Asibuye kumagumbi amane omhlaba, uma uzwa kuvuka inzondo kuwe, uzonda iNazaretha ulizondela ukuthi likutshela ukuthi uNkulunkulu munye, bese uthi kwenzenjani enhlizweni yami, nganenhliziyo ezonda ukuyalwa ngoba ithi incwadi yeZaga, “ULAKA LUHLALA EZIFUBENI ZEZIWULA.” Ngakho uma uvuka ngolaka uma ukhokhelwa, kusho ukuthi uwena oziqamba igama Elisha lokuthi uyisiwula ngoba ukukhokhelwa ikhona okusizayo.
Inkonzo yeSabatha ekuseni mhlaka 27 August 2022: NguMvangeli uZulu.
Ngiyayikhetha iNkosi yaseKuphakameni. Ngiyabingelela iHamente eyingcwele, ngosuku olukhulu lokudumisa uJehova. Ngibonga ithuba engiliphiwayo ezulwini, uma kuthiwa angiguqe phakathi kwaba ngcwele sikhulume indaba kaNkulunkulu owasidalayo. Ngiycela nami kuNkulunkulu waseKuphakameni ukuthi angiphe amandla okwenza lokho okuthandwa nguye nami ahlale olimini lwami angiphe amazwi akhe amein. Ngiyacela sihube ihubo lamashumi amabili, isihlabelelo 20.
20. ISIHLABELELO
uNumeri 22:22-35
1 Mangilizwe izwi lakho
Wena Menzi wami,
Kusinda imbongolo
Yalizwa izwi lakho.
2 Kanti umuntu oyisiwula
Kalizwanga izwi lakho,
Kabili nakathathu
Kalizwanga yena.
3 Kanti imbongolo eyisithulu
Yaphendula ngokushesha,
Yathi nangu uMikhayeli.
Emi phambi kwakho.
4 Saphaphama isiwula
Sathi uthini mbongolo
Kade kwasa ngikukhwela
Wawungangitsheli ngani.
5 Phaphamani maNazaretha
Naku sekusile,
Nangu uMikhayeli
Emi phambi kwenu.
1.Ngiyabonga bantwana baseKuphakameni, ngiphuthuma isikhathi ngoba siyalulekwa lapha ekhaya ngesikhathi. Bantwna beNkosi, phezu kwezinto zonke, esefundiwe amazwi omthetho endlini kaJehova, uMprofethi asilobela wona adumisa uJehova ebabaza ubukhulu bakhe nokuthi wasenzelani, esinqobela ngisho izitha zethu, alibongwe igama leNkosi. Into enkulu esiziqhenya ngayo ngokuba lapha endlini, ukuba ngabantwana beNkosi yasezulwini uJehova owasidalayo, alibongwe igama leNkosi! Siyabonga bantwana baka Jehova ngiyacela ukukhuluma ngesihloko esithi: “UNKULUNKULU WEBANDLA LIKA JEHOVA MUNYE,” alibongwe igama leNkosi. UNkulunkulu webandla lika Jehova munye, bantwana baseKuphakameni, lapha sisesikoleni, kulesi sikole sifundiswa ngokukhonzwa kwenkosi yezulu nomhlaba.
2.UBaba iLanga, iNkosi yaseKuphakameni wabuka wabona ukuthi lobu buNazaretha kancane kancane sebuphumile esimeni uMprofethi owayebulethe buyiso, manje-ke wathuma iNgelosi ukuba ikhulume kubaholi bethu ukuba abuvuselelwe kabusha kubuyele endaweni yabo, alibongwe igama leNkosi. Manje-ke yikho-ke layikhaya sikhuluma ngoJehova ngoba uMprofethi wathi, “BONGANI UJEHOVA NGOKUBA ELUNGILE UMUSA WAKHE UHLEZI PHAKADE,” alibongwe igama leNkosi! Nkonke ukukhuluma kwalapha e-NCG kungoJehova and akusunguliwe la, kusho uMprofethi webandla lamaNazaretha wonke. Ngenxa-ke yezinto ezithile zokweduka, manje ngiqondeni ngalokho?
3.Ngiqonde ukuthi abantu ngenxa yezinto ezithile abazicabangayo abazikholelwayo bona, beze becabange ukuthi leli bandla lingaba nomunye unkulunkulu, kanti lelibandla likaJehova uNkulunkulu uMdali wezulu nomhlaba lilokhu lafika entabeni yaseSinai, linoNkulunkulu oyedwa and igama lalowo Nkulunkulu uJehova. Bantwana baseKuphakameni kufanele sikugcizelele ukuze izikhisi ezidusa abantwana bakithi abaphansi komthunzi welanga abacabanga ukuthi kungaba khona omunye unkulunkulu bebuye kancane kancane. Lapha eNazaretha njengoba sesishilo ukuthi inkolo kaNkulunkulu, inoNkulunkulu oyedwa and uJehova kuphela, kukhona izikhisi ezike zisiduse emhlabeni thina bantu and siyalulekana ngoa lapha ekhaya sihlala neNgelosi, ngakho-ke asikufuniseli ukukholwa kwethu ukuthi kubhekephi. Sike sithi uma sixoxa ekhaya nezingane sithi, “Kodwa niyayibona yini inhlanhla esinayo?” bathi, “Ngani?” sithi, “Thina sihlala nomuntu olale ezulwini uma kuwukuthi kuyalalwa ezulwini,” alibongwe igama leNkosi.
