Ngithi-ke bantwana bokukholwa, singamaNazaretha kaNkulunkulu ngoba sinikezwe ukuthi noma singahlupheka kangakanani, noma siphila noma sifa asingasuki kuNkulunkulu. Sinikezwe ukuthi noma sihlupheka noma sibusa, yonke indawo siyophatha ubhoko lokudondolozela ukuthi sidondolozele ngoNkulunkulu, siyakuziqhenya ngoNkulunkulu.
Inkonzo yeSabatha ekuseni mhlaka 03 September 2022: NguMfundisikazi Nomcebo Nxumalo Mpanza.
ISIHLABELELO 6.
1 Sakubona Kuphakama
Sakubona Judia,
Ubabekephi abafowethu
Abathunyelwe kuwe.
2 Babalekile bakushiya
Baxoshwa ubuNgcwele,
Akungeni sono kuwe
Kwana sono sinye.
3 Masango okuPhakama
Phakamani singene,
Sizahlulekele nathi
Kwanjenga banye.
4 Wozani wozani
Siye kweliphezulu,
Makabongwe lowo ozayo
Ekuphakameni.
5 Jehova ungakushiyi
Ukuphakama,
Kuzungeze Nkosi
Amacal’omane.
1.Ngiphinde ngiyikhethe iNkosi enkulu yaseKuphakameni. Ngemukele inkonzo ngiphinde ngibonge ukuba uNkulunkulu angikhethe ukuthi ngalolusuku lanamuhla kube imina engizochazela abantu ukuthi mina uqobo lwami yini into eyangenza ngaba lapha. Isihloko sithi, “MASIFUNE UMOYA KAJEHOVA.” Ngiyacela bangcwele ukuthi sifunde uJohani 7, siqale laphana evesini lika 38 besesigcina ku 40.
2.“OKHOLWA YIMI, NJENGOKUSHO KOMBHALO, ‘ESISWINI SAKHE KUYAKUGOBHOZA IMIFULA YAMANZI APHILAYO.’ WASHO LOKHO NGOMOYA, ABAZAMAMUKELA ABAKHOLWA NGUYE, NGOKUBA UMOYA WAYENGAKAFIKI, LOKHU UJESU WAYENGAKAKHAZIMULISWA. ABANYE BESIXUKU SEBEZWA LAWAMAZWI, BATHI, ‘LO UNGUMPROFETHI ISIBILI.’
3.Amein, ngamazwi lawa engimukela ngawo lenkonzo engithi asihlanganyele sonke kuwo sonke sizibuze noma sizikhumbuze ukuthi ngabe seza lapha sasizwe maphi amazwi? Sizwa-ke laphayana, uthi-ke uJesu, “Abakholwa nguye…” uthi-ke, “eziswini zabo kogobhoza amanzi omfula,” abakholwa kuye kodwa! Uthi, “Okholwa yimi, njengokusho kombhalo, esiswini sakhe kuyawugobhoza imifula yamanzi aphilayo.” Ngithanda lapha emanzini ayawugobhoza esiswini somuntu omukela ukukholwa. Bantwana baseKuphakameni, siye sibonakale sibaningi sizinkulungwane, noma sibabili sibathathu noma singamashumi amabili kodwa khona lapho siyabuzwa ukuthi ukhona yini owomileyo phakathi kwethu ngoba kuyabonakala ukuthi akukuhle ukuphuza amanzi ungawomelanga. Kufanele wome bese uwafuna amanzi, lithi-ke izwi, “Ukhona yini owomileyo phakathi kwenu?”
4.Bantwana baseKuphakameni, nathi lapha eKuphakameni noma lapha eNingizimu-Afrika, uNkulunkulu wasithanda wathi uma eqhubekisa lokhu kukholwa, okakukade kufike noJesu ngingasho yena lo owakhandwa ngamaRoma, ngisho uYeshua waseNazaretha, ukuthi wathi uma esebona ukuthi inqola ibhajiwe, ikhulunyiwe amasondo, amaRoma ayikhumula aphula yonke inqola kaNkulunkulu. Wabe uNkulunkulu uyabheka uyabuka, wase nathi uyasikhumbula wathumela uShembe, wathumela uMprofethi u-Isaiah Shembe, wathi akeze azovuselela inkolo kaJehova, wathi akeze azofuna abomileyo, azofuna labo abangaphuza bese eziswini zabo kugobhoza umfula wokuphila, amanzi okuphila. Asisoze sakuyeka lokhu ngoba abantu baye bajahele lapho okulula khona, bajahele lapho abazawufihleka khona ukuthi kube ngathi kuhle kuhamba kahle kodwa kungahambi kahle.
