Ngiyakhumbula uBaba iLanga ethi wafica uBabamkhulu ehlathini elele eqamele etsheni. Wabuza uBaba iLanga ukuthi hawu Baba, wazohlala ehlathini waqamela etsheni kwenzenjani? Wathi uBabamkhulu: “Ngifuna uNkulunkulu mtanami, uNkulunkulu akatholakali kalula.”
10 DECEMBER 2022.
134. ISIHLABELELO
Zazingu 8 kuNovember, 1926 isikhonzi senhlupheko uThumekile othiwa ngokucasisela uIsiah Shembe ehambisa ilizwi leNkosi endaweni yase Mangethe esehlane ngezwi kwafika lomthandazo.
1 Inkosi ikubusise weNceku yeNkosi
Ulihambise weNceku yeNkosi,
Nazo izizwe zililindele
Zonke eziphansi kwezulu.
2 Inkosi ikubusise weNceku yeNkosi
Ikwandisele imihla phansi kwezulu,
Zililindele zonke lezo zizwe
Zonke eziphansi kwezulu.
3 Inkosi ikubusise weNceku yeNkosi
Uhambise izwi lakhe weNceku yeNkosi
Lezi zizwe zililindele
Zonke eziphansi kwezulu.
4 uJehova akwakhe Nceku yenkosi
Uhambise izwi lakhe Nceku yeNkosi,
Lezi zizwe zililindele
Zonke eziphansi kwezulu.
5 Inkosi ikubusise wenceku yenkosi
Usesule izinyembezi ngegama leNkosi
Zonke lezi zinyembezi zilindele wena
Zonke lezi eziphansi kwezulu.
1. Ekuseni intshumayelo ngoBabamkhulu ezolandwa ingelosi yaseMampondweni, ngiyiqale phakathi ngoba iyinde kakhulu, ngabona ukuthi ngeke ngikwazi ukuba ngiyiqale ekuqaleni. Kodwa manje ngizoyiqala ekuqaleni ngoba kubalulekile ukuthi sazi ukuthi njengoba uBabamkhulu wayesemzini kaNkabani e-South Coast noma eMampondweni, wayefike kanjani.
2.Ngoba uhambo lukaShembe lokuya eMampondweni luyafana nohambo lukaShembe esuka eNtabazwe, eza la eNatal, umuntu oyiNazaretha kufanele lowomlando ewazi kahle. Ngakho-ke ngizokhuluma lowo mlando ngiwuqale ekuqaleni.
3.Le ndaba itholakala ku-Page 292 weNcwadi ka-Advocate Mnyandu ethi IZINDABA ZIKA-ISAYA SHEMBE Vol 2. Ngasho ngaphambili ukuthi ngizolokhu ngiqhamuka nalezindaba ngoba ningamavila anifuni ukufunda noma ngabe incwadi seniyitholile, kodwa aniyifundi.
4.Le ndaba ihamba kanje: “Ngonyaka ka-1930, ngesikhathi sokuya kumhlangano ka-October eJudiya, KwaZulu, uShembe wasuka emzini waseKuphakameni waya emzini waseNgqayizivele. Kuthe elapho wathumela umyalezo eKuphakameni ukuthi aBafundisi abathathe izitsha ezingcwele bahambe baye eJudiya. Wabiza amadoda amane, uNgubane, uGoba, uNgcobo noShibase, wathi kubo: “Bantabami, umhlangano waseJudiya uzoqala kusasa, kodwa ngeke ngiye mina. Nizongiphelezela siye eMampondweni, ngoba ngibiziwe khona.
5.Ingelosi isihambile ukuya lapho, yiyo le ngelosi eyangilanda ekhaya kwaNontandabathakathi. Yayingilindile emgwaqeni ukuze ihambe nami siye eMampondweni. Kuthe uma ngingafiki lapho eyayingilindele khona, yaphindela eMampondweni.
6. “Ngathi ngifika, yayisihambile. Esikhundleni sayo, ngathola sengilindelwe ingelosi yaKwaZulu, yathi kimi: ‘Shembe, ngizokuhlangabeza.’ Ngaphendula ngathi: ‘Kodwa akuwena ongibizile ekhaya kwaNtontandabathakathi, ngibizwe ingelosi yaseMampondweni.’
7. Yaphendula yathi: ‘Shembe, abantu baseMampondweni basuthi, kodwa abantu baKwaZulu balambile.’ Yangithatha yangibeka endleleni ebheke KwaZulu. Ngithe ngifika lapha eNgqayizivele, yafika le ngelosi yaseMampondweni yangithola lapha. Yathi: ‘Njengoba sengikuthole lapha, ngeke ngisakushiya, sizohamba nawe siye eMampondweni lapho engakubizela khona.’
