Ukuhamba ngokuqondake kulele enhliziyweni yikho noBabamkhulu ethi asomkhonza uNkulunkulu ngayo yonke inhliziyo yethu. Okusho ukuthi uma kufikwa enhliziyweni yami kufanele uma kubhekwa kungatholakali ukuthi kukhona igumbi elingamkhonzi uNkulunkulu ngoba lokho kusho ukuthi angimkhonzi uNkulunkulu ngayo yonke inhliziyo yami njengoba uBabamkhulu washo lapha emthandazweni weSabatha ukuthi asomkhonza ngayo yonke inhliziyo yethu.
Inkonzo yangeSabatha ekuseni ngomhlaka 07 March 2026.
Besiyethulelwa nguMfundisi uMsane, ebisihloko sithi:
INHLIZIYO ELUNGILEYO IHLALA KUJEHOVA.
1. Bantwana baseZulwini. Ngiyabonga ithuba engilitholayo livela esihlalweni sobukhosi baseZulwini ukuba ngiphakame kulenkonzo yeSabatha lanamhlanje, kuwumkhosi omkhulu wentethelelo weSabatha. Ngiphakamisa ukubonga, ngiyacela eNkosini yaseKuphakameni ukuba ihlale olwimini lwami kube iyona ezongipha namazwi engizowabeka phambi kwabantwana abayingcwele.
2. Kungabi ngamazwi azoqhamuka kimi nasemizweni yami kepha kube ngamazwi asuka kuyo (i-Nkosi), azothi uma efika kubantwana bayo abe ukuphila. Ngizocela nje ukudlula esihlabelelweni sika-66. Ngiyocela abaNgcwele bangilekelele.
66. ISIHLABELELO
1 Thixo wami uyamangalisa
Ubukhulu bakho buyakhazimula
Yeka ubuhle besihlalo somusa,
Ekujabuleni kokukhanya okuvuthayo.
2 Hawu ukumangalisa, Hawu ubuhle bakho,
Bokuzibonakalisa kwakho,
Ukuhlakanipha kwakho okungena mkhawulo
Amandla akho angena kubohla
Nobungcwele bakho obungapheli.
3 Hawu ukukwesaba kwami Thixo ophilayo
Ngokwesaba okujulile okumnene.
Ngikukhonza ngethemba eliqhaqhazelayo
Nezinyembezi ezinganqamukiyo.
4 Ngiyakuthanda Mkhululi
Ngokuba usungithandile,
Ngokuba uthobele ukungincenga
Nothando lwenhliziyo yami empofu.
5 Akakho uBaba emhlabeni onothando
Olunjengo lwakho,
Akakho nomame onjengawe
Mthwali wazo zonke izono zethu,
Nezami mina moni olusizi.
6 Yise kaJesu Mvuzi wothando
Hawu intokozo eyakubakhona
Uma sesiguqa phambi kwesihlalo sakho,
Sigqolozela njalo kuwe! Amen.
3. Ngiyabonga kakhulu bantwana baseZulwini ngokungilekelela. Ukuma phambi kwalendawo akuyo into encane nento ongayithatha kalula noma ngabe kuthiwa mhlambe ukukhuluma uwumuntu okujwayele nokukhuluma phakathi kwabantu kodwa uma sekufanele ukuthi ukhulume phambi kwabantwana baseZulwini nabantwana abathandwa uNkulunkulu kuye kufanele ukubheke ukukhuluma kwakho unxuse nasesihlalweni saseZulwini ukuthi sibe solwimini lwakho.
4. Ngake ngasho ngelinye ilanga ngathi, kwake kwathi iNkosi yaseKuphakameni uBaba iLanga ethandaza ebusisa emveni kwenkonzo, wasethi, “Nkosi yaseKuphakameni uma wawudalile ukuthi kukhona abantu abayothi uma befa emhlabeni bangene eZulwini, ngiyacela ukuthi kusale sekuba yibo laba. Uma wawudalile ukuthi kukhona abantwana abayobizwa ngokuthi bangabantwana bakho, ngiyacela ukuthi kusale sekuba yibo laba.
5. Wathi, “Yiba yizinto zonke kubantu bonke ngesikhathi sonke.” Wayekhulumake lamazwi uBaba iLanga ecelela thina maNazaretha. Manje uma kufanele ukhulume phambi kwamaNazaretha kuye kufanele ngathi nolwimi lwakho ungaluqoqa ngoba usuke ukhuluma phambi kwabantu abacelelwa into enkulu, ukuthi uma bedlula emhlabeni bangene eZulwini.
6. Isihloko engizokhuluma ngaso sithi INHLIZIYO ELUNGILEYO IHLALA KUJEHOVA. Sizodlula nje lapha kwiversi lika-23 kuMthandazo weSabatha elithi, “UMKHONZE NGAYO YONKE INHLIZIYO YAKHO NANGAWO WONKE UMPHEFUMULO WAKHO OKUNGOKUKA JEHOVA.” Laphake kuleli vesi uMprofethi ukhulume ngezinto ezimbili, ukhulume ngenhliziyo wakhuluma nangomphefumulo.
7. Zombili lezizinto zitholakala emzimbeni womuntu kodwa uthi uBabamkhulu lezinto futhi zombili zingezika Jehova. Okusho ukuthi inhliziyo esinayo eka Jehova, umphefumulo esinawo okaJehova. Siyazike ukuthi uNkulunkulu mhla edala umuntu wathi esembumbile wasephefumulela umphefumulo wakhe kuye.
8. Yindaba engicabanga ukuthi wonke umuntu ngisho umntwana oseskoleni uyayazi leyondaba. Ngingazike manje thina esikoleni safunda kusekhona ezenkolo angazike noma namanje zisekhona yini. Kodwa-ke esizokhuluma ngakho thina sizokhuluma ngenhliziyo, ukuthike inhliziyo elungileyo ehlala kuJehova.
9. Uyeze asho uNkulunkulu laphana encwadini ngithi uJeremiya 17 ivesi lika-9 no-10 ethi INHLIZIYO INGUMKHOHLISI UBANI ONGAYAZI NA? lithi MINA JEHOVA NGIHLOLA INHLIZIYO NGIVININYA IZINSO UKUBA NGAMUKELISE YILOYO NALOYO NGOKWEMSEBENZI YAKHE. Manjeke kuye kufanele ukuthi uma singabantwanake abakholiwe sihlale sikucela njalo ukuthi inhliziyo yethu ihlale ibheke kuNkulunkulu ngezikhathi zonke ngoba yila okuhlala khona yonke into enhle nembi.