5.Wayiqhuba naye lenqola wahamba nayo ezofuna abantu abomileyo, wabathola ababili abathathu, zangena izigidi nezinkulungwane, kwafika isikhathi wayiphetha indima yakhe wabe usuyasuswa kulomhlaba. Basala ababebekelwe ukuqhubekisa inkolo, yaqhubeka yaze yayofika kuMphethi wembhenge, waqeda naye wahamba. Selilikhulu kakhulu ibandla, kodwa lingelikhulu ngabantu abomileyo, lilikhulu ngabantu abangomile, ngabantu abazobheka ukuthi njengoba ibandla lingaka angasimisaphi isitolo lapho angadayisa khona. Kwangena abantu abebekade besebenza imisebenzi yabo ababeyinikezwe ngoyisemkhulu, babona ukuthi uShembe uyabaphendula abantu, ukubhalile phansi, amaNazaretha ayatshelwa iSabatha neSabatha ayakhunjuzwa ukuthi ungawuphathi, “UNGAWUPHATHI UMUTHI NGESANDLA SAKHO UYIKHOLWA UYAKUFA NOKUFA.”
5.Babona ukuthi abaze badla lutho ngoba abantu sebeyalalela manje ukuthi, kuthiwa bayakufa nokufa ababephatha umuthi. Nakuba uShembe wayekhuluma nabantu abakholwayo njengoba esho uJesu kodwa babephenduka abantu. Kwahamba kwahamba kulelibandla, yaphela indaba kaNkulunkulu kwangena indaba yobabamkhulu. Wasifundisa uMprofethi ukuthi umhlangano ungumhlangano kaJehova, wasifundisa ukuthi umhlangano uqalwa kuye kube nenkonzo yokungenisa umhlangano, kungeniswa abangcwele abazophatha umhlangano, kodwa kwashintshwa phakathi nendawo kwathiwa kungeniswa obabamkhulu. Lendaba yobabamkhulu eyabonakala igqame kakhulu kuleli bandla, yasimemela izangoma, zajabula zahleka zodwa zibona ukuthi ziyodla izambane likapondo ngoba zona ziyaziwa ukuthi kungumsebenzi wazo ukuthi zikhulume ngobabamkhulu bazo ngoba vele ziphethwe yibo.
6.Zangena bangcwele zangena ngokuzamula, zazamula, ahalalisa amaNazaretha, ajabula bathi, “Ungesabi ukusho uma kukhona into oyibonayo,” kodwa banikeziwe uMqondisi onguShembe wehlile wehlisiwe ukuba azofuna abomileyo abomele ukukholwa, abomele ukungena ezulwini. Zaqala zenza izibonakaliso, zabona ukuthi azibuzwa muntu ukuthi, “UShembe wakuphi lona ongafike atshele thina ukuthi singawuphathi umuthi ngesandla sethu siyawukufa nokufa bese eyokhuluma nesangoma, lona othe manje, ‘isangoma uSathane uchitha ngaso umthetho kaJehova,’ aphinde futhi athume sona kubantu abasuse kuso?” Kwakanye ahawukela amaNazaretha, abona abantu bokuhamba bevuna, ase eyasuka nawo kuNkulunkulu ehawukela kulaba abaqhamuka bathi manje, “Uthi uShembe akube ukuthi,” kodwa bebe bengesiwona amaNazaretha, babe futhi beyizangoma uShembe exwayise amaNazaretha ngazo.
7.Kwase-ke kuqubuka abantu, kwangaqubuka nabantu abaphendukile, kwaqubuka abantu ababekhuluma bethi bazalwa lapha, babeshaya insimbi kodwa bangaqubuka nomthetho kaNkulunkulu owawuthunywe kuShembe, baqubuka noyisemkhulu. Abantu ababephendukile bavuma bawamukela ngezandla zombili ukuzamula kwabantu abayinzalo yaleli bandla, babona ukuthi bazosizakala nami ngokwami ngoba babezisho. Njengalo owafika lapha ekhaya, owu-anti wethu, wakusho nalayindlini ukuthi… esuxoxela nezinto ezazenzeka bebancane, asixoxela ngeNkosi ILanga kodwa engasitsheli ukuthi waphuma kanjani phona kulezinto asitshela zona ukuthi zashiwo ngoBaba, waphunyuka kanjani wayeseyophathwa ngoyisemkhulu, ababengamakholwa?