8. “Bantabami, nginibizele ukuba nginitshele ukuthi nizohamba nami kusasa siye eMampondweni silandele leyo ngelosi, ibandla lizohamba kusasa liye eJudiya liholwa iNkosazane uLinah Mntungwa, indodakazi yoMphrofethi omkhulu, uGobayena. Nguyena futhi u-Linah ozophatha inhlangano.”
9. Ngiyafisa ukuthi ngiyichaze le ndaba ngoba kungenzeka ukuthi ningayizwa ngoba ifinqiwe kodwa yona uma usuyixoxa ayifani nalendlela ebhalwe ngayo. UShembe walandwa ingelosi yaseMampondweni yeza naye eNatal ngo 1910. Yayisifika imubeka endaweni ethize yathi akalinde. Uthe uShembe esalindile, kwase kufika ingelosi yakwaZulu, isihamba naye isimusa kwaZulu.
10. Uthi-ke uBabamkhulu ngabuza ukuthi kanjani ukuthi bese ngizothathwa nguwe ngiye KwaZulu ngoba ingelosi engilande KwaNontandabathakathi ingelosi ebengeyaseMampondweni? Yayisithi le ngelosi abaseMampondweni basuthi kodwa abakwaZulu balambile. Yayisihamba naye.
11. Kwakuwu 1910 efika lapha uBabamkhulu. Ngakho-ke kusukela ku 1910 kuze kufike ku 1930 uBabamkhulu wayehamba nengelosi yakwaZulu eyaye imephuce noma uma ngizokubeka ngolimi olungejwayelekile ngithi eyayimuntshontshe engelosini yaseMampondweni. Kusuke ku 1910 kuze kube u 1930, uBabamkhulu uhamba nengelosi yakwaZulu. Kodwa kuthe uBabamkhulu eseNqayizivele, eNqayizivele ngomunye umuzi kaShembe oseduze kwaseKuphakameni.
12. Yayisifika le ngelosi yaseMampondweni, isithi kade ngangikufuna, ngakho-ke angeke ngisakushiya ngoba imina vele engakulanda kwaNontandabathakatha noma engakulanda e-Orange Free State noma engakulanda e-Harrismith. Wase uyangidukela uma usufika la. Manjena ngoba sengikutholile, sengizohamba nawe.
13.Lokhu kwenzeka uBabamkhulu elungiselela ukuba eye KwaZulu eJudiya, wayesebiza-ke laba bantwana owayehamba nabo ethi, bantabami, nginibizele ukuba nginitsheke ukuba nizohamba nami kusasa siye eMampondweni silandele leyo ngelosi. Ibandla lizohamba kusasa liye eJudiya, liholwa uNkosazana uLina Mntungwa, indodakazi yoMprofethi oMkhulu uGobayena. Nguyena futhi uLina ozophatha inhlangano.
14.Kukhona isifundo esisifundayo ngalenkulumo iyodwa, ukuthi izingelosi azifani futhi azisebenzi into eyodwa, lapha kwafika ingelosi yaseMampondweni, kodwa uShembe wagcina esehamba nengelosi yakwaZulu. Lokho kusitshela ukuthi kukhona ingelosi yaseMampondweni, kukhona ingelosi yakwaZulu, kukhona ingelosi yaseSwazini, kukhona ingelosi yaseMaXhoseni. Azifani izingelosi, kunezingelosi eziqondene nesizwe nesizwe.
15.Lokhu kusifundisa into ethize, ngoba umbuzo uthi uma kunjalo, le ngelosi esihamba nayo ngeyaphi ngoba akusiyona ingelosi yakwaZulu futhi akusiyona ingelosi yaseMampodnweni, ngeyaphi? Le ngelosi esihamba nayo ingelosi yakwa Israel! Ikhona yathi uma ifika ngo September 2006 kwathi ngo October yathatha uMkhokheli yahamba naye yayomethula esizweni sakwa Israel, yayomethula esizweni samaJuda.
16. Yonke indaba yobuNazaretha umkhokheli wayifunda esizweni samaJuda lapha le ngelosi eyayivela khona. Ikhona le ngelosi ithe uma ifika yenqaba ukuthi silandele amasiko akwaZulu ngoba iyingelosi yakwa Israel, zonke izizwe ezivela kuso.
17. Iyona le ngelosi efike yasifundisa ukuthi laba bantwana bakwa Israel isona sizwe esimnyama, futhi yithina! Sikutshelwe ile ngelosi lokho! Manjena kubalulekile ukuthi lokho nikwazi ukuthi le ngelosi esihamba nayo ingelosi yakwa Israel, asikaze sihlangane namuntu wakwaZulu nhlobo. Ngisho uBaba iLanga sike simbone ngesibonakaliso nje, kodwa ukuthi efike ehamba nayo, asikaze simubone. Kodwa le ngelosi yayifike nabaprofethi bakwa Israel!