10.Noma umuntu engenza into embi njengamanje akukaze kwashiwo ukuthi, “Hawu! Unamehlo amabi,” noma, “Unengqondo embi,” noma, “Unezinyawo ezimbi.” Kodwa kuyaye kuthiwe, “Hawu lomuntu usengaze abulale abantu kangaka, hhayi unenhliziyo embi.” Uma wenze futhi okuhle okuze kungashiwo ukuthi, “Hawu lomntwana unokucabanga okuhle, unokubona okuhle.”
11.Kodwa kuye kuthiwe unenhliziyo enhle ethanda abantu. Manjeke kuye kufanele ukuthi ngaso sonke isikhathi siyicele le nhliziyo kuNkulunkulu njengoba sesifundile nalapha ukuthi uthi uBabamkhulu asomkhonza uNkulunkulu ngayo yonke inhliziyo yethu nangawo wonke umphefumulo wethu. Okusho ukuthike ukukholwa kwethu kunamathele kakhulu enhlizweni.
12.Uma ukukholwa kungabanga bikho enhliziyweni awukwazi ukuthi ukholwe kahle, ungahlala phakathi kwethu. Ngifike ngihlale la ngiguqe njengoba ngithunyiwe namhlanje ukuthi ngiguqe phambi kwabantwana abayiNgcwele kodwa inhiziyo yami uma ingamkhonzi uNkulunkulu ngokuphelele njengoba kusho uBabamkhulu ethi asomkhonza uNkulunkulu ngayo yonke inhliziyo yethu.
13.Ngiyothi uma kuhlukana umphefumulo nenyama bese ngingaliboni lelikhaya elizayo, ngingawuboni lomuzi owathi uBaba iLanga mhla ethandaza wathi, “Nkosi uma wawudalile ukuthi kunabantu abayowubona umbuso weZulu uma bedlula emhlabeni, ngiyacela kube yibona laba.” Inhliziyo yamike uma ingangivumeli ukuba ngikholwe angeke ngikwazi ukungena kulomuzi ahlabelela ngawo uBabamkhulu kwisihlabelelo-10 wathi, “UMUZI WAMANAZARETHA UKHAZIMULA NGAPHEZU KWELANGA NENYANGA UMKHOKHELI WAKHONA MUNYE UJEHOVA KUPHELA.”
14.Nasesihlabelelweni uma ngikhaphosisi ngithi u 105 mhlampe ivesi lesine elithi, “UKUKHOLWA KUWE KUNGUKUVUMA KWENHLIZIYO, UMA INHLIZIYO INGIPHIKISA NGOVUNYELWA NGUBANI.” Wayesakhuluma yona nala indaba uBabamkhulu ukuthi kufanele izinhliziyo zethu ziqonde ngoba uma inhliziyo ingavumanga ukukholwa akekho omunye umuntu futhi ozokuvumela ukuthi ukholwe.
15.Njengoba esho uBabamkhulu ukuthi,”Uma inhliziyo ingiphikisa ngovunyelwa ubani?” nakusihlabelelo 237 uthi, “NGIYATHANDA MINA UKUYIKHONZA INKOSI YEZULU NOMHLABA KEPHA INHLIZIYO AYIVUMI UKUKHULULA UMPHEFUMULO.” Manje kuye kufanele ukuthi ngaso sonke isikhathi uma singabantwana sikholiwe sikubheke kakhulu ukuthi inhliziyo yethu isenza njani.
16.Sikucele futhi nakuNkulunkulu ukuthi inhliziyo yethu isivumele ukuthi sikholwe. Abaholi sebesifundise kakhulu izinto eziningi ukuthi ukuze sibone uMbuso weZulu kufanele senzenjani, kufanele sihambe kanjani. Kuningi esesikufundile kusukela lelibandla likhona siqondiswa ngalenhliziyo ukuthi kufanele sihambe ngokuqonda.
17.Ukuhamba ngokuqondake kulele enhliziyweni yikho noBabamkhulu ethi asomkhonza uNkulunkulu ngayo yonke inhliziyo yethu. Okusho ukuthi uma kufikwa enhliziyweni yami kufanele uma kubhekwa kungatholakali ukuthi kukhona igumbi elingamkhonzi uNkulunkulu ngoba lokho kusho ukuthi angimkhonzi uNkulunkulu ngayo yonke inhliziyo yami njengoba uBabamkhulu washo lapha emthandazweni weSabatha ukuthi asomkhonza ngayo yonke inhliziyo yethu.
18.Kufanele ukuthi inhliziyo yethu iphelele ekukhonzeni uNkulunkulu njengoba nakuso isihlabalelo u-222 esithi: NGINGUMLANDELI WAKHO NOMOYA ONGCWELE YIPHA NKOSI INHLIZIYO YAMI UKULIZWA IZWI LAKHO. Noma uqhubeka naso wonke amavesi ngokulandelana kukhona elide liphindile lithi: VUMA NHLIZIYO YAMI VUMA NGIMULANDELE.
19.Sizelanake nje phambi kobuso bukaNkulunkulu sizoncenga izinhliziyo zethu ukuthi azivume ukuthi simulandele uNkulunkulu. Ngoba uma izinhiziyo zethu zingavumi ukuba sikhonze uNkulunkulu sizogcina sesikhonza abanye onkulunkulu abangeke besisize ngalutho. Into eyinkingake uma uzolandela abanye onkulunkulu.
20.UBaba uMelusi uvamile ukusifundisa ukuthi ungayenza yonke into yakho ewukungalungi, umuphike uNkulunkulu njengoba sekukhona abamuphikayo abathi uNkulunkulu akekho kodwa okuyinqaba ukuthi mhla kufika usuku lwakho lokuhamba emhlabeni uyena loNkulunkulu omuphikayo okuwuyena oyokwahlulela.
21.LoNkulunkulu wakho ozakhele yena wena nosumkhonza osekuwuyena oyithemba lakho akanawo amandla okukwahlulela kodwa oyokwahlulela iloNkulunkulu omphikayo. Kukhona incwadi angazi noma ukhona yini ongakwazi ukuthi angitholele yona, ngicabanga ukuthi incwadi kaJeremiya-11 vesi 10-12.
