Ekhasini 81 lencwadi ka-Advocate Mnyandu ethi IZINTSHUMAYELO ZENKOSI ILANGA. Nanka amazwi eNkosi iLanga:
“UbuNazaretha lobu uNkulunkulu akabenzelanga abantu, wazenzela yena. Into yakhe le, akusiyo into yabantu, akusiyo futhi into kaShembe, futhi akusiyo into yamadodana ami, noma yabafowethu; nabefundisi base Kuphakameni akusiyo into yabo, NGEKANKULUNKULU!” Amen!
Isihlabelelo 73.
1.Ngiyakholwa kuYise
Onamandla onke
KuMdali weZulu nomhlaba
NakuMoya ongcwele.
2.Nakuyo iRamente eyingcwele
Yama Nazaretha.
Nobudlelwane baba ngcwele
Base Nazaretha.
3.Idwala elihle
Lama Nazaretha
Owazikhethela lona uJehova
Ngokulithanda kwakhe.
4.Useze wahloba ngabo kathathu
Lobu buNazaretha
Phambi kwamaZulu onke
Unyaka umunye.
5.Ngigeze ngehisop
Yasezulwini
Ngikhanye ngokukhanya
Ebusweni bakho.
IBANDLA LAMA NAZARETHA LINONKULUNKULU OYEDWA.
1.Entshumayelo yomhla ka 18 November 2023, umholi waseBuhleni, uNyazi, lukhulume kabanzi lungihlasela ngezinto eziningi. Kodwa ngenxa yobude baleyo nkonzo yalo, angenke ngikusho konke elukushilo.
2.Ngaphambi kokuba uNyazi ngiluphendule ngqo kulenkulumo yalo, ngizochaza ngegunya enginalo lokukhulumela ibandla lamaNazaretha onke njengoba lasungulwa nguBabamkhulu.
3.Ngiyinzalo yobuNazaretha, umama was an adopted child kaBabamkhulu kusukela eneminyaka cishe engu 11.
4.UBabamkhulu wamthenga kwaDube ngezinkomo ezingu 18 ezazihamba ngamasondo umama.
5.Wakhuliswa nguBabamkhulu, ekwedluleni kwaBabamkhulu emhlabeni, wahlala kuBaba iLanga waze waphumela kwaShembe eseyogana kwaMpanza.
6.Ngakho-ke kwaShembe kusekhakomama, iNkosi iLanga neNkosi iNyangayezulu ngomalume, noma ngingakaze ngibabize kanjalo!
7.UThingo kwakungumfowethu, futhi engibiza kanjalo uma sisodwa! UNyazi indodana yami!
8.Ebandleni lamaNazaretha ngaba yinhlalisuthi, ngaba ngumshumayeli, ngagcina sengingumvangeli ngise bandleni laseBuhleni.
9.Ngo 1992, ngiyimantshi eMadadeni, iNkosi iNyangeyezulu, okungumkhulu woNyazi, yathumela abavangeli abane ukuba beyongibiza khona.
10.Sengifikile kuyo, yangibizela endlini yayo nginomnewethu umfundisi uMpanza, yabe isithi:
11.“Nginibizele ukuzonitshela ukuthi UKUWA NOKUVUKA KWEBANDLA LAMANAZARETHA UNKULUNKULU UYOKUBUZA KINI NOBABILI!” Amen! 12.Igunya lami lokulwela ubuNazaretha liqala lapho ke!
13.Ngo 2003, ingasekho emhlabeni iNyangayezulu, sathi siseNhlangakazi nomnewethu, kwafika kithi umfundisi uKhumalo oshone eseBuhleni.
14.Wathi uthunywa iNkosi iLanga ukuba ezobuza kithi ukuthi SISAKHUMBULA YINI UKUTHI YATHINI INYANGAYEZULU KITHI.
15.Kulapho esaveza khona ukuthi yathi iNyangayezulu ukuwa nokuvuka kwalelibandla uNkulunkulu uyokubuza kithi sobabili!
16.Loludaba umfundisi uKhumalo waluhambisa kuThingo, lwaze lwafike nakwabanye abefundisi!
17.Lombuzo weNkosi iLanga wagcwalisa igunya lami lokuthi kumele ngikulwela ubuNazaretha njengenkolo ukuthi kungawiswa muntu!
18.Ngomhla ka 4 January 2010, sabona sekuguqe ingelosi phambi kwethu, yabe isithi:
19.“Ngithunywa kuwe uShembe uBaba iLanga, uthi angikutshele umakhele ibandla likaJehova.
20.Kulelibandla ufundise abantu ukuthi uJehova ukhonzwa kanjani; uthathele eBhayibheli nasezi hlabelelweni zamaNazaretha.