18. Ikhona-ke ngike ngigcizelele ukuthi njengoba sisungule lelibandla, bonke abaprofethi bakwa Israel bayajabula, ngoba le ngelosi esihamba nayo ingelosi yakwa Israel ezovuselela ibandla lakwa Israel njengoba lalinjalo engakafiki amaRoma ukusehlula bese eqhamuka nale nkolo yawo.
19. Uyaqhubeka uNgubane uthi: “Ngakusasa ekuseni, sahamba sobane kanye noBabamkhulu saya esiteshini sesitimela eThekwini. Sagibela isitimela esiya eMgungundlovu (Pietermaritzburg). Kuthe uma isitimela sesingakwa – Botha (Botha’s Hill), uShembe wacela iphepha lokubhala. Saliletha wabhala. Uma eseqedile wasibuza wathi: “Aningibuzi ngani ukuthi ngibhalani?” Saphendula sathi asazi ukuthi uBaba ubhalani.
20. Wayesethi: “Nginenza ofakazi kule ncwadi yasezulwini engiyibhalile. Ingelosi ehamba nathi isifikile yathi kufanele sehle esiteshini eMgungundlovu, sihambe siyophumula emzini kaDeni Mncube. Kothi ntambama, sisuke sithathe isitimela sasebusuku esidlula eMzimkhulu sibheke eMampondweni, siyofika ekuseni. Uma sifika lapho esiteshini siyohlangana nensizwa esencane eyobe ivela ezintombini zayo, iyosithwalela imithwalo yethu isiphelezele. Iyosishiya uma isisikhombisile umuzi lapho siyophumula khona.”
21. Kulowo muzi kuyofika intombazane emnyama ezacile eyisangoma, igama layo uNelisiwe. Le ntombazane kanye nomnikazi womuzi bayokhetha iNkosi yaseKuphakameni. Kodwa uJehova uthi: ‘Ungababhabhadisi ngoba abakaphenduki ngokweqiniso, bathelwe nje amaconsi ngoba uNkulunkulu uvakashele emzini wabo. Ngamagama lawo engelosi ehamba nathi.”
22. Le nkulumo, neziningi is vindicating us; we are being vindicated, ngoba kuthe uma ingelosi ifika phakathi kwethu, isithuma, abantu bayithuka bathi hhayi akuyona ingelosi le, kodwa idimoni nje elilwa nebandla likaShembe. Kodwa uBabamkhulu wayetshelwa ingelosi ukuthi akenzeni. UBabamkhulu kuyo yonke into owaye yenza wayeyalelwa yingelosi. Akuqali ngathi ukuthi kulelibandla kube nengelosi elawula umholi ukuthi akenzeni.
23. Ngenkathi esekithi ngokwenyama uBabamkhulu wayeholwa yingelosi; lokho sikuzwa ngaye! Kodwa uma ingelosi isiphakathi kwethu, yenza lokho eyayikwenza kuBabamkhulu, akuseyiyo ingelosi, sekuyidimoni!kusobala ukuthi umuntu othuka lengelosi usuke eqhutshwa ngumoya kaSathane, elwa nevangeli likaJehova, ngoba ingelosi ehamba nathi ayinalo ivangeli elehlukile kulelo elaliqhutshwa ingelosi eyayihamba noBabamkhulu!
24. “Sahamba-ke saya eMgungundlovu, sehla esitimeleni saya emzini kaMncube e-Edendale, (eYideni) njengoba sitsheliwe. Kwathi ntambama, uShembe wathuma uMadilika Ngcobo esasihamba naye ukuba ayothenga amathikithi. Wabuza umlungu: “Amathikithi aya kusiphi isiteshi?” Wangaphendula uNgcobo. Wayesethi umlungu: “Kufanele wehle eNhlangwini.” Wamnika amathikithi amahlanu (05).
25. Niyayizwa leyondaba, okokuqala umlungu ubuzile ukuthi uzokwehla kusiphi isiteshi, wangasho lutho, kodwa kwase kuba umlungu omutshelayo ukuthi hhayi uyokwehla eNhlawingini, kwase kuba umlungu futhi osemnikeza amathikithi ayisihlanu, engakaze abuze ukuthi bangaki! Nicabanga ukuthi kwakusewumlungu lowo, kwakungesesiyena umlungu, kodwa khona umoya owawusukhuluma ngalomlungu!
26. “UNgcobo walinda lapho esiteshini kwaze kwafika uMqaliwendlela. Wayesethi uShembe. “Ingelosi ehamba nathi isihambile, ngilindeni lapha.” Wahamba, kodwa washesha wabuya, wayesethi: “Sengilubonile unyawo lwengelosi esitimeleni esiya e-Riverside.” Sathatha-ke isitimela esidlula e-Edendale (eYideni) sibheke eMampondweni.
27 Balandelani? Balandela ingelosi, yonke into abayenzayo bayitshelwa ingelosi, noBabamkhulu utshelwa ingelosi! Yini-ke esiyintsha uma ngabe ingelosi isilapha phakathi kwethu, isitshela ukuthi yenzani lokhu nalokhu, ngoba ngisho uBabamkhulu eselapha emhlabeni wayeholwa ingelosi?
