Bantwana baseKuphakameni bayajabula abangazange babone lo mhlaba nengcebo yawo, ngoba uma ngabe uke wabona umhlaba nengcebo yawo namehlo akho omphefumulo wakho angeke avuleke futhi angeke alibone ikhaya labangcwele ngoba asebone umhlaba nengcebo yawo
Inkonzo yangeSabatha ekuseni mhlaka 18 March 2023. UMfundisikazi Nomcebo Nxumalo Mpanza.
237. ISIHLABELELO. 18
1 Ngiyathanda mina ukukhonza
Inkosi yezulu,
Inhliziyo ayivumi
Ukukhulula umphefumulo wami.
2 Ngenze Nkosi isiboshwa
Noma kubuhlungu njalo,
Ukuze umoya ukhululwe
Ngosuku lweNkosi.
3 Jabula wena ongaboniyo
Umhlaba nengcebo yawo
Vula amehlo omphefumulo
Abone ikhaya labaNgcwele.
1.Ngiyababingelela abngcwele, ngiyayikhetha iNkosi yaseKuphakameni eyadala izulu nomhlaba, ngiyabonga ukuphinda nginikezwe ithuba, nginikezwa ukuthi ngiguqe phakathi kwabangcwele. Ngiyazicelela eNkosini enkulu yaseKuphakameni phansi kwesihloko esithi vuna lapho utshale khona ukuze uthole okunikiweyo.
2.Bantwana baseKuphakameni bayajabula abangazange babone lo mhlaba nengcebo yawo, ngoba uma ngabe uke wabona umhlaba nengcebo yawo namehlo akho omphefumulo wakho angeke avuleke futhi angeke alibone ikhaya labangcwele ngoba asebone umhlaba nengcebo yawo. Indaba enkulu-ke bantwana baseKuphakameni, kulesisihloko ngisaqhubeka nendaba yami yeviki eliphelile noma indaba kaNkulunkulu ekade ngiyikhuluma evikini eliphelile.
3.Ngigcine ngikhuluma ngoLuka, ngakhuluma ngamazwi akhulunywa uYeshua umNazaretha enza umzekeliso ngabantu abanikezwa amathalente, sizwileke konke lokho. Namuhla ngithi ake sibhekisise lamazwi abhalwa iNkosi yaseKuphakameni ikhuluma ngomhlaba nengcebo yawo. Uma uwalandela lamazwi ungawathatha uwaphose emakhosini omdabu ubale ukuthi mangaki asedutshuliwe manje abulewe. Abulawa ngabantu ababone umhlaba nengcebo yawo, ungamangala ukuthi bangaki abantu abafile abebezothatha izikhundla ezithile kuhulumeni ngokwemfundo yabo.
4.Kodwa kwaqhamuka umuntu owabona umhlaba nengcebo yawo wayesehlela ukuthi lo muntu akadutshulwe abulawe ukuze angakwazi ukungena kulesisikhundla. Kuhle bantwana baseKuphakameni ukuthi njengabantwana bakaNkulunkulu sicele kuNkulunkulu ukuthi awufihle umhlaba nengcebo yawo kithi thina bantwana bakaNkulunkulu. Nakubantu abadingayo ukuthi ezinsukwini zabo zokugcina umphefumulo wabo ungahlali ethuneni, ungaba isiboshwa, abafuna ukuthi baphile impilo yasezulwini belapha emhlabeni.
5.Noma sebehambile uhambo lwabo lube mhlophe, abangafuni ukuzwa ubuhlungu bokufa, abangafuni ukudingiswa badingiselwe ethuneni. Ngithi-ke bantwana baseKuphakameni ungaya emabandleni onke uzwe ukuthi bangaki abaholi ababulewe, babulawa ngabantu abafike babona umhlaba nengcebo yawo, bangakubona lokhu okukhulunywango okuhle kangaka ukuthi uphile impilo engcwele ulapha emhlabeni noma uhamba, uhambe kahle, uhambe undize kahle umphefumulo wakho uye kumnikazi wawo, ungadingiswa.
6.Ungathi uma usufika le phambili beseke uyadingiswa kuthiwa phindela emumva, uthi uphindela emumva uqhamukele ethuneni. Ngithi-ke bantwana baseKuphakameni iNkosi iLanga yayixwayisa amakholwa kulelivesi nje elithi nje ‘jabula wena ongaboniyo umhlaba nengcebo yawo, vula amehlo omphefumulo abone ikhaya labangcwele.’ Ize isho iNkosi ithi khona alukho usizi, kuphelile ukufa, amanga nobuqili konke kuqedwa ngomlilo. Ithi-ke iNkosi yaseKuphakameni kuhle inyama yami ihlupheke, ukuze inhliziyo ikhumbule ukuthi akulo ikhaya leli kuyidokodo lomhambi. Ikhaya elimi phakade likhona, lifihliwe inkazimulo edlulayo ebolayo, engagculisi umphefumulo.
7.Ngithi-ke bantwana baseKuphakameni iwona amavesi lawa engathi singagxila kakhulu kuwo ngoba ayizixwayiso, singagcini ngokuhlabelela kube mnandi, noma sisine kube mnandi, kodwa siyilalele lento eshiwo lapha, iNkosi ekushoyo ukuthi abajabule abangawubonanga lo mhlaba nengcebo yawo. Ngempela ababone ingcebo namuhla kumapeketwane ebandleni, ibandla uMprofethi walishiya lilinye, kodwa wathi ukuba kuhambe iNkosi iLanga eyayigcotshwe ngogcobo lwasezulwini, kwathi uma sekuza iNkosi iNyangayezulu eyayibekwe kanye noBaba iLanga, kwase kuba khona umuntu owabona umhlaba ngaso leso sikhathi nengcebo yawo, wazibona eseyisicebi, wazibona eseyiyo yonke into, wahliphiza bonke ubudlelwane ebandleni, kuze kube namhlanje ibandla liyahlukana, liyahlangana lihlukane.