21.Ezintshumayelweni zoMprofethi, ubheke ukuthi uBabamkhulu wayewafundisani amaNazaretha ngokuthi uJehova kufanele akhonzwe kanjani.”
22.Yingelosi eyangikhipha eBuhleni mhla ka 30 September 2010, ithunywe iNkosi iLanga, ngangisengaphansi kweNkosi uThingo.
23.UThingo lwakwazi lokho, laze lathumela umvangeli uZwane ukuthi akatshele amaNazaretha engangihlukumezi ngoba ngithunywe yinkosi iLanga!
24.EBuhleni ngakhishelwa ukuba ngikwazi ukuvikela ubuNazaretha ngingasekho ngaphansi kwabaholi bakwaShembe!!
25.Lengelosi yahlala nathi kuze kube namuhla. Zonke izintshumayelo engiyaye ngizenze, ngisuke ngigqugquzelwe yiyo ukuthi angikhulume lokhu nalokhu, bese ngiyakukhuluma-ke!
26.Ngelinye ilanga ngabuza kulengelosi ukuthi kungani kukhethwe mina engingasiye owakwaShembe ukuba ngihole leli bandla lamaNazaretha? Ingelosi yangiphendula yathi:
27.“Mhla iNyangayezulu ithi ukuwa nokuvuka kobuNazaretha uNkulunkulu uyokubuza kuwe, awuzange wambuza ngani ukuthi kungani ukuwa nokuvuka kobuNazaretha kubuzwe kuwe, ngoba babekhona oNyathikazi noSolomuzi bakwaShembe, nabo ababehamba nenyangayewzulu?
28.Manje uNkulunkulu usezonqunyelwa nguwe ukuthi kulelibandla lakhe uliqhuba kanjani, ubani omgcobayo nongamgcobi? Ngathula ngoba kwakubukela lombuzo iwucasulile!
29.Yabe ingelosi isiqhubeka ithi: “Esikhathini esiphambini lelibandla lisaholwa nguBabamkhulu kwafika izithunywa zasezulwini, zase zimazisa uBabamkhulu ukuthi lelibandla likaJehova lohamba lihambe liphele, kodwa loqedwa yiyo inzalo kaBabamkhulu.
30.Zambuza lezi zithunywa uBabamkhulu ukuthi uyoyivimba kanjani lento ukuba ingenzeki, ngoba iyohamba ihambe yenzeke?
31.Waphendula uMprofethi wathi: “Ngicela uJehova angibusisele lentandane yami, ekhomba umama, ukuze kuthi lapho lomntwana eyogana khona, ezale umntwane okothi engasiye owakwa Shembe ngesibongo, kodwa abe noMoya kaShembe, ukuze avimbe ukuphela kwalelibandla likaJehova!
32.Ithi-ke ingelosi: “Emva kwaBaba uThingo lelibandla lizoba noShembe abaningi, nalowo nalowo ethi yimina umholi wamaNazaretha.
33.Leli bandla lamaNazaretha logcina liholwa ngumuntu ongakaze akholwe kwasekuzalweni kwakhe, kodwa uyolihola lelibandla ngokuthi ungowakwaShembe!
34.Ngenkathi umndeni wakwaShembe lelibandla usulibanga, usuliphendule laba yifa lomndeni, nguwe okhethwe ezulwini ukuba ulwele ukuthi lelibandla likaMenzi wezulu ulibuyisele lapho uMprofethi walishiya khona!
35.Kumele usifeze isicelo soMprofethi, nesaziso seNyangayezulu, ungavumi ukuba lelibandla likaJehova liqedwe ngamadodana akwaShembe!”Amen!
36.Mhla ka 26 March 2011 sabona sekufika ingelosi futhi ebusuku izosigcoba sinomkhokheli ukuba sihole lelibandla likaNkulunkulu, yabe isiliiqamba ithi IBANDLA LAMANAZARETHA KANKULUNKULU (Nazarites Church of God. NCG).
37.Ibandla labe linqume ukuthi lizongemukela mhla ka 3 April 2011, kodwa cishe ngolwesine mhla ka 24 March, ingelosi yafike yalushintsha lolo lusuku. Yabe isithi:
38. “Ngenke lulunge usuku lomhla ka 3 April, ngoba ngalolo lusuku kobe kunomcimbi ongemuhle ezulwini.”
39.Asaze sazi ukuthi isho ukuthini ngalokho, kodwa nempela salushintsha lolusuku lwaba mhla ka 27 March 2011.
40.Mhla ka 28 March, 2011, ngoMsombuluko, kwafika umbiko wokuthi uBaba uThingo akasekho emhlabeni.