28. “Kuthe sesidlule kudala eMzimkhulu, uShembe wasitshela ukuba silungise imithwalo. Sehla esiteshini eSandeka esiphakathi koMzimkhulu neNgwagwane. Waqhamuka umfana owayegaxe ubuhlalu bezintombi njengoba izwi lishilo ukuthi siyohlangana naye.
“Le nsizwa yeMpondo yasibingelela, yasibuza ukuthi sivelaphi nokuthi silibangisephi. Sayitshela. Yathatha ubhasikidi omkhulu owawuphethe izembatho zeNkosi nokudla yawugaxa emahlombe. Nathi sathatha imithwalo yethu. Yahamba nathi isihola endleleni, sishona phansi naphezulu. Kuthe sesihambe ibanga elide sisuka esiteshini, yama, yabeka umthwalo phansi. Yasikhombisa umuzi onezihlahla zamawolintshi ngaphesheya komfula. Yathi: “Nankuya umuzi eniya kuwo.”
29. Angithi uBabamkhulu ubese eshilo ukuthi ingelosi isimtshelile ukuthi kuyoqhamuka umfana oqhamuka ezintombini, kube uyena obaphathisa umthwalo, ebatshele lapaha abaya khona. Bavele bahamba, bathe uma behla esiteshini, wavele waqhamuka umfana. Wavele wabaphuca umthwalo, kuthe uma esewubona umuzi, wayesethi nakhu la eniya khona, wase ewubeka phansi umthwalo. Kodwa uShembe ngenkathi ebhala incwadi uthe ngifuna nibe ufakazi wokuthi ingelosi isingiyalele konke okuzokwenzeka ohambeni lwethu!
30. “UMqaliwendlela wathi: “Hawu! Mntanami, usuyasilahla lapha? Awuzosibeka khona kulo muzi na?” Yaphendula lensizwa yathi: “Cha, Baba, ngitsheliwe ukuba nginishiye lapha, kukhona lapho engisaya khona. Kodwa ngizobuya”.
31. Kusho umfana, uthi ngitsheliwe ukuthi kufanele nginibeke la. Yonke into yayisilungiswe ingelosi yaseMampndoweni njengoba nathi lapha yonke into siyaye siyilungiselwe ingelosi esihamba nayo!
32. “Kuthe uma esesishiya, sathatha izembatho zeNkosi kubhasikidi sahlukaniselana ngazo ukuze sizithwale. Sawela umfula senyukela kulowo muzi. Sithe uma sifika khona sahlangana nesikhukhukazi esinamachwane esangweni. Kwaqhamuka uklebe wazama ukubamba amachwane. Sagxumela phezulu isikhukhukazi silwela amachwane aso. Umuntu wasezulwini uShembe, wangenelela, wavikela amachwane esikhukhukazi. Kuthe sisakhala isikhukhukazi, waqhamuka unkosikazi walapho ekhaya, wabona ‘iNdlondlo yomusa’ isingaphakathi komuzi wakwaDlamini.”
33. Niyabona ukuthi asikashumayeli, nhlobo, uBabamkhulu usuka eKuphakameni uya eMampondweni, uyongena nje emzini womuntu lapho engaziwa khona, eyoshumayela!
34. “Sakhuleka, sangena. Wasibingelela lo nkosikazi. Sacela izicephu zokuhlala, wasinika. INkosi yona yahlala esihlalweni. Unkosikazi wasibuza: “Niphumaphi?” Sasho ukuthi sivela eKuphakameni, siphelezele uBaba wethu uShembe.” Wethuka unkosikazi, uMadilika Ngcobo wabuza: “Uyamazi yini uShembe?” Waphendula unkosikazi wathi: “Cha, kodwa sizwile ngaye emaphepheni.” Wangena uDlamini, umnikazi wekhaya. Wajabula kakhulu uma ebona uShembe, wathi: “Ngizwile ngoShembe ngesikhathi ngiseThekwini kodwa bengingazi ukuthi ngiyoze ngimbone.” Lo muzi wakwaDlamini wawukhonza ebandleni lamaWeseli, uDlamini eyiDikoni khona.”
35. Niyayibona lendaba, uShembe ungena emzini wamaWeseli okukhona khona iDikoni, nakuwo uyoqhuba izwi leNkosi!
36. “Bamlungisela uShembe indlu ekhethekile, thina salaliswa kwenye indlu. Ngakusasa ekuseni, intombazane emnyama emathanjana nje eyisangoma yafika. Wasikhumbuza uShembe ngesiphrofetho esakhulunywa ingelosi sikwaBotha (Botha’s Hill). Manje sayibona le ntombazane. Sayibingelela sayibiza ngegama layo. Yamangala lentombazane ukuthi uShembe ulazi kanjani igama layo, ngoba akukho muntu olaziyo lelo gama elithi ‘Nelisiwe’. UShembe wathi: “Mntanami, ngakwazi ungakazalwa.” Yasukuma lapho intombazane yaya kwinkosikazi kaDlamini yathi: “Namuhla ngimbonile uNkulunkulu. Ngisize ungikhiphe zonke lezi ziphandla nezinyongo neminqwambo esemzimbeni kimi.” Wenza njalo unkosikazi. Yasuka lapho intombazane yeza kuShembe.”