22.“Incwadi kaJeremiya amavesi kusukela ku-10 kuya ku-12: BABUYELE EZIPHAMBUKWENI ZOKHOKHO BABO BOKUQALA ABALA UKULALELA AMAZWI AMI, BALANDELA ABANYE ONKULUNULU UKUBA BABAKHONZE. INDLU KA ISRAELI NENDLU KAJUDA ZASEPHULA ISIVUMELWANO SAMI ENGASENZA NOKHOKHO BABO. NGAKHOKE USHO KANJE UJEHOVA UTHI, BHEKA NGIYAKWEHLISELA INHLEKELELE PHEZU KWABO ABANGAYIKUPHUNYUKA KUYO. BAYAKUKHALA KIMI KEPHA ANGIYUKUBEZWA, IMIZI YABAJUDA NABAKHILEYO EJERUSALEMA BAYAKUHAMBA BAKHALE KONKULUNKULU ABABASHISELA IMPEPHO KEPHA ABAYAKUBASINDISA NAKANCU LAPHO BEHLELWA INHLEKELELE.”
23.Angithi niyayizwake indaba ukuthi uNkulunkulu uthini. Ungabakhonza onkulunkulu bakho labo othanda ukubakhonza kodwa mhla uNkulunkulu esehlisa inhlekelele phezu kwakho, labo nkulunkulu bakho angeke bekwazi ukukusiza ngoba abanawo amandla okukwaphula uma ususosizini kodwa loNkulunkulu onguJehova, lo athi uShembe asimkhonze ngayo yonke inhliziyo yethu uyena onamandla okuthi uma kuqhamuka usizi simemeza yena uyakwazi ukuthi asizwe.
24.Kodwa uthike laba abakhonza abanye onkulunkulu, abashisela abanye onkulunkulu impepho noma bekhala uma eselethe usizi kubona ngeke aze akwazi ukubezwa. Nalabonkulunkulu babo futhi… bayohamba bayokhala kulezi zithixo zabo. nazo futhi izithixo zabo ngeke zikwazi ukubasiza. Sizokhumbula ngesikhathi se Covid-19 ukuthi kwenzekalani.
25.Bonke abantu bagijima bayokhala konkulunkulu babo kodwa labo nkulunkulu babo akaze bebasize. Njengoba esho nje uNkulunkulu ukuthi labonkulunkulu babo ababashisela impepho abakwazi ukubasiza uma sebebhekene nobunzima kodwa uyena kuphela okwazi ukukusiza uma usubhekene nobunzima kodwa uma umkhonza ngayo yonke inhliziyo yakho.
26.Njengoba nathi yathi uma ifika i-Covid-19 uNkulunkulu wathumela iNgilosi kubaHoli ukuthi kufanele senze njani ukuze sizosinda, nangempela sasinda kwaze kwasinda nemindeni yethu. Ngani? Ingoba sasikhonze loNkulunkulu onguJehova uNkulunkulu onguMdali weZulu noMhlaba, okwazi ukubhubhisa abangamukhonzi.
27.Manjeke ibaluleke kakhulu indaba yokuthi inhliziyo yethu njengoba ngishilo ukuthi isihloko sethu sithi INHLIZIYO ELUNGILEYO NGEHLALA KUJEHOVA. Inhliziyo yethu sengathi ingahlala kuJehova ngezikhathi zonke ngoba inhliziyo uma ihleli kuJehova izokwenza ukuthi ngibe nothando lomzalwane omunye oseceleni kwami, izongenza ukuthi ngibe nothando nomakhelwane izongenza ukuthi ngibe nothando ngisho nakubaHoli.
28.Izokwakha ukuthi ngithande ngisho ukugcina umthetho kaNkulunkulu ngoba ngiyazi ukuthi enhlizweni yami ngaphakathi alikho ichashazi elitholakalayo ukuthi kukhona indawana engikwazi kuyo ukuthi ngigcine izinto ezingahambisani noNkulunkulu. Lento ngiyayikhuluma ngoba nami ngenzela ukuthi ingigqugquzele ingakhe ukuthi inhliziyo yami kufanele ukuthi ibe inhliziyo ezokhonza uNkulunkulu ngezikhathi zonke.
29.Ngoba uma ungamkhonzi uNkulunkulu, kuzothi uma kubhekwa inhliziyo yakho njengoba ishilo incwadi kaJeremiya 17 lapha kwi vesi lika-9 ukuthi uNkulunkulu uhlola yona inhliziyo ukuthi wena enhlizweni yakho kukhonani ukuze akwamukelise ngomsebenzi wakho. Manje uyabona ukuthi inhliziyo iyonanto engathi hlampe kushukuthi iphethe ukuphila kwethu ngoba nakodokotela uma kukekwama inhliziyo kuke kushiwo kuthiwe hhayi kuvele kwama inhliziyo besengasakwazi ukuphefumule bese kwaba ukuhamba kwakhe emhlabeni.
30.Kusho ukuthi inhliziyo iyona ephethe ukuphila kwethu, iyona futhi ephethe ukuthi sikwazi ukungena eZulwini. Ngenhliziyo yethu uma ihlalile kuJehova kuyothi la ikhathala khona sikwazi ukuthi singene eZulwini ngoba uyothi uma eyithatha uNkulunkulu eyibheka ayithole ukuthi hhayi ihambe ngezimiso zakhe kusukela ekuqaleni kwaze kwaba sekugcineni kungabibikho la okutholakala khona kunechashaza.
31.Njengoba silana nje silandela abaholi bethu, inhliziyo yethu eyasivumela ukuthi size la. Abaningi izinhliziyo zabo ezingabavuelanga ukuthi beze la bami lapha kude namuhlanje, bakhipha izinhlamba bakhipha konke okubi bakubhekisa kubaholi bethu ngoba izinhliziyo zabo zibanqabelile ukuthi beze la. Basibona njengoba siguqile nje sila phambi kwabaholi bethu, basibuka njengabantu adlalayo.
32.Abanye baze babhale ngisho koFacebook bethi uBaba uMelusi wasebenzisa ukuhlakanipha kwakhe ukuthi asibambe ukuthi silandele yena kanti cha akunjalo uBaba uMelusi vele ngokudalwa wayevele ehlakaniphile kodwa futhi uNkulunkulu wayengeke angamuphi ukuhlakanipha uma wayazi ukuthi uzomthuma ukuba enze lomsebenzi.