41.Kungakapheli sikhathi kufike lombiko, yafika futhi leNgelosi, yabe isithi: “Seniyaqonda manje ukuthi bengithini uma ngithi ngomhla ka 3 April kuyobe kunomcimbi ongemuhle ezulwini?”
42.Yabe isiguqa ibheka phezulu kwasakuthandaza, isithi: “Ngiyabonga Nkosi ukuthi umsebenzi ongithume wona ufezeke kahle!
43.Mina sengiwuqedile owakho umsebenzi, abasemhlabeni sebengenza okwabo kwasemhlabeni!” Amen!
44.Ngenkathi uNyazi luqala ukubanga ubuholi noMsebe, babebanga ubuholi bakubo kwaShembe, kodwa mina ngagcotshwa ngabasezulwini ukuhola lelibandla mhla ka 26 March, uThingo luzohamba emhlabeni mhla ka 28 March 2011.
45.Ngakho-ke noma amaNazaretha engabalandeli bamadodana akwaShembe ngokwalapha emhlabeni,, kodwa mina ngiyazi ukuthi ezulwini yimina engigcotshwe ukuhola lonke ibandla lamaNazaretha!
46.Yikho-ke ngingasoze ngathula uma kuqhamuka noma ubani efaka lelibandla ehlathini, ngoba mina ngiyazi ukuthi lelibandla akusilo elakwaShembe, futhi akusilo elamadodana kaShembe, kodwa ngelikaJehova uNkulunkulu wethu!
47.Lokho akushiwo yimi, kodwa kwashiwo nguye uShembe! Ekhasini 81 lencwadi ka-Advocate Mnyandu ethi IZINTSHUMAYELO ZENKOSI ILANGA. Nanka amazwi eNkosi iLanga:
48.“UbuNazaretha lobu uNkulunkulu akabenzelanga abantu, wazenzela yena. Into yakhe le, akusiyo into yabantu, akusiyo futhi into kaShembe, futhi akusiyo into yamadodana ami, noma yabafowethu; nabefundisi base Kuphakameni akusiyo into yabo, NGEKANKULUNKULU!” Amen!
49.Ngakho-ke amaNazaretha nomndeni wakwaShembe kumele bakuqonde ukuthi ibandla lamaNazaretha ngelikaJehova, noShembe usho njalo kulesi sihlabelelo ekade sisihlabelela!
50.Ngakho-ke nginegunya ngokwase zulwini ukuthi ngibheke noma ngubani ohlubula abantu kuNkulunkulu ekuleli bandla, ngaphandle uma esephumile kuleli bandla njengomprofethi uXaba!
51.ElakwaShembe ibandla liholwa umndeni wakwaShembe, kodwa leli likaJehova elavuselelwa nguBabamkhulu, njengamanje linikwe mina ukuba ngileluse!
52.Ingelosi-ke uma izwa uNyazi luthi lunguNkulunkulu, ithukuthele kakhulu, ebese ithi angingenelele ngiyiqondise lento, ngoba iNyangayezulu lelibandla yalishiya kimi, yathi UKUWA NOKUVUKA KWALELI BANDLA UNKULUNKULU UYOKUBUZA KUWE!
53. Ngakho-ke mina ngokwasezulwini nginegunya lokuhola ibandla likaJehova elibizwa ngokuthi ibandla lamaNazaretha, njengoba lasungulwa nguBabamkhulu!
54.Ukuthi umuntu uyakukholwa noma akakukholwa lokho, akundaba yami leyo, kodwa indaba yakhe nongithumile!
55.Kwehla ingelosi ezulwini yazongigcoba ukuhola ibandla lamaNazaretha, angazi-ke elakwaShembe!
56.Akufihlekile ukuthi kunamaNazaretha amaningi ayaye alwe nami, bethi angingayikhulumi indaba yoNyazi, angibhekane nebandla lami.
57.Kodwa konke lokhu kukhuluma kusukela ekungazini, ngoba ngibheke lonke ibandla likaJehova!
58.Angikwazi ukungayikhulumi indaba yoNyazi uma lusathi lingumNazaretha, ngoba okwamanje kubhekwe mina ukuba ngibuvikele ubuNazaretha njengenkolo!
59.Lelogunya ngalinikwa ezulwini, angidingi ukulicela kumuntu wasemhlabeni!
60.KuMathewu 5:11-12 uYeshua uthi: “Nibusisiwe nxa benithuka, benizingela, bekhuluma konke okubi ngani, beqamba amanga ngenxa yami.
61.Jabulani nithokoze ngokuba umvuzo wenu mkhulu ezulwini, ngokuba babazingela kanjalo abaprofethi abanendulelayo!” Amen!