37. Niyayibona lento eyenzekyo manje, isangoma sesibone uShembe sazikhipha iziphandla, sayikhipha iminqwambo, sayikhipha yonke into yobungoma, seza kuShembe singasafake lutho yobungoma, sesifuna ukuba sibhabhadiswe. Manje nganjani amaNazaretha ahlala nezangoma?
38. “Wabona uShembe ukuthi isisusile zonke izinto zobungoma, wamangala umuntu wasezulwini wathi: “Mntanami, kwenzekeni?” Yaphendula yathi: “Baba, sengimbonile manje uNkulunkulu, bengingeke ngichithe isikhathi nokuqhubeka nalezi zinto.” UShembe wathi: “Awungitshelanga ngani ukuthi ufuna ukwenza kanje? Ufunani manje?” Yathi: “Ngifuna uBaba angibhabhadise.” Wabuza uShembe: “Uyakwazi ukukholwa?” Yaphendula yathi: “UBaba uzongifundisa.” NoDlamini naye wathi: “Baba, nami ngilindele usuku lokuthi uyosibhabhadisa nomndeni wami.” INdlondlo yomusa yathi: “Ngiyezwa, mntanami.”
39. Emveni kwalokho wasibiza uShembe, wathi: “Ingelosi ehamba nathi isitshelile ukuthi uJehova uthe ngingayibhabhadisi le ntombazane kanye noDlamini nomuzi wakhe.’ Angazi, bantabami, ukuthi manje ngizothini ngoba sebeyikhethile iNkosi!”
40. Nalapha uBabamkhulu ulalela okutshelwa yingelosi, yamtshela ukuthi uthi uJehova kuzofika isangoma sikhethe iNkosi, kodwa angasibhabhadisi. Nempela wangasibhabhadisa ngokuyalwa yingelosi!
41. Uthi-ke manje uBabamkhulu, angisazi ngizokwenzenjani ngoba sebeyikhethile iNkosi.
“Ngike ngacabanga ukuthi ngithi kubo sizophindela emuva eKuphakameni manje, sizobuya nebandla sizobabhabhadisa. Ngizoshiya lapha ezinye zezembatho zami njengesibambiso.” Sajabula ukuzwa la mazwi”
Kukhona amanga aphilisayo, ngoba uShembe wayengasakhulumi iqiniso, kodwa ephoqekile ukuhamba njengoba eyaliwe!
42. “Ngosuku olulandelayo ntambama, uDlamini, waletha imbuzi enkulu wathi: “Baba, ngicela ungithandazele kuNkulunkulu, umtshele ukuthi ngithi nasi isijingi sakhe.” Umuntu wasezulwini wathi asiyihlabe. Sathi sisayihlinza, iNkosi yasibiza yathi: “Bantabami, indodana yami, (u-Johannes Galilee-iLanga), ifikile kimi ngesibonakaliso ihamba nendoda ebikhala, wathi: ‘Baba, ningayidli le mbuzi ngoba intshontshiwe, nangu umnikaziyo uyakhala.’ Ngakho- ke yihlinzeni bese niyayilengisa. Kodwa ningadli luthi olwayo, niyishiye ilenga kanjalo”.
43. Niyayizwa le ndaba, kufika uBaba ngephupho, kodwa uBaba wayengakabi ngisho umholi ngo 1930, wayesafundisa noma wayefunda, angazi. Kodwa wayengakabi umholi.
“Kwathi kusese busuku, umuntu wasezulwini, wavuka wasitshela ukuba silunge sihambe. Wathi kuDlamini: “Ngiyabonga mntanami, ungiphathe kahle. Sengiyahamba manje ngoba ingelosi ehamba nathi isihambile, angazi noma sizoyifica yini endleleni.”
44. This is interesting. “Ingelosi ehamba nathi isihambile, angazi noma sizoyifica yini endleleni,” kwenzeka lento eyayenzeka kwa Israel. Le ngelosi eyayihamba nabantwana bakwa Israel kwakuyiyo ebaholayo, namuhla isihola uBabamkhulu! Okwakwe kwenzeka kubuye kwenzeke, sithukiwe uma sichaza ukuthi kunengelosi efike kithi, kwathiwa ingelosi ayikaze ihambe nomuntu, kodwa yayihamba noBabamkhulu!