33.Ngoba wayezowenza kanjani uma wayengezumnika ukuhlakanipha. So ke ukuhlakanipha uBaba uMelusi anakho ukuhlakanipha vele owakuphiwa ezulwini, uNkulunkulu emphela khona ukuthi akwazi ukuqhuba kahle leliZwi ngoba ukube kuthiwa lelibandla lamaNazaretha kaNkulunkulu alikho angazi ngabe kunjani emhlabeni futhi nami angizazi ukuthi ngabe ngikhuphi.
34.Ngoba umhlaba ungawuhamba wonke ngeke ulithole leliZwi esilifunda kubaholi bethu, angeke uze ulithole ndawo ngobala akufuniselwa kusuka umuntu osuka eZulwini azosho ukuthi yini okufanele siyenze ukuze uNkulunkulu asamukele. Njengamanje akwenziwe ukuthi, njengamanje akwenziwe ukuthi.
35.Kodwa abantu abanezinhliziyo eziqinile nezinhliziyo ezilukhuni abekho la, namanje ezinhlizweni zabo basenemicabango emibi uma bebheka abaholi bethu. Kodwa noma sewubachazele kanjani ngokuba khona kwaleli bandla baye bengafuni ukulalela ngoba izinhliziyo zabo azibavumeli ukuthi bakholwe. NoNkulunkulu futhi abamkhonzi ngenhliziyo yabo yonke.
36.Enhlizweni yabo babuye babe nendawo abayigcinele ukuba bezonde ngayo abanye abantu. Uma nje ngizokhuluma ngendaba eyenzeka, uBaba uMelusi uvame ukusikhumbuza ukuthi yathi iNgilisi ,Ngesikhathi uBabamkhulu esungula lelibandla lamaNazaretha wakwenza konke wathi esekwenzile konke sekuqala kuhamba kahle kukhanya zase zifika izithunywa zaseZulwini zamuvezela ukuthi lobu buNazaretha buzohamba buhambe bugcine sebunjani.
37.Futhi zakuveza ukuthi leso simo esiyobufica ubuNazaretha siyobe sisuka kuyo inzalo yakhe uMprofethi. Zase zibuza izithunywa zaseZulwini ukuthi iyolungiseka kanjani lento, uBabamkhulu uyoyilungisa kanjani lento. Wayesethi uBabamkhulu hhayi ikhona intandane yami ngizocela ukuthi uNkulunkulu angibusisele yona, abantwana eyobazala bayothi bengeyibo abakwaShembe ngenyama nangegazi kodwa babe noMoya kaShembe.
38.Uhlezi esikhumbuza uBaba uMelusi lento kodwa ngisho abadala ababekhona bayayazi leyonto ngiyakhumbula uma ngikhumbula kahle uye esho uBaba uMelusi cishe kwakuseminyakeni yo-1985 uma ngingakhumbula kahle kukhona incwadi owayeyibhalile. Waficwa yenye yamakhosazane amadala ayekhona ngesikhathi sikaBabamkhulu.
39.Yathi lenkosazana uma imufica uBaba uMelusi edayisa lezi zincwadi ezikhuluma ngendaba kaShembe, isizwa futhi ukuthi njengoba uBaba uMelusi eyidayisa nje futhi uyena oyibhalile. Yase ihalalisa ibonga ukuthi ngoba wayeshilo vele uBabamkhulu ukuthi abantwana abayozalwa umama uMaDube ozala uBaba uMelusi uyozala abantwana abayothi bengeyibo abakwaShembe ngokwenyama nangokwegazi kodwa babe noMoya kaShembe.
40.Lenkosazana yayibona wona loMoya kaShembe uma ngikhumbula kahle ngithi uMamashi owafica uBaba uMelusi edayisa izincwadi lapha eBuhleni. Wahalalisa ngoba ebona ukuthi leyanto eyashiwo uBabamkhulu nanku namhlanje loMoya kaShembe uyasebenza njengoba nanamhlanje usebenza, sila nje sibuthwe yiwo futhi loMoya kaShembe owakhuluma ngawo uBabamkhulu, owacela kuNkulunkulu ukuthi akabusise lentandane ngoba iyophatha indaba enkulu le esihlangene ngayo namhlanje.
41.Kungagcinanga lapho ngonyaka ka1992 uBaba iNyangayezulu wathuma abavangeli abathathu abahamba emhlabeni sebengabefundisi, kunguMfundisi Mthethwa, uMfundisi uMthonsi waseVunizitha noMfundisi uMgabhi, uMgabhi noma ngingakhumbuli kahle ngathi kodwa owangapha ngako Mnambithi angisakhumbuli kahle noma ko Bergville.
42.Umfundisi Mthethwa ke kwakowaseMlazi, wabathuma kwakuwumhlaka-9 September 1992, wabathuma eNewcastle ukuba bayobiza uBaba uMelusi behamba ngalekhumbi ebovu. Bahamba bafike balala eNewcastle babuya ngakusasa ngomhlaka-10 September. Bathi uma befika lapha emzini waseBuhleni, uBaba iNyangayezulu wasebiza uBaba uMelusi kanye nomfundisi uMpanza ongumnewabo kaBaba uMelusi omdala.
43.Wangena nabo ngaphakathi endlini yakhe ubaba iNyangayezulu, wangena nabo ekamelweni wafike wabakhombisa impahla, kwakunezinto ezazingahleli kahle izimpahla nje ngicabanga ukuthi kwakuzimpahla mhlampe okusuke kunikelwe nangazo. Bafika endlini kungahleli kahle wabuza kubona uBaba iNyangayezulu, “Lezimpahla uma zihleli kanje zihleli kahle yini?”
44.Baphendula ngokuthi, “cha Baba azihleli kahle.” Baphuma kulelo kamelo baya kwelinye, nakhona bafica kuyinto efanayo waphinde wabuza futhi ukuthi lezipahla zihleli kahle yini? Nakhona futhi bathi azihleli kahle. Baze baya ngisho kwi bedroom yakhe uBaba iNyangayezulu, nakhona futhi bafica kunezinto ezingahlelekile kahle.