62.Nempela-ke, akekho umuntu owake wathunywa nguNkulunkulu awaze waba yisitha kubantu asebemhlubukile uNkulunkulu, nasemandulo kwakunjalo!
63.Ngelinye ilanga ingelosi ingeluleka ukuba ngime isibindi noma amaNazaretha engithuka, yangifundela incwadi kaHezekeli 2:3-8, lapho uJehova ethi:
64.“Ndodana yomuntu, ngiyakuthuma kubantu bakwa-Israel, ezizweni zamambuka, ezihlubukile kimi, zona nokhokho bazo zonile kimi kuze kube namuhla.
65.Bangabantu abanenkani, nenhliziyo elukhuni, ngiyakuthuma kubo, uyakuthi kubo: “Isho kanje iNkosi uJehova, ithi:
66.“Noma ngabe bayalalela noma abalaleli, ngokuba bayindlu ehlubukayo, nokho bayokwazi ukuthi bekukhona uMprofethi phakathi kwabo.
67.Wena ndodana yomuntu ungabesabi, ungawesabi namazwi abo, noma ngabe afana namakhakhasi nameva kuwe, uhleli nofezela, ungawesabi amazwi abo, ungapheli amandla ngenxa yobuso babo, ngokuba bayindlu ehlubukayo!
68.Uyakukhuluma amazwi ami kubo, noma bayalalela, noma bawashaya indiva, ngokuba bangabahlubuki!”
69.Yabuye ingelosi yangifundela incwadi kaHezekeli 3:17-19 lapho uNkulunkulu ethi: 70.“Ndodana yomuntu, ngikuqoke ukuba ngumlindi kuyo indlu yakwa-Israel, ngakho-ke uyakuzwa izwi eliphuma emlonyeni wami, ungixwayisele bona.
71.Uma ngithi komubi, uyakufa nokufa, bese ungamxwayisi, ungakhulumi umxwayise omubi endleni yakhe embi, ukuba omubi umsindise, uyakufa ngenxa yezono zakhe, kodwa igazi lakhe ngolibiza esandleni sakho.
72.Kepha wena uma umxwayisa omubi, kodwa akaze abuyeka ububi bakhe, nendlela yakhe embi, uyakufa ngenxa yesono sakhe, kodwa wena uwusindisile umphefumulo wakho!”
73.Njengamanje uJehova uqoke mina ngeNkosi iLanga ukuba ngilwele ukungawi kwalelibandla likaMenzi wezulu nomhlaba.
74.Ngakho-ke akekho ongangivimba ukuba ngikuqondise okonakala phambi kwami.
75.Sengibuyela kulemfundiso yoNyazi yokuthi luthi lunguNkulunkulu!
76,Ku-Eksodusi 20:2-3 uJehova uthi: “NginguJehova uNkulunkulu wakho owakukhipha eGibhithe indlu yobugqila. Ungabi nabanye onkulunkulu ngaphandle kwami.”
77.Kanti ku -Isaya 43:10- 11 uJehova uthi: “Ningofakazi bami, nenceku yami engiyikhethile ukuba nazi, ningethembe, niqonde ukuthi ngiNguye; ngaphambi kwami akwenziwanga uNkulunkulu, nangasemuva kwami akayikuba khona. Mina, mina nginguJehova, ngaphandle kwami akakho uMsindisi!” Amen!
78.Okufanele uNyazi lukwazi ukuthi alusiye uNkulunkulu, alusiye noMprofethi. Ngaphandle kwalokho, kungukuhlubuka ebandleni likaJehova ukuzibiza ngoNkulunkulu!
79.Yikho kusemthethweni wokuqala ukuthi singabi nabanye onkulunkulu ngaphandle kwaJehova!
80.Ungakusho ukuthi ungunkulunkulu uma usenkolweni ezimele njenge Bhudaism neHindusm, kodwa hhayi ebandleni likaJehova! Lelibandla alizimele, ngelikaJehova!
81.NoYeshua akaze asho ukuthi unguNkulunkulu! KuJohane 12:49-50 uYeshua uthi: “Ngokuba angikhulumanga ngokwami, kodwa uBaba ongithumileyo, nguye onginike umyalo wokuthi ngithini, futhi ngikhulumeni.
82.Ngiyazi ukuthi umyalo wakhe ungukuphila okuphakade. Ngakho-ke lokhu engikukhulumayo ngikukhuluma njengalokhu uBaba engitshela khona.” Amen!
83.Kodwa lapha ngizogxila ezimfundisweni zikaBabamkhulu, ngoba uNyazi luthi kwasho uBabamkhulu ukuthi uShembe nguNkulunkulu.!
84.Kuso sonke isihlabelelo samaNazaretha uBabamkhulu wayekhuluma ngoJehova, yena ezibiza ngenceku kaJehova!