4.Sihlala nomuntu odla ezulwini uma kuwukuthi kuyadliwa ezulwini, sihlala nomuntu osivakashelayo la ezosifundisa, ohlala noJehova, ngaklho lelibandla alicabangeli ukuthi kufunekani ezulwini, ngoba izifundo zakhona ziyisiminya. Uma umuntu ethanda ukuya ezulwini enganamathela ezifundweni zalapha ekhaya, ngeke azisole ekugcineni ngoba lelibanda lino Nkulunkulu. La uma ungafunda incwadi yama Hubo 90, uzothola iNkosi u-Davide ikhuluma ihuba umthandazo kaMose, libhalwe kanjalo lelo Hubo asizolifunda, kodwa lamaHubo 90 iNkosi uDavide ihuba ihubo lika Mose, iqhuba inkolo eyafika entaeni yase Sinai kuMoses. Libhalwe kanjalo leli hubo lithi, “UMTHANDAZO KAMOSE,” Kodwa libhawe iNkosi u-Davide ngoba kuqhubeka iNkolo kaJehova njengoba iya phambili. Futhi uma ungabuka amahubo 22, ubuka ivesi lokuqala uzothola iNkosi u-Davide ibhale ukuthi, “NKULUNKULU WAMI NKULUNKULU WAMI UNGISHIYELANI NA?”
5.Kodwa uma usubuka lawa mazwi uthole uYeshua efika emhlabeni, uma sekufanele athandaze ngezikhathi zobunzima bakhe ukhumbula amazwi omthandazo omdala eNkosi u-Davide eyawuthandazayo, alibongwe igama leNkosi. Ukuqhubeka kwenkolo kaJehova ayishintshi bantwana baseKuphakameni, ayikaze ishintshe nje iqhubeka njengoba injalo, ngakho kuwukweduka bantwana beNkosi, kuhle sincedisane namakholwa akithi ukuthi uma uJehova ethi kuMose, “MOSE NGIZOKWENZA WENA UBE NGUNKULUNKULU BESE U-ARONI EBA NGUMPROFETHI WAKHO,” amazwi lawa kaNkulunkulu ekhuluma ulwimi lwasezulwini, ecikoza ekhuluma noMose bantwana baseKuphakameni. Manje ngiwafundiswa yini lawa mazwi, ngoba abantu abaningi baye bacabange ukuthi ngalawo mazwi ngakhoke sike saba nonkulunkulu lapha emhlabeni okuthiwa u-Mose, ayikaze ibe khona into enjalo bantwana baseKuphakameni.
6.Sikuthathaphi ukuthi ayikaze ibe khona into enjalo? uNkulunkulu walapha eKuphakameni uyena oshilo, ngesikhathi sikaMose no-Aroni, wayengakafiki uMprofethi u-Isaiah lo oseBhayibhelini, angisho uBabamkhulu. Ngakho-ke kuzwakala yena uJehova encwadini ka-Isaiah 43 verse 10 kuya ku 11, ngiyacela siyifunde leyo ka 43 ngoba ibaluleke kakhulu bantwana baseKuphakameni. Uzwakala yena uNkulunkulu wakithi eKuphakameni uJehova owasidalayo, egcizelela ukuthi uNkulunkulu nguyeni okhona lapha ophethe izinto zonke ngubani ngiyacela siyifunde leyo amein. Incwadi ka Isaiah 43 kusukela kwi vesi leshumi kuya kwele shumi nanye: “NINGOFAKAZI BAMI,” KUSHO UJEHOVA, “NENCEKU YAMI ENGIYIKHETHILEYO, UKUBA NAZI NINGETHEMBE NIQONDE UKUTHI NGINGUYE. NGAPHAMBI KWAMI AKWENZIWANGA UNKULUNKULU, NANGASEMUVA KWAMI AKUYIKUBA KHONA. MINA, MINA NGINGUJEHOVA, NGAPHANDLE KWAMI AKAKHO UMSINDISI.”