45.Waphinde wabuza futhi uBaba iNyangayezulu ukuthi lezi zinto njengoba zihleli kanje zihleli kahle yini. Bathi cha Baba azihleli kahle, wase ephuma nabo eya e sitting room. Uma sebese sitting room uthi uBaba iNyangayezulu, “Ngiyabona ukuthi senididekile, anginibizele yona lendlu kodwa enginibizele khona yibandla lamaNazaretha. Njengoba nibona lendlu nje imafuhlululu inje nebandla lamaNazaretha limafuhlululu kanje. Nakhuke enginibizele khona UKUWA NOKUVUKA KWALELIBANDLA UNKULUNKULU UYOKUBUZA KININA. Sengiqedile hambani.”
46.Amazwi lawo ashiwo uBaba iNyangayezulu, emveni kwalokho kwathi kusenkonzweni phakathi, ngaleso sikhathi uBaba uMelusi wayengakagcotshwa ngisho ukugcotshwa. Wathi ehleli nje uBaba uMelusi lapha enhlalisuthini uBaba iNyangayezulu wabiza umfundisi uMthethwa owayengumuvangeli ngaleso sikhathi.
47.Wafike wamunika umyalelo wokuthi akahambe ayothatha uBaba uMelusi lapha ahlezi khona azomhlalisa la kubefundisi phambili. Wamuyalela futhi ukuthi afike amutshele uBaba uMelusi ukuthi uzohlala la futhi uma kunikelwa angawubambi ulayini akoza nje phambili afike aguqe bese eyanikela abike lokho afuna ukukubika.
48.Wahamba umfundisi uMthethwa waya kuBaba uMelusi wafike wamthatha wamhlalisa phambili nabefundisi. Ekwenza lokho phambi kwebandla kubuka wonke umuntu, akuyiyo into eyayifihliwe. Kodwa ababike bakubuka bangakuthanda lokho ngoba ngishilo ukuthi inhliziyo elungileyo ehlala kuJehova.
49.Ababenezinhliziyo ezazingahleli kuJehova bakubuka lokho bangakuthanda base beqala bakha amacebo amabi ababewabhekise kuBaba uMelusi. Bamhlukumeza ngayo yonke indlela ngoba babengakholiwe ezinhlizweni zabo. Kwathi noma sekufika isikhathi sokuthi eZulwini athunywe uBaba uMelusi ukuthi akaphathe lomsebenzi zaqhubeka izitha zakhona njengoba namanje zikhona kodwa sike sikubonge kuNkulunkulu ukuthi noma zikhona kodwa ude njalo uNkulunkulu ezinqindile amandla.
50.Siyamcela futhi ukuthi akaqhubeke njalo ede ezinqindile nje izitha amandla zingabi nakho okubi ezizokwazi ukuthi ziphumelele ukukwenza phezu kwabaholi bethu. Lapho bekhona abaholi bethu, izingilosi lezi ezakhishwa eziyisikhombisa zihlale zikhona eduze kwabo zibavikele ngaso sonke isikhathi la behamba khona noma bela ngaphakathi kwalomuzi waseNqobizitha zihlale zikhona futhi kungabi bikho isikhathi la ezizongabi khona eduze kwabo zihlale zibavikela njalo.
51.Ngoba kuningi uBaba aye asitshele khona ngo kuhlukumezeka kwakhe uze uzibuze kwesinye isikhathi ukuthi hhawu uthi laba bantu babekholiwe kodwa khona uma kuzothi uma kukhulunywa kuphakame umuntu athi hhayi mina ngibona ukuthi into ezolungisa lento ukuthi akabulawe. Yake yakhulunywa into enjalo ebandleni?
52.Kodwa ngenxa yokuthi inhliziyo yalowo muntu yayingenaye uJehova yikho wayengalungile. Ikhona wayekwazi ukuthi angabi namahloni okuphakama phambi kwabantu akhulume into efana naleyo ingoba inhliziyo yakhe yayingalungile. Ngiyakhumbula nje kwakungunyaka ka 2009 sisasabathela laphana ezansi eSanlam center.
53.Ngaleso sikhathike laphana eSanlam center kwakungeyiyo indawo eyithempeli, kuse parki lapha so abantu-ke baye bezifikele ngo lwesihlanu bazifikele bazenzele into yabo bashiye kungcolile kunjalo. Ngase ngikwenze kwaba umsebenzi wami ukuthi ngizovuka njalo ekuseni ngiyosebenza laphana ngilungise indawo okuzokwazi ukuthi kusontelwe khona.
54.Njalo ngeSabathe-ke ngangike ngivuke early kakhulu endlini ngihambe ngiye lapha ngifike ngi cleane ngisuse amaphepha. Ngihambe ngiye lapha ngaphansi eSanlam lapho kulahlwa khona ama khalibhothi. Ngilande amakhalibhothi ngiwandlale yonke lendawo la okuzohlala khona abangwcele. Bethi befika nje abangcwele sengilungisile yonke into.
55.Ngilande nezindwangu kwakukhona umuzi owawungaphesheya esasibeka kuwo izindwangu esasiye sihenqe njengazo ezazizokhombisa ukuthi nanka namasango okungena ngaphakathi eThempelini. Ngase ngikwenze nje lokho kwaba umsebenzi wami, ngangike ngivuke njalo ngeSabatha ngikwenze. Kwahambake kwahambe kwaze kwafika isikhathi la kufika khona uBaba uMelusi noma uMfundisikazi.
56.Ngaqhubeka nje ngawenza lomsebenzi. Kwahamba kwahamba-ke lendaba yenhliziyoke engithe angikhulume ngayo namhlanje ukuthi inhliziyo elungileyo kufanele kube inhliziyo ehlala kuJehova. Kuthe sekukhona abaholi bethuke yavuka inhliziyo engahlali kuJehova kubantu. Abantu ebesihleli nabo nje sibathembile kungabantu ababebadala phambi kwethu bewobaba kithi esasiye silalele kubona sithunywe yibo la kwakufanele basithume khona.
57.Kodwa kwathi uma sekukhona abaholi bethu baqala manje abangabe besasifundisa indaba kaShembe base besifundisa ukuthi asizonde uBaba uMelusi kanye noMama uMfundisikazi. Ngaleso sikhathi ngangisemncwane kakhulu cishe ngangino 25/26 years nje lapho. Uma ubhekake sasisebancane kakhulu ukuthi umuntu kwakungafika umuntu ukuthi azosifaka inhliziyo yokuthi asizonde abaholi bethu.