8.Ngithike bantwana baseKuphakameni, kufanele uzifune ukuthi wafika womile yini lapha? Nali izwi libuza lithi, phakathi kwethu njngoba silapha, angabe ukhona yini owomileyo? Wathi uShembe uma esho njalo, wakhuluma abantu bengasambuki, abantu bebuka izangoma, abantu belalela belethe izindlebe eduze kwabantu abasuke bezamula.
AmaNazaretha ahloba ngabo, ahloba ngabo ngangangokuthi kwakungavumelekile ukuthi bahlale ngemuva, kwakuthiwa ngabaye phambili ngoba ngabantu abanabantu abadala. Akekho umuntu owabuza ukuthi abantu abadala abaqeda kwenzani kulento kaNkulunkulu? Kodwa bahlaliswa phambli kwathiwa banamakhosi, banabantu abadala. Ngithi-ke bangcwele namuhla siyabuzwa ukuthi angabe ukhona yini umuntu phakathi kwethu owomileyo?
9.Kuthiwa-ke uma ngabe ewemmukela lawamanzi, lawamanzi, lokhu kukholwa, esiswini sakhe kuyawugobhoza amanzi okuphila. Ngithi-ke bantwana baseKuphakameni, uShembe wafika nawo lamanzi ayekade ewagcinele ukuthi kugobhoze wona eziswini zethu, kube ngamanzi okuphila. Kwaqala esontweni kwaba nezimbiza ezithengiswayo, imithi engamanzi efakwa emabhodleleni. Kwathi lowo mthonseyana othi uyamangala uyabuza, kwaqubu umfundisi ogcotshwe nguSathane wathi, “Hhayi bheka into oweza ngayo ukuyeke okunye, khumbula into eyakuletha lapha.” Ngoba uSathane unjalo, uma ezohliphiza into kaNkulunkulu uqala ngokugcoba abantu abazomumela, abazolwa nalaba abazobe bephikisana naye. Akakaze ayone into kaNkulunkulu ngaphandle kokuthi agcobe umuntu, kungako namhlanjena kuphithizela. Ngisho noma ngabe kuqhamuka nje uhlanya, luthi uhlanya luqoqe abantu luthi, “Yonke lento ela ayisilo iqiniso, okuyiqiniso ukuthi kufihliwe, imina umuntu owabekwa ukuthi ahole lento.”
10.Babakhona abathi, “Uqinisile.” Akakaze ahambe yedwa, usuke esenabantu abamuphelezelayo laba abathi uqinisile. Baqale manje abantu, basho bakhulume ngezibonakaliso, athi, “Ngakubona ngelinye ilanga ngake ngakubona nami.” Nakhu bakwazi ukubona enye insizwa okwakukade kukhulunywa ngayo ukuthi yathi iNkosi iNyangayezulu, “Ngisho ozibanibani, yena lo!,” imkhomba la eduze kwakhe. UBaba kwasa egcwele emaphepheni emangalelwa, emangalelwa umuntu owaye lapha eduze kwakhe, babezobika, wathi, “Nisho uzibanibani lo!,” wabe ekhomba lapha ekhwapheni lakhe, kwathiwa, “Yebo Baba.” Ngoba uSathane wayezophikisa uShembe ngaye, ezokwenqabela abantu ukuthi bengawaphuzi lamanzi azogobhoza eziswini zabo bese befumana ukuphila.
11.Ngithi-ke bantwana baseKuphakameni, engathi singakucela ukoma, uma ngabe somile siyawafuna amanzi ukuba siphuze wona bese egobhoza eziswini zethu bese siba ngabantu abanganawukuyifuna into embi. UMoya kaNkulunkulu, ithi iNgelozi ngelinye ilanga, “Nibohlala niwufune ngoba uMoya kaNkulunkulu uyisibani somuntu oyikholwa. Uma umuntu enomoya kaNkulunkulu enoMoya oyingcwele, uMoya oyingcwele uma wehlela kumuntu wenza umuntu anyanye ukwenza isono, wenza umuntu akwazi ukulizwa iphunga lomubi, akwazi ukubona umuntu ombhethe izambatho ezimenza ukuthi abe unkulunkulu engasiye.” Uthi, “Ngokuba uYeshua wabe ewumuntu owembhethe uMoya kNkulunkulu, wayethi noma esefikile uSathane lapho owayelinde khona, wathi noma athi, ‘Ziphose phansi ngoba izingelozi zizakukunqaka, ngoba uyindondana kaNkulunkulu. Yisho kuwo amantshe ukuthi aphenduke abe yisinkwa ukuze udle,’ kodwa uYeshua wayengashongo ukuthi ufuna ukudla,wayengashongo ukuthi ufuna isinkwa, wayethi uthathe isinqumo sokungadli nokungaphuzi eya lapho ayeyolindela khona uNkulunkulu.