7.Ngiyabonga mfundisi weNkosi, ngiyabonga baba, hhayi uNkulunkulu uyena osephendulile ngoba bekungathiwa kuphendule lendlu, uyena uNkulunkulu osephendulile ngoba uNkulunkulu uwasho lamazwi esewakhulumile lawa ayewakhuluma ku-Aroni noMose, ngakho-ke uNkulunkulu uyena ocacisayo ukuthi iqiniso ukuthi uNkulunkulu uyena yedwa, alibongwe igama leNkosi. And akekho omunye, ngakho-ke zikhona izigameko eziqhamukayo, bakhona abaye bakhulume ngencwadi lapho umpostoli uPhawuli alunywa khona inyoka esandleni wayithintithela phansi, qede base beyathuka abantu bathi, “Hawu! Lomuntu unobunkulunkulu,” bese bethi ngakhoke umuntu onamandla kaNkulunkulu uyaye abe nguNkulunkulu. Cha! Bantwana baseKuphakameni, uthini yena uPhawuli evakwayo yonke lento esiyenzekile?
8.Ake sifunde futhi Efesu 4, incwadi yabase-Efesu 4, ngoba usho yena umpostoli uPhawuli ukuthi onkulunkulu bangaki, alibongwe igama leNkosi. Incwadi yabase-Efesu 4 ivesi 5 to 7. Incwadi yabase Efesi 4 kusukela evesini lika 5 kuya ku 7: “YINYE INKOSI, YINYE INKOLO, MUNYE UMBHABHATHISO, MUNYE UNKULUNKULU UYISE WABO BONKE OPHEZU KWAKHO KONKE, OKUBO BONKE OPHAKATHI KWABO BONKE. KEPHA ILOWO NALOWO KITHINA UPHIWE UMUSA NGOKWESILINGANISO SESIPHO SIKAKRISTU.” Ameni, hhayi layikhaya sifundiswa lokho bantwana baseKuphakameni, imibhalo ibhalwe phansi ngakho-ke naye umpostoli uPhawuli uthi yinye iNkosi yezulu nomhlaba eyasidalayo alibongwe igama leNkosi. Ngakho asinaye omunye uNkulunkulu ebandleni leli lomdali wezulu nomhlaba, awekho amandla enzekayo noma ngabe isimangaliso esenza ukuthi umuntu osuke ethunyiwe uNkulunkulu noma esicabanga ukuthi unomoya kaNkulunkulu njengoba esenze leso simangaliso, angaba uNkulunkulu.
9.Ngiyacela ukuthi lelihlathi lokucasha ngokuthi banoMoya oyingcwele, uMoya oyingcwele uvela kuNkulunkulu, ukuthi uMoya oyingcwele uvela kuNkulunkulu kakuchazi ukuthi sekukhona onkulunkulu ababili noma abathathu, kakuchazi lokho. UNkulunkulu owaziyo ukuthi uMoya wakhe uwufaka kanjani kumuntu, kodwa umuntu njalo aqhubeke abe wumuntu. Izimangaliso ezenziwa ngo Eliya, izimangaliso eziyisimanga kangangokuba u-Eliya akakaze afe, wavele wakhuphuka wahamba, alikho ngisho ithuna lakhe lapho wangcwatshwa khona, mhlambe ngoba ungalikhomba elika Yeshua ukuthi liphi, kodwa namanje kwathi uma kuqhutshekwa kukhuluma ngo Elija kwakhulunywa ngo Elija umprofethi, alibongwe Igama leNkosi.
10. Isimangaliso asenzi umuntu abe nguNkulunkulu, la eNazaretha uNkulunkulu wethu nguJehova kuphela, lo obhalwe phansi kwishlabelelo seshumi esithi, “UMUZI WAMANAZARETHA… MUNYE KUPHELA UMKHOKHELI WAKHONA NGUJEHOVA INKOSI ENAMANDLA.” Asikwazi ukukushintsha lokho, noma sinothando olungakanani lwabaholi abasiholayo, lokho kufanele sikugcizelele ngoba kuye kuqhamuke umuntu athi, “Abantu base-NCG abanake inkolo yabo behlukane nathi phansi,” asikwazi ukuhlukana phansi nabantu uma bedumaza uNkulunkulu wethu, ngoba uJehova unguNkulunkulu wethu, futhi into ethuka uMprofethi wethu angakaze ayisho kufanele ukuba siphumele obala simumele umprofethi wethu ukuthi akayishongo leyonto. UMprofethi ukhulume ngoNkulunkulu ogama lakhe kungu Jehova kuphela.
11.Futhi lento iyalihlambalaza ibandla bantwana baseKuphakameni, nalapho abantu besebenza khona, uyahamba udilivile ndawothile ufike nayi insizwa yaseKuphakameni inesihluthu esihle, la e receiving lakungena khona izimpahla, bese ibona ukuthi ngowakithi lomuntu, nampa nabantu bakhona. Ngeke nikholwe bangcwele ukuthi kugcina kunokuphoxeka okunjani, engabe kuba kuhle. Ukuphoxeka kudalwa yini? Ukuphoxeka kudalwa ukuthi lensizwa ebona lena enye bese uma iyibingelela ithi, “Hawu mntaka sibanibani,” ingasho ukuthi mntaka Jehova, isho ummholi wayo, yona emthandayo, kanti ngeshwa lena efikile ezodiliva la, ayilandeli loyo mholi, bese kuphoqeleka ukuthi lensizwa le ezodiliva la iyitshele le ukuthi mina angisiye umntaka sibani bani. Bese abantu beyayeka yonke into abayenzayo bebuke amaNazaretha eklwebhana.