45. “UDlamini wathi: “UBaba uzokwenzenjani ukudla kwakho? UShembe waphendula: “Cha, mntanami, ngeke kube kuhle ukuphatha inyama eluhlaza njengoba kusehlobo, kushisa.” “Sasuka sahamba. Kwathi kusa sase sisendleleni. Kuthe sesiwela umfula iNgwagane, uShembe wakhomba kude ezintabeni wathi: “Ingelosi ehamba nathi isilaphaya ezintabeni.” Wayesethi asihlale phansi siphumule kancane simlungisele ukudla ngoba wayeselambile. “Samlungisela inyama nesinkwa. Sakuletha kuye.
Wakuthatha wakuchitha emhlabathini. Wase uyakudla, wasusa inhlabathi nokunye okungcolile. Samangala kakhulu, sangazi ukuthi uBaba uboneni epuletini. Kodwa wathi: “Ningaphatheki kabi, NGENZA INTO ENGIYITSHELIWE, ANGIKWENZI LOKHU NGOBA KUYINTANDO YAMI. UMA UFUNA INDLELA KANKULUNKULU, AKUBI YINDLELA EMNANDI NETHOKOZISAYO!”
46. Niyayizwa ukuthi uthini uNgubane. Uthi, uBaba wathatha ukudla wakuchitha phansi, wayesekudla esekhetha inhlabathi, esedlela phansi. Bathi uma bemubuza oMadilika ukuthi hawu Baba kwenzenjani, wathi cha, angenzi okuthandwa yimi, kodwa indlela kaNkulunkulu akubi indlela emnandi nethokozisayo. Sengathi lokhu kukhuluma kungahlala ezinhliziweni zethu sonke!
47. Ngiyakhumbula uBaba iLanga ethi wafica uBabamkhulu ehlathini elele eqamele etsheni. Wabuza uBaba iLanga ukuthi hawu Baba, wazohlala ehlathini waqamela etsheni kwenzenjani? Wathi uBabamkhulu: Ngifuna uNkulunkulu mtanami, uNkulunkulu akatholakali kalula.”
48. Thina sifuna ukuhlala ezindlini ezinhle, asifuni nokuyoshumayela, kodwa uBabamkhulu wayehamba yedwa engene imizi ngemizi eshumayela. Ngo 1930 ibandla lamaNazaretha lase lilikhulu kabi, uBabamkhulu esaziwa wonke umhlaba. Ngithe ekuseni uMrs Wells wathi izimishini zahlangana, zathi uma simuyeka lo muntu, uzoyibhidliza yonke lento esiyakhile.
49. Ngobani? Ngoba bonke abantu abamnyama ababesezinkonzweni ezahlukene basebebonile ukuthi nangu umMsinduisi wethu, base bezishiya izimishini beza kuShembe. Izimishini zabona ukuthi lento esasithi siyeqedile esizweni samaJuda, ngokushabalalisa uYeshua, nansi lento isizovuka KwaZulu! Abamhlophe futhi babazi kahle ukuthi amaZulu ayisizukulwane sika-Israel, ngoba kwakhukhona nezincwadi abazibhalilo ezazisho lokho, noma AmaZulu amaningi ayengakwazi lokho!
50. Ekuseni ngichazile ukuthi ibandla lamaWeseli lathi uma libona abakhokheli namadikoni akhona belandela uShembwe, base bezomhlasela! uShembe! Akukholakani ukuthi umuntu wayengahlaselelwa ukuthi abantu abamningi bayamlandela. Kodwa izimishini zamhlasela uShembe, kwase kuthi ekuhambeni kwakhe seziqeda ngaye, ngoba zaqeda ngoYeshua, sezivela noJesu wabo ongaziwa ezulwini!
51. “Saqhubeka nohambo lwethu kuleli zwe laseMampondweni, sadlula ehlathini elikhulu okuthiwa iGxalingenwa, saphumela eChancele” Ngicabanga ukuthi ileli iChancela elake laba nomprofethi owaduma kakhulu, kodwa uBaba iNyangayezulu washo ukuthi lento izohamba ihambe iphele ngoba ayiveli kuJehova!
52. “Sahamba sashona ezansi emfuleni iGoxe elalinamanzi amaningi. UShembe wathi asibheke ukuthi sikhona yini isiziba. Sahamba sayobheka, sabuya sasho ukuthi sikhona.Wayesethi: “UJehova uthi siyobhabhadisa lapho abantu abaningi ngesonto elizayo.” Niyamuzwa ukuthi uShembe uthini? Leligama lokuthi ngaso sonke isikhathi sikhulume ngoJehova, akuqali e-NCG, kodwa kwakululimi lukaBabamkhulu!
53. “Sakhuphuka sathola imizi eminingi. UShembe wathi: “Asikhethe umuzi esizoya kuwo.” UMadilika Ngcobo wakhomba umuzi othize omkhulu. UShembe wathi: “Cha, Ngcobo, asizikhetheli thina, uJehova nguye osikhethelayo, uJehova akangeni emizini emikhulu.” UShembe wayesekhomba omunye umuzi wathi asicele khona ukungena.”