85.Kusihlabelelo 134 nanka amazwi aso:
INkosi ikubusise weNceku yeNkosi
Ulihambise wenceku yeNkosi.
Nazo izizwe zililindele
Zonke eziphansi kwezulu.
INkosi ikubusise weNceku yeNkosi
Ikwandisele imihla phansi kwezulu.
Zililindele zonke lezo zizwe
Zonke eziphansi kwezulu.
INkosi ikubusise wenceku yeNkosi
Uhambise izwi lakhe weNceku yeNkosi
Lezi zizwe zililindele
Zonke eziphansi kwezulu.
UJehova akwakhe nceku yeNkosi
Uhambise izwi lakhe nceku yeNkosi
Lezi zizwe zililindele
Zonke eziphansi kwezulu.
INkosi ikubusise Nceku yeNkosi
Usesule izinyembezi ngegama leNkosi
Zonke lezi zinyembezi zilindele wena
Zonke lezi eziphansi kwezulu.”
Amen!
86.Angazi-ke ngokoNyazi ukuthi leNkosi okukhulunywa ngayo kulesi sihlabelelo ngubani, nokuthi inceku yeNkosi ngubani?
87.Ngaso sonke isikhathi uma uNyazi lufakazisa ukuthi linguNkulunkulu, luyaye lucaphuna uvesi 50 woMthandazo wesabatha lapho kuthi khona:
88.“Noma niphuma emazweni onke aphansi kwezulu, nilethe iminikelo yenu kuJehova emzini waseKuphakameni, akayi kuyamukela uma ningalaleli ukugcina usuku lwesabatha.”
89.Okwethusayo ukuthi uNyazi luthi lungunkulunkulu ngoba kwasho uShembe kuvesi 50 womthandazo weSabatha, kodwa alwazi ukuthi lelivesi uBabamkhulu walicaphuna eBhayibhelini kuJeremiya 17:21-27.
90.Kuvesi 21 kuthi: “Usho kanje uJehova, uthi: “Xwayani ngenxa yemiphefumulo yenu, ukuba ningathwali umthwalo ngosuku lwe sabatha, ningawu ngenisi emasangweni aseJerusalema.”
91.Kusukela kuvesi 22 kuya kuvesi 27 uMprofethi uJeremiya ukusho konke uShembe okubhale kuvesi 50 woMthandazo weSabatha, kodwa uNyazi alukwazi lokho, lufundisa abantu into engekho!
92.Selugaxekisa uBabamkhulu, lithi kwasho uBabamkhulu ukuthi nguye owathi unguNkulunkulu, kuyilo olulwela ukuthi linguNkulunkulu, kodwa kuyilo futhi olususa amaNazaretha emthethweni kaNkulunkulu!
94.Nakhu ubufakazi balokho: Entshumayelweni ka 1927 NgoJuly eKuphakameni, uShembe wakhuluma lamazwi ngokuhlabela amadlozi:
95.“Nizwile emthethweni wayizolo ukuthi anisekuwakhonza amadlozi, nomthetho othi anisahlangani nabafowethu abenza okunjalo; ngoba abenza okunjalo bayanengeka kuJehova.”
96.Ngaso leso sikhathi babuza oNkwanyana noMzelemu, bathi: “Nceku yeNkosi, angenke sisabahlabela okhokho bethu na?”
97.Waphendula uMprofethi wathi: “CHA BANTWANA BAKANHLIZIYO, OKWENU KUHLE UKUBA NIBAKHUMBULE ELATINI ELIKHULU, EMZINI KAJEHOVA EKUPHAKAMENI, KUNOKUBA NENZE NJENGA LABO ABANGENAYE UTHIXO.”
98.Kodwa namuhla ama Nazaretha asewa hlabela udede amadlozi, abanye bawenzela utshwala ngisho ngeSabatha!
99.Lomthetho wokuthi singawahlabeli amadlozi, esawunikwa nguMprofethi, naye ewuthathe eBhayibhelini, ngaphansi koNyazi amaNazaretha asewugxoba gxoba ngezinyawo!
100.Entshumayelweni yango 1925, nanka amazwi oMprofethi ngokuzihlanganisa nezangoma:
101.“Bantabami uma nike nangenisa iSangoma, naba nemimoya engcolileyo kulobu buNazaretha, nibokwazi ukuthi kusukela ngalelo langa lobu buNazaretha sebufile, abusekho!
102.Ngokuba isitha sokuqala sika Nkulunkulu yiSangoma. Ngokuba kuye kuthi nxa uJehova eshaya umthetho ngomlomo woMprofethi, bese noSathane ashaye umthetho ophambene noka Jehova ngomlomo weZangoma neyabo bonke abakhothama emimoyeni enqatshiwe ngu Jehova!