8.Noma uthi uyabonga uzwa kuthiwa abanye sebethelelene amanzi, uthi uyalalela uthi kuzoba kuhle, uphinde uzwe kuthiwa sebexabene futhi. Konke lokhu kusuke kumuntu owabona umhlaba nengcebo yawo, ongazange amubone uNkulunkulu. Kuhle futhi bayajabula abantu abathi uma ngabe bephathiswe umsebenzi kaNkulunkulu, kuthi uma ngabe abantu bekhona bafunde indlela kaNkulunkulu.
UJehova wayiphikisa lento, wayiphikisa ngendlela eyisimangaliso, ngoba wayemazi umuntu amgcobile, wayazi ukuthi ngubani umuntu okwakufanele alandele, hhayi ukuthi kwakuzakucingwa, kwakwazeka ukuthi ngubani umuntu okufanele alandele owagcosthwa nguMprofethi entabeni yomhlangano, ngoba ugcobo oluhle ukuba umuntu agcotshwe uNkulunkulu.
9.Ngithi-ke bantwana baseKuphakameni namuhla sizodlula emazwini, ngifunde enye yezincwadi ezafundwa mhlazana kugcotshwa uMelusi kanye nami. Ngithi-ke bantwana baseKuphakameni ngiyathanda ukuthi sizwe, ukuze abantu bathi awu asikwazi okukhona okuyikho ukuthi ikuphi. Sizofunda laphayana ku Zakhariya wesithathu siqale evesini lokuqala siyogcina kwelika seven. (Zakaria 3:1-7.)
10.“Wayesengibonisa uJoshuwa umpristi omkhulu emi phambi kwengelosi kaJehova, noSathane emi ngakwesokunene sakhe ukumelana naye. UJehova wathi kuSathane: “UJehova uyakukukhuza, Sathane, yebo, uJehova olikhethile iJerusalema uyakukukhuza; lo akasiso isikhuni esophulwe emlilweni na?”
11.UJoshuwa wayembethe izingubo ezingcolileyo; wayemi phambi kwengelosi. Yathatha yasho kwababemi phambi kwayo, yathi: “Mkhumuleni izingubo ezingcolileyo.” Kuyena yathi: “Bheka, ngidedisile kuwe ububi bakho; ngiyakukwembathisa ezobukhosi.” Ngase ngithi: “Mababeke isigqoko esihlanzekileyo ekhanda lakhe.” Base bebeka isigqoko esihlanzekileyo ekhanda lakhe, bamembathisa izingubo, ingelosi kaJehova isemi khona. Ingelosi kaJehova yagomela kuJoshuwa, yathi: “Usho kanje uJehova Sebawoti, uthi: ‘Uma uhamba ngezindlela zami, ugcine inkonzo yami, uyakwahlulela endlini yami, ugcine namagceke ami; ngiyakukunika ukuba uhambe phakathi kwalaba abemi lapha.”
12.Ngithike bantwana baseKuphakameni uma ngabe uwumholi, uma umuntu egcotshwa uyanikwa bantwana baseKuphakameni, anikwe ngumnikazi omgcobela lo msebenzi. Kube namazwi ayohlala njalo emzungezile emkhumbuza ukuthi mina ngingumgcotshwa kaNkulunkulu, uNkulunkulu wangibeka, wangikhumula izambatho ezingcolileyo, wangimbathisa ezihlanzekileyo, wanginikeza isigqoko sobukhosi ukuba ngime phambi kwabantu bakhe.
13.Akhumbule njalo ukuthi UNkulunkulu uthena, uNkulunkulu umethembisile, wathi sengikugcobile, sewumbethe ingubo nesigqoko sobukhosi, kodwa uyakukhuluma kahle, uyiphathe kahle inkonzo yami ufundise kahle abantu. Uthi-ke uma ngabe ukwenzile konke lokho ngiyakukunikeza ukuba uhlulele imizi yami namagceke ami, uyakuma phambi kwalaba bantu engibeka kubo.
14.Ngithi-ke bantwana baseKuphakameni lamazwi ayisekelo, somuntu obekwe uNkulunkulu, ubekwa kanjalo umuntu obekwa uNkulunkulu, akazikhumuli, uyakhulunywa, akazithengeli uyathengelwa. Ngithi-ke ngiyathemba ukuthi abangcwele bayayizwa indaba yesigqoko ukuthi isuka kuphi, njengoba isigqoko sihlale sibangwa, kuthiwa isigqoko lesi uma ususigqokile kuthiwa uzenza uShembe Asazi ukuthi uJoshua wayezenza bani ngoba wasinikezwa nguNkulunkulu ngoba ezokuma phambi kwabantu. UNkulunkulu wamenza wahluka, wamenza waba mkhulu kubantu ozokuma phambi kwabo.
15.Akusiye yena uJoshua owafika esekhumulile ephethe izingubo, akusiye yena owafika nesigqoko, kodwa kwasho ozomgcoba, kuthiwa kwakukhona ngisho ingelosi. Kodwa engifuna sikhulume ngakho kakhulu, lithike ibhayibheli lithi naye uSathane wayekhona khona lapho okuzogcotshwa khona umgcotshwa kaNkulunkulu.
Wayelapho uJehova wathi ‘bheka ngiyakukhuza ngoba wayengeke angaba bikho ngoba ufuna khona ukuthi naye ebese egcoba owakhe.
16.Isho njalo ingelosi ngelinye ilanga, ithi njengoba nibona kuphithana kuba njena nje ngesinye isikhathi, kufike kubekwe umuntu, athi uSathane mina angimfuni lo, mina ngigcoba nangu. Lona amkhombile, avele angenwe umoya kaSathane ngaso leso sikhathi ebese eqala ebandleni eba namaviyo akhe phakathi lapho kuleloqembu noma kusesontweni, akhe amaqembu akhe ukuhlukana. Athi niyamubona lo muntu wayenga fanelanga ukuthi abe umholi, ambalele izono ambalele konke.