11.And angazi ukuthi amaNazaretha kuwathokozisa ngani lokho, ukuthi siphenduke inhlekisa sizihlekisa thina, ngoba nalona osuke efika lana uyabona ukuthi uma ngithula kuzobe kuchaza ukuthi ngiholwa ilesi siyingayinga esiwumholi wakhe. Bese abantu beyama beyasibuka, ukuba kuyenzeka ngelinye ilanga sobathola abantu abafana noMelusi, mhlawumbe uNkulunkulu uyosikhumbula sithole abefundisi abaneqiniso, abayothatha ucingo bamfonele uMelusi bethi, “Baba asiyilungise lento,sesikhathele ukuba inhlekisa ezweni ngento engena nkinga,” ngoba singekubange ukuthi thina sihlala ezihlalweni amanye amaNazaretha akwezinye izindawo ahlala ezicephini, ngoba lokho akuwuphazamisi ndawo umthetho kaJehova, alibongwe igama leNkosi. Lokho kasikubangi ndawo, kodwa nansi into esihluphayo, ile yokuthi sihlukane ngoNkulunkulu-ke manje, bese kuba khona onkulunkulu bokuzakhela.
12.Uma bantwana baseKuphakameni, mhlawumbe uNkulunkulu uyosikhumbula angene ezinhlizweni zabefundisi, mhlawumbe abakhona noma abasazogcotshwa mhlawumbe uyosikhumbula uNkulunkulu, abayothinta uMelusi bethi lento kasiyilungise sicela ukuhlangana nawe, sicela ukuthi kuze izinhlangothi zonke sihlukane ngabaholi kodwa uNkulunkulu wethu munye, yes, sivume sonke ukuthi ngoba izincwadi zisho njalo, cha uNkulunkulu wethu munye nguJehova, sinaba profethi-ke kwafika uMprofethi u-Isaiah Shembe wavusa lenkolo kwase kuba nabaholi-ke emva kwakhe abaningi ngoba lokho singekubange, alibonge igama leNkosi. Kodwa lento iyasihlambalaza, nazo izinsizwa sengathi ukube hhawu siyazikhuza azehlise ukuthi sawubona mntaka sbanibani, ngoba lento iyalehlisa ibandla, iyasihlambalaza iyasiphoxa ngoba singabantwana bakaJehova thina. Kusho uBabamkhulu uthi:
199. ISIHLABELELO
13.Lesi sihlabelelo safika ngeSabatha ngangi kwelase Machunwini
ngomhlaka 22 April, 1933.
1 Abantwana bakaNkulunkulu
Bayathandana,
Bangeke bahlukane
Futhi bangeke baxabane.
Usho njalo uMprofethi wakithi eKuphakameni, usho njalo bantwana baseKuphakameni, ngakho sigcizelela amazwi akhe ukuthi udumo malube kuye owadala izulu nomhlaba njengoba esifundise lokho. Asibuye kumagumbi amane omhlaba, uma uzwa kuvuka inzondo kuwe, uzonda iNazaretha ulizondela ukuthi likutshela ukuthi uNkulunkulu munye, bese uthi kwenzenjani enhlizweni yami, nganenhliziyo ezonda ukuyalwa ngoba ithi incwadi yeZaga, “ULAKA LUHLALA EZIFUBENI ZEZIWULA.” Ngakho uma uvuka ngolaka uma ukhokhelwa, kusho ukuthi uwena oziqamba igama Elisha lokuthi uyisiwula ngoba ukukhokhelwa ikhona okusizayo. Kodwa umuntu ohlakaniphileyo uyancela kubaholi abasuke bekhona uma befunda phansi incwadi, befunda nje ukuthi uJehova wathi, bese befunda phansi, uyaye abone ukuthi nanti iqiniso abese ethi cha mfowethu noma sehlukene ngezinhlangothi kodwa uqinisile alibongwe igama leNkosi.
14.Sicela abantu abanjalo, hhawu sesibonile futhi baba Melusi oyingcwele ukuthi uma sihamba sibuka phandle la, laba bantu abadala abangangani noma ma bethu bayamthanda uNkulunkulu nakhona kwamanye amabranch, kuvuka izingane ezilahlekelwe inhlonipho zidunge ibandla, zidunga ibandla lika Jehova and bayasaba obaba bethu noma wethu ngoba lezingane ziyabulala, kodwa uyababona ukuthi bayalithanda iqiniso, siyababona uma sihambile baba uma usithume kwezinye izindawo. Siyacela ukuthi sengathi lezi zingane nazo zingashawa unembeza wokuthi, singafike sizalwe emhlabeni sizalelwe ukuzodunga ibandla lika Nkulunkulu, ngoba uma lelibandla umprofethi alakha kanzima kangaka seliqhudelana ngonkulunkulu bokuzikhandela, zohleka bani izizwe!