58.Thina esasiyizingane sasikujabulela ukuba khona kuka Baba uMelusi noMfundisikazi ngoba uBaba uMelusi wayesifundisa indaba kaNkulunkulu. Kuthe ngelinye ilanga ngifikile nje ngisathi ukulungisa lapha kwase kufika omunye umgcotshwa. Ngangimkhonzile nje kakhulu, uyangifica ngibhizi ngiyasebenza lapha.
59.Bese efika naye esebenza. Kwakuwuyena muntuke wesibile owayevame ukufika, kwakufika mina kuqala bese eyafika naye silungiseke lapha. uma sesilungisake alifake leli vangeli. Ngiyakhumbula kulezo nsuku kwakusanda kudlula emhlabeni umlungu owayehlala kulendlu engemuva la sekuthungelwa khona.
60.Wakhulumake izinto eziningi kodwa owayebhekisa kukho kakhululu ukuthi kufanele kuxoshwe uBaba uMelusi noMama uMfundisikazi lapha eThempelini. Kuthiwa uBaba (wayesengumvangeli ngaleso sikhathi) njegoba engumvangeli akufanele ehlale elaphana eThempelini. Kufanele ehambele wonke amaThempeli ala ePinetown.
61.Manje babefuna ukwenza izinto zabo kahle ngoba babazi ukuthi uma kukhona uBaba uyena mgcotshwa ongaphezulu yonke into izohamba ngokuthi silandele ukuthi uBaba utheni. Wayifakake lento mhlampe bazokhumbula ababekhona, kwakulokhu kushiwo ukuthi kuza abafundisi abakhulu sizomkhipha uzohamba.
62.Wayifakake leyonto nakumina lomgcotshwa. Ngicabanga ukuthi kwakungemvaka May noma mhlambe uMay wawungakapheli ka 2009. Bazokhumbula… kwakukade kuyisikhumbuzo eGibisila inkonzo angisakhumbuli noma kwakusemini yini inkonzo uBaba uThingo eyinikeze nje ngicabanga ukuthi kwakungabe fundisi nabavangeli.
63.UBaba uMelusi uyena owashumayela ekugcineni lapho, wathi uma eqeda uBaba uThingo wase esukuma wayivala inkonzo. Uma ngikhumbulakahle wathi uma esephumile uBaba uThingo wasala uMvangeli uZwane wathatha umbhobho walwa walwisa uBaba uMelusi, elwa ngokuthi ushumayele isikhathi eside, wakhuluma ukukhuluma okungekuhle kodwa ekubhekise kuBaba uMelusi.
64.Mhlambe ababekhona bazokukhumbula lokho. Lomgcotshwake wayegiya ngalokhoke ukuthike hhayi uZwane ukhulume wathi wathi wathi. Ufaka kimi lento yokuthi nami angibe nenhliziyo efana neyakhe yokuzonda uBaba uMelusi. Kwahambake kwahambake ilokhu ikhulunywa lento uma ngiyicabanga ngiye ngidabuke ngoba kunamakhosana esasisonta nawo agcina ebalekile ukusonta lapha ahamba ngoba ebalekela lezi zimfundiso esasifundiswa zona zokuthi sizonde uBaba uMelusi.
65.Base bethi bona, “Hhayi asikwazi thina ukuzingena lezinto.” Bancamela ukubaleka impela, ngiyamkhumbula nje omunye wayesuka kwaMhlabuyalingana omunye kwakungowakwaKubheka ewowase Port Shepton wayehlala ema flathini lapha ngase Sanlam. Yizinsizwa nje lezo esasiSabatha nazo lapha.
66.Bagcina behambile angibazi namhlanje ukuthi bakuphi ngoba bebalekela lomgcotshwa lo. Kwase kuthi ngoJune kwamenyezelwa ukuthi kuzoba nomnikelo ozowenziwa eThempelini kuzobekwa imbenge laphaya ebese umuntu uzohamba eyoguqa lapha embengeni abike lonke usizi lwakhe. Kuzobe kungekho muntu embengeni kuzobe kukhona uShembe owuMoya oyiNgcwele.
67.Umuntu uzohamba ofuna umsebenzi uzocela umsebenzi ohlushwa zilwane ebusuku uzobika. Uzobika nje lonke lolusizi, uma ngikhumbula kahle leso simemezelo senziwa ngomhlaka ngomhlaka 6 June ngo 2009 ukuthi kuzonikelwa ngeSabatha lomhlaka 13 June. Lafikake iSabatha lomhlaka 13 silindileke ngoba sasitsheliwe ukuthi asilinde kuzoba nento ekanje, sizobe siyobika usizi lwethu kuShembe kaMoya.
68.Akekhoke umuntu engicabanga ukuthi njengamanje uma kungathiwa kufanele ayobika usizi lwakhe kuShembe kaMoya ongeke akujabulele lokho kodwa onenhliziyo elungileyo nehleli kuJehova angakujabulela lokho kodwa ongenayo inhliziyo elungileyo angeke akujabulele lokho. Lafikake lolo suku yenziwa inkonzo yasekuseni yenziwa inkonzo yasemini kwase kufikake isikhathike sokuthike sekuzonikelwake.
69.UBaba uMelusi wayesahamba ngalemoto emnyama i-Tucson. UMama uMfundisikazike waye sehamba eya emotweni eyolanda imbenge wabuya nayo nje imbozwe ngesicephu esincane, weza nayo wafike wangena ngaphakathi eThempelini yabekwa lapha.
70.Sase sihambake siya konikela. Ngiyakhumbula nje kulezo nsuku ngangisanda kuthola nami umsebenzi lo engigcine ukusebenza kuwo ngo 2022 engagcine sengiwu supervisor kuwona kodwa ngangisabamba itoho ngisebenza ngibuyengimiswa. Kodwa ngahamba nami ngayonikela ngalo lelo langa ngacela ukuthi lomsebenzi ube permanent, wagcina ube permanent ngampela.
71.Baningi abacela imisebenzi bayithola kodwa abanye abasekho la. Abanye bacela izimoto bazithola kodwa engiya kukho kwenziwa konke lokho kwadlula kwaphela. Sathi siyafika ngeSabatha elilandelayo sekukhulunywa indaba yokuthi kuthiwa kade kunelati la ngeSabatha eledlule. Bathi lifike noMama uMfundisikazi uhambe wayolilanda emotweni.