12.Kodwa watheleka, wafika njengomuntu omudabukelayo, wathi, “Shono kuwo lamatshe ukuthi aphenduke abeyisinkwa ukwazi ukuthi udle,” wathi, “Ziwise phansi laphana usuke esigcongweni sezintaba ,” wathi, “Izingelosi engani zizakukunqaka.” Kodwa lona ngoba wayengowasezulwini, wayenoMoya owawuwenza ukuthi abone ukuthi uSathane uqonde ukumsusa kuNkulunkulu. Wayesemnike yonke imibuzo, wathi, “Uma ukwenza konke lokhu ngiyakukwenzela konke okufunayo, ngiyakukunikeza imibuso.” Wayisho imibuso azomnikeza yona, kodwa owayekade ezolinda uNkulunkulu, futhi naye ewuMoya oyingcwele, akawuvumanga lombuso, wawubona ukuthi ungowokumsusa kuNkulunkulu, wathi, “Kulotshiwe ukuthi, ‘ungamlingi uNkulunkulu wakho,’ hamba Sathane eduze kwami!”
13.Ngithi-ke bantwana bokukholwa, namhlanjena sibuzwa yizwi lithi, “UKHONA YINI OWOMILEYO?” Washo njalo uShembe uma ngabe esefika, ngithi mina washo njena ngoba angazi ukuthi kwakuyini eyayingangisusa ebandleni engangikhuliswe ngalo ekhaya, kodwa ngithi noma engamemezanga endlebeni kodwa washo emzweni yami ukuthi, “ABOMILEYO ABEZE KIMI UKUZE BATHOLE AMANZI AYOHLALE EGOBHOZA EZISWINI ZABO ABE WUKUPHILA KUBO.” Ngithi-ke bantwana bokukholwa, nathi sonke singamaNazaretha kaNkulunkulu, sikhishelwe eceleni, abantu baye babe nenkinga uma kufikwa kuleli gama bathi, “Ngabe uMpanza usho ukuthini,” (ngisho into abavame ukuyisho) “ngabe uchaza ubani uma ethi ibandla aliholayo ngamaNazaretha kaNkulunkulu? Yimaphi amaNazaretha ekungewona akaNkulunkulu? Uyamuzwa yini kodwa uMpanza?” Basho njalo, abeve besithanda lesi sibongo, abave besithanda!
14.Ngithi-ke bantwana bokukholwa, singamaNazaretha kaNkulunkulu ngoba sinikezwe ukuthi noma singahlupheka kangakanani, noma siphila noma sifa asingasuki kuNkulunkulu. Sinikezwe ukuthi noma sihlupheka noma sibusa, yonke indawo siyophatha ubhoko lokudondolozela ukuthi sidondolozele ngoNkulunkulu, siyakuziqhenya ngoNkulunkulu. Asiyikuziqhenya ngathi nangezinto esinazo kodwa sinikwe ukuthi siziqhenye ngalo Jehova njengoba kuhlala kushiwo ukuthi loluthando alufiki namhlanjena kodwa labonakala lapho isizwe sakhe sasiboshwe uFaro. Siyaziqhenya ngalowoNkulunkulu owasifica sihluphekile,(sengikhulumake okwenzeka-ke, okwadala ukuthi sibe ngamaNazaretha kaNkulunkulu) azange iNkosi iLanga ithi asibuyele kuJehova, sibuyele emazwini ayeshiwo uBabamkhulu kuphela.
15.Kodwa wasikhombisa ukuthi uma sibuyela kuNkulunkulu sizawuba ngabantu abanjani.Bangcwele angazi ukuthi yimalini esayishiya emuva esayishiya emajikeni lapho esasiikela khona, imalini esayishiya emadokodweni lapho esasiphuma emakhaya sithwele imithwalo siyokhonza uJehova kodwa bese siphuma kuloyo esimnikwe nguJehova ukuthi eme phambi kwethu asifundise, bese siya emadokodweni siyolalela abantu, siyolalela obabamkhulu bokuhamba, obabamkhulu babantu. Sabalalela bangcwele sashiya izinkulungwane emadokodweni kodwa iminikelo eyayimenyezwa ethempelini sasehluleka ukuyikhipha yonke, kodwa sasiyikhipha iminikelo emikhulu eyayibizwa emadokodweni. Ngithi-ke bangcwele alahleka amanzi kwafika ukoma, sasingesibona abantu abababelwe ukuhlupheka, uShembe wakuvala ukuthi amaNazaretha abulawe izinyoka, uShembe wakuvala ukuthi amaNazaretha adutshulwe, uShembe wanqaba ukuthi amaNazaretha abulawe izulu.