15.Bekungaba njani uma lezi zingane zingake zikhokheleke zizodwa uma kuwukuthi aziwubhemi ugwayi wesizulu ngoba ayikho into ongayenza ngomuntu uma ekhuluma into evele ebanjwe izinto lezi ezibhenywayo, kodwa ingane ekholwayo kayishintshe ithi ngizolalela abaphambili kwami ukuthi bathini.
16Enye indawo ekade sikuyona ngeke ngiyibize nangegama, siye khona kuzwakala umfundisi omdala kakhulu ufundisa abantu abasha abazi ukuthi yini u-Yehoshua. Uthi njengoba ekade ekhuluma nje uNtuli ekhuluma ngoYehoshua uthi umfundisi wakithi, uthi uYehoshua yilo okuthiwa uJesu enithi nina uJesu, usethi ‘abazi phela.’ Yihlazo, ziyabhiyoza njalo izingane zethu ngaleso sikhathizi, empty empty! zihlulwa ubaba othi wabona uBaba iLanga. Hhawu cha kukhona esikufundayo kubafundisi bakithi noma abalapha ekhaya noma ngabe bakwezinye izinhlangothi laba abadala iningi labo, siyakufunda ukukholwa nakubona, alibongwe igama leNkosi.
17.Siyakufunda ukukholwa kubona, ngoba leli bandla alizile mhlambe ukugxeka mhlambe ukuthi liyona kodwa ubaba uMelusi, lithi izwi, “Ukuwa nokuvuka kwalobu buNazaretha ngiyokubuza kuwe,” manje-ke ulo esebenza ukuthi hhayi asibuyisane, asikhumbuzane bafwethu ukuthi uNkulunkulu wethu munye uMprofethi abhale ngaye esihlabelelweni, wacaohuna iBhayibheli uMprofethi ukuthi iBhayibheli lithi, “MESABENI UJEHOVA ZIZUKULWANE NGEZIZUKULWANE,” usifundisa ukuthi kwathiwa asesabe uJehova. Ufike wakubhala phansi kwisihlabelelo seSabatha ku 3 no 4 ukuthi YESABANI UJEHOVA ZIZUKULWANE NGEZIZUKULWANE, wasigcizelela lapho kumi khona ivangeli kanjalo, ngakho bengilapho ekutheni ngisho yena uPhawuli wathi iNkosi yinye uJehova, alibongwe igama leNkosi.
18.Lo Phawuli ogxekwa kakhulu ngamaNazaretha ukuthi wona umthetho, kodwa ikhona into enhle ayenzayo ngoba wathi yinye iNkosi yezulu nomhlaba esho uJehova. Sesingcono ngani kunalo Phawuli esimgxeka kangaka uma thina sesithi kayiyinye iNkosi enguJehova owasidalayo sesithi uma umuntu enoMoya ongcwele esetshenziswa uNkulunkulu uyaphenduka naye abe uJehova, sekuwukukholwa okunjani lokho bantwana baseKuphakameni? Ikhona ingona lapha kaBabamkhulu ethi, “BUYA GEBELEWENI BUYA LIZOSHONA ILANGA.” Liyashona ilanga kumuntu, umuntu uyacikoza emhlabeni ecabange ukuthi ungase umhlaba lona uphenduke ubuke yena, ngoba uligagu kakhulu u-good ngasekuthukeni, kodwa meselele phansi umhlaba lona bese uyaphenduka ube ngange sandla.
19.Bekungakuhle sibuye ngoba kusho uMprofethi uthi buya lizoshona ilanga, uthi buya Gebeleweni. Ngiyabamema bonke abantwana bakithi eNazaretha, sonke nje ukuthi asibuyele kuNkulunkulu wakithi eKuphakameni, uNkulunkulu wemikhosi uJehova owasidalayo, uNkulunkulu osatshwa zihlahla nenyanga nayo yonke into, uNkulunkulu esingembange ngoba uwuNkulunkulu wethu nje uphelele, uma sikulowo Nkulunkulu asinayo inkinga yonkuthi konje wena ulandela muphi unkulunkulu? Kodwa ihlazo lini lelo maNazaretha ukuthi singahambe sibukwa abantu, futhi bangamagagu labantu uma uhlangana nabo emakethe udlula uthi uya edolobheni athi, “mntaka sbani bani!” bese uyambuka uphenduke uthi uvele ungavumi, bathi abantu, “Hhayibo ngoba ungathi basonta ndawonye njena?”