17.Kodwa lithike namuhla ibhayibheli, uJoshua wayembethe izimbathi ezincolile, lathi izwi mkhumuleni, nimembathise lezi, esephucwa okwakhe engena kokuka Nkulunkulu. Ngalawo mazwi angeke ukwazi ukumelana nomuntu owabekwa uNkulunkulu wena uhlela ukuzigcoba, ngoba njengoba kwakukhona ingelosi nje, yayibekelwe ukuthi imbheke le ngelosi njengoba yayikhona laphayana. Kodwake nakuBaba uMelusi wathi uma ebekwa wavulelwa le ncwadi, kwezinye ezafundwa, kodwa le ncwadi lena ingezinye zezincwadi ezafundwa.
Kwakwenzelwa ukuthi uBaba uMelusi angaweqi umthetho kaNkulunkulu, angalenzi ibandla libe ibhizinisi, angayivumi into uJehova angayifuni, angakhi ibandla ngamanga, angajaheli ukuthi kuphithizele abantu kodwa uNkulunkulu ebe engekho. Akhulume ivangeli likaNkulunkulu njengoba esho ethi uma ulikhukumile, uthi uyobusa imizi eminye emzini yami. Ngithi-ke bantwana baseKuphakameni lamazwi lawa angeke uwathole kubantu abagcobene.
18.Ngithi-ke ngihlehla ngibuyela lapha ekwahlukaneni kwebandla, ngithi umlando uthi uBabamkhulu wamemezela entabeni iNhlangakazi wathi ngithunywa uJehova uthi angimgcobele naba abaholi bakusasa, kusho uBaba uthi abaholi bakusasa. Akasho ukuthi onkulunkulu uthi abaholi bakusasa. Kwabe uBaba iLanga naye kwaba uBaba iNyangayezulu, kube uMfundisi uMqayi, noMfundisi uMzobe. Kwahamba kwahamba bantwana baseKuphakameni lo Sathane owayeme mhla kucgotshwa uJoshua wase uyasebenza.
19.Ngithi-ke bantwana baseKuphakameni, yaphatha iNkosi iLanga kwafika isikhathi uJehova wayisusa kulelizwe. Kwaphatha uBaba iNyangayezulu kwafika lapho uJehova eyisusa kulelizwe. Kwase kuqaleka labaholi, kubo bonke abaholi abakhona, laba esithweswa icala kuthiwa kumbathwelani izingubo ezinjengezabo, kuthwalelwani isigqoko esinjengesabo, kwagcina kuBaba iNyangayezulu ukuba nomholi owagcotshwa njengo Jeshua, kwagcina kuBaba iLanga ukuba nomholi onogcobo lukaNkulunkulu kwamenyezwa kwathiwa kusho uJehova.
20.Bonke abaholi abakhona ebandleni namuhla abaholi besibongo, abangagcotshwe isibongo, abangagcotshiwe ukukholwa, abangagcotshiwe uNkulunkulu kodwa abagcotshwe isibongo ukuthi bangabakwa Shembe. Indaba yokuthi uyakholwa, indaba yokuthi uyamazi yini uNkulunkulu, ayisebenzi.
21.Kwaqala lapho ukuthi kube khona ibandla ngokwezindlu, laphenduka laphoke ibandla laba ibandla elinjengeliphethwe iNkosi yesizwe, lapho okuye kube nombango khona ukuthi ayikwazi iNkosi ukuvela endlini yokhohlo kufanele ivele ngapha endlini yenkosikazi endala. Konke lokho kwathutha kweza la eKuphakameni, kwathutha kweza la eKuphakameni, waphela uNkulunkulu, kwaba khona ubukhosi bomhlaba, kwaba khona lapho sesinabaholi ababona umhlaba nengcebo yawo.
22.Namhlanje sihlekwa izizwe, namhlanje ususaba nokusho ukuthi uyiNazaretha ngoba uyaye uthi uthi uyiNazaretha, kuthiwe wena usonta kumuphi, usonta kuloya owalahlwa icala, usonta kumuphi usonta kuloyana owavunwa icala. Ungabe usazi ukuthi kufanele uphendule uthini ngoba izinto ezingakufuni lezo, abantu abazi ukuthi izingubo zethu ziyafana, sigcina ISabatha ngosuku olulodwa, sisina ukusina okukodwa, abantu bengakwazi ukusahlukanisa.
23.Kodwa ngoba uJehova enomusa ohlezi phakade, uBaba iLanga waphenduka wabheka emuva ezwa isililo. Wase uyayivusa lento, wayivusa ngendlela engaqondakali. Wathumela umuntu othi uma umbuka uthi umuntu, kanti ingelosi, yafika yaba umuntu ofana nabantu, yakhuluma njengathi njengoba sikhuluma, yahleka njengathi njengoba sihleka. Yazi ukuthi isafuna amangeniso, konke kunesikhathi sakho, lesi sikhathi ingazivezanga, yayibona ukuthi asikakafiki isikhathi ukuthi iziveze, yayingafuni ukuthi izinqumele yona isikhathi ukuthi sekufuneka kwenzeke lokhu. Kwathi uma sekulungiseke zonke izinto, isibona ukuthi engathi manje sesiyaqala ukuthi siyijwayele. Yase ifika, yaqala ngokuthi ithathe mina ihambe nami iye emanzini. Kukuhle, sihlezi sikhona eBuhleni bamaNazaretha.
24.Ngahamba ngaya khona, ngafika le phambili, kulapho engathola khona imfundo yokukholwa. Angizange ngiwubone umndeni wakithi nabasekhaya komama kodwa ngabona amaJuda. Ngaqala phansi ngafundiswa lenkolo, lenkolo ngiyifundiswa ngaleso sihlabelelo, ngiyifundiswa ngalawa mazwi abhalwa uShembe. Ngaqala lapho bantwana baseKuphakameni ukwazi ukuthi kanti sasidukile ngalesi sikhathi sithi uma sihluphekile sibambe imbuzi siyocela kobabamkhulu. Ngaqala lapho ukwazi ukuthi kanti abantu abakholiwe abahlangani nesangoma, ngaqala lapho ukubona, ngibona abantu abangamabandla beza beza kulowo owayehlezi lapho.