16.Ngisho abantu bezwe babazi ukuthi uma uhamba nomuntu waseKuphakameni , izulu alikwazi ukukushaya. Hhayi ngoba lizovinjwa nguwe, ngoba uShembe wayekhethwe ethunyelwe kubo ukuba babe isizwe sika Nkulunkulu. Baningike abantu abakhala ngokuthi, sigida ndawonye, asizukusuka kulendaba yezangoma, ngeke sidede ngoba leligama elithi umsamo ilona uSathane afike wasebenza ngalo kuleli bandla. Wathi noma ufika kwala ngisho… bakhona abantu abahamba lapha emhlabeni bangayi esihogweni baye ezulwini, bathandwe nje. Labo bantu abaya ezulwini, bathi uma befika ezinganeni zabo, bafike bamtshele bathi, “Hamba kuShembe njengoba uhlupheke kanjena,” bathi, “Hamba lento ufike uyibikele uShembe, umtshele ukuthi wena uhluphekile kanje kanje, izophela lento, ugcine neSabatha,” kusho umuntu okuzalayo athi, “Ugcine iSabatha, ugcine konke, hamba uye kuShembe.”
17.Lowo muntu usuke engekho ezulwini lomndeni, usuke esezulwini lika Nkulunkulu ngoba uShembe akatholakali ezulwini lomndeni. Ngithi-ke bantwana baseKuphakameni sasingesibo abantu esingashawa izulu, kodwa ngokwenza okwanqatshwa, ngokweqa umthetho owafika noMprofethi wethu wathi, “ISANGOMA NGISHO NOMA NGABE SINGANQABA UKUPHUMA, KODWA SIBOTHATHA AMAGUGU KAJEHOVA SIPHUME SISISHIYE LAPHO.” Azange kwenzeke lokho, namuhla seziningi zedlula amaNazaretha, ziyibandla seziyasabeka, akekho manje umuntu ongamelana nazo athi aziphume ngoba seziyibandla, seziningi zona kunabantu abakholwayo. Amagugu kaJehova akekho owabaleka nawo, zibhodla phezu kwawo, zbhodla phezu kwelati esilaziyo ukuthi lapho elikhona kukhona ubungcwele!
18.Ngithi-ke bantwana baseKuphakameni, kuye kufanele ukuthi mhlampe kungakuhle uma ngabe noma singathandi kakhulu ukuthi uhulumeni engcine kakhulu kulezinto zokukholwa kwethi kodwa kukhona okunye oye ukucabange ngoba usubona into kaNkulunkulu siyonakala, uthi mhlampe uma bekungashintsha mhlambe umthetho ngoba uthi umuntu uma eqala engena, atshele izwe ukuthi uthunywe ngubani, uthena akazokwenzani. Noma-ke akashoke atshele izwe athi ungunkulunkulu, kodwa alitshele izwe ukuthi njengoba engunkulunkulu esukile lapho konkulunkulu abanye, uzokwenzani, umsebenzi wakhe yini? Noma singeke sakubuza ukuthi usuka kuliphi izulu, ngoba siyazi ukuthi besivele sinaye lapha, noma singeke sikubuze ukuthi ngabe izulu asuka kulo ngabe usho ixhiba lakwabo yini? Singeke sikubuze lokho.
19.Kodwa uma-nje engatshela izwe ukuthi, “Njengoba ngime lapha ngithunywe ukuthi ngizokwenza lokhu nalokhu.” Uma ngabe engathunyiwe, engunkulunkulu, asho ukuthi njengoba uNkulunkulu engabonwa, yena ungunkulunkulu obonwayo kodwa uzokwenzani, uzothini kubantu nasezweni lonke? Ngoba akekho unkulunkulu oyilocal kodwa uNkulunkulu uba uNkulunkulu kazwelonke njengoba esho uShembe ethi ngisho izinkanyezi zezulu athi ziguqa ngamadolo zidumise yena. Akekho unkulunkulu ongaba unkulunkulu wesifundazwe noma isiyingana esithile kodwa uwunkulunkulu wabo bonke abantu abadalile. Mhlambe-ke bekungacaca ukuthi abantu bazeke ngokwemibhalo ebhalwe yibo ukuthi basuka kweliphi izulu, bazokwenzani kubantu? Bazofuna abantu abafuna ukuyaphi? Ukuze uzikhethele wena ukuthi uma ngifuna ukuya endaweni ethile ngizoya ohlangothini oluthile ngoba umholi wakhona wathi umele leyo ndawo.