20.Abese ethi umuntu, “Hha ungazuthi amakholwa ayakholwa kanti ave enezinhliziyo ezimbi,” kanti ilaba bantu abayeke ukuthi… bekunani ukuthi uma ngiyinkosana, “nkosana yasezulwini,” noma ngabe ingudlungudlungu, ayaziwa amagama uSheme asipha wona. Yini umuntu afune ukuzikhathaza ukuthi mntaka sbani bani? Leyonto ilincedaphi ibandla, ilincedaphi ibandla, asifundi lutho kuleyo nkulumo, kodwa sifunda umoya wenzondo, wokuzondana siyibandla likaNkulunkulu. Njengamanje uMelusi ushumayele kakhulu encedwa ngabe fundisi bakhe noma. Manje uma amaNazaretha ebukisisa ngabe ayazibona ukuthi noma ngabe akuluphi uhlangothi asewunqobile umhlaba ngoba izwi lezulu leli elisezihlabelelweni zawo wonke amaNazaretha, selizwakele umhlaba wonke. Kodwa idimoni elincane nje bantwana baseKuphakameni lokubanga ukuthi, “Hhayi lowangapha esayidini lami uyena omkhulu,” liphazamisa izwi lezulu.
21.Uma kungenzeka ngabe siyacela ukuthi amaNazaretha onke ajabulele ukuthi izwi lezulu lizwakele emhlabeni wonke. Sasithi thina inganekwane ukuthi uBaba iLanga wake wathi, “AYIKHO INTO EZOBANHLE NJENGOBUNAZARETHA.” Sibuka ukuthi mhlawumbe leyonto iyokwenzeka kudala, siyabona manje baba, njengoba sihambile, ukuthi indlela osewusebenze ngayo lapha endlini, kukhona abantu abashumayela kusabe abantu ukusukuma bashumayele emva kwabo. Lesi sikole sakho sikhipha abantu abanjalo, abashumayela ngendlela yokuthi uma ehlala phansi kuthiwe akulandele omunye umuntu ashumayele bezinkonzo ezithile, bathi, “Ngeke ngisakwazi ukusukuma,” kuthiwe, “Fine ke uma uthi wena mfundisi ngeke usukume, sukumake mkhokheli uzibanibani wasendaweni ethile,” athi, “Nami ngeke ngisakwazi ukusukuma!”
22.La ubona khona ukuthi kanti izwi lezulu liyisimangaliso, siyambonga uNkulunkulu siyambonga noBaba iLanga ukuthumela iNgelosi ngoba nathi ngabe sihambe siqhosha ngobumnyama, ngabe nathi sidunguza ontwini. Namhlanje siphethe izwi eliphelele phakathi kwezizwe, noma amajazi nothayi baba uMelusi kugcwele endlini, wonke umuntu afake umsila ngaphakathi kuthiwe, “Khulumanike,” bethi abantu, “Ngeke sikwazi ukukhuluma!” Angeke ngisho ukuthi kwakwenzeka kephi nini, kodwa ngibonga uNkulunkulu ukusithanda kwakhe, ukuthi asifake eqinisweni eliyisimanga kangaka. Buphenduke ubuNazaretha etendeni bube buhle ngaphezu kwezinto zonke, kuphenduke kube buhle ngaphezu kwezinto zonke, kusukume izinsizwa ezivumelwe umoya nezingekho lapha endlini, ezikwamanye amabandla zithi, “Nansoke into esiyaziyo.”
23.Usho njalo lomfundisi, angifuni nokusho ukuthi owakuyiphi indawo, angifuni nokusho ukuthi ungubani, usho njalo baba lomfundisi uthi-ke uthi, “Njengoba esekhulumile umfundisi uNtuli, kunjalo,” uthi, “Kunjalo,” sathi, “Hhawu laba bantu abadala ayifundiswa inkolo, bayalivumela izwi lingene kubo lingathiywa noma ngabe likhulunywa umuntu ongekho ohlangothini lwabo.” Hhawu singafunda luthile, singafunda lukhulu kini. Niyabonakala ukuthi nabona isimanga, uthando olukuni luyisimangaliso, alusuki eqinisweni. Sekunjalo sekuthiwa…sesibuyele isikhathi kumfundisi uNtuli (kwenye indawo esasikuyo, angazi noma isemaMpondweni angazi noma iseGoli) kodwa uma kusukuma lomfundisi wakithi okolunye uhlangothi ongekho lapha endlini uthi, “Ayikho into e-wrong njengoba umfundisi ekhuluma kanjena, umfundisi uNtuli noma ngabe uthathe isikhathi, njengoba silapha nje ithina esinikezwe ilungelo lokuncengela umuntu indlela yokuya ezulwini, kufanele ukuthi ngabe sidedelwe sonke njengabefundisi lana endlini, safakaza ngokuthi uNkulunkulu aphelezele lomuntu amukele lomuntu akhanyise indlela yakhe.”