25.Baqhamuka bebahle bekhazimula, benemiNazaretha emihle, beza, kodwa bathi uma sebeyofika eduzane, yashintsha imiNazaretha, yangaba isaba mhlophe, yashintsha yaya ngokungcola kwaze kwaphela nya ukuba mhlophe, yaba ukhakhi. Wayesethi lona owayechaza, “Njengoba ubabona, baqhamuke laphana bebabahle, base beyafika lapha base beyajika.” Wathi cha ibo laba abazikhazimulisayo, ibo bona laba abazenzela bona izinto, abangazange bawugcine umthetho kaNkulunkulu, sebathi bazongena lapha bangene ngalengubo emhlophe. Bangqandekiswa, bajikiselwa kwenye indawo engingabonanga ukuthi ngale kwaleyandawo kunani. Kwaqhamuka elinye iviyo, leza leza leza linemiNazaretha ebonakalayo ukuthi leminazaretha ingcolile futhi eminye igugile, sengathi ngabantu abakade besebenza nje ngodaka. Laqhamuka leliviyo, lithe uma lifika lapho ekushintshe khona ingubo yalaba bantu yangaba isaba mhlophe, kwafike kwashintsha lapho baba mhlophe laba bantu, baya laphana sebekhanya!
26.Nabo futhi bathathwa basiwa kwenye indawo engingabonanga ukuthi kwakukade kuyindawo enjani lapho ababesithelisa khona. Kodwa lona owayechaza wayelokhu eqhubekile ethi: “Kunjalo ukukholwa ngengubo, uyothi uma sewufika, kube khona la ongazukungena khona!” Namhlanje sizwa iNkosi iLanga ithi ‘jabula wena ongaboniyo umhlaba nengcebo yawo.’ Ngithi ngaqala lapho ukufundiswa ngomonakalo owenziwa izangoma, ngaqeqeshwa ngatshelwa ngaboniswa yonke into ukuthi lokhu, konke lokhu kwakudalwa umonakalo owenziwa izangoma. Ingakho izangoma zingafuneki ebandleni likaJehova, nangampela bantwana bokukholwa sasise khona laphana ebandleni esasuka kulo.
27.Sasebenza noBaba uMelusi, sasikwazi ukungena inkonzo yasekuseni eBuhleni kodwa sivuke ebusuku siyoshumayela laphana eZwini Lomzansi, sihambe siyoshumayela lapho siphinde sihambe siye esontweni.
Noma ngabe kungumhlangano, siyomemezela ukuthi lithi izwi abantu ababuyele kuJehova. Sathi uma siwuchaza umonakalo odaleka ngokuqoqa imimoya, kwanyakaza umhlaba, bonke abantu bafuna ukuthi umuntu oyiNazaretha lakuphi lona okhuluma kanjena, basabathe bayasethuka, kodwa asaze sanqandeka! Waqhubeka uBaba wamemezela ukuthi ukuthi abantu ababuyele kuJehova, waqala uBaba wazithola izincwadi zoMprofethi ezifihliwe, wachaza ukuthi uma uwumNazaretha awuzihlanganisi nabantu abangasekho noma ukukhuluma nabo. Kwagcwala lokho okushiwo iNgelosi.
28.Saphuma kanjalo bantwana baseKuphakameni emakhamandela, sathi noma sesibika ukuhlupheka, sithi sihluphekile, yathi ingelosi, ‘nahlupheka nabikela bani?’ Yathi engani uShembe wanitshela wathi ngosuku lwenhlupheko nibize uJehova, nina nake nabiza bani, nambiza nini uJehova, izinto zonke zizoshintsha!’ Sathi bantwana baseKuphakameni uma siwathatha lamazwi asaze sawafumbatha, sawahasha yonke indawo, bawacosha abawacoshayo, bawalahla abawalahlayo. Sathuka sabizwa ngayo yonke into, yaqhubeka ingelosi yasho izinto ezizokwenzeka njengoba ezweni zonke zenzekile lezi zinto ingelosi eyazisho.
29.Akekho owake waqhamuka wathi sesiyabona namhlanje, babethi mhlawumbe uma besithuka, bethuka le ngelosi, sizoba sesiyesaba bese sihamba siye emsakwazweni siyothi hhayi sasidlala, bathola ukuthi sisho lokho ebesikusho izolo! Ngithi-ke bantwana baseKuphakameni uBaba uMelusi lelojokwe owalithweswa, njengoba ekhuluma esidlangalaleni ngoJehova ukuthi kuwukumethuka uNkulunkulu waseKuphakameni ukumhlanganisa nezangoma! Ingoba mhla ebekwa kwathiwa uma ngabe uyiphathe kahle inkonzo, uyonikezwa amandla okubusa ingxenye yemizi, ngoba uJehova usho njena uyobe ejabulile ngoba uyazi ukuthi kade kwasa ivangeli eliletha lihliphizwa, ethumela abaprofethi bebulawa, abanye bephazanyiswa beboshwa.
30.Ivangeli lethu-ke bantwana baseKuphakameni liqhamuka lapho, angeke siyeke, noma abantu bengathi sigudla bona, akekho esimgudlayo, sikhuluma indaba kaNkulunkulu ebhaliwe phansi. Konke ingelosi eyakusho kwatholakala kukhona ebhayibhelini, njengoba yayisitshela ukuthi uShembe wayesitshela iqiniso uma ethi asibuke amazwi abhaliwe, asibuke nasebhayibhelini. Konke kuyohamba kuqonde!
31.Sasihluphekile singenawo ngisho umuzi, kodwa mhla izwi lifika lithi buyelani kuJehova safundiswa sisuswa kulemisamo, sisuswa emavungwini ezulwini lomndeni, sasuswa ezindabeni, bakhishwa abantu emabheshwini ayengagqokelwe uNkulunkulu, kodwa egqokelwe abantu abazodunyiswa lapho ekuthiwe akudunyiswe khona uNkulunkulu! Ngithi-ke bantwana baseKuphakameni yema imizi, lomuzi wawungekho, kodwa sathi uma silalela, singasayi kulomsamu sixolisa kuJehova, uJehova wasixolela!
