yonke inhlobo yesono esikhona emhlabeni ikhona phakathi kwenu. Abaningi banazo lezi zono, bayacasha lapha. Abanye sebeyaziwa ukuthi usibanibani impilo yakhe inje.
123.Aliyikuba khona elinye ilanga elifana naleli lanamuhla lokuba nishiye izono, nihlambuluke nigezeke.
124.Umuntu avume konke akwenzile phambi kukaNkulunkulu, ngoba uNkulunkulu uyanithanda kakhulu.
125.UNkulunkulu uyathanda ukuthi sengathi ningaba abantwana abaNgcwele, abahlanzekile angabukisa ngabo phambi kwamazulu athi: ‘Bhekani abantwana baseKuphakameni abanaso isono!
126.Abanye abantuke abanazo izono, kodwa ziyabazingela. Isono siyabafuna.
127.Ubusisiwe umuntu ongemi endleleni yezoni, okuthokoza kwakhe kusemthethweni kaJehova, ozindla ngomthetho kaNkulunkulu imini nobusuku.
128.Isono lesi maNazaretha into enzima ngoba asikhethi. UMfundisi, uMshumayeli noMkhokheli siyambamba. Namakhosi alapha siyawabamba.
129.Umuntu abe yinto yesono, abe ukudla kwesono, akhohlwe ukuthi ungumntwana kaShembe.
130.UShembe wayengenaso isono, noma engakakholwa ewumuntu obhincayo, kwakungakaze kwathethwa icala lokuthi wonile.
131.Nakubelungu ayesebenza kubo kwakungakaze kwathethwa cala likaShembe. Babengamsoli ngalutho.
132.Babengaze basho ukuthi uMloyiswa wonile endaweni yethu noma bathi ‘Shembe, bopha uhambe ngoba wonile endaweni yethu.”
133.Nalapha phakathi kwenu uShembe uhlale iminyaka engamashumi amabili nesihlanu, kusukela ngonyaka ka-1910 kuze kube unyaka ka-1935 ehamba yedwa.
134.Akakaze athethe cala lokuthi wonile. Akakaze amangalelwe emakhosini ukuthi uShembe wonile.
135.Wayethi: ‘ngingasenza kanjani isono ngoba ngikhonza iNkosi enkulu kangaka! Futhi le Nkosi engiyikhonzayo ingiphethe kahle, iyangivikela kwabangizondayo!
136.Iyawathetha amacala ami. Ngingaqamba amanga kanjani?” Amen!
137.Lesi siprofetho seNkosi iLanga ebona wonke amaNazaretha engena odakeni, sinzima kakhulu, kodwa kulesi sikhathi samanje amaNazaretha amaningi ayantunta nje, ayisakhulunywa kuwo indaba yesono!
138.Kodwa isiprofetho esikhulu kakhulu ileso umfundisi uMadlala owashumayela ngaso siseBuhleni. Lesi sigameko senzeka iNkosi iLanga isizohamba emhlabeni.
139.UMfundisi uMadlala uthi: “Sasise Kuphakameni, sesijwayele, kukuhle konke; iminyaka eminingi siphila ngezwi; ngokungena nje siphile singa thandazelwanga nokuthandazelwa!
140.Kwaku kuhle eKuphakameni ngenxa yenkokhelo, udumo lukaNkulunkulu lulukhulu, SINGACABANGI LUTHO OLUNYE NGAPHANDLE KOKUNGENA EZULWINI! Sasingafisi nawukuthintwa ngumuntu ongakholwa!
141.Kwathi ngonyaka othile iNkosi isikhulile, nami senginguMfundisi, iNkosi yaphatheka kabi kakhulu. Emva kwalenkonzo yaphatheka kabi (yagula) yaze yedlula emhlabeni.
142.Kwakungu July sibuthene eKuphakameni, iNkosi yashumayela ngendaba yokuzithanda, nokuthanda uNkulunkulu. Izibeka izindaba ezinhle zokuhamba kwalapha eKuphakameni.
143.Yakhuluma ngenkathi YOKWANDA KOBUNAZARETHA EMHLABENI WONKE, ithi ayikho into ezobanhle ukwedlula ubuNazaretha emhlabeni.
144.Sajabula kakhulu, ngoba umuntu omnyama wayengelutho ngalezo zinsuku, nobuNazaretha babuyi hlaya, nezimfundiso zazi ningi ezimbi ngakho.
145.Kuthe siseneme, sambona egqungqa uBaba, wakhala, kwabamuncu, kwaba nzima, kwaphela nasozwanini kithi! Asaze sazi ukuthi sizothini, senzeni.
146.Wayivala inkonzo,
wasithandazisa. Ngalelo langa umthandazo waba mude kakhulu, unganqamuki.