24.Uthi-ke, “Ngakho ayikho into e-wrong eyenziwe umfundisi vele kufuneka engabe sinikwe ithuba eliningi elanele,” zase zisokola lezi ngane engikhuluma ngazo, zase zisokola zalahlwa isikhulu sasohlangothini lwazo ngoba sineqiniso. Hhayi bantwana baseKuphakameni izingane zethu azifuni ukukholwa, kodwa azisale thina siyafunda komama bethu nobaba bethu abadala, siyafunda kakhulu. Ithi lensizwa endala, “Abazi laba bantu ukuthi ubani…” ungababona obaba laba bethule nje ucabange ukuthi ziyingayinga kanti bayabuka nje ukuthi wee kwakungenjena lapha eKuphakameni, bazilindele nje usukulabo lokuhamba obaba bayohlala noBaba iLanga ngoba lezi zingane azifuni ukulalela, kodwa lisekhona ithuba, zisengashintsha izingane zethu uma zithanda uNkulunkulu. Zisengashintsha zibuyele kuJehova owasidalayo, ayikho into esizoyibanga noma ngabe sihlanganaphi, ngoba uma sibuya… ngoba igama elisiphambanisayo elonkulunkulu abaningi.
25.Ngoba ithe incwadi ka Exodus 20, “[3]UNGABI NANYE ONKULUNKULU NGAPHANDLE KWAMI.” Sisaba yona-ke nathi, uma uqhamuka nonkulunkulu wakho siyakushalazela.
Uma sesikushalazela bethi abantu, “Hhawu nali iNazaretha libingelelwa ngelinye leli elinye lingavumi, kanti banjani laba bantu?” Sovuma kanjani ngoba uphambana neqiniso lika Nkulunkulu? Ungasibiza kanjani? Angafike athi uBabamkhulu singabantwana baka Nkulunkulu, uthi wena singabantwana baka sbani bani, bese sivuma, cha ngeke sivume bantwana baseKuphakameni, ngeke sivume singabantwana bakaNkulunkulu, kodwa nathi asinankinga ukubahlonipha abaholi bakwamanye ama branch uma bezothathwa njengaba holi, asinankinga noma bagcotshwe abantu noma bagcotshwe uNkulunkulu kasinankinga thina, sikujwayele nje ukuhlonipha sifundisiwe ukuhlonipha, singabahloniphaYo!
26.Kodwa asikwazi ukuthatha udumo lukaJehova nathi siluyise kubo, yileyonto nje inkinga yethu nabantwana bakithi eNazaretha, siyathanda ukuthi ngabe sikhuluma ulimu olulodwa, manje sishawa ukuthi UDUMO MALUBE KUYE OWADALA IZULU NOMHLABA yena yedwa. Ngalokho-ke isibindi esinaso sihlula ukwenza, noma ungasibama usigence ngocelemba usibulale, uma sivuka sovuka sikutshele lokho nje sithi, “Munye uNkulunkulu wethu owasidalayo!” Ngoba sitsheliwe nawukuthi umuzi esiya kuwona uma simela iqiniso muhle kanjani, sitshelwe uMprofethi wethu wathi, “UKHAZIMULA NGAPHEZU KWELANGA NENYANGA,” wathi, “IGOLIDE NESILIVA NGOBUHLE ALILUTHO,” wathi, “KALILUTHO.”
27.Ngakho-ke iqiniso… bengikhuluma bantwana baseKuphakameni sengizohlala phansi, ngokuthi uNkulunkulu wethu munye, kodwa into esiphambanisayo ukuthi ozakwethu abanye becabange ukuthi onkulunkulu bangaba babili. Nabo abakithi abangaphansi kwenkolo yobuKrestu, nabo abafowethu uma benganciphisa ematendeni ukuthi, “Glory to Jesus, glory to Jesus,” cha! Kuyasidumaza lokho uma ususho njalo sivele sehlele ngezansi thina. “Hhawu nampoke laba bantu baka sbanibani bayagxeka ngathi bafundiswe into eyodwa bonke,” akuve sikufundile ukuthi sikutshele iqiniso uma wenza into e-wrong, eve sikufundisiwe uma nje wenza into e-wrong siyakutshela sithi, “Udumo lufanele uNkulunkulu umdali wezulu nomhla, asikho isithunywa esifanele lokho.”