32.Yafika ingelosi yasho yathi uBaba uMelusi akasho ukuthi ufuna umuzi onjani, wathi uma ethi uyasho uBaba ethi bengisathanda isitezi kodwa anginamali, kwathiwa cha, akusikho okwakho lokho, wena bhala into oyifunayo ngizohamba nayo incwadi ngiyise kuBaba iLanga. Nangampela bantwana baseKuphakameni sayothola lendlu ngemali nje ongeke uyinake ongeke, sawuthola lomuzi, akukho bond esiyikhokhelayo, sikhokhela amanzi, nogesi kuphela, asikho emzini wesikweletu ngoba sesibuyele kuJehova. Bonke laba ababesikhalela bathi bayasidabukela ngoba sizakwehlelwa ngamashwa ngoba silahla sithuka obabamkhulu, okuseqinisweni sasingathuki obabamkhulu, sasithuka imimoya efika izenze obabamkhulu kithi. Bese sihlaba sithi sihlabela obabamkhulu kanti sihlabela imimoya emibi ethunyiwe, efuna igazi, eyazi kahle ukuthi uma ivela ngoyihlomkhulu uyogijima ushiye isithunzi uhambe uyofuna imali ngoba ivele ithi izakunikeza inhlanhla, kanti isho uma izokugweba udilikajele.
33.USathane wabagcoba abantu ebandleni wabagcoba emini kubona abantu, wabagcoba wabenza izangoma phansi kwengubo emhlophe ukuze amaNazaretha avume, acabange ukuthi kukhona izangoma okuthiwa lesi sabusiswa, ungazi ukuthi sasibusiswa ngubani. Ngithike bantwana baseKuphakameni sifanele ukumbonga uNkulunkulu, sifanele ukubonga ukukhishwa kwethu emakhamandela. Namuhla abantu banezimoto bonke nabangakaze babe nalo ngisho ibhayisekili, ngoba babeqolwa ilemimoya okuthiwa obabamkhulu. Wawuthi uma ungena ufice indlu enomgibe, kube nekhethini elingaka, kube khona inansuka, kube khona umuntu ozifihlayo ngenansuka kuthiwa kuzokhuluma ubabamkhulu wakho.
34.Ulaleleke sekukhuluma lobabamkhulu ongamuboni kodwa mawuthi uyalibuza igama lakhe nixabane, uma uthi uyena babamkhulu ongubani, owakuyiphi indlu, sithi isangoma angeke usinde uma unochuku, iphele kanjalo indaba yakho. Uhambe uyokwenza lokho ulahlekelwe ilokho okuncane obukhala ngakho uthi kuncane uphucwe nakho, lomoya ukushiye udindilizile osizini. Khathi uwufaka kwathiwa uzothola yonke into izinhlanhla zakho zimi lapho. Sathi uma sibuzwa lapha ezwini loMzansi, kukhona umuntu owayengibuza, uma kukhuluma nathi, kungenzeka kanjani ukuthi umuntu ongubabamkhulu wakho esemile laphana, efuna ukugezwa efuna ukwembeswa umngenise, kushiwo kahle ukuthi izinto zakho zizokhanya, kwabe uyasho izinto ozibonile. Kungenzeka kanjani ukuthi ungamumekeli?
35.Ngamutshela ngathi uboke ulalele abantu abamukela labantu, wena ubabamkhulu wakho wakho esaphila wake wayicela yini into wase ekunikeza enye into, wakunikeza into ezokuzwisa ubuhlungu esaphila, khona engenakho, wayengalanduli kahle ukuthi anginakho mtanami ngizothi ngingaba nakho ngikunike, wayekunikeza ukuhlupheka? Cha wayengakuniki! Pho manje kuqhamukaphi lokhu ukuthi manje uzothi uma upheka ukudla, ulahlekelwe umsebenzi wenzela umuntu othi ufuna izibusiso?
36.Ngakusho khona lapha emsakazweni, ngakusho ngathi bonke laba abahlupheka namuhla bayaziklwebha, bangenisa ikhehla abangalazi abalibiza ngobabamkhulu wabo, langena nentululwane yokuhlupheka, balembesa bengcono bona, kwathiwa liyagodola, balembesa, balembesa kwagodola bona! Uthenge ibhulukwe libhoboke kusasa, ngoba wathatha ukuhlupheka kwendoda yokuhamba eyayikade ingqandiwe, yanqandwa ezulwini, yaxoshwa yachithwa, kwathiwa phuma uphele lapha! Kodwa namhla njena sekuqhamuka umuntu kuthiwe mungenise ukuze akunike inhlanhla, uyithathaphi inhlanhla umuntu ofuna ukwembeswa yena? Yini kungashiwo ukuthi uphethe isaka le mali, yini kungashiwo lokho, uma umngenisa umakhela nomuzi uxosha wena, uphume undinde, lendlu le owamungenisa kuyo, ngoba ayisayindawo, uyoyishiya uhambe ulahlekelwe yikho konke okade unakho!
37.Ngekhehla ekwathiwa liyagodola kwasho isangoma safika sithwele idlokolo sithi sizokungenisela uyihlomkhulu, wangazibuza ukuthi lo yihlomkhulu angaze ayokhuluma kumkamuntu, ayokhuluma kumuntu wokuhamba, ongasiye ngisho udadewabo kayihlo, azokubiza abongelele athemeleze phakathi komuzi. Why ungaboni ukuthi ukulethela izilwane, mhlazane ethi thenga izinkukhu ezimbili emnyama nemhlophe, athi eyokucela inhlanhla lena emhlophe ebese ekushiyela emnyama. Wawuthi ukushiyela yiphi inhlanhla ngoba uthathe lena emhlophe ushiya lena emnyama, abazange babuze ukuthi uzakunika yiphi inhlanhla ngoba nabo abanayo, ufuna ukwembeswa yimi?