72.Uma kukhulunywa ngeLatike yinto e serious kakhulu ebandleni lamaNazaretha, iLati esikhathini esiphambilike bekungangenwa ngisho eSontweni iLati lingaka ngeni. Bekuke kungene iLati kuqala ebese kungena isihlala ebese kuyima sikwazike ukuthi singene. Bazokhumbula akade bekhona kudala ukuthi bekuye kuphushwane kanjani uma sekugijinywa kuyongenwa eThempelini emveni kokuba sekungene iLati.
73.Njengoba uye uzwe isihlabelelo sithi SEBEPHANGA UKUNGENA, sike sabona thina la ebandleni kuphangwa ukungena eThempelini uMenzi engakavali. Sasiye sihlale nje kanje phambi kwesango, usheshe ujahe ukuthi ufike uhlale nje kanje phambi kwesango ngoba awukwazi ukungena ngaphakathi eThempelini iLati lingakangeni, uyothi uma selingenileke iLati sekuyodudulwanake kungenwa la ngaphakathi.
74.Kodwake ngicabanga ukuthi ngokwanda kwabantuke kwagcina sesivumeleka ukuthi singene eThempelini iLati lingakangeni ngoba iLati Ilona elihlala iNgilozi yeSabatha. Manjeke kwakuyi issue enkuluke leyo ukuthi kutholakale kune Lati lapha and futhi nomuntu ophatha iLati kuba umuntu wesilisa. Manje leli okuthiwa lifike lapha futhi lifike noMfundisikazi yey kwakungenyeke inkingake futhi leyo ukuthi beliphethwe nawumuntu wesifazane.
75.So uyabona umuntu owayeyizwa leyonto esontweni exoxelwa, wayebona ukuthi hhayi shuthi konakele lapha. Yini kwakwakhiwa i-case ezoqina ukuze kukwazi ukuthi kuxoshwe ngayo abaholi. Yikho kwakwakhiwa amanga kanje. Yasithusake lento ukuthi hhawu sekunjalo, hawu iLati lisukephi ngoba akukho Lati ekade likhona.
76.Ngiyakhumbula icala lakhona ngicabanga ukuthi lahlala kwase kuwu August uma ngikhumbula noma lahlala before siye emhlanganweni kaJuly angisakhumbuli kahle. Kodwa ngiyakhumbula uMfundisi uMvubu owayekhona. So uma efikake uMfundisi uMvubu asho ukuthi uze ngodaba olukanje kanje kanje njengoba sengichazile ukuthi kuneLati la iLati lifike no Mkhokheli.
77.Wasehlalaphansike esededela abamangalike ukuthi bashoke ukuthi kwenzeke kanjani. Ayi silalele, wavele wasukuma nje umama esasikade simthembile naye. Hhayi wasukuma impelanje wayisho wathi hhayi kwenzeke kanje uMkhokheli uhambe wayolanda iLati emotweni, wabuya nalo walibeka ngaphakathi eSontweni kwase kuthiwa abantu abayonikela kulo.
78.Ngicabanga ukuthi mhlampe noMfundisi uMvubu lapho wayesethola isiqiniseko ukuthi okusho ukuthi lento yenzekile ngoba phela manje isikhulunywa kuphambi kwabaholi. Okusho ukuthi manje sekufanele kuzwakaleke ukuthi uhlangothi oluzolandela luzothini. Ngiyakhumbula nakulowo mhlangano ngaphakamisa wangikhomba uMfundisi uMvubu.
79.Ngase ngimchazela nje uMfundisi ukuthi lento iqale ngokumenyezelwa nge date ewukuthi, mhlaka 6 yenzeka nge date ewukuthi mhlaka 13. Ngamchazela ukuthi inkonzo yangena yaphela ngesikhathi sekufanele kunikelwe uMkhokheli wahamba waya emotweni wayolanda imbhenge wabuya nayo wayibeka phambi kwebandla sasuka sahamba sayonikela, le nje yeLati Mfundisi khohlwa badlalangawe yinto engakaze yenzeke leyo.
80.Basukuma nabanye esasinabo bayifakaza lento kwagcina kuvelile ukuthi lento le ingamanga ngoba uma ngizohlehla nje kancane ngalelilanga kwenzeka lomcimbi lomama owayesefakaza lapha wayesegumule ngisho umnazaretha, ebhizi le ngasemugwaqeni efona ngingazi ukuthi wayefonela obani.
81.Angazi ukuthi wayesembone nini uMkhokheli eza neLati ngoba phela wayesentanta nefoni yena ipaki yonke leya efona ungazi ukuthi wayefona efonela obani okusho ukuthi wayefona eqamba wona lamanga ukuthi nakhu sekukhona iLati. Kodwake inhliziyo yakhe yayingalungile yayingahleli kuJehova ngoba babehamba kanje nalomgcotshwa.
82.Ibona abantu ababebadala esasibathembile ukuthi hhayi njengoba silanje ukhona ubaba umhlambululi uCele yonke into siyithathisa kuyena ngoba uyena owayephambili kuwuyena umuntu owayegcotshiwe bese kuba nabashumayelike ababefikake ngokushintshashintshana kodwa nje umuntu owayesabekiwe eThempelini ukuthi akabheke
kwakuwumhlambululi uCele.
83.Bese kuba uma umaNdelu okwakungudade wabo kamfundisi uNdelu. Ibona abantu esasinabo. Yibo laba bantu ababefaka lelivangelike. Manje ngiye ngibadabukele abantu esasinabo ngalesiya sikhathi abahlulwa ukuthi bamele iqiniso ngoba phela babaleka abafowethu nje ngoba babazi ukuthi lento ingamanga kodwa kunokuthi bame bathi hhayi ingamanga lento bancamela ukuthi bebaleke angibazi ukuthi bakuphi namhlanje njengoba ibandla linje.
84.Ngiye ngibakhalele kakhulu kodwa laba bantu abangenayo inhliziyo ehleli kuJehova ababefuna ukusibulalela lobu buhle obuhle kanje. Namhlanje ngabe sikuphi, uyayibona ukuthi lento eyayifakwa ilaba bantu babefuna ukubulala ubuNazaretha uqobo lwabo ngoba ubuNazaretha uqobo lwabo ilobu obula.