28.And amaNazaretha nawo wonke uma ebuya esho lokho, lokho kuyowasiza, kuyokwenza ukuba sibe noNkulunkulu oyedwa noMprofethi wethu onesithunzi esiphelele. Hhayi ukuthi uMprofethi wethu ehliswe isithunzi ngokuthi kuthiwe zingakhona izingane ezingaba zukulu bakhe ekuthiwa izona ezathuma yena lapha ukuba azoshumayela kodwa abantwana baseKuphakameni uqhamukaphi umuntu ongayithandi into yakhe ngaleyo ndlela athi umzukulwana kababa uMprofethi athi, “Hhayi nikhohlwa indaba nina, lomzukulu woMprofethi uyena owathumela uMprofethi la,” bese kufanele sivume njalo sivume, kufanele kuvume thina khona kuzozwakala kube kuhle. Asivumi! Futhi asigcini ngokungavumi, siyancenga sithi, “BUYA GEBELEWENI, BUYELA EKHAYA.” Noma ubani akabuyele kuJehoba owamudalayo, lo uMprofethi asifundise ngaye ukuthi sikhonze yena singamkhonzi omunye unkulunkulu bantwana baseKuphakameni.
29.Sibonga iNgelosi ukuthi ifike naleso simangaliso ngoba besizohlala sizule emahlane ngezwi. Njengoba uMprofethi wathi izizwe uzibona zihlakazekile, sasithi usho izizwe, kodwa namhlanje sibona kuhlakazeke ibandla lamaNazaretha, lizula emahlane ngezwi, lizula ngezwi kodwa likhona, kodwa isihlabelelo sika 180 kukhona ivesi ethi, “NIKHALELANI NILIPHETHE?” kusho uMprofethi, “NIKHALELANI NILIPHETHE, LIDLENINI SEKWANELE.” Nami ngiyafisa ukusho njalo ukuthi hhawu uMprofethi uthi sikhalelani siliphethe ngoba leli vangeli, iqiniso lokuthi uNkulunkulu wethu ubani ukhonzwa kanjani siliphethe ezihlabelelweni zethu, manje sikhalela bani, imuphi loNkulunkulu esimfunayo, muhle ngani kunoNkulunkulu wethu oyisimangaliso! Ayi sengizohlala phansi, kodwa ikhona incwadi yezenzo baba sengizohlala phansi.
30.Izenzo 14 ivesi leshumi kuya kweleshumi nane ngoba lokhu esikushoyo nasemandulu, nesibandulelayo ababekulenkolo abakaze bavume ukuthi ngenxa yemisebenzi emikhulu abayenzile bese kuthiwa bango nkulunkulu. Incwadi ye Zenzo 14 kusekela evesini leshumi kuya ku 14: “WATHI NGEZWI ELIKHULU, ‘SUKUMA UME NGEZINYAWO ZAKHO.’ YAYISIGXUMA YAHAMBA. KWATHI-KE IZIXUKU ZIKUBONA LOKHO AKWENZILE UPHAWULI, ZAPHAKAMISA IZWI LAZO, ZATHI NGESILIKAWONIYA, ‘ONKULUNKULU BEFANA NABANTU BEHLELE KITHI!’ UBHANABHA BAMUBIZA NGOKUTHI UJUBHITHERI, UPHAWULI NGOKUTHI UMEKHORIYA, NGOKUBA KWAKUNGUYE OWAYEHOLA EKUKHULUMENI. KEPHA UMPRISTI KAJUBHITHERI, OTHEMPELI LAKHE LIPHAMBI KOMUZI, WALETHA IZINKUNZI ZEMIGEXO YEZIMBALI NGASEMASANGWENI WAFUNA UKUBAHLABELA EKANYE NEZIXUKU. KWATHI UKUBA BAKUZWE LOKHO ABAPHOSTOLI OBHANAHA NO PHAWULA, BAKLEBHULA IZINGUBO ZABO BAPHONSEKA PHAKATHI KWESIXUKU, BEMEMEZA.”
31.Ameini, lendaba bantwana baseKuphakameni, abaphostoli benza isimangaliso behambe beshumayela. Zase zithi izixuku zakuleyo ndawo zathi, “Onkulunkulu sebehamba phansi njengabantu,” basuka bashiya konke abakwenzayo abaphostoli badabula izingubo zabo bathi, “Hawu nikwenzelani lokhu, nikwenzelani lokhu? Singabantu njenganani, uNkulunkulu munye asisibo onkulunkulu.” Sebebahlabela bebuyisa izinto eziningi bethi bayabahlabela babenzela zonke izinto ngoba benze izimangaliso. Kodwa baqhamuka abaphostoli bathi, “Udumo kufanele uNkulunkulu kuphela singabantu njenganani,” alibongwe igama leNkosi. Ayikaze selokhu kusukela emandulo, njengoba ngiqale emuva emazwini kaMose acashunwe iNkosi u-Davide kuze kuzofika lapha ekugcineni ngase Bhayibhelini, kuze kuzofika kuMprofethi.
32.Asikho isithunywa, umuntu onoMoya kaNkulunkulu owake waphakamisa igama lomunye unkulunkulu kulenkolo kaJehova akukaze kwenzeke bantwana baseKuphakameni. Zonke izithunywa ezithunywa uNkulunkulu, zithi uNkulunkulu munye and lowo Nkulunkulu igama lakhe ujehova.
INkosi ibusise enikuzwile