20.Ngithi-ke bantwana baseKuphakameni, nalapha e-NCG, abantu balaphanje angabe akakhulumi lona iqiniso umuntu ongabe akazi ukuthi umholi wakhe wathi uthunyweni. Washo ukuthi uthunyiwe, washo ukuthi uthunywe ubani, washo futhi ukuthi uthunywe ukuzokwenzani. Lokho futhi asakwenza namanje, siyibandla-ke likaNkulunkulu ngoba kumholi wethu kwathunyelwa iNgelozi isuka ezulwini kuBaba iLanga lamalanga iNkosi enkulu yaseKuphakameni, yathuma iNgelozi yathi akeze azokhuluma lezi zindaba. Ibuhlungu kabi indaba yethu, ibuhlungu kabi indaba kababa uMelusi uma uyithatha uyibhekisa kuwe. Watshelwa izinto ezingazange zitshelwe ngisho oyisemkhulu ababekholwa kuleli bandla. UBaba iLanga wamtshela ukuthi, emtshela ngomlomo weNgelozi ukuthi akamboni uShembe okhona emhlabeni, uzwa isililo abantu bayalila, kodwa bathi abantu bayamkhumbula, abazi ukuthi wayaphi!
21.Uthi-ke uBaba, “Uma ngifika ngithola abadoda, afosha abantu ebakhiphela ngaphandle, anamazinyo ayizingovolo.” Mhlampe mina ngangingahle ngingakusho lokho ngokwesaba izibhambu nemikhonto, kodwa ubaba uMelusi wakusho konke lokho. Ngithi-ke bantwana baseKuphakameni, izwi libuza ukuthi ukhona yini owomileyo, ngithi ngikhona ngoba ngeke ngisho ukuthi angomile uma ngabe ngisahluleka ukugcina okunye. Ngithi-ke bantwana baseKuphakameni ngiyalapha ekusikhombiseni. Namuhla lapha emhlabeni kufakazwa ngezimangaliso, ungamangala uma ufika ematendeni, ungazibona izimangaliso zenziwa ngabafundisi bomhlaba, bendiza bentanta emoyeni. Asazi ngempela ukuthi kwenzekalani, bentanta belenga emoyeni beqinisekisa ukuthi bangonkulunkulu ngoba ukuze abantu bayikholwe kahle indaba yakho kufuna kube khona intwana oyenzayo. Izangoma ziyabhodla ziyazamula zibhodle kodwa-ke abafundisi bomhlaba baqala ukwenza zonke izinto esingakaze sizwe ngisho ukuthi uJesu wazenza.
22.Balenge balenge baphinde baqathake futhi la kuleli esikhona thina, akekho olengayo ahambe impela ayosithela njengoba kwasithela u Enoch, bayabuya. Ngithi-ke bantwana baseKuphakameni, siyibandla sifundiswe ngoJehova, sakhishwa kwathiwa asiphume lapho kuzamula khona izangoma, asiphume into kaNkulunkulu isiphelile, into esikhona sekuyizangoma ziphakamisa oyisemkhulu kodwa izwi elamemezwa uShembe wathi, “MESABENI UJEHOVA,”bezwa abantu ngamunye ngamunye emzini ngaminye kodwa ekugcineni akabe lisazwakala leli lokuthi MESABENI UJEHOVA, kwathiwa besabeni oyihlomkhulu. Babekusho phambi kwamakhosi, phambi kwabefundisi nayo enye ingxenye yabefundisi yayisho ukuthi uShembe ngeke asisize ngalutho uma ngabe obabamkhulu bengafuni singene ezulwini.