38.Bahlupheke banjani namhlanje, baqothukelwe ngisho amashiya, badlavuzekile, awazi nokuthi badlavuzwa yini, badlavuzwa ilezi zilwane abazibiza ngoyisemkhulu kungeyena ubabamkhulu wabo. Abaganiwe, bayaganwa akuganweki, bayakha akwakheki, kodwa bonke abantu emva kokuthi bathathe lelizwi, banemizi, abanye banemizi ngamibili, okungewona umuzi we bond, okungumuzi wabo. Ababengenawo ngisho amabhayisikili namhlanje banezimoto ngambili ngantathu, ngoba balalela, naye uJehova ushilo laphana ukuthi uyomenzela into enhle umuntu oyolalela ebese enza! Balalela abantu bashiya konke beza lapha bazokhonza uNkulunkulu. Akuzange kwagcina lapho ngoba uJehova esithanda, akugcinanga lapho. Kwathi bantwana baseKuphakameni sesibuthene, esebona ukuthi sibuthene, uJehova waphinda futhi wasithanda, wathi cha, kunesikhathi esizayo, kukhona ukufa okuzobulala abantu, wathi ingculaza ingcono. Wathi nikelani, nicele kuJehova ukuthi anibiyele. Sanikela isikhathi singakafiki, singasazi nokuthi siyini lesi sifo, wathi asikakabizwa nangegama.
39.Akuzange kuphele isikhathi esingakanani kwafika i-corona, bawa abantu ngapha nangapha, baphela abantu, nalapho ebandleni lamaNazaretha kwezinye izinhlangothi, baphela abantu kwawa abafundisi, kwawa abashumayeli kwawa abakhokheli bafa abantu. Saphinde sanikela kwathiwa bophani imichilo yamasaka, nizile nizilele lokhu kufa. Ngempela uJehova wasifukamela, akuzange kufe ngisho oyedwa, ngisho abadala ngisho abancane, akuzange kufe muntu ngoba sihamba phansi kwezwi, kunomuntu obekwe phambi kwethu ovela ezulwini, isithunywa sezulu, sifika sisitshele ukuthi vikani lento ingakafiki, isitshele futhi ukuthi siyivike kanjani.
40.Namhlanjena iSabatha lapho okuzomangalelwa khona abathakathi. Ithi-ke ingelosi ‘baningi kakhulu abantu asebeloyiwe. Intoke manje esekuloyelwa yona, kuloyelwa ukuthi ngoba lento eyashiwo ayibange isenzeka, babethena lelibandla alize laya phambili ngoba into nje kaMpanza nomkakhe, izophela. Alaze laphela, siyaphila, asihalalisi ngalaba abafa, kodwa sihalalisa kuNkulunkulu ukuthi uNkulunkulu wasithanda siyizandlana, wathutha ezigidini ngezigidi wazohlala nathi siyibandlanyana nje sibancane. Noma bengaba izigidi ezingakanani, akukho esikuhawukelayo ngoba thina siyaphila, simelwe, simelwe lapha emhlabeni, simelwe ezulwini. Uma sifuna into siyayicela sonke sikhale kanye nathi sithi sicela ukuthi nokuthi nokuthi, uNkulunkulu akufeze, kwenzeke lokho, esikhombisa ukuthi sisengabantwana bakhe.
41.Ngoba uShembe wayezovuselela umthetho kaMose, okuthe manje uma sebehambile laba abagcotshwa uNkulunkulu kwase kuwa intululwana lapha yezangoma, zayichitha indaba kaNkulunkulu. Basethuka baze bakhathala, becabanga ukuthi ngoba bethi nibathathu, bacabanga ukuthi sizothi abasihlephulele ezinye izangoma zize ngapha. Asizange size sisho, asikaze sike sicele ukuthi abasibolekele izangoma ezilishumi okuzokwenza engathi sibaningi, sathi kulungile. Bayizigidi, kodwa bayizigidi ngezangoma, uMprofethi amemezela ebandleni lakhe wakubhala phansi ukuthi isangoma singavunyelwa ukungena kulelibandla.
42.Uma ngabe singena ngenkani, wathi uBaba akuthathwe amagugu kaJehova baphume abantu basishiye ethempelini. Kodwa namhlanjena azange athathwe amagugu kunalokho kwathathwa imnikelo wezangoma, bahamba ngezimoto, bashaya ngezimoto ezinzima ezithengwe ngeminikelo yezangoma, ngeminikelo eqhamuka kubantu ababizwa ngongqingili, abangadingeki ebandleni likaNkulunkulu. Kodwa ngoba ibandla selaphendulwa laba ibhizinisi, kuthiwa wozani, kuthiwa wozani, kuqanjwe namanga, kuthiwa lapha uyasukuma noma ngabe uyisishosha, kodwa izishosha zingakanani eduzane kwalapha, akukaze kusukume ngisho esisodwa. Kodwa lezi ezisukumayo zithi uma sezisukumile bese ziyabaleka ngoba ziyazi ukuthi kuzofika izintatheli zizobuza ukuthi ubuhamba muphi udokotela kusiphi isibhedlela.
43.Ngeke lapha siye eMozambique siyofuna abantu abahluphekile esizobabeka kulesisihlalo esithi bebengakwazi ukuhamba, kodwa singamkhombi udokotela okade enaka lomuntu, singamkhombi udokotela owabhala ukuthi kufuneka athole lesi sihlalo. Ngithi-ke bangcwele uthi uBaba iLanga ‘jabula wena ongaboniyo umhlaba nengcebo yawo.’ Esihlokweni sami ngithi kuso, engikhulume ngokutshalileyo, ngikhuluma ngomuntu, ngithi umuntu akayazi into ayizele. UMfundisi uMlangeni wathi emenyelwe ukuzokhonza uJehova wayesefika ebona umhlaba nengcebo yawo, wayeseqala akha amaviyo, akhela uBabamkhulu. Lathula ibandla elalikhona ngaleso sikhathi.