Kwakungumuzi kaKhayeka Nkabana.” UNkabana kwakunguyise walomntwana owavuswa nguye uBabamkhulu. Lapha sesixhuma indaba kaNkabana engikhulume ngayo ekuseni.
54. “Sahamba saya khona, sasho ukuthi sihamba nomuntu kaNkulunkulu, uShembe. UNkabana wethuka. Wabuza uNgcobo: “Uyamazi yini uShembe?” Waphendula wathi: “Cha, kodwa ngake ngezwa ngaye ngenkathi ngisebenza eThekwini ngiwu-‘Lisho’ (rickshah). Kanti uShembe uyangena emizini yabantu abangelutho?” Sathi yebo, uyangena. Wabuza uNkabana: “Umuntu ofana noShembe udlani?” Sathi udla konke ukudla okudliwa ngabantu kodwa uthanda kakhulu amabele.” UNkabana wabiza izingane zakhe wazitshela ukuba zilungise indlu yezivakashi. Wangena uShembe, wenza umthandazo wakusihlwa”
55. “Walala endlini esebemlungisele yona. Thina salala kwenye indlu. Ngakusasa ekuseni kwagcwala abantu kulo muzi. Babebizwe unkosikazi kaNkabana. UShembe wayesebiza inkonzo. Wasukuma emthandazweni wathi: “Angizanga lapha ngokuthanda kwami, ngibiziwe. Ngicela abantu bakule ndawo ukuba bangitshele ukuthi bangibizeleni.” Wahlala phansi”
56. Niyamuzwa ukuthi uthini uBabamkhulu sekugcwele abantu? Uthi uBabamkhulu, cha angizizelanga lapha, kodwa ngibiziwe, ngakho laba bantu abangibizile abachaze ukuthi bangibizeleni? Kodwa ngokwazi kwethu bonke laba bantu babeqala ukumbona uMprofethi!
57. “Kwaphakama, u-Enni Dedela, onguMkhokheli ebandleni lamaWeseli, wathi: “Makhosikazi omthandazo, manje sekuvelile enginitshele khona emhlanganweni wethu. Ephusheni lami, ngibone amadoda ayisithupha efika egqoke izingubo ezimhlophe ngendlela okugqoka abesifazane. Ngabona indodakazi yami egane eMampondweni iza kula bantu igqoke amasandali ezinyaweni. Kwase kuqhamuka izwi lathi: ‘Umuntu akayi kula bantu beqiniso efake amasandali ezinyaweni zakhe.’”
Kufakaza uMkhokheli waseWeseli, uthi-ke naba laba bantu engibabone ebusuku, engithe uma ngibona indodakazi iya kubo ifake amasandali noma izicathulo kwaqhamuka izwi lathi umuntu akayi kulaba bantu beqiniso efake izinto ezinyaweni zakhe!”
58. “Kuthe uma eseqedile ukukhuluma lonkosikazi, wahlala phansi. Yasukuma iNkosi yathi: “Ngiyabonga lamazwi, kodwa ngaphambi kokuba ngikhulume, le ndoda ebulale umuntu oyiHiligwa (Griqua) obesebenza emapulangweni eMzimkhulu, ayiphume lapha.” Yagxuma le ndoda yabaleka!
59. “Emveni kwalokho, uShembe waphendukela kumakhosikazi amabili ayephethe umuthi wentando. Wathi kuwo: “Phumani phandle nilahle leyo mithi bantabami, ngoba amadoda enizowadlisa lentando ayophenduka ngosuku lokugcina abe izinja, amabhova, bese enidla!”
60. “La makhosikazi amabili aphuma ayilahla, awaphindanga awusebenzise umuthi. UNkabana wafakaza naye wathi unina ngenkathi esehamba emhlabeni wakhuluma ngesonto elizofika emhlabeni abantu bakhona bayogqoka izingubo ezimhlophe.
61. Wathi: “Ningalilahli lelo sonto ngoba lingukuqala nokugcina kwenkolo yeqiniso.” Washumayela-ke uShembe emzini kaNkabana, kwaphenduka abantu abangu-50.”
62. Ngiyagcina lapho ngoba ekuseni ngiqale lapho, uma sengiqhubeka ngizobe sengikhuluma into ebengikhulume ekuseni. Kodwa ngithena angiyiqale ekuqaleni le ndaba ukuze izwakale kahle, ngoba uma ngiqala laphana uBabamkhulu esekwaNkabana, anazi ukuthi uBabamkhulu ufike kanjani eMampondweni.
63. Kafuphi uBabamkhulu waya eMampondweni ngo 1930, sesiyakwazi lokho, kwakuwu October ngo 1930. UBabamkhulu ngo 1930 walandwa ingelosi yaseMampondweni, eseNqayizivele, kodwa elungiselela ukuya KwaZulu eJudiya emhlanganweni.