23.Sasisatshiswa ngalokho, ngangithi kuliqiniso kodwa ngenxa yokufundiswa iNgelozi ukuthi babengasho lelizulu uShembe akhuluma ngalo, babesho izulu lomndeni, babesho izulu elinendlala elinokoma, yikho loku abantu abahleli khona bebuya lapha emhlabeni bazocela ukuhlatshelwa, yikho lokhu abantu abahleli kuleliya zulu bebuya bethi bomile abagayelwe utshwala, yikho lokhu abantu abahleli kuleli zulu babuya bathi bacela ukuthi baganelwe, ngoba manje bafike bashawa le phambili. Abasho kulelizulu lapho umuntu ajeziselwa okuqondene naye, leli uShembe akhuluma ngalo uma ethi, “SIYOWELA SIJABHILE EMFULENI WASEHUZE,” lapjo ethi, “ZIYOPHENYWA IZINCWADI,” akushiwo lokho. Saba ngamaNazaretha kaNkulunkulu ngoba izwi lamazwi elasithandayo, lathi asiphume ezintweni ezingama gugu esizwe, lathi asiphume ezintweni ezingamagugu ezangoma ngeke izangoma ziye kumaKrestu ngoba amaKrestu ngeke uwabone efake amabheshu, ngeke izangoma uzibone ziya kumaKrestu ngoba amaKrestu awakhulumi ngomuntu ongasekho ukuthi uzowasiza kodwa babuka abanalemimoya, izangoma zase ziyabona ibandla elifanele zona.
24.Namuhla zihlobe ngakho konke okwakuthiwa akuhlobele uJehova. UNkulunkulu waseKuphakameni wasithanda wasithumelela iNgelosi, namuhla bakhethekile abantwana bakuleli bandla, into eyenza ukuthi babe ngaba khethekile ngisho bengagqokile izinto ezimhlophe ingoba bamukele uMoya omuhle, uMoya omuhle kaJehova uyabageza abantu ubenza babe bahle, wenza ngisho izihluthu zabo zithambe izinwele zabo zibe zinhle ngoba bamukela umoya owafika noMprofethi u-Isaiah Shembe ngoba bavumile ukwesaba uJehova! UJehoa akesatshwa ngeSabatha kuphela, umsaba noma kungelona iSabatha, awuyi emikhosini yabantu, awuyi emikhosini ehlatshelwa abantu abangasekho, awukhiphi ngisho umnikelo wokwesekela lelo dili. Abakhipha iminikelo bathi ukuze nabo babhalwe koyisemkhulu, babhalwa kusho ezinhluphekweni zabo lezi abafa bezihlupheka babese beyaqalekiswa, baqalekiswe bona ngoba bayayazi indaba kaNkulunkulu.
25.Kodwa kunokuthi basize abantu ukuthi abantu babuyele kuJehova, bona ibona asebaqhubekela phambili ukuthi basuke kuNkulunkulu. Ngithi-ke bantwana baseKuphakameni leli bandla lifuna umuntu onenhliziyo esukile emanxiweni. Ngenye imini washo njalo lomuntu wasezulwini wathi, “ABANTU BAYAHLUPHEKA BAHLUSHWA UKUNGASUKI EMANXIWENI,” wathi, “LAPHO KWAFA KHONA UYIHLO NONYOKO WABULAWA NOMA WAKAJWA IMAMBA NOMA WABULAWA LAPHO,” wathi, “SUKA EMANXIWENI NGOBA UYOHLOMULA LOKHO OKWATHOLWA ABAZALI BAKHO,” wathi, “KOHLOMULA KUZE KUHLOMULE NGISHO ABANTWANA BAKHO UNGASEKHO, NGOBA UHLELI ESIZINDENI LAPHO KWANQOTSHWA KHONA ABAZALI BAKHO, KWANQOTSHWA KHONA ISIZWE SAKINI SONKE.”
26.Ngithi-ke bantwana baseKuphakameni, ithi-ke iNgelozi uma ifika ithi, “NIYABAFUNDISA KAHLE ABANTU,” ithi, “NGICELA UKUTHI KULELI BANDLA KUBE NEZIQUBULO, NGISHO IZINGANE ZAKULELI BANDLA NOMA ZIDLALA NGEZIKOPOTI KODWA ZIDLALE NGALESI SIQUBULO, NISIKHUZE LESIQUBULO NISIKHUZE NASEMIZINI YENU, NISIKHUZE NOMA NIJABULILE NISIKHUZE NOMA NINGAJABULANGA UKUZE USATHANE ABONE UKUTHI ANISIBONA ABAKHE.” Sikhona isihlabelelo esiye sisihlabelelelwe thina naso esisuke sithi siyazikhumbuza ngaso ukuthi emuva asisayi kodwa siya phambili, sasisukela esihlabelelweni samaKrestu kodwa uthe uma efika uNkosazana wathi, “IBANI NESIQUBULO.” Ngangazi mina ukuthi lesi siqubulo sizawusenza kanjani ngokuba-ke ngiwumuntu olibhimbi futhi.