147.Ngaze ngavula amehlo, ngabona ukuthi iNkosi isisishiye sodwa yaphuma ethempelini.
148.Ngabheka kozakwethu, nabo basebe bhekile. NguMfundisi uKHumalo owathi, Amen! Yavuma inhlangano.
149.Saphuma sambheka uBaba endlini emhlophe, samfica ekhala, amaduku esemaningi; nezingane zingasangeni lapho ayehleli khona.
150.Sakhala nathi, sazilahla phambi kwakhe, sifuna ukuzwa isici nesono sethu.
151.Wehluleka nokusibheka; isikhathi esingange hora singene endlini enosizi, ekhala, esenesilokozane.
152.Wayesethi: “Nginosizi, inhliziyo yami idabukile, ngiyakwesaba kakhulu okuzokwenzeka emva kwami.
153.Ngibona igazi ligobhoza lapha eKuphakameni. Lomuzi uNkulunkulu uzowushiya, kube ngumhume wabaphangi nezindindwa neziphingi.
154.KUZOSALA ABAFILE, BETHI BAYAPHILA! UZOCHITHEKA LOMUZI! Usizi lukhulu oluzoba khona emva kwami.
155.ABANTU ABEZAYO ABAZOPHENDUKA, NGENKE BALIFUNE IZWI LIKANKULUNKULU, NGENKE BAMLALELE NOZAYO.
156.Emva kwami abantu bayokholwa ngenxa yemali, ngenke balinake izwi loPhezulu. Abanye bazofika nemikhuba yabo, AMASIKO ABO!
157.BAZOKWENZA INDABUKO YABO, LE USHEMBE OWAYICHITHA PHAKATHI KWENU.
158.IZANGOMA ZONGENA NGOKUTHANDA, ZIPHUME NGOKUTHANDA. ABABI BAYOBAKHIPHA ABAHLE LAPHA EKUPHAKAMENI!
159.NGIBONA KUMI IZIMBIZA ZOTSHWALA EMIZINI YENU, NEZANGOMA ZISINA EMIZINI YAMANAZARETHA, NIDLA NILOBOLISA IZINGANE ZENU ABANGAKHOLWA.
160.NGIBONA ABANTU BEZA NGAMANDLA LAPHA EKUKHOLWENI, BAYOFIKA BAZI, ABAYOVUMA UKUKHOKHELWA, ABAYIKULITHANDA IZWI ELISIBUTHILE!
161.BAYOFIKA NOKWAZI KWABO, BAHLAKANIPHILE, BANOLIMI NEZIBONAKALISO, nani niyothatheka, NIYILAHLE INDLELA KABABA ANISHIYE KUYO!
162.Bayonixosha, banikhiphe nasemathempelini enu. Ningavumi noma sekunjalo, NIKUPHIKE ANGAKUSHONGO USHEMBE PHAKATHI KWENU, NIKWENQABE ENGIKWENQABILE!
163.Bayothi gayani utshwala, lumbani amalumbo, BANIBUYISELE KOKUCHITHIWE, BETHI YIYO INDLELA YOKHOKHO BENU, BETHI NINGAYILAHLI!
164.MINA MUNYE UMTHETHO ENGIZONISHIYA NAWO, NENGINI NIKA WONA, YILOWO UBABA OWANIFUNDISA WONA!
165.Ngiyanicela, nibafundise abezwayo, nibayeke abangafuni, ISIHLUNGO SIYOZIHLUNGA!
166.Yabe isikhala iNkosi, yadabuka, yahlanganisa izandla njengomuntu obalayo. Amen!
167.Lesi siprofetho safezeka njengoba sinjalo. Kulelibandla izangoma zingena ziphuma ebandleni lamaNazaretha, amaNazaretha asewuchithe wonke umthetho kaBabamkhulu!
168.Ibandla selilikhulu, kodwa laba bantu abazile ekukholweni, kodwa kuzokwenziwa imali. Akukho lutho ongabatshela khona, ngoba vele bangamahlubuka, abesabi lutho, sekuyibo abazi konke!
169.Ithi-ke iNkosi iLanga: “Bayothi gayani utshwala, lumbani amalumbo, BANIBUYISELE KOKUCHITHIWE, BETHI YIYO INDLELA YOKHOKHO BENU, BETHI NINGAYILAHLI!
170.MINA MUNYE UMTHETHO ENGIZONISHIYA NAWO, NENGINI NIKA WONA, YILOWO UBABA OWANIFUNDISA WONA!”
171.Ekugcineni iNkosi iLanga ithi: “Ngiyanicela, nibafundise abezwayo, nibayeke abangafuni, ISIHLUNGO SIYOZIHLUNGA!”
INkosi ibusise enikuzwile!