64. Yathi le ngelosi ‘imina engakulanda eNtabazawe, ngakushiya somewhere, kwase kufika ingelosi yakwaZulu yakuthatha. Ngakho-ke ngeke ngisakushiya, sengifuna ukuhamba nawe manje, siye eMampondweni siyoshumayela khona. Ivangeli laseMampondweni laqala kanjaloke.
65. Ngelinye ilanga ingelosi ithi kimi ngiseseBuhleni, angifuni wena ukuba ufake ibheshu, ngoba noma wena ungaboni uyaye uvakashelwe zingelosi zezizwe ezahlukene. Uma le zingelosi, mhlawumbe ngeyaseMaXhoseni, ifika kuwe ufake ibheshu, ayiphatheki kahle, ngoba esizweni sayo alifakwa ibheshu. Ngakho-ke kumele ugqoke into ezomukeleka kubo bonke abantu! Ngangingazi ukuthi kuchaza ukuthini lokho, ngoba lalingakabi bikho lelibandla.
66. Kodwa kancane kancane kuba nezinto ozifundayo uma unakisisa. Leli libandla likaJehova, kodwa ingelosi nengelosi iba nomsebenzi wokushumayela ngokuqondene nomsebenzi wayo. Isikhona ingelosi eshumayela kwaZulu, kodwa nengelosi yaseMampondweni yayifuna ukoshumayela emaMpondweni. Izizwe ngezizwe, umuntu nomuntu uba nengelosi yakhe. Akugcini lapho, uba nengelosi yokukholwa kwakho. Ingelosi yesabatha iyabheka ukuthi ukhona yini esabathweni, ingelosi ka 23 iyabheka ukuthi ukhona yini ku 23 noma ku 14.
67. Iukhona ingelosi yabagcotshwa ngokwehlukana kwabo, nayo iyabheka ukuthi njengomgcotshwa kaNkulunkulu, uziphatha kanjani. Ngakho-ke umuntu oyedwa unezingelosi eziningi ezimbhekile kokwahlukana kwemisebenzi yazo.
68. Lengelosi esihamba nayo ngeyebandla, kodwa zikhona izingelosi esingaziboni ezibheke izinto eziningi ebandleni. Njengoba sihlkale sisho, yathi ingelosi ezulwini kukhishwe izingelosi ezingu 7 ezibheke lelibandla, kodwa asiziboni thina, siyaye sibone uHlaleleni yedwa!
69. Njengoba uHlaleleni eyingelosi yakwa Israel, lapha owayehambise khona uMkhokheli, labo bantu abasekho emhlabeni ngoba abantu bakwa Israel thina sesiyinzalo yabo. UNkosazana umkhokheli umaNxumalo wamhlanganisa nabaprofethi bakwa-Israel. Kodwa laba baprofethi babemfundisa ngobuNazaretha, lokhu esikwaziyo, futhi bemchazela nangoShembe. Kodwa asikho isikhathi lapho umkhokheli owake wahlangana khona nomuntu wakwaZulu. Uthi wayehleli nezintshebe nje ezingamaJuda, kodwa ongazazi!
70. Lento ikhona into eyikhulumayo! Kusobala ukuthi abaprofethi bakwa-Israel bakhathazeka ngokuphela kwenkolo kaJehova ababethunywe ukuthi bayandise emhlabeni, base beza kunzalo yabo elapha KwaZulu ukuba ngayo bazovusa ibandla likaJehova!
71. Ngalentshumayelo ngiqonde ukuthi okokuqala siwazi umlando kaBabamkhulu in and out, sizazi izimangaliso zikaBabamkhulu, in and out. Ngoba specifically ngenkathi ingelosi ifika, yathi, yakha ibandla likaJehova kulelibandla uyofundisa abantu ukuthi uJehova ukhonzwa kanjani, kodwa uthathele ezimfundisweni zikaBabamkhulu.
72. Njengoba amaKrestu ama missionary akha isithombe sokuthi uBabamkhulu kwakungumkhohlisi, njengoba namaNazaretha ekusho kithi, kodwa kufanele kube nomlando ocacile ukuthi uBabamkhulu akaze abe yilento izimishini ezathi uyiyo!
73. Njengoba ngilokhu ngiphinda lezindaba, kuzoqhamuka izimangaliso ezitshengisayo ukuthi akekho uMprofethi owake wafana noBabamkhulu, kodwa ngalokho okungasho ukuthi uBabamkhulu uwuNkulunkulu. Ukubiza omunye umuntu, ngaphandle kwaJehova yedwa, uthi unguNkulunkulu, kuyisono sokuhlambalaza uNkulunkulu, kungukuhlubuka kuNkulunkulu!
INkosi ibusise enikuzwile.