27.Wathi, “LELI BANDLA KUFANELE ZONKE IZIZUKULWANA ZALO ZAZI UKUTHI UMA NGABE UKE WAPHAMBUKELA KULEMIMOYA UYAHLUPHEKA UZE UNGENE ETHUNENI USUHLUSHWA ISIQALEKISO OSITHOLAYO, USUSITHOLA LAPHA KUNKULUNKULU.” Wathi, “AKUBE KHONA ISIQUBULO KINI,” ngathi ngisadidekile, wahamba, ngasala ngikhuluma ngathi, “Kodwa manje lento ngizawuyiqala ngiyithini, ngizoyenze njani?” wabuya wathi, “HHAYI NGIYEZWA UKUTHI UYA…,” wathi, “WATHI AKUDINGI UKUTHI KUZE KUQA…,” wathi, “SIFAKENI KUSO SONA LESI, QHUBEKANI NGASO SONA LESI.” Kodwa ngifisa ukuthi abantu bazi ukuthi bahleli empini la kulelizwe leli, kufanele abantu bahlale behlomile, abantu babe naso isiqubulo noma bekuphi, hhayi leziqubulo zokwedelela unkulunkulu, leziqubulo zokuthi umuntu ezibiza ngekholwa, abe nesiqubulo soyisemkhulu azosiqubula phakathi kwebandla elibizwa ngebandla likankulunkulu. Bese engabuzwa ukuthi singena ngani thina lapho ngoba silandiwe emakhaya kwathiwa asizosaba uJehova, kodwa manje sekuvela umuntu uthi asizokwesaba oyisemkhulu.
28.Ngithi-ke bantwana baseKuphakameni, angisiye umuntu oyigagu, nephimbo lami alivumi kahle ukukhuphuka kusukela ekuguleni, kodwa bazawuzwa abantu ukuthi ngithini. Ngiyafisa ukuthi abazongivumela bangilalele kahle ukuthi ngiyagijima yini noma ngihamba kancane ngoba njengomuntu ongasilo igagu ngingabese ngiyona.
29.Ngithi-ke bantwana baseKuphakameni, ithi-ke iNgelozi asihlabelele ithi isiqubulo akusona isihlabelelo, isiqubulo esiqinisekisa ukuthi leli bandla yibandla likaMenzi wezulu nomhlaba, leli bandla leli yibandla elibuyisela udumo Kuye owenza izulu nomhlaba.
30.Lokho sakuthatha kuMprofethi wethu, hhayi ukuthi kwaqhamuka kithi, akusiwo umbono wethu kodwa kusho uMprofethi wethu owasitshela indaba kaJehova ngoba kumele kucace lokho ukuthi indaba sayithola kuShembe, hhayi laboShembe besimanje, ngisho uShembe wasezulwini.
31.“Nkosi ngiphe amandla,
Okunqoba uSathane
Ezulwini kuyayiwa
Kodwa kuya abangcwele
Ubungcwele buqala lapha
Khona lapha emhlabeni.
32.Ameni bangcwele, anginalo iphimbo, iphimbo lami libuhlungu angifikanga lapho kwamanye amavesi kodwa nininikeza nje… ngibonga ukuvunyelwa kahle. Ngithi-ke uma ngabe unikwa umsebenzi kaNkulunkulu, unikwa nomeluleki. Lesi sihlabelelo siyisiqubulo phakathi kwethu sonke nakubantwana bethu, noma usebenza emzini wakho noma ucenta igceke lakwakho noma wenza iwashingi noma upheka uzikhumbuze ukuthi-ke manje-ke lapha kufanele ngicele amandla okunqoba uSathane ngoba kuyayiwa ezulwini.
33.Uthi-ke, “EZULWINI KUNGENA ABANGCWELE KUNGENWA NGOBUNGCWELE,” uthi-ke, “NABO LOBUNGCWELE BUQALA LAPHA EMHLABENI.” Uma eqhubeka uthi-ke, “BUYASETSHENZELWA UBUNGCWELE,” ukuthi ube ngcwele evesini eliya phambili.
34.Ngithike bangcwele yikoke singamaNazaretha kaNkulunkulu ngoba lokhu ngeke ukuthole kwezinye izindawo, awukho myalezo otholakalayo kodwa kulomyalezo osuke uvela kubo labo bantu oqondana nabo kodwa thina siyavivinywa njalo ukuthi sisakhumbula yini ukuthi udumo kufanele ukuthi silubuyisele Kuye owenza izulu nomhlaba!
INkosi ibusise izwi layo.