103.Ayikho ingozi enkulu engase inehlele ukwedlula ingozi yokuba nivumele iSangoma singene phakathi kwenu.
104.Uma nike nasingenisa bantabami niyobe nibubulele ubuNazaretha, niyobe nimxoshile uNkulunkulu phakathi kwenu.” Amen!
105.Kodwa namuhla ngisho abagcotshwa ebandleni lama Nazaretha eBuhleni sebeyi zangoma.
106.UmNazaretha usethwasiswa uGobela ongumNazaretha ephehlweni, emva kokuthwasa, eyokhishwa libandla lamaNazaretha ngomgidi kaJehova!
107.UNyazi luhlala nezangoma emzini kaNkulunkulu, zinikela kulo, ezinye zingabefundisi, ziyabhabhadisa!
108.Lapha ngiveza izintshumayelo zoMprofethi, okumele siziqhathanise nalezi zinto esezenziwa uNyazi namaNazaretha aseBuhleni.
109.Okokuqala uMprofethi uthi: “Kuza isikhathi lapho abantu baseKuphakameni bayoyilahla khona indlela kaShembe.
110.Lapho bayobe sebenza imicabango yabo kunezwi esibayala ngalo thina boShembe.
111.Ngaleyo nkathi bayobe bengasali khathalele izwe laphakade, bayobe sebethembe amazulu amaningi, nangekho!
112.Ngalezo zinsuku bayodebesela ukugcina umthetho kaJehova, LO OKUTHIWE ANGIWUVUSELELE!
113.Bayowu gxoba, bawuzibe, kuphase imithetho yabo nemithetho yezithixo zabo abayozibuyisa bazifake lapha.” Amen!
114.Lezo zinsuku sezifikile lapho amaNazaretha aholwa uNyazi sebeyilahlile indlela kaNkulunkulu, lapho asebezakhele uNyazi njengonkulunkulu wabo!
115.Uthi uBaba iLanga kwenye yezintshumaye zakhe: “KODWA NINA MANAZARETHA EYENU INKOSI AYIBONWA, NGUNKULUNKULU KUPHELA, AYIKHO ENYE.
116.NGAKHO NILIBAMBISISE LELO LIZWI, NOMA NINI, NOMA SINGASEKHO THINA EMHABENI, NIKHUMBULE UKUTHI UBUNAZARETHA LOBU, NALOMUZI WASEKUPHAKAMENI, AKUSIWO OWOMUNTU.”
117.Iyaqhubeka iNkosi iLanga ithi: “Akukho muntu ongavela onjengami nje anikhiphe endleleni kaSheme.
118.Uma ngithi onjengami, ngisho ngoba kuyaye kuthiwe ngingumholi wamaNazaretha, kepha angisiye, umholi wenu nguShembe kuphela!
119.UShembe lo owaphemba lobu buNazaretha wayengesiye umuntu, wayevela ezulwini, kodwa engaqali ukufika lapha emhlabeni.
120.Wayaye afike ayiphembe lento esibutheni ngayo, ayishiye, acabange ukuthi izosala ilunge.
121.Bese emva kwakhe kuvela abantu abanjengami nje, abaye bathi bangabaholi, kodwa bengenawo uMoya kaShembe, bese bayayi phambukisa lento ngobu thakathaka babo!” Amen!
122.Namuhla uNyazi luhlambalaza uJehova, selithi yilo uNkulunkulu! Kodwa uThingo, okunguyise woNyazi, wakuphika ukuthi uShembe nguNkulunkulu. Nanka amazwi oThingo:
123.“Yini lento eniyishoyo? Kunezinto la eziningi uShembe angazange anifundise zona, esenizenzela nje noma yini, bese nikuncikisa kuShembe kube ngathi uShembe owasho lento! Senithi uShembe uNkulunkulu manje?
124.Cha mina ngazi ukuthi uShembe akasiye uNkulunkulu, ngazi ukuthi uShembe inceku kaNkulunkulu, ngazi ukuthi uyisithunywa sikaNkulunkulu!
125.Lokhu kokuthi uShembe uNkulunkulu akusilo iqiniso, ngiyafisa niyiyeke lento, yikho sizondwa kangaka nje, sithukwa kabi kabi ngalento ngoba akusiyo, mina ngiyayazi ukuthi akusiyo!” Amen!
126.UNyazi-ke luthi lungunkulunkulu ngoba luzalwa ngunkulunkulu! Kusobala ukuthi alazi ukuthi uyise walwa kanjani namaNazaretha ewaphikisa ukuthi uShembe uNkulunkulu!