44.Ngithi-ke bantwana baseKuphakameni uBaba uMelusi ungumuntu ongayishintshi into, ngingathi nje igama lakhe nguPhikelela, kwezenkolo kodwa! UwuPhkilelela kwezenkolo, uma ukhuluma ngezenkolo usuke umthintile, uma ukhuluma ngoJehova usuke umthintile! Ngithi-ke bantwana baseKuphakameni namanje noma siyibandla elincinyane elidelekile, kodwa asifuni ukuqola abantu ngamanga sithi kwenzeka lokhu nalokhu. Lokhu engikushoyo kuwumlando obhaliwe, futhi into ekhona. Ngeke silakhe ibandla ngamanga, futhi ngeke size siwavule amasango siwavulele izangoma sithi senzela ukuthi ibandla lizoba likhulu, ngoba ibandla alisiyona ibhizinisi. Ngeke sibamukele ongqingili abazovula amaziko la kuze balande abantu. Noma engazifihla, kodwa ithi ingelosi ngaso sonke isikhathi nibohlala kuthi njalo ngamaSabatha noma ngaphambi kokuba inyanga iphele bese niyanikela nithi Nkulunkulu sicela ukuthi usinqobele ingelosi yobungoma, usinqobele ingelosi yongqingili! Noma sebebufumbethe singabuboni ubungoma, sebefihle yonke into, bathi bazofika baqale baziphembele abantu ngoba bakhona abantu othi unabo lapha uthi bayakholwa kanti abakholwa kwezinye izinto.
45.Sifika lapha isangoma singakazivezi, siqale ngokuthi sibheka abantu abangazwani, bese siyongena kulona omunye sithi hhayi mina ngingakusiza ngaloya muntu. Beseke lo muntu uba umngani wasoke, anisiboni ukuthi yiso, uma esesizakele ngalokhu ayekufuna ukuthi kuvelele lowa muntu ebese etshela abanye, ebese zikhula kanjaloke izangoma. Ngithike bangcwele lapha kulelibandla, noma ngabe kuthiwa asisekho, isangoma ngeke sikhule, ngithi noma ngabe inyanga isiyindoda, ngeke sigxwegule, siyokufa sishaywe uJehova njengoba ashaya uSawula eyiNkosi, emshayela ukuthi uye esangomeni. Lowo Jehova kusenguye lona esimkhonzayo loyo owashaya uSawula wambulalela ukuthi uyeleni ukuyobuza esangomeni. Ngithike bantwana baseKuphakameni ayadingeka amaqhawe, azidingeki izithingithingi endaweni kaNkulunkulu.
46.Ngoba lento kaNkulunkulu iyifa okufanele ukuthi ululwele, ulifele ukuthi lihlale likhona, inkolo iyalwelwa kodwa uma nje kuyinkolo ebuswa umthetho kaJehova. Namuhla bamangalelene amaphepha asenkantolo athi kubangwa amafa, akushiwo ukuthi babanga ukuthi omunye wabo akahambisi ngendlela kaNkulunkulu. Kodwa kubangwa amafa, amafa abo ngobani, ilezi zigidi! Ngithike bantwana baseKuphakameni ithe ingelosi uma seyifika lapha, ifuna ukukhanyisela umhlaba wonke ukuthi uJehova ubuyile uhleli kithi, yathi lelibandla kuyoze kubhubhe umhlaba, akukho muntu oyoba umholi nendodana yakhe noma nomfowabo ukuze kubonakale ukuthi lento ngekaNkulunkulu! Vuna lapho utshale khona.
47.Namhlanje kusuka nje umuntu ongenandaba noNkulunkulu ongazi nokuthi ukuphi noma esesontweni, kodwa amehlo akhe anwebeke, abone ukuthi ohleli esihlalweni akahambisi kahle uyena ongahambisa kahle.
Vuna lapho utshale khona ukuze uthole lokho okunivuniweyo. UBaba uMelusi ukuba lelibandla kade ewheba, ngabe uthe uma efika laphana wakhipha abashumayeli ukuthi bamemezele ukuthi abafuna ukunikela abeze bazonikela, asizange sihambe ngisho nanembenge, sazihambela nje. Ngoba into enkulu kithi, ukuthi abantu bazi uNkulunkulu.
48.Ngithi-ke bantwana baseKuphakameni, njengoba ngikhuluma ngalencwadi, evikini eliphelile, sizwe indaba lapho lowo muntu owayehambela leyo nkosi, Kwathi lona owatholakala yena ethi lelithalente owanginika lona, ngaligcina ngoba ngiyazi wena uyinkosi enomhawu, angazi noma wakubeka kanjalo. Wathi wena uvuna lapho ungatshalanga khona, yathi inkosi wawungayifaki ngani imali yami e-Bank yande ngoba wawungazi ukuthi ngiwumuntu onjalo, ofuna izinto lapho anganalutho khona. Wathi mbambeni nimthathe nimuse lapho ekukhalwa khona ekugedlwa amazinyo.
49.Wathi baphi laba ababethi abafuni ukuphathwa yimi, abangafuni angeke babuswe yimi. Yathi baletheni lapha babulawe phambi kwami. Yaqeda lapha yakhuphuka, yakhuphukela eJerusalema. Ngithi uma ungake ubuze ukuthi ziphi izimfanelo, bonke abanazo izimfanelo zikaThixo, angeke akutshele umuntu ukuthi yena wathi uma ebekwa uNkulunkulu wamunika muphi umyalo. Kodwa uBaba uMelusi wanikezwa umgomo, watshelwa futhi ukuthi uma ngabe uhambe kahle uyotholani.
50.Le ngelosi bantwana baseKuphakameni yasibuyisela kuJehova ngokuthunywa uShembe, yasenza sabuyela ebuhleni esasinabo. Yenza ukuthi bonke abantu bakaNkulunkulu babuyele babe bahle njengomholi wethu uBabamkhulu uMprofethi u-Isaya Shembe, (ukuthola kube kuye.) Noma umbona ezithombeli wayegqoka amasudu asemandulo, kodwa uyambona ukuthi wayemuhle kanjani ekamile. Baphuma abantu, baphuma abanumzane bethu aphuma amadodana ethu, akama asuleka aba mahle ngoba abasaphakeli izilwane. Akagcinanga lapho wabuye wakhuluma ngokuganwa nangokugana, wathi kulelibandla abangahlali abantu behleli ndawonye bengahlanganiswa.