85.Ukube kuthiwa onke amacebo ayecetshwa izitha zabaholi ayephumelela ngabe lobubuhle obula ngabe abukho. Umhlaba wonke namhlanje wazi ngobuNazaretha ngokuthi kukhona lelibandla. Njengoba kuzobe kulontshwa nje ne bhayibheli iTestamente likaMoya oNgcwele, ukuba kuthiwa babephumelele ngabe lizolotshwa yini leliTestamente.
86.Kodwa ngoba kwakungumsebenzi lo abaholi ababewuthunywe uNkulunkulu waba nabo njalo. Wayelokhu enabo nje uNkulunkulu walokhu ebavikelile nje. Kusukela uBabamkhulu eshilo ukuthi abantwana abayozalwa ilontwana bayothi bengeyibo abakwaShembe ngokwesibongo nangokwegazi kodwa bayoba noMoya kaShembe.
87.Ukube mhlambe ngiwuthisha ngiseskoleni bengizobuza umbuzo ngithi phakathi komuntu onenyama yakwaShembe negazi lakwaShembe nonoMoya kaShembe, ubani onesibusiso sokuhola ibandla? Kodwake usuyozibalela nawe.
88.Ngomhla 25 July 2005 siseBuhleni kuvalwa umhlangano kaJuly, lalingakasebenzi lelithempeli elilapha phezulu ngoba ngicabanga ukuthi eThempelini phezulu kuqalwe ngoJuly ka 2007.
89. Inkonzo yayisese zansi lapha eThempelini elidala, uBaba uThingo phethe inkonzo uthi uBaba uThingo, bazokhumbula ababekhona ngalelo langa wake wayimisa uBaba inkonzo iphakathi wathi akuthandazwe kucelelwe intethelelo abantwana lababangaphakathi baseKuphakameni abalwa noBaba iNyangayezulu mhla ehlala esihlalweni.
90.Bayahlupheka kakhulu ngoba noBabamkhulu uyabaxosha uma bethi beza kuyena nobaba iLanga uyabaxosha. Wasethike uBaba uThingo asenze umthandazoke bacelelwe intethelelo. Uthike uBaba uThingo “Kukhona into ebingiphethe kabi maNazaretha.” Yayishube impela nje futhi leyo nkonzo uthi, “ maNazaretha kukhona into ebingiphethe kabi njengoba ngikhula kuzohamba kuhambe bese ngiyahamba la emhlabeni, sengithe ngiyabheka kubafowethu angimboni umuntu ozosale ephathe lomsebenzi.”
91.Wathi, “Ey! Ingiphethe kabi lento.” Wasethi, “Kodwa ngiyadabuka ngoba useke wathi lungu uBaba iLanga kancane uthumele unkosikazi wase Bergville wathi akeze azongitshela ukuthi angingaphatheki kabi, njengoba ngikhona ngimile la usekhona useduze kwami.” Usekhona uBaba iLanga useduze kukaBaba uThingo.
92.Uthi, “uthe ngizokunikeza umuntu ozobe ehamba nengilozi yami.” Amazwi lawa ashiwo uBaba uThingo ngomhlaka 25 July 2009 eThempelini elidala laphana eBuhleni ephethe inkonzo kuvalwa umhlangano kaJuly. Uthike uthe uBaba iLanga akangaphatheki kabi njengoba kade ethi ubephatheke kabi ukuthi uma ehamba ubuNazaretha buzosala nobani.
93.Uthi kodwa usefikile uBaba iLanga wathi akangaphatheki kabi, ngoba uzokunikeza ozobe ehamba neNgilozi yakhe uBaba ILanga . Waze wathi uBaba uThingo ngikhona nje ingoba uBaba iLanga ula eduze kwami kodwa engiya kulo ileli elithi uthe uzonginikeza umuntu ohamba neNgilozi yakhe uBaba ILanga. Shaya izibalo futhi ubale bonke abaholi bamaNazaretha abakhona.
94. AbaseGoli, Ginyezinye, eBuhleni, eKuphakameni ungawabala mhlawumbe kukhona engizowashiya angike ngithi nje bonke abaholi bamabandla amaNazaretha akhona. Ushaye ezakho izibalo futhi, phakathi kwabo bonke njengoba nathi sikhona ubani umholi wamaNazaretha oseke waphumela obala wathi uhamba neNgilosi ethunywe uBaba iLanga ngaphandle kukaBaba uMelusi?
95.Ungayiqinisa inhliziyo yakho, inhliziyo yakho uma ingahleli kuJehova siyokubuka nje ukhulume uze ufike la uthanda khona kodwa thina siyalazi iqiniso la lihamba khona. Asizange size sidideke futhi siyakucela kuNkulunkulu ukuthi sigadideki nangelinye ilanga ngoba asimazi ukuthi uSathane mhla efika wofika enjani.
96.Mhlambe loSathane owayefika ngabagcotshwa silapha ezansi sibancane, uNkulunkulu wasipha amehlo okuthi sikwazi ukumbona mhlampe nezono sasingakabi nazo. Manje mhlampe sesinazo nezono uyothi uma efika uSathane singakwazi ukubona ukuthi uSathane lo. Siyacela kuNkulunkulu ukuthi abenathi asiphe njalo amehlo okuthi simbone uSathane uma efika ukuze sikwazi ukuthi sibuyele eceleni.
96.Sengenzela ukuthi nawe ofikayo mhlambe osabamba uyeka, osathi uthi kuyikho? Uyalalela nangala eceleni uyalalela… ungabe sabheka eceleni uma sewula bheka abaholi bethu abaphambi kwethu uNkulunkulu ababekile akukho okunye. Ubufakazi lobu engikunika khona nawe ukuthi hamba uzibhekele.
97.Okokuqala ongaqala ukwenze ungaya mhlambe uyoyibheka lentshumayelo kaBaba uThingo engikhuluma ngayo. Kuhle futhi ngoba ngiyibeke kahle futhi ngayibeka nane date ungahamba uyoyifuna uhlale phansi uyilalele uzoyizwa ukuthi isho khona yini lokhu engikushoyo, lentshumayelo ka Baba uThingo eyango 25 July 2005.
98. August 2006 yafika iNgelosi kubaholi bethu njengoba nanamhlanje isekhona nje.
99.Usuyozibonela wenake ukuthi ubamba kuphi kodwa nje isihloko ebengisibekile bengithe INHLIZIYO ELUNGILEYO IHLALA KUJEHOVA.
INkosi ibusise enikuzwile.