127.Ngezansi ngiveza izimfundiso zoMprofethi ngoJehova nenkolo yakhe, le uNyazi oseluthi ngiyakubo! Uthi uBabamkhulu:
128.“Ngesikhathi kuthiwa kunina landelani lokho uJehovah akuvezile, bathi: “CHA, silandela lokho esafica obaba bekulandela.”
129.Kuyilapho noYise babo babengaqondi lutho. Ningabi njengo khokho benu abazenza lukhuni izinhliziyo zabo kuyimanje sithwele izono zabo.
130.Kunjalo ukuphika ubukhona buka Thixo, uyojeza uthanda noma ungathandi, akukhalelwa muntu esigodini sosizi!
131.Nani bemindeni yabo akukho eniyobenzela khona uma sebedlulile emhlabeni, kuphela ngumlilo ubusuku nemini, aninandlela yokubakhulula ngaphandle kokubacelela intethelelo enkosini ngemi nikelo, nangemi thandazo!
132.Labo abafihla iqiniso elithize emthethweni kaJehovah ayiloba ngenceku yakhe uMose, noma bekushintshe, noma bekuzibe, labo badla umlilo uqobo, futhi uNkulunkulu akasoze akhulume lutho nabo ngosuku lokuvuswa kwelizayo.
133.Labo bangabathengisa ngeqiniso ekukholweni, bayoba ngabancinyane embusweni weZulu.” Amen!
134.UBabamkhulu usifundise ukuthi iBhayibheli liyisisekelo salenkolo, kodwa uNyazi luthi uma sifunda iBhayibheli sisuke sikhohlisa nje izivakashi!
135.Uyaqhubeka uMprofethi uthi:” UNkulunkulu uJehova uveze iqiniso eliphelele ngemithetho yakhe ebhalwe phansi, eBhayibhelini, wayifundisa nangaba profethi kanye naba Priest, ngakho labo abangavumelani nemithetho ka Mose, baya ekulahlweni!
136.Umthetho kaJehova uyisihlengo somphefumulo bantabami; hhayi noma imuphi umthetho, kuphela lo inceku yakhe eninika wona.
137.Uyindlela yokuhamba uya lapho kungekho khona ubumnyama nenzondo, nendlala namakhaza, kuphela inkazimulo engenaku fiphala.” Amen!
138.Akengicaphune intshumayelo yoNyazi yomhla ka 18 November 2023. UNyazi luthi: “Manje uma kungukuthi ngithatha lelibandla LAKITHI, BESE UNGIHLANGANISA NALABA, LELIBANDLA LIZIMELE, THINA KULELIBANDLA NGABE ASILIFUNDI IBHAYIBHELI, SENZELA ABANTU BABONE UKUTHI SISEKUPHI.
139.IBHAYIBHELI ASILAZI LABHALWA NGUBANI! UMA SIFUNDA IBHAYIBHELI SISUKE SENZELA ABASIVAKASHELE!” Amen!
140.Uma uthi ufunda lentshumayelo yoNyazi uvele uphelelwe amandla, ungaze waqonda ukuthi umuntu ongumholi webandla lika Nkulunkulu engayikhuluma kanjani into enje, eqambele uMprofethi kaJehova amanga ngalendlela?
141.Lelibandla akuseyilo elikaMenzi wezulu nomhlaba, njengoba kwasho uShembe, kodwa sekungelakubo koNyazi?
142.Luthi uNyazi lelibandla lizimele, okusho ukuthi alikho ngaphansi kwaJehova, liyefana nje nenkolo iBhudasm, noma iHinduism!
143.Lithi uNyazi: THINA KULELIBANDLA NGABE ASILIFUNDI IBHAYIBHELI, SENZELA ABANTU BABONE UKUTHI SISEKUPHI.
144.IBHAYIBHELI ASILAZI LABHALWA NGUBANI! UMA SIFUNDA IBHAYIBHELI SISUKE SENZELA ABASIVAKASHELE!” Amen!
145.Esinye isazi senkolo sathi akakho emhlabeni umuntu owayazi iBhayibheli njengoShembe. Nempela uBabamkhulu iBhayibheli wabe elicula njengama Moslems ecula iKoeran!
145.Kodwa uNyazi luthi iBhayibheli thina silifundela izivakashi, yinto esingakholelwa kuyo!
146.Njengoba uchaza uvesi 3 womthandazo wesabatha, isisekelo sobuNazaretha imithetho kaJehova owayiloba ngenceku yakhe uMose. Yonke inqubo yokukholwa kwalelibandla itholakala eBhayibhelini!
147.Kodwa namuhla uNyazi luthi lelibandla alihlangene neBhayibheli, ngoba asilazi ukuthi iBhayibheli labhalwa ngubani!
148.Luthi uma sifunda iBhayibheli sisuke sikhohlisa abantu, senzela ukuthi abantu bakholwe ukuthi nathi siyakholelwa eBhayibhelini!
149.Le inhlamba ebhekiswe kuBabamkhulu wuNyazi. Ngomlomo luthi alumphikisi uMprofethi, kodwa lenkulumo yoNyazi ayigcini ngokuphikisa uMprofethi, kodwa iyamhlambalaza!
150.UNyazi luthi uma uShembe efundisa ngomthetho kaJehova uyambuluza, wenzela ukuthi abantu bacabange ukuthi uyakholelwa eBhayibhelini!
151.Luyaqhubeka uNyazi luthi: “Uyazi thina bakwaShembe kungcono mhlawumbe okwethu, njengoba kade ngibala, kwaprofethwa ukuthi kofika isikhathi la okuyovela khona oShembe abaningi, nami ngingomunye walabo Shembe abaningi.
152.Kodwa kwase kuba khona impendulo ethi okuyena yena uyobonakala ngokulandelwa ngamakhosi.
153.(Amanga lawo, amakhosi aba khona kusukela kuBabamkhulu. Ngesikhathi seNkosi iLanga abe esengaphezulu kuka 20.) Asikho isiprofetho esinjalo!
154.Luthi-ke uNyazi: “Bayazi abalandeli balelibandla ukuthi kufa uShembe kuhlale uShembe, kanti uma sekuqhamuka esinye isibongo kusuke sekwenze njani? Angibazike laba asebeqhamuka aba offside ukuthi benzenjani.
155.Uma uqhamuka uba offside la, ungalwi nami, ngoba mina ngiwugeneral, ngiwu- original, ngingowangempela mina!” Amen!
156.UNyazi lusho mina-ke oyi-offside, kodwa ngibona sengathi belisho u-outsider, hhayi u-offside, ngoba angazi lo-offside ukuthi uchaza ukuthini kulenkulumo?
157.Manje-ke sengilwiselwa ukuvikela inkolo kaJehova ukuthi lezi zimpi zencithakalo eseziphakathi kwama Nazaretha zingaphumeleli ukuqeda ngayo!
158.Uma ngisola lesi senzo sokuhlubuka uJehova, luthi uNyazi namanye amaNazaretha nginomona, ngibona ngoba lilandelwa ngabantu abaningi, licebile!
159.Lesi senzo samaNazaretha sokuthi uNyazi ngunkulunkulu, bazama ukufihla ubuqili abakwenza ukuchitha ubuholi boMsebe!
160.Lesi senzo asehlukene nalesi esenziwa ngabantwana bakwa-Israel, lapho bavele bakha isithixo ngamacici egolide, base besiguqela, sebethi yiso esibakhiphe eGibhithe!
161.UNyazi aluzange lubekwe nguNkulunkulu ukuhola lelibandla, futhi alubekwanga nanguyise uThingo!
162.UNyazi lwagcotshwa ngamaNazaretha aseBuhleni ngobuqili obuyisimanga, bephuca uMsebe ngohheshe ubuholi owabe ebunikwe inkosi uThingo!
163.LamaNazaretha angenwa ngumoya omubi, balwela ukuthi ubuholi bebandla bungabuyeli endlini yeNkosi iLanga!
164.Mina ngikwazi konke okwenzeka ngisho uThingo lusaphila, ngoba yonke into yayedlula kimi njengomeluleki webandla kwezomthetho, kusukela kusekhona iNyangayezulu!
165.Ubufakazi bommeli uButhelezi enkantolo kwakuliqiniso lodwa. Ngathi uma uButhelezi ngimfakazela ukuthi ukhuluma iqiniso, amaNazaretha angithuka ashiya angalazi, ethi ngiyiphekula!
166.Manje kuyangijabhisa uma uNyazi seluzinweba phambi kwabantu luthi lwakhethwa ezulwini ukuhola lelibandla, kodwa lwazi kahle ukuthi ubuholi baleli bandla bephucwa uMsebe ngobuqili obuyisimangaliso!
167.Kodwa manje sekuyaqala ukuzisho ukuthi into etholwe ngobuqili igcina kanjani!
168.Ngithunywe ukuqondisa ibandla lamaNazaretha, hhayi lakwaShembe, ngakho-ke ngizokumela ukuba ubuNazaretha, njengenkolo kaMenzi wezulu nomhlaba, kuhlale kukulesi simo uMprofethi owakushiya kukuso!
169.Lokho ngizokumele ngisho ngabe kusho ukuthi angife! Kodwa ngenke ngiwuyeke umsebenzi kaNkulunkulu ucekelwa phansi impi kasathane!
INkosi ibusise enikuzwile!