51.Wawuqeda umshado owawuvimbela abantu ukuthi baganwe, ukuthi abantu balotsholiswe kakhulu bakhishelwe izibizo. Kodwa futhi uma sebehlanganiswa esontweni kuthiwe cha, akukapheleli lapha, kusafuneka kuyiwe, kulandwe iphoyisa le nkosi yesizwe lizobuza abantu asebehlanganiswe ukuthi bayathandana yini, ababhale kulo, kulo leliphoyisa ukuthi bayathandana, kodwa behlanganisiwe ngomthetho kaNkulunkulu! Saba ibandla lokuqala elibuyele emthethweni owawukade ushawe uMprofethi, bonke abantu abashada ngezikhathi zabo, abakaze bake bahambe bayokwaba, kuba ukuhlanganisa esontweni kube ukuthi umuntu uphelele. Kulapha bantwana baseKuphakameni okwaqala khona, kwaqala lapha ukuthi kube namantombazane lawa athola abantwana esemzini oyise. Kodwa yathi ingelosi abacele intethelelo, babuye endlini yesonto, uma sebesendlini yesonto abangene emgidini bangene nasesidlweni ngoba uma bengaphakathi ethempelini bahlambulukile ngoba umuntu ongahlambulikile akangeni ethempelini.
52.Ngithike bantwana baseKuphakameni, le ngelosi bantwana baseKuphakameni yabakhipha abantu baganwa abantu baba nemizi. Yazibhidliza izindonga zaseJerico ezazivimbela abantu ukuthi bangakwazi ukungena esidlweni, bangakwazi ukungena emgdini, bevinjelwe ukuthi kusafuneka bayodlula kubantu abadala. Nanamuhla bantwana baseKuphakameni uma ngase ubuke abantu abahlanganiswe lapha, ngibuka ngisho abakithi abasahamba ngaleyondlela, abasala lapha. Yonke into uma beyenza bayenzela abantu abadala, kodwa bayenza ethempelini, bakhonza abantu abadala endaweni yokukhonzela uNkulunkulu.
53.Ungababona ukuthi banjani, abanye bagana kwathiwa abasine, basinele o-Anti babo abahamba bengasinanga, abahamba bengazange bahlanganiswe abangazange babe omakoti. Kulandwa nje umuntu kuthiwa akulandwe uzibanibani ngoba uyena olayidi, azomela u-anti wakhe lona owayehlukene nalona ukuthi sebeya hlanganiswa, asazi bahlanganiswa ngobani ngoba bahamba befumbathelene amaqiniso bahlukana phambi komhlaba hhayi ukuthi wabe esefa ngalelonga. Kodwa kuqhamuka izangoma ezengubo emhlophe, zizothi izinto zakho azilungi zivinjwe ilokhu, ngesikhathi kungakenzeki lokhu zazivinjwe yini? Ngithike bangcwele omunye wahamba wayosina, indoda yakhe imthanda, inezitolo wahamba wayomela umuntu owaliwa. Wathi esina, wasina wasina, laphela iviki esaliwe naye, indoda isimqhubile yayomlahla kubo. Ukwaliwa kwakhuphuka kwaze kwayofika ekhanda, waliwa, indoda yamchitha kwayo. Sekukhuphuke lokhuya kwaliwa okwakukade kukuloya.
54.Ungamela umuntu owaliwe wena uhleli nomnumzane ekushadile ekuthanda? Wamuxosha! Ngithike bantwana baseKuphakameni lapha akekho umuntu ohlanganisela umuntu ongasekho. Lapha akekho umuntu oyosebenzisa ubuqili, oyofika noSathane ebandleni agcobe izangoma, zithi ukhona umfowenu owahamba emhlabeni, sikhona isisu esachitheka manje uyakhala ufuna umganele. Ngeke beze lapha ngoba lawo manga awamukelekile, bangena laphana ngoba laphayana kukwathela wayeka.
Bayazi ukuthi kuyoshona ilanga beganwe isiqhoqho samakhosikazi, kukhona nje okuthiwa uthathele umfowabo, nalomfowabo uma ungambuza ukuthi igama lakhe ngubani akamazi naye!
55.Akwenziwake lapha lokho, ngoba ibandla likaNkulunkulu, liphethwe uNKulunkulu owadala izulu nomhlaba! Ngisho lokhoke bangcwele! Ithike ingelosi akusenakwenzeka kodwa ukuthi kufe o-Abela, sekuzakufa abo Khayini, laba abathi uma bebuka ibandla babuke ibandla lingumcebo. Ngithike bantwana baseKuphakameni, indodana enhle ehamba ezinyathelweni zikaYise, ithande uJehova ifunde umthetho kaNkulunkulu, iwufundele ukuyongena ezulwini, hhayi ukuthi iwufundele ukuthi izoba umholi, ngoba into yasezulwini ayihambi kanjalo.
56.UNkulunkulu uyazikhethela yena akafuni ukukhethelwa ngabantu. Ngithike bantwana baseKuphakameni uNkulunkulu akasenze ukuthi sizazi ukuthi sizofunani lapha. Ngisazoqhubeka nendaba kavuna lapho otshale khona. Ngiyoze ngifike emaphethelweni ngo Jehova osangigcinile. Ngithike nina beNkosi okwase zulwini kude, akupheli ngaleso sikhathi. Baze bahamba abantu emhlabeni bekukhuluma bekushiya bathemba ukuthi kuzophela akuphelanga. Namike bantwana baseKuphakameni njengomuntu obenikezwe ithuba umholi webandla ukuthi angedlulise amazwi kubantu nakimi uqobo lwami, sekufike lapho engithi khumu nina